Luka 15

A pɛ́rʋ na bɔr ɛ́ bɛ lɛb nyɛ̃ a zʋkpar

(Mat 18:12-14)

1A zuru-yar-dierbɛ nɩ a yel-bebe dem tɩ tawr'a tarɛ a Yeezu zie bɛ za, kɛ́ bɛ bɛr wõ a ʋ ƴɛ̀rʋ. 2A Faarizɩ̃ɛ mɩnɛ nɩ a Naaŋmɩn wulu sɛ-sɛbrbɛ tɩ zɛbr'a yere nɩ: «A nɩr ŋa a, ʋ nɔnɛ nɩ a yel-bebe dem ɛ́ lãw dɩrɛ nɩ bɛ!» 3Lɛ n'a a Yeezu tɩ lɔb zʋkpar ŋa kʋ̀ bɛ: 4«A nyɩ buor sob'ʋ na tɛr píir kʋba (100), a pɛr-been wa bɔr, ʋ bɛ tɩɛ a kʋba for bir al bɛr a wɛja pʋɔ, ɛ́ bɔ a ʋl na bɔr a, wa tɩ nyɛ̃ ʋ? 5Ʋʋ na wa nyɛ̃ ʋ a, ʋ ɓáw ʋ na va baw 6cɩlɛ kule nɩ, tɩ ta a yir bʋɔlɩ a ʋ bárɩ nɩ a ʋ sɩman dem yel bɛ: “Nyɩ wa lãwnɩ mɛ̃ tɩ cɩlɛ, ɩ̃ lɛb'a nyɛ̃ a ɩ̃ pɛ́rʋ na tɩ bɔr a.” 7Ɩ̃ yere na kʋ̀rɛ nyɩ, à ŋá n'a a na ɩ nʋ̃ɔ̀ yaga a tẽ-vla pʋɔ, a yel-bier-maalɛ been yõ na lɩɛbɩ a ʋ ɩb a ƴãw, zuo a nɩ-mɩn kʋba for bir na bɛ tɛr a bɛ ɩb lɩɛbʋ yel-ɩra a.»

A libir na bɔr ɛ́ bɛ lɛb nyɛ̃ a zʋkpar

8«Bɩɩ pɔw buor sob'ʋ na tɛr salm-zɩɛ wɛr-bie pie, ɛ́ wɛr-bi-been wa bɔr, ʋ bɛ ƴãw fɩ̃tɩlɛ, pɩɩr'ɩ a yir, ɛ́ ƴãw fãw bɔ tɩ nyɛ̃ ʋ? 9Ʋʋ na wa nyɛ̃ ʋ a, ʋ bʋɔl'ɩ a ʋ cɛnbɛ nɩ a ʋ sɩman pɔw-taabɛ yel bɛ: “Nyɩ wa lãwnɩ mɛ̃ tɩ cɩlɛ, ɩ̃ lɛb'a nyɛ̃ a ɩ̃ wɛr-bir na tɩ bɔr a.” 10Ɩ̃ yere na kʋ̀rɛ nyɩ, à ŋá n'a a mɩ́ ɩ nʋ̃ɔ̀ a Naaŋmɩn malkɩ mɩnɛ zie, a yel-bier-maalɛ been yõ na mɩ́ lɩɛbɩ a ʋ ɩb a ƴãw.»

A bie na bɔr ɛ́ a sãà lɛb nyɛ̃ a zʋkpar

11A Yeezu tɩ cãà na lɛb yel: «Nɩr kãw tɩ tɛr'ɩ bidɛbr ayi. 12A bidɛb-bile tɩ yel'ɩ a sãà: “Ɩ̃ sãà a, a fʋ bome a na sɛw kɛ́ tɩ de a fʋ kũu pùorí a, kʋ̀ mãa a ɩ̃ dem.” A sãà tɩ de nɩ a ʋ bome põ kʋ̀ bɛ. 13Bibie blãlɛ pùorí, a bidɛb-bile tɩ wob'ɩ a ʋ bome za ɓã taa yi cen nɩ tẽ-zãána kãw, tɩ bʋnɩ ɩrɛ, sãw a za bɛr. 14Ʋ na wa dɩ a za baar'a, kɔ̃-faa tɩ lo n a ʋlɩ tẽw nɛ pʋɔ, lɛ n'a bom za nã́w pãa tɩ nyɔw ʋ. 15Ʋ tɩ cen na tɩ kpɛ tome a tẽw nɛ nɩr kãw zie, ʋ ƴãw ʋ cen a ʋ pu-pʋɔ tɩ gùre a dobaar. 16A bie tɩ tɩɛrɛ na k'ʋʋ nãá nɩ̃ɛ mɩ́ páw a tɩ-wɔmɛ al a dobaar na mɩ́ 'wɔbr a, 'wɔb paal a nyagɛ, ɛ́ nɩr za bɛ mɩ́ tɩ kʋ̀ ʋ ɛ. 17Lɛ n'a ʋ tɩ tɩɛr ʋ pʋɔ ɛ́ yel ʋ tʋɔra: “Ɩ̃ sãà tõ-tõ-biir'ɩ bɛ ŋa yãwmɛ, ɛ́ mɩ́ dɩ bʋ̃-dɩrɩ guu bɛr, ɛ́ mãa wa zɩ̃ ka kɔ̃ kʋ̀rɛ mɛ̃ ɛ! 18Ɩ̃ na ìr'a lɛb cen a ɩ̃ sãà zie tɩ yel ʋ: ɩ̃ sãà a, ɩ̃ sãw nɩ a Naaŋmɩn nɩ a fʋ̃ʋ za. 19Ɩ̃ bɛ cãà sɛwnɩ kɛ́ bɛ bʋɔlɛ mɛ̃ a fʋ bidɛb ɛ. Ɩrɛ mɛ̃, mɛ̃ a fʋ tõ-tõ-bie kãw a.” 20Lɛ n'a ʋ tɩ ìr lɛb kule a ʋ sãà zie.»

«Ʋ na tɩ cãà zãá nɩ a yir a, a sãà tɩ nyɛ̃ ʋ na, nɩbaalʋ za kpɛ ʋ. Ʋ tɩ zɔ na tuor'ʋ, nyɔw ʋ weri ɛ́ puor'ʋ. 21A bidɛb tɩ yel ʋ na: “Ɩ̃ sãà a, ɩ̃ sãw nɩ a Naaŋmɩn nɩ a fʋ̃ʋ za. Ɩ̃ bɛ cãà sɛwnɩ kɛ́ bɛ bʋɔlɛ mɛ̃ a fʋ bidɛb ɛ...” 22Ɛcɛ a sãà tɩ yel'ɩ a ʋ tõ-tõ-biir: “Nyɩ kpɛ fɔ̃w tɩ de a kpar-bal-bie wa su ʋ, nyɩ ƴãw ʋ nũ-tʋʋr a nobirí, ɛ́ ƴãw ʋ nafawr a gbɛ̃ɛ́. 23Nyɩ nyɔw a nadeli-'wɔr wa n wa kʋ, tɩ maal'ɩ cuw wõ nʋ̃ɔ̀, 24bʋ̃ʋ n'ʋ vɛ̃, a ɩ̃ bidɛb ŋa tɩ kpi na, ɛ́ lɛb wa vʋʋrɛ, ʋ tɩ bɔr'a, ɩ̃ɩ lɛb wa nyɛ̃ ʋ.” Bɛ tɩ nyɔw nɩ a cuw dɩb.»

25«A bidɛb-kpɛ̃ɛ ʋl tɩ be n a pu-pʋɔ. Ʋ na tɩ lɛb kule waar wa tarɛ pɩɛlɛ a yir a, ʋ wõ n jile na ŋmɩɛr a, nɩ bɩnɛ bɛ na ƴawr a. 26Ʋ tɩ bʋɔl'ɩ a tõ-tõ-bie kãw wa sowri kaa bom nɛ na n'ʋ ɩrɛ a. 27A tõ-tõ-bie nɛ yel ʋ: “A fʋ yɛb'ʋ lɛb wa, a fʋ sãà kʋ a nadeli-'wɔr, ʋ na lɛb nyɛ̃ ʋ k'ʋ tɛr ƴã-ɓaarʋ a ƴãw.” 28Lɛ n'a a bidɛb-kpɛ̃ɛ tɩ nyɛ̃ suur ɛ́ zawrɩ a kpɛb. A sãà tɩ yi na tɩ zɛlɛ ʋ k'ʋʋ kpɛ. 29Ɛcɛ ʋ tɩ sɔw na yel a sãà: “Nyɛ̃, yome á ŋá za n'a ɩ̃ so a fʋ tome tone ɛ́ bɛ dãw zawrɩ a fʋ nʋɔr ɛ, ɛcɛ fʋ bɛ dãw kʋ̀ m bʋle k'ɩ̃ɩ lãwnɩ a ɩ̃ bárɩ maal'ɩ cuw ɛ. 30Ɛcɛ a fʋ bie ŋa, na de a fʋ bome tu n pɔwbɛ pùor sãw a za bɛr a, ʋ na wa lɛb wa a, fʋ kʋ n a nadeli-'wɔr kʋ̀ ʋ!” 31A sãà tɩ yel ʋ na: “Ɩ̃ bie e, mãa nɩ fʋ̃ʋ nɛbɛ kʋralɛ, a ɩ̃ bome za a, fʋ̃ʋ so a. 32Ɛcɛ a tɩ fɛr'a kɛ́ tɩ maalɩ cuw wõ n nʋ̃ɔ̀, a fʋ yɛb ŋa na tɩ kpi ɛ́ lɛb wa vʋʋrɛ a ƴãw, ʋ na tɩ bɔr ɩ̃ɩ lɛb wa nyɛ̃ ʋ a ƴãw.”»

Currently Selected:

Luka 15: DBDC

Highlight

Copy