Luka 16
16
A bʋ̃-kaarɛ ʋl na cɩ a zʋkpar
1Al pùorí, a Yeezu tɩ yel'ɩ a ʋ po-tuurbɛ: «Nɩr kãw na tɩ kpɛ naalʋ a, tɩ tɛr'ɩ bʋ̃-kaarɛ, ɛ̀ bɛ wa yel kʋ̀ ʋ k'aa ʋ bʋ̃-kaarɛ sãwnɛ nɩ a ʋ bome bɛrɛ. 2A nɩ-kpɛ̃ɛ tɩ bʋɔl'ʋ na wa yel ʋ: “Ɩ̃ wõ na kɛ́ fʋ ɩrɛ nɩ ŋmɩn a? Manɩ a lɛ fʋ na kaarɛ a ɩ̃ bome zie a kʋ̀ m, bʋ̃ʋ n'ʋ vɛ̃, dɩ̃a na ta a, fʋ kʋ̃ cãà ɩ a ɩ̃ bʋ̃-kaarɛ ɩ.” 3A bʋ̃-kaarɛ tɩ tɩɛr'ɩ ʋ pʋɔ: “A ɩ̃ nɩ-kpɛ̃ɛ na faa nɩ a ɩ̃ tome. Ɩ̃ na ɩ n ŋmɩn? Ɩ̃ bɛ tɛr fãw a tẽsɔw kɔb ƴãw ɛ, ɛ́ vĩ ɩrɛ mɛ̃ a zɛlʋ ƴãw. 4Ɛcɛ ɩ̃ bãw nɩ a lɛ ɩ̃ na na ɩ, bɛlɛ wa diw mɛ̃ bɛr a ɩ̃ bome kaafʋ tome pʋɔ a, mãa nyɛ̃ nɩbɛ bɛ kʋ̀ m taw-lanʋ zie a bɛ yie pʋɔ a.” 5Lɛ n'a ʋ tɩ bʋɔlɩ a ʋ nɩ-kpɛ̃ɛ samɛ dem za, beƴeni ƴeni, wa n wa sowri a dãw-niwn sob: “A ŋmɩn san n'a fʋ tɛr a ɩ̃ nɩ-kpɛ̃ɛ zie?” 6Ʋ sɔw: “Kãá dʋwr kʋba (100) san n'a!” A bʋ̃-kaarɛ yel ʋ: “Nyɛ̃ a fʋ san sɛbɛ, zɩ̃ fɔ̃wlɛ ɛ́ sɛb lɩz'a ayi nɩ pie.” 7Ʋ tɩ lɛb'a sowri a kãw: “Ɛ́ fʋ̃ʋ, a ŋmɩn san n'a fʋ tɛr?” Ʋ sɔw: “Ble vʋɔrɩ kʋba (100).” A bʋ̃-kaarɛ yel ʋ: “Nyɛ̃ a fʋ san sɛbɛ, sɛb lɩz'a anaar.” 8A nɩ-kpɛ̃ɛ tɩ mʋʋr'ɩ a bʋ̃-kaarɛ ŋa ɩb na bɛ tori a, a yã-maalʋ ʋ na tɩ maalɩ a ƴãw. A tẽw ŋa zu nɩbɛ sɩrɩ na kpɛ yã a bɛ taabɛ zie zuo a cãà pʋɔ nɩbɛ.»
9«Ɛcɛ mãa yere na kʋ̀rɛ nyɩ, nyɩ de a nyãnyu-libie á ŋá ír'ɩ bárɩ, alɛ bɛ wa cãà a nyɩ nũú a, a bárɩ bɛ ŋa bɛ̃ɛ de nyɩ a kpɛb ziir na bɛ tɛr sãwfʋ daar a pʋɔ. 10Nɩr na tɛr yel-mɩŋa yel-pʋrɩ ƴãw a, ʋ mɩ̀ mɩ́ tɛr'ɩ yel-mɩŋa yel-kpɛ̃ɛ ƴãw, ɛ́ nɩr na bɛ tɛr yel-mɩŋa yel-pʋrɩ ƴãw a, ʋ mɩ̀ bɛ mɩ́ tɛr yel-mɩŋa yel-kpɛ̃ɛ ƴãw ɛ. 11Nyɩ bɛ wul'a kɛ́ nyɩ ɩ n nɩ-mɩn a nyãnyu-libie yele pʋɔ ɩ, ɛ́ ãa n'ʋ na sàw de bʋ̃-sɩza kʋ̀ nyɩ nyɩ kaarɛ? 12Nyɩ bɛ tɛr'ɩ yel-mɩŋa a zawlɛ bom kaafʋ pʋɔ ɩ, ɛ́ ãa n'ʋ na de a nyɩ dem kʋ̀ nyɩ?»
13«Tõ-tõ-bie kãw za kʋ̃ tʋ̃ɔ́ nɩ-bɛrɛ ayi tome tõ ɩ: alɛ bɛ ɩ lɛ, ʋ na hɩ̃ɛn nɩ a dãw-niwn sob ɛ́ nɔnɛ a ayi sob, bɩɩ a dãw-niwn sob'ʋ ʋ na tu, ɛ́ bɛ ŋmɛlɛ kaar a ayi sob ɛ. Nyɩ kʋ̃ tʋ̃ɔ́ lãw ɩ a Naaŋmɩn nɩ a libir tõ-tõ-biir ɛ.»
A Naaŋmɩn wulu nɩ a tẽ-vla Naalʋ yele
(Mat 11:12-13, 5:31-32, Mark 10:11-12)
14A Faarizɩ̃ɛ mɩnɛ na nɔnɛ a libie, ɛ́ tɩ bɛr wõ a Yeezu ƴɛ̀rʋ á ŋá za a, tɩ ɩrɛ ʋ na laar. 15A Yeezu tɩ yel bɛ na: «A nyɩɩm a, nyɩ mɩ́ ɩrɛ nɩ a nɩsaalbɛ niŋé mɛ̃ nɩ-mɩn n'ɩ nyɩ a, ɛcɛ Naaŋmɩn bãw nɩ a nyɩ pʋɔ ŋmɛ̃a: bʋ̃ʋ n'ʋ vɛ̃, Naaŋmɩn bɛ nɔnɛ a ʋlɩ bom nɛ a nɩsaal na mɩ́ nyɛ̃ ʋ ɩ kpɛ̃ɛ a ɩ.»
16«A Naaŋmɩn wulu nɩ a naaŋmɩn-ƴɛ̀r-manbɛ wulu tu na tɩ ta a Zã-Bati daar. Ɛcɛ a na tĩ a Zã-Bati daar a, a nɩbɛ wõ n a Naaŋmɩn Naalʋ Yel-nʋ̃ɔ̀ bɛ na hier'a, ɛ́ nɩsaal za mɩ́ ƴãw fãw bɔbr k'ʋʋ kpɛ a Naaŋmɩn Naalʋ pʋɔ. 17A salom nɩ a tẽw na tɔl'ɩ mɔlɛ lɛ zuo a Naaŋmɩn wulu yel-cãpile kãw za na na tɔl a.»
18«Dɛb za na bɛr a ʋ pɔw ɛ́ kul pɔw-yũo a, ʋ maal'ɩ pɔw-gaa yel-bier, ɛ́ nɩr na kul pɔw a sɩr na bɛr a, ʋ maal'ɩ pɔw-gaa yel-bier.»
A nã́w sob Lazaar nɩ a nãà zʋkpar
19«Nɩr kãw tɩ be n be kpɛ naalʋ yaga. Ʋ tɩ suur'ɩ fɔbr-vɩɛlɩ vɩɛlɩ, a dàarʋ na kpɛmɛ a, ɛ́ dɩrɛ cuw bʋ̃-dɩ-kãánɩ bibi-vɩɛrɩ za. 20Nã́w sob kãw, bɛ na bʋɔlɛ kɛ́ Lazaar a, tɩ gã nɩ a nãà dɩ̃dɔr nʋɔr: a ʋ ƴã-gan za tɩ ɩ n natɩɛ. 21Ʋ tɩ bɔbr'a k'ʋʋ nãá mɩ́ páw a nãà bʋ̃-dɩ-ŋmaarɛ na lore a tẽw a tɩ dɩ tɩw, ɛcɛ baar'a nɩ̃ɛ mɩ́ tɩ wa lɛnɛ a ʋ natɩɛ. 22Ɛcɛ a nã́w sob wa kpi na, a malkɩ mɩnɛ ɓáw ʋ cen nɩ a Abraham zie. A nãà mɩ̀ kpi, bɛ ũù ʋ. 23A tɩ wone ʋ nɩ yaga a nɩ-kũuni tẽw pʋɔ be. Ʋ wa dʋɔ nɩ zu wɩɛr tɩ nyɛ̃ a Abraham, ɛ́ a Lazaar zɩ̃ kɔwlɩ ʋ. 24Lɛ n'a ʋ tɩ lɔb cɛl yel: “Ɩ̃ sãà Abraham i, zɔ ɩ̃ nɩbaalʋ, ɛ́ ƴãw a Lazaar cen tɩ tõ nobir kʋ̃ɔmɩ́ wa ɓãá nɩ mɛ̃ zɛl, ɩ̃ wone nɩ tuo yaga a vũu á ŋá pʋɔ.” 25Ɛcɛ a Abraham tɩ yel ʋ na: “Ɩ̃ bie e, lɛb tɩɛrɩ bãwnɩ fʋ na páw a nʋ̃ɔ̀ a fʋ tẽw zu nyɔ-vʋʋrʋ pʋɔ, ɛ́ a Lazaar páw a tuo a. Ƴɛrɛŋa a, ʋ nyɛrɛ nɩ mɔwlʋ a ka, ɛ́ fʋ mɩ̀ nɩ̃ɛ wone tuo. 26À ŋá za fʋ na saa yere a, bɛ ƴãw nɩ gbʋlãkpow-kpɛ̃ɛ a nyɩɩm nɩ a tɩɩm cará, kɛ́ a bɛlɩ dem nãà wa bɔbr kɛ́ bɛ mɩ́ wa a nyɩ zie a, bɛ ta tʋ̃ɔ́ ɩ, ɛ́ nɩr mɩ̀ ta mɩ́ yi a nyɩ zie be ɛ́ wa a tɩ zie ka ɩ.” 27A nãà yel: “Alɛ wa ɩ lɛ a, ɩ̃ zɛlɛ fʋ na, ɩ̃ sãà a, kɛ́ fʋ tõ a Lazaar a ɩ̃ sãà yir pʋɔ. 28Ɩ̃ tɛr'ɩ yɛbr anũu. Ʋ tɩ yel kʋ̀ bɛ kɛ́ bɛ maal ɩrɛ, taa wa nanɩ waar a tuo-wob zie ka ɩ.” 29A Abraham tɩ yel ʋ na: “A Moyiir nɩ a naaŋmɩn-ƴɛ̀r-manbɛ be n be, bɛ bɛrɛ wone a bɛ ƴɛ̀rʋ.” 30A nãà lɛb yel: “Lɛ bɛ n'a ɩ, ɩ̃ sãà Abraham i, nɩr wa ɩ mɛ̃ ʋ yi n a kũuni pʋɔ cen a bɛ zie a, bɛ na lɩɛb'ɩ a bɛ ɩb.” 31Ɛcɛ a Abraham tɩ sɔw ʋ na: “Bɛlɛ bɛ wa wone a Moyiir nɩ a naaŋmɩn-ƴɛ̀r-manbɛ ƴɛ̀rʋ a, ɛ́ nɩr saa yi a kũuni pʋɔ cen a, bɛ cãà kʋ̃ sàw ɛ.”»
Currently Selected:
Luka 16: DBDC
Highlight
Share
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
