LUKA 5

Yezu b'a ka kalanden fɔlɔw wele

(Mat 4.18-22; Mar 1.16-20; Zan 21.1-11)

1Loon dɔ la, ka Yezu to Zenezarɛti baa daa la, jama tun y'a lamini n'u bɛ nyɔgɔn nyɔntinyɔntira waasa ka Ala ka kuma lamɛn. 2A ye kurun fila ye bada la. Mɔnikɛlaw tun bɔra u kɔnɔ, u tun bɛ u ka jɔɔw kora. 3Yezu donna o kurun nunu kelen kɔnɔ min tun ye Simɔn ta ye. A y'a nyini Simɔn fɛ ko a ka taa ni kurun ye jii cɛmancɛ la dɔɔni. O kɔ, k'a siginin to kurun kɔnɔ, a y'a daminɛ tugu ka mɔgɔw kalan.

4A tilara kuma na tuma min na, a y'a fɔ Simɔn ye ko: “Jii ka dun yɔrɔ min na, taa ni kurun ye o yɔrɔ la. Aw k'aw ka jɔɔ fili yen.”

5Simɔn y'a jaabi ko: “Karamɔgɔ, an ye baara kɛ ka dugu gwɛ, an ma foyi sɔrɔ. Nga i ka kuma kɔsɔn, ne bɛna jɔɔ fili jii la.” 6O la, u ye jɔɔ fili. U ka jɔɔ ye jigɛ caaman minɛ fɔɔ jɔɔw daminɛna ka faranfaran. 7U y'u bolo kɛ ka u tɔnyɔgɔnw wele kurun dɔ nin kɔnɔ ko u ka na u dɛmɛ. Olu taara, u ye kurun fila nunu bɛɛ fa jigɛ la fɔɔ kurunw tun bɛ nyini ka jigi jii jukɔrɔ. 8Simɔn Piyɛri y'o ye minkɛ, a y'a kunbiri gwan Yezu kɔrɔ k'a fɔ ko: “Matigi, i kana gwɛrɛ n na, bari ne ye kojugukɛla ye.”

9A y'o fɔ bari a tun siranna. Ale ni minw tun bɛ nyɔgɔn fɛ kurun kɔnɔ, u bɛɛ tun siranna bari u ye jigɛ caaman sɔrɔ. 10Zebede ka dencɛw, Zaki ni Zan tun ye Simɔn baarakɛnyɔgɔnw ye, olu fana tun siranna. Nga Yezu y'a fɔ Simɔn ye ko: “I kana siran. Kabini sisan, i tɛna kɛ mɔnikɛla ye tugu, nga i bɛna kɛ waajulikɛla ye, ka mɔgɔw sɔrɔ Ala ye.”

11O tuma na, u segira ka na u ka kurunw bila bada la, k'u ka fɛɛnw bɛɛ to yen ka tugu Yezu kɔ.

Yezu bɛ kunatɔ dɔ kɛnɛya

(Mat 8.1-4; Mar 1.40-45)

12Loon dɔ, ka Yezu to dugu dɔ la, cɛɛ dɔ fana tun bɛ yen, kunatɔbana diginin tun b'o la. A ye Yezu ye tuma min na, a taara biri a kɔrɔ k'a dali ko: “Matigi, n'i sɔnna, i bɛ se ka ne kɛnɛya.” 13Yezu magara a la, k'a fɔ ko: “N sɔnna ko i ka kɛnɛya.” O yɔrɔnin bɛ, cɛɛ kɛnɛyara. 14O kɔ, Yezu y'a gwɛlɛya a ma kosɛbɛ ko: “I kan'a fɔ mɔgɔ si ye ko ne le y'i kɛnɛya dɛ. Nga taa i yɛrɛ yira sarakalasebaga la. Musa ye saraka min koo fɔ saniyali faan fɛ, i k'o bɔ k'a yira mɔgɔw la ko i kɛnɛyara.”

15O bɛɛ n'a ta, Yezu tɔgɔ bɔra ka taa nya fɔɔ mɔgɔ caaman tun bɛ to ka taa u lajɛn a kɔrɔ waasa k'a ka kuma lamɛn, walima a k'u kɛnɛya. 16Yezu tun bɛ to ka taa kongo kɔnɔ a kelen ka Ala dali yen.

Yezu bɛ muruku dɔ kɛnɛya

(Mat 9.1-8; Mar 2.1-12)

17Loon dɔ, ka Yezu to mɔgɔw kalan na, Farizinyɛw ni sariya karamɔgɔ dɔw siginin tun bɛ yen. U tun nana ka bɔ Galile ni Zude mara dugudenninw bɛɛ la, ani Zeruzalɛmu. Matigi Ala ka sebagaya tun bɛ Yezu fɛ n'a bɛ banabagatɔw kɛnɛya. 18Cɛɛ dɔw taara ni muruku dɔ ye o yɔrɔ la. A lanin tun bɛ dilan kan. U tun bɛ cogo nyinina ka don n'o cɛɛ ye soo kɔnɔ k'a la Yezu nyakɔrɔ. 19U m'a cogo sɔrɔ ka don n'a ye jama kɔsɔn. O la, u yɛlɛla soo kunna k'o yɔrɔ dɔ walaka. Ka muruku nin to a ka dilan na, u y'a jigi o woo fɛ jama cɛma ni juru ye Yezu nyakɔrɔ. 20Yezu y'a ye k'o mɔgɔw lara ale la minkɛ, a y'a fɔ muruku nin ye ko: “Cɛɛ, i ka kojuguw yafara i ma.”

21Sariya karamɔgɔw ni Farizinyɛw y'a daminɛ ka miiri u kɔnɔ ko: “Nin ye jon ye n'a bɛ Ala tɔgɔ cɛn ten? Jon le bɛ se ka mɔgɔ ka kojuguw yafa a ma ni Ala kelen tɛ?”

22Nga Yezu y'u ka miiriya lɔn k'a fɔ u ye ko: “Mun y'a to aw b'a la ka miiri aw kɔnɔ ten? 23K'a fɔ muruku ye ko: ‘I ka kojuguw yafara i ma,’ walima k'a fɔ a ye ko: ‘Wili ka taama,’ o kuma fila la, jumɛn fɔko ka nɔgɔ? 24Nga ne b'a fɛ aw k'a lɔn ko see bɛ Mɔgɔ Dencɛ ye ka mɔgɔ ka kojuguw yafa a ma k'a to dugukolo kan. O la, cɛɛ, n b'a fɔ i ye, wili k'i ka dilan ta ka taa soo.”

25O yɔrɔnin bɛ, cɛɛ nin wilila mɔgɔw nyana k'a ka dilan ta ka taa soo. A tun bɛ Ala tando n'a bɛ taa. 26U bɛɛ kabakoyara. U ye Ala tando. U siranninba y'a fɔ ko: “An ye kabako ye bii dɛ!”

Yezu bɛ Levi wele

(Mat 9.9-13; Mar 2.13-17)

27O kɔ, Yezu bɔra yen, a ye wusuruminɛla dɔ ye min tɔgɔ ko Levi, a siginin tun bɛ wusuruminɛlaw ka baarakɛyɔrɔ la. Yezu y'a fɔ a ye ko: “Tugu ne kɔ.” 28Levi y'a ka baara to yen ka wili ka tugu a kɔ.

29O kɔ, Levi ye dumuniba labɛn a ka soo Yezu ye. Wusuruminɛlaw ni mɔgɔ wɛrɛw tun bɛ yen caaman. U tun bɛ dumuni kɛra ni Yezu n'a kɔmɔgɔw ye. 30Farizinyɛw n'u ka sariya karamɔgɔw tun bɛ ;nunu;nununa. U ye Yezu ka kalandenw nyininga ko: “Mun na aw bɛ dumuni kɛ ka minni kɛ ni wusuruminɛlaw ani kojugukɛlaw ye?”

31Yezu ye kuma ta k'u jaabi ko: “Mɔgɔ minw ka kɛnɛ, olu mako tɛ furakɛla la, banabagatɔw le mako b'a la. 32Ne ma na mɔgɔtilenninw wele, nga ne nana kojugukɛlaw le wele waasa u ka nimisa ka faran u ka kojuguw la.”

Yezu ye min fɔ suun koo la

(Mat 9.14-15; Mar 2.18-20)

33Mɔgɔ dɔw y'a fɔ Yezu ye ko: “Zan ka kalandenw ni Farizinyɛw ka kalandenw bɛ suun don tuma caaman ka Ala dali, k'a sɔrɔ e taw bɛ dumuni kɛ ka minni kɛ.”

34Yezu y'u jaabi ko: “Aw tɛ se ka kɔnyɔcɛ teriw wajibiya ka suun don k'u ni kɔnyɔcɛ to nyɔgɔn fɛ. Tinyɛ tɛ wa? 35Nga waati dɔ bɛna se, kɔnyɔcɛ bɛna bɔsi u la, u bɛna suun don o tuma na.”

(Mat 9.16-17; Mar 2.21-22)

36Yezu ye talen nin la u ye fana ko: “Mɔgɔ si tɛ fanikura faran ka fani kɔrɔman bari n'a ye. N'o kɛra, fanikura cɛnna, kunkurunnin nin fana tɛna bɛn ni fani kɔrɔman ye. 37Mɔgɔ si tɛ duvɛnkɛnɛ kɛ foroko kɔrɔman kɔnɔ. N'o kɛra, duvɛnkɛnɛ bɛna foroko faran, foroko bɛna cɛn, duvɛn bɛna bɔn. 38Nga duvɛnkɛnɛ ka kan ka kɛ forokokuraw le kɔnɔ. 39Ni mɔgɔ min delila duvɛnkɔrɔ min na, o tigi tɛ duvɛnkɛnɛ fɛ, bari a b'a fɔ ko duvɛnkɔrɔ le ka di.”

Currently Selected:

LUKA 5: JULNT94

Highlight

Copy