MI ÑAMA 18
18
1Madiana kopadiciamo Jetilo yua n den tie Musa cuado den gbadi U Tienu n den tieni Musa leni o niba Isalele yaaba po yaa *ŋanbili. O den gbadi ke Li Miali Diedo teni ke Isalele yaaba ñani Ejipiti nni. 2Musa cuado Jetilo den taa Musa pua Sefola ki cuani o kelima Musa den goa ki gedini o o denpo.#Ñam 2.21-22 3O go den taa Sefola yaa bijaliediba, yendo den yi Gelisoma#18.3 Gelisoma: “N sani ki ti wuoni ne.” kelima Musa den yedi: «N tie caano ki kaa mi dielanma nni.»#JTT 7.29 4O lielo mo den yi Elieseli#18.4 Elieseli: “N Tienu todi nni.” kelima Musa den yedi: «N baa yaa Tienu den todi nni ki faabi nni leni *Falono jugisiega.»
5Musa cuado Jetilo leni Musa pua leni o bijaba, den cua mi fanpienma nni Musa n den jiidi naani ki kuu leni U Tienu yaa juali kani. 6O den teni ke bi yedi Musa: «Mini a cuado Jetilo n cua a kani ki kubi a pua leni a bijaliediba.» 7Musa den ñani ki cua o cuado nintuali ki labini ki gobini o. Bi den puni biyaba bi laabaali ki yegi ki kua Musa gbandieli nni. 8Musa den waani o cuado Li Miali Diedo n den tieni Falono leni Ejipiti yaaba yaala kuli kelima Isalele yaaba yaa po. O den waani o ban den laa yaa fala kuli u sanu po leni Li Miali Diedo n den faabi ba maama yaa po. 9Jetilo den mangi o pali kelima Li Miali Diedo n den tieni Isalele yaaba po yaa *ŋanbili kuli, leni wan den faabi ba Ejipiti yaaba nuu nni maama. 10Jetilo den yedi: «Li Miali Diedo n baa ti pagidi wani yua n den faabi yi Ejipiti yaaba leni Falono yaa nuu nni ki go faabi bi niba kuli Ejipiti yaaba nuu nni. 11N bani moala ke Li Miali Diedo pia u paalu ki cie i *buli kuli, kelima o teni ke Ejipiti yaaba biadima goa ki baa bi yula po.»
12Musa cuado Jetilo den padi U Tienu po li *padijuukaali leni a padifana. Alono leni Isalele yaaba nikpeliba kuli den cua ki taani leni Musa cuado ki dini U Tienu nintuali.
Musa dini bi niba li bali baa ja ti buudi
13Lan den fii ki faa Musa den kali ki baa bu leni bi niba. Bi niba den se o nintuali ki cili ku tiŋaagu ki ban pundi hali ku yenjuogu. 14Musa cuado den laa wan den tiendi bi niba po yaala kuli. O den yedi: «A tiendi be mo nne bi naa niba po? Be yaa po yo ke a kaa fini a bebe ki tuuni li naa tuonli ke bi naa niba kuli se a nintuali ki cili ku tiŋaagu ki ban tuoni ku yenjuogu?» 15Musa den goa ki yedi o cuadibaa: «Bi niba na kpendi n kani ki bua ki buali U Tienu bonliba yo. 16Bi yaa pia maamaba bi siiga, bi yen cua n kani, min jia bipo ti buudi. N go yen teni ban bandi U Tienu ñoabona leni o *bali maama.»
17Musa cuado den yedi o: «Ŋan tiendi yaala yeni naa ŋani. 18A baa coagini aba ki go coagini yaa niba n ye leni a kelima laa tuonli yaba ki cie a fidu. A kan fidi ki tieni likuli fini a bebe. 19Cengi min pia apo yaa tundi, U Tienu mo n yaa ye leni a: A tuonli n baa yaa tie ŋan ga li taanli kaanu, ŋan cua li nitaanli yeli nni, ki cuani ban pia yaa maama U Tienu nintuali. 20Ŋan yaa bangi ba a ñoabona leni li balimaama ki go yen teni ban bandi lan pundi ke ban ŋoadi yaa sanu leni lan pundi ke ban yaa tiendi yaala.
21Ŋan gandi bi niba siiga bi yanfodanba yaaba n jie U Tienu ki bua i moamoani ki nani li suuli. Ŋan dini ba li bali ke ban tua niba tudilitudili yudanba leni niba kobigakobiga yudanba leni niba piimumuu yudanba leni niba piigapiiga yudanba.
22Bani n baa yaa ja ti buudi bi niba po yaa yogunu kuli. Yaa maama n tie macianma kuli ban cuani ma a kani. Ama mawaama kuli ban jia ma biba ŋan wadi laa tugili yeni ke ban taani leni a ki yaa tugi li. 23A yaa tiendi yeni ke U Tienu mo wangi a ŋan baa tieni yaala a baa fidi bonla kuli, bi naa niba mo baa pundi leni laafia yin caa naani.»
24Musa den cengi o cuado yedima ki tieni wan waani o yaala kuli. 25Musa den gandi bi yanfodanba Isalele yaaba kuli siiga ki dini ba li bali ke bi tua bi yudanba bi niba po ki tie niba tudilitudili yudanba leni niba kobigakobiga yudanba leni niba piimumuu yudanba leni niba piiga piiga yudanba. 26Bi den ja bi niba po ti buudi yaa yogunu kuli. Bi den yen cuani Musa kani yaa maama n pa, ama bi yen jia ti buudi bani biba yaa maama n wa. 27Musa den cabi o cuadibaa Jetilo ke o guani o diema nni.
U Tienu ŋantaado leni Isalele yaaba
Currently Selected:
MI ÑAMA 18: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
