MI ÑAMA 20
20
1Lanwani U Tienu den maadi mi naa maama kuli ki yedi: 2«N tie Li Miali Diedo yi Tienu yua n den ñani yi Ejipiti diema nni, yin den ye ti yonbidi yaa diema nni. 3Yin da baa tientoe n nintuali.
4Yin da taa bonliba ki tagi *bulo, bi nannanliba yaala n naani leni yaala n ye tanpoli, bi yaala n ye ki tinga nni, bi yaala n ye mi ñima nni ki tinga tiipo.#Ñam 34.17; Lef 19.4; 26.1; Tia 4.15-18; 27.15 5Yin da gbaani ki pugi la, yin da kpiagi la mo, kelima mini Li Miali Diedo yi Tienu n tie yaa Tienu n pia li *nunponli. N guandi baanba yaa biadima panpaani bi bila kani hali nifiima taa bi nifiima naa yaaba n nani nni po.#Ñam 34.6-7; Coa 14.18; Tia 7.9-10 6Ama n gba mi niñima yaaba n bua nni ki go kubi n *bali maama yaa po hali nifiima tudili.
7Yin da taa Li Miali Diedo a Tienu yeli fanma fanma, kelima Li Miali Diedo kan cedi yua n taagi o yeli fanma fanma.#Lef 19.12
8Yin yaa tiadi mi *fuodima daali ki gagidi li. 9Yi baa soani yin pia yaa tuonli kuli dana luoba siiga.#Ñam 16.23-30; 31.12-14; 23.12; 31.15; 34.21; 35.2; Lef 23.3 10Ama li daleleeli tie Li Miali Diedo yi Tienu fuodima daali. Yin da soani tuonliba kuli laa daali, lan tie yinba, yi bijaba, yi bisiaba, yi naacenba, yi potuada, yi yandi, baa yaa canba n ye yi diedi nni, oba kuli kan soani tuonli laa daali. 11Kelima dana luoba yaa niinni Li Miali Diedo den tagi tanpoli leni ki tinga mi ñincianma leni yaala n ye mi niinni kuli ki den fuodi li daleleeli. Li tie lani yaa poe ke Li Miali Diedo den seligi mi fuodima daali ki gagidi li.#Cil 2.1-3; Ñam 31.17
12Yin jigini yi baanba leni yi naanba ke yi dana n foagidi Li Miali Diedo yi Tienu n puni yi yaa diema yaa niinni.#Tia 27.16; Mat 15.4; 19.19; Mak 7.10; 10.19; Luk 18.20; Efe 6.2-3
13Yin da kpa o nilo.#Cil 9.6; Lef 24.17; Mat 5.21; 19.18; Mak 10.19; Luk 18.20; Lom 13.9; Jak 2.11
14Yin da conbi.#Lef 20.10; Mat 5.27; 19.18; Mak 10.19; Luk 18.20; Lom 13.9; Jak 2.11
15Yin da su.#Lef 19.11; Mat 19.18; Mak 10.19; Luk 18.20; Lom 13.9
16Yin da tieni mi siedi faama yi nisaalilielo po.#Ñam 23.1; Mat 19.18; Mak 10.19; Luk 18.20
17Yin da pia li nunponbiadili yi nisaalilielo diegu po, o pua po, baa o naacemo po, baa o potuado po, baa o nua po, baa o ŋunbo po, baa yi nisaalilielo n die yaa bonla kuli po.»#Lom 7.7; 13.9
18Bi niba kuli den gbadi i tatantani leni li naatuntunli piebima, ki laa mi tañigima leni yaa juali n den co mi fantama. Laa bonlekaala den jieni bi niba ke bi digibi ki piadi ki ban se foagima. 19Bi den yedi Musa: «Ŋan maadi leni ti fini aba ke ti baa cengi. Ama U Tienu n da go maadi leni ti ke tin da ti kpe.»#Ebl 12.18-19
20Musa den yedi bi niba: «Yin da jie mani, kelima U Tienu cua ki baa biigi yi. Li go tie ke yin yaa pia opo li fangili yi pala nni ke yin da tieni ti *tuonbiadi.»
21Bi niba den sedi hali foagima ama Musa den nagini ku tawaligu U Tienu n den ye naani.
Yaa bali maama n ye li padibinbinli yaa po
22Li Miali Diedo den yedi Musa: «Maadi leni Isalele yaaba yaa maama n tie na: Yi laa ke n maadi leni yi ke n nialu ñani hali tanpoli po. 23Yin da duadi ŋanjilifa *buli bi wula buli, ki da kpiagi i kaa tie mini. 24Ŋan maa npo ti tandi *padibinbinli ŋan baa padi npo a pe leni a ne naankani lan tua a padijuukaana leni i jaandi yaa pada. Min teni ke bi tiadi n yeli naankani kuli n baa cua a kani ki seligi a. 25A yaa maa npo a tana padibinbinli ŋan da maa li leni yaa tana n kpie kelima a yaa kpie li tanli leni ti kudi a baa *joagini li.#Tia 27.5-7; Jos 8.31 26Ŋan da do li bondokaala ki cua n padibinbinli kani ke a mubima n da doagidi likani.»
Yaa balimaama n ye Ebilu yonbi po
Currently Selected:
MI ÑAMA 20: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
