MI ÑAMA 21
21
1Diidi ŋan baa bili bipo yaa ñoabonbilikaana:#Tia 15.12-18 2«A yaa da o yonbo ke o tie Ebilu buolu yua, o baa soani bina luoba. Ama li binleleedili wani, o baa ña ki diedi o yuli ki naa pani pu kuli mo.#Lef 25.39-46 3O yaa den kua ti yonbidi o bebe, o baa ña o bebe yo. O yaa den pia o pua mo o baa ña wani leni o pua. 4O canbaa n yaa puni o pua ke o mali opo a bonjala bi a bonpola o canbaa n baa yendi o pua leni a bila, omo baa ña o bebe. 5O yonbo yaa yedi: ‹N bua n canbaa leni n pua leni n bila, mii bua ki ña ki yendi nba.› 6Lanwani o canbaa baa taa o ki cuani U Tienu kani. O baa tabini laa ja bu buliñoabu bi li buliñoagundili. O canbaa baa cibi o tubili leni li penkpaali lani yaa puoli o yonbo yeni baa tuuni opo yaa yogunu kuli.
7Ja yaa kuadi o bisalo ke o tua yonbo, o kan ña ti yonbidi nni nani bi yonbijaba n ña ti yonbidi nni maama. 8O canbaa yama yaa ñani o niinni wani yua n den taa o o yaa yuli po yeni baa dingi opo o ñama. Waa pia u sanu ki kuadi o nilanbuolu po kelima wani oba n yie o.
9O yaa kubi o o bijua po mo, o baa tieni opo nani lan pundi ban tieni bi jafanba po maama yeni. 10O yaa taa potoa o kan wadi liba kuli o pokpialo yeni kani lan tie li manli ti tiayiekaadi leni u duanu kuli. 11O yaa tiendi opo laa bontaadila, o baa fidi ki ña ki naa pani pu kuli.
Yaa tagili n pundi mi kuuma
12Nilo yaa pua ki ku o lielo, ban kpa omo.#Lef 24.17 13Ama li yaa tie jalibu, kaa tie nilo n kpaagi ki bua ki tieni yaala, U Tienu n yaa teni ke o kpe o nuu nni, n baa waani o wan baa sani ki wuoni naankani.#Coa 35.10-34; Tia 19.1-13; Jos 20.1-9 14Ama nilo yaa luni nunfanbu ki baa kpa o nisaalilielo, baa o yaa sani ki wuoni n *padibinbinli kani, yin dadi ki ñani o ki kpa o.
15Yaa nilo n pua o baa bi o naa, yin kpa o.
16Yaa nilo n suni o nilo ki kuadi o, bi ki kubi o leni u paalu, yin kpa o.#Tia 24.7
17Yua n soli o baa yaaka o naa li pundi ban kpa o.#Lef 20.9; Mat 15.4; Mak 7.10
Li puapuali leni mi poagilima
18Jaba lie yaa koani ke yendo lugidi o nisaalilielo li tanli bi ki kudi o li nukuli ke waa kpe, ama ke li duani o, 19lani yaa puoli o yaa fidi ki fii ki ñani ki goadi niinpo ki ñiigi u gbiamu, yua pua laa ja baa gaapo. Ama o baa pa i panpaani yaa dana ke laa ja ki den fidi ki soani yeni ki go buu o hali wan ban paagi cain.
20Nilo yaa pua o yonbo, ja bi yonbipua leni u gbiamu ke o kpe yin tu opo li panli. 21Ama o yaa tieni dayenli bi dana lie yi kan tu opo li panli kelima o den da o leni o ligi yo.
22Bi jaba yaa koani leni biyaba ki bobi potugupunbo ki teni ke o mali, ke jalibutoa kuli ki tieni, o podaano baa bili ba i panpaani, bi baa pa ki ŋoadi bi bujiaba n jagi maama. 23Ama jalibu yaa ye lienni, miali n baa pa miali panli, 24nunbu n baa pa nunbu panli, ñinli mo n baa pa ñinli panli, nuu n baa pa nuu panli, taali n baa pa taali panli.#Lef 24.19-20; Tia 19.21; Mat 5.38 25Fantansiama n pa fantansiama panli, poagilima n pa poagilima panli, faligima n pa faligima panli.
26Nilo yaa pia yonbo ke o tie ja bi yonbo ke o tie pua ki pua fiadi o nunbu, wan luo yaa nunbu yeni yaa po o baa ŋa o wan diedi o yuli. 27O yonbo canbaa yaa pua ki kpaadi o ñinli, o ñinli yaa kpaadima yeni yaa po, o baa ŋa o wan diedi o yuli lan tie ja leni lan tie pua kuli.
28Naatonli yaa tuoni ja bi pua ke o kpe, yi baa lugidi o a tana, oba kuli n da ŋmani o nandi, o naadaano kan baa tagiliba.
29Ama li yaa sua ke o nua den mali ki to bi niba, ke bi waani o naadaano ke waa tieni liba kuli, yi baa lugidi o nua a tana ki kpa o, li yaa tie ke o ku ja bi pua, yi baa kpa o daano moko. 30Li yaa tie ke bi bili i panpaani o naadaano po ke wan ga o miali ban bili o yaa panpaani kuli, o baa pa yi. 31O nua yaa tuoni bonjaga bi bonpuoga laa maama moko n jia nani lan bili maama. 32Ama o nua n tuoni yaa ja bi yaa pua yaa tie yonbo bi baa pa o yonbidaano kujapiena piitaa ki go lugidi ki kpa o nua yeni.
33Nilo yaa ŋa caali ke li yaa, bi nilo yaa gbini caali ki naa baa yaala n baa yaa luondi li, nua bi ŋunbo yaa baa lienni, 34li caali daano baa pa i panpaani. Lani yaa puoli wani n di die ki yankpienga.
35Nilo nua yaa tuoni ki ku nitoa nua, bi baa taani ki kuadi yaa nua n fo ki boagidi i ligi, bi go didi baa taani ki boagidi yaa nua n kpe moko.
36Ama bi yaa den tuodi ki bani o nua yeni tuonma po, ke o daano naa tieni liba kuli ki baa kubi o cua, o baa lingi naatoa ki pa o naakpiemo daano, ama lani yaa puoli omo n di die o naakpiemo.
Ti yandi subu maama
37Nilo yaa suni nua bi pebiga, o yaa kodi o bi o yaa kuadi o o baa pa ne muu o nua yeni po, leni pe naa ki pebiga yaa po mo.
Currently Selected:
MI ÑAMA 21: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
