MI ÑAMA 25
25
1Li Miali Diedo den maadi leni Musa ki yedi:#Ñam 35.4-9 2«Maadi leni Isalele yaaba, teni ban baa npo bu paabu. Yin ga laa paabu yua puni leni ti bulicindi kani. 3Diidi mani yin baa ga bikani yaa paabu nne: Wula, ŋanjilifa leni ti kumoandi, 4yaa caba n moani ki suudi, yaa moani colicoli leni *len tiidi gaali, ti ŋuakobidi, 5a petona gbandi ke ti sie ki tu tu ki moani moani, leni yaa gbandi n nugi ki juagi, akasia yaa daadi, 6mi fidisankpama, yaa tiibidi n pia u nuulimanu mi gagidiŋanbima kpama po leni tulale mi juuma po, 7onigisi tana leni tantoana yaa moko n pia li mayuli ke bi baa ŋuuni u *benŋuunu nni leni o kopadiciamo *benliadili nni. 8Bi baa tii npo u *kaangagidiŋamu lan tie min fidi ki yaa ye bi siiga. 9N baa waani yi li gbandieli leni li tadimu n baa tie maama. Yin ŋoadi ki tieni likuli nani min waani yaa nannanli yeni.
Ku ŋantaadikpaku n baa tie maama
10Yin tieni ku kpaku leni akasia daadi ku foagimu baa tie nukpanduna lie leni boagidima, ku pianu mo baa tie nukpandunyenli leni boagidima ku kpedima mo baa tie nukpandunyenli leni boagidima.#Ñam 27.1-9 11Ŋan boali ku leni wulamoano tugu nni leni niinpo kuli, ŋan go kugini ki gaani ki cebini leni wula. 12Ŋan duadi kupo wula ñoagibila naa ki tieni ku logidinaadima nni ñoagibila lie poyendu, ñoagibila lie u poyu. 13Ŋan pedi dopandi yi n tie akasia ki boali i wula. 14Ŋan kuani i dopandi ku kpaku ñoagibila yaa n ye ganu leni jienu ke bi baa fidi ki yen tugi ku. 15Ŋan cedi i dopandi yeni n yaa tu ku kpaku ñoagibila yeni nni ŋan da soadi ki ñani i. 16Ŋan kpieni ku kpaku nni li *balimaama *tanpabimu min baa teni a yaamu.
17Ŋan tagi ku kpaku biili leni wulamoano. Li bonbiili foagimu baa yaa tie nukpanduna lie leni boagidima, u pianu mo baa yaa tie nukpandunyenli leni boagidima.#Ebl 9.5 18Ku kpaku biili ganu leni jienu po kuli ŋan tagi *selubanba bonba lie yaa nannanli. 19Bi selubanba bonliediba yeni baa duadi ki taani leni ku kpaku biili. Selubanyendo baa ye ku kpaku biili ganu po o yua mo ku jienu po, ganu leni jienu ki goa mi joma po. 20Selubanba yeni baa yaa tiegi biyabe, bi nunjoma baa pegidi ki yaa nua ku kpaku biili, bi fiabi baa yaa yuugi. 21Ŋan taa min baa teni a yaa balimaama tili yeni ki kpieni li ku *ŋantaadikpaku nni ki ŋoadi ki taa ku kpaku biili ki ŋoagini. 22Min baa yaa kadi leni a naankani n tie ku kpaku biili tanpoli. N baa kadi leni a ku kpaku biili tanpoli selubanba bonliediba siiga yaaba n ye ku ŋantaadikpaku tanpoli yeni. N baa maadi leni a ki teni a n balimaama kuli Isalele yaaba po.
Ban maandi U Tienu dupen yaa tabili po
23Ŋan kpie tabili leni akasia daadi. Li foagimu baa pundi nukpanduna lie li pianu mo nukpandunyenli, li kpedima mo nukpandunyenli leni boagidima.#Ñam 37.10-16 24Ŋan boali li kukuli leni wulamoano ki go kugini likuli leni wula ki gaani ki cebini. 25Ŋan gaani ki lindi li leni yaa bonguudu n baa yaa pia nani ku nupuogu yaa pianu yeni, ŋan go kugini li kukuli leni wula ki ban cebini. 26Ŋan duadi ñoagibila naa leni wula ki tieni a mi logidima nni a taanaada sedikaanu. 27A ñoagibila yeni baa yaa kuu leni yaala n kugini tabili yeni. I dopandi baa yaa tu a ñoagibila yeni nne ke ban fidi ki tugi tabili yeni. 28Ŋan tieni i dopandi leni akasia yaa daadi ŋan boali i kukuli leni wula. Laa dopandi n baa todi tabili yeni tugima. 29Ŋan tagi mu tadimu, mu tadibuomu leni yaa tiadi n baa todi bi yaa baa cabi U Tienu po mi daama yaa yogunu. Ŋan tieni likuli leni wulamoano. 30Ŋan bili tabili po yaa dupen n gagidi ki ŋani n nintuali, laa bonla n yaa tiendi yogunu kuli.#Lef 24.5-8
U fidisantuankaanu leni u benleleedi
31Ŋan tagi u fidisantuankaanu leni wulamoano. U fidisantuankaanu baa tie yaa wula n pua ki tandi: U fidisantuankaanu taali, u kankagili, u tadibuomu, u puuma leni yaala n ŋoagini kuli baa tie yenme.#Ñam 37.17-24 32Beni luoba n baa ña u kali nni. U fidisantuankaanu kali yendu nni baa ña beni taa, u kali yu mo n ña beni taa goga. 33I benluobidi yeni kuli yaa siiga benu kuli baa yaa pia tadibuomu taa ke mu naani leni amandie yaa bonluonkaala. 34U fidisantuankaanu benjali po baa yaa pia tadiñokaamu naa ke mu naani leni amandie yaa bonluonkaala leni li muada leni li puuma kuli. 35I benliedi n tugini ki ñani u fidisantuankaanu benjali kani naankani kuli baa yaa pia nani li gbinli yeni. Yaa benliedi n ŋua moko n ñani naani li benjali po moko baa yaa pia li gbinli nannanli. Li go baa yaa tie yene yaa benliedi n sieni moko yaa po. Yaa benluobidi n ñani u fidisantuankaanu yeni kani kuli po, li baa tie yene. 36U fidisantuankaanu beni leni yaala n naani leni a gbina yeni kuli baa duadi ki taani yenma. Li kukuli baa tie wulamoano.
37Ŋan tagi fidisanmu lele. Ŋan tuani mu fidisanmu yeni maama ke mu baa yendi nintuali. 38Mu babimu leni mi fantanpienma tadimu moko baa yaa tie wulamoano. 39U fidisantuankaanu leni u tiadi baa tieni leni wulamoano yua yaa kpiagu n pundi kilo piitaa. 40Diidi ki yuandi ki tieni nani ban den waani a yaa nannanli li juali po yeni.#JTT 7.44; Ebl 8.5
U kaangagidiŋamu
Currently Selected:
MI ÑAMA 25: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
