MI ÑAMA 24
24
1U Tienu den yedi Musa: «Ŋan do ki cua mini Li Miali Diedo kani fini leni Alono leni Nadabi leni Abihu leni Isalele yaaba nikpeliba siiga niba piilele. Yin pugi mani nni ki da ye hali foagima. 2Fini Musa bebe n nagini mini Li Miali Diedo kani, bani yaaba n sieni n da nagini n kani, ku niligu mo n da do leni a ki cua n kani.»
3Musa den cua ku niligu kani ki waani ba Li Miali Diedo ñoabona kuli leni o *bali maama kuli. Ku niligu kuli den taani ki maadi mayenma ki yedi: «Ti baa tieni Li Miali Diedo n yedi yaala kuli.»
4Musa den diani Li Miali Diedo n den maadi yaa maama kuli. Lani o den fii ku tiŋaapanpangu ki gedi li juali tinga ki maa li *padibinbinli ki sieni piiga n tanalie mi tiadima po nani Isalele piiga n buoliedi n de maama. 5O den soani Isalele yaaba jawaaba siiga bi tianba ke bi padi ki juu Li Miali Diedo po a padijuukaana ki go padi a naatona ke a tie mi taanyenma yaa pada. 6Musa den taa mi padisoama boagidima ki kuodi mu tadibuomu nni, ki go taa yaa soama boagidima n sieni ki wuli li padibinbinli po. 7O den taa o *ŋantaado tili ki cogi bi niba po ke bi yedi: «Ti baa tieni Li Miali Diedo n yedi yaala kuli, ti baa tuo ki yaa ŋua likuli.»
8Lanwani Musa den taa mi soama ki mii mii ku niligu po ki yedi: «Diidi ki le mani, yaa soama n tie na waani ke Li Miali Diedo ŋantaado baa ye nani wan bili yipo a ñoabona maama yeni.»#Mat 26.28; Mak 14.24; Luk 22.20; 1Kol 11.25; Ebl 9.19-20; 10.29
9Musa den doni li juali leni Alono leni Nadabi leni Abihu leni Isalele yaaba nikpeliba siiga niba piilele. 10Bi den laa Isalele yaaba Tienu. O taana tiipo den naani leni safili tana ki boani nani tanpoli n boani maama ki ñuliti kolikoli. 11U Tienu naa den tandi o nuu ki faligi Isalele yudanba. Bi den laa wani U Tienu ki nan dini ki go ñuni.
Musa tuogi U Tienu li juali yuli po
12Li Miali Diedo den yedi Musa: «Ŋan do li juali ki cua n kani ki guudi. N baa teni a yaa bondiankaani n tie mu *tanpabimu, min diani n balimaama leni n ñoabonbilikaana Isalele yaaba bangima po naankani.»
13Musa den fii leni Josue, yua n den tuuni opo, ki doni U Tienu juali. 14O den yedi bi nikpeliba: «Yin guudi mani ti nekanba hali tin baa guani yi kani. Diidi ki le mani Alono leni Huli baa ye leni yi. Yua n pia maama kuli wan gedi bikani.» 15Musa den doni li juali po ku tawaligu mo den ŋoagini li. 16Li Miali Diedo kpiagidi den jiidi Sinayi juali po ku tawaligu den ŋoagini li dana luoba. Li daleleeli daali Li Miali Diedo yua n den ye ku tawaligu niinni den yini Musa. 17Isalele yaaba den laa Li Miali Diedo kpiagidi ke ti den ye li juali yuli po ki tie nani yaa fantama n co ki bolindi yeni. 18Musa den kua ku tawaligu niinni ki go doni hali li juali yuli po. Lani Musa den ye li juali yuli po dana piinaa leni ñadi piinaa.#Tia 9.9
Isalele yaaba yaa todima
Currently Selected:
MI ÑAMA 24: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
