Luki 10
10
Jesu soani o ŋoadikaaba piilele n bilie
1Li yaa puoli, o Diedo go den gandi ŋoadikaaba piilele n bilie#10.1 Bi tianba yedi ŋoadikaaba piilele. ki soani ba nibilie lie ke bi kua o liiga, ki gedi wani o ba n den baa gedi yaa dogi leni yaa kaani kuli. 2O den yedi ba: «U jetaagu yabi, ama bi tuonsoanba nan wa. Lanwani, yin mia mani u jetaagu Diedo wan soani bi tuonsoanba o jetaagu po. #Mat 9.37-38. 3Gedi mani! Diidi ki le, n soani yi nani a pebila yeni i fuasangbanli siiga. #Mat 10.16. 4Yin da taa mani ligiboagili, ba sancenboagili, ba cacaadi, ki da sedi u sanu nni ki fuondi oba. #Mat 10.7-14; Mrk 6.8-11; Luk 9.3-5. 5Yin kua yaa diegu nni kuli, kpa fuondi mani ki yedi: ‹Mi yanduanma n yaa ye ku naa diegu nni.› 6Yua n bua mi yanduanma yaa ye lienni, yin gaali o yaa yanduanma yeni, baa yaa ye leni o. Yua n bua mi yanduanma yeni yàá ye likani mo, yi gaali n guani yi kani. 7Yin yaa ye laa diegu nni ki di ki go ñu ban puuni yi yaala kuli, kelima o tuonsoanlo pundi ki baa o panpaani. Yin da ña diegu nni, ki tuadi dietoagu. #1Kor 9.14; 1Tim 5.18. 8Yin kua yaa dogu nni ke bi gaa yi cangu kuli, yin je ban puni yi yaala, 9ki paagi yaa yiama n ye likani ki yedi ba: ‹U Tienu diema cua yi kani.› 10Ama yin kua yaa dogu nni ke baa gaa yi cangu kuli, yin ña ki sedi bi sani nni ki yedi: #JTT 13.51. 11‹Ti kpia ba yi dogu tama yaama n tabini ti taana yeni. Ama yin bandi bonŋanla ke U Tienu diema cua.› » 12Jesu den pugini ki yedi o ŋoadikaaba: «N yedi yi ke ti buudi daali, Sodomi yaa buudi kaa bia ki pundi laa dogu yaaba buudi. #Cil 19.24-28; Mat 11.24; 10.15.
Yaa dogi n yie Jesu maama
(Mat 11.20-24)
13Fala baa yaa ye leni fini Korasini dogu. Fala baa yaa ye leni fini Betisayida dogu, kelima yaa bancianma n tieni a niinni ne yaa den tieni hali yogu Tiiri leni Sidon dogi nni, bi den baa la li paboanli tiadi leni mi fantanpienma ki lebidi bi pala. #Esa 23.1-18; Esk 26.1—28.26; Jl 4.4-8; Amo 1.9-10; Sak 9.2-4. 14Lani yaa po, ti buudi daali Tiiri leni Sidon dogi yaa fala kan yaa bia ki pundi yi yaa fala. 15Fini, Kafarnawum dogu moko, a tama ke a baa fiini a yuli hali tanpoli po bi? Kalam, bi baa jiini a hali bi tinkpiba diema nni.» #Esa 14.13-15.
16Jesu go den yedi o ŋoadikaaba: «Yua n cengi yi maama cengi n yaama, yua n yie yi mo yie mini, yua n yie mini mo yie yua n soani nni.» #Mat 10.40; Mrk 9.37; Luk 9.48; Jan 13.20.
Jesu ŋoadikaaba piilele n bilie guani o kani
17Ŋoadikaaba piilele n bilie yeni den guani Jesu kani leni li pamanli ki yedi: «Ti Daano, ba mu cicibiadimu moko tuodi ti maama a yeli nni.» 18Jesu den yedi ba: «N den laa ke Sutaani ñani tanpoli ki peli nani mi tañigima yeni ki baa. 19N puni yi u paalu ke yi baa fidi ki yaa ŋmaadi i we leni i nami, ki yaa paani yibali paalu kuli. Liba kuli kan fidi ki tieni yi yaala n bia. #Ps 91.13. 20Ba yeni, yin da mangi mani yi pala kelima mu cicibiadimu tuo yi maama, ama yin mangi yi pala kelima bi diani yi yela tanpoli po.»
U Tienu Fuoma Yua mangi Jesu pali boncianla
(Mat 11.25-27; 13.16-17)
21Lanyogunu liga, U Tienu Fuoma Yua den teni ke Jesu pali mangi hali boncianla, ke o yedi: «Baa, fini yua n tie tanpoli leni ki tinga kuli Diedo, n pagi a kelima a doagini li naa bonla bi yanfuodanba leni bi nunfandanba kuli po, ki doagidi la yaaba n tie nani a bonwaala yeni po. Yeni de! Baa, li tie yeni ki ŋoadi a yanjagiŋanli.» 22Jesu den pugini ki yedi: «N Baa puni nni li bonla kuli bali. Oba kuli ki bani Bijua n tie yua, kali Baa bebe. Oba kuli mo ki bani Baa n tie yua, kali Bijua leni wani Bijua n bua ki doagidi o yua yaa po.» #Jan 3.35; 10.15. 23Lani, Jesu den jigidi ki noanli o ŋoadikaaba ki maadi leni bani bebe ki yedi: «Li pamanli ye leni yi, kelima yin laa yaala po. 24N yedi yi ke bi saawalipuaba leni bi badiba boncianla den bua ki le yin nua yaala na, ki naa laa la. Bi den bua ki gbadi yin gba yaala na, ki naa gbadi la.»
Samari niŋamo
(Mat 22.32-35; Mrk 12.28-34)
25U Tienu bali maama bangikaciamo yendo den fii ki bua ki biigi Jesu, ki yedi o: «Canbaa, n baa tieni lede ki baa yaa miali n kan gbeni?» #Mat 22.35-40; Mrk 12.28-34. 26Jesu den yedi o: «Be n diani li bali maama nni? A cogi be lienni?» 27O den guani ki yedi o: «Ŋan bua o Diedo a Tienu leni a pali kuli leni a miali kuli leni a fidu kuli leni a yantiali kuli, ki go bua a lielo nani ŋan bua a yuli maama.» #Lev 19.18; Tia 6.5. 28Jesu den yedi o: «A guani ke li tiegi. Yaa tiendi yeni, a baa yaa ye.» #Lev 18.5. 29Li bali maama bangikaciamo yeni den bua ki saa o yuli po i moamoani, ki yedi Jesu: «Ŋme n tie n lielo?»
30Jesu den guani ki yedi o: «O joa den ñani Jerusalemi, ki jiidi ki caa Jeriko. O den baa bi sanjiaba siiga, ke bi bibi o, ki fie wan pia yaala ki go pua pua o ki ŋaa o ke wani leni mi kuuma ki foagi, ki ban caa. 31Li den sua ke bi kopadicianba siiga yendo moko jiidi ki tagi laa sanu. Wan den laa o joa yeni, o den jadi ki balini ki pendi. 32Levi buolu yua moko n den jiidi ki pundi likani ki laa o joa yeni, o den jadi ki pendi. 33Ama, Samari nilo, den caa u dogu ki cua likani. Wan den laa o joa yeni, mi ninñima den cuo o. #2Baj 28.15. 34O den nagini ki tieni o nala mi kpama leni duven ki finfini a a caba, ki jagini o wani o ba yaa bonjaginkaala po, ki gedini o ki ban baa o po ku candiegu ki kubi o. 35Lan fii ki faa, o den ñani kujapienalie#10.35 Diidi Matie 20.2. Kujapienalie yeni tie o tuonsoanlo n baa gaa yaala danalie tuonli po. ki teni ku candiegu daano ki yedi o: ‹Yaa kubi o, ŋan baa biani o po yaala ki pugini line po, n yaa lebidi ki guani, n baa pa ŋa.› »
36Lani, Jesu den buali o ki yedi: «A yaa yama po, bi nitaadiba yeni siiga, ŋme n tie yua n den baa bi sanjiaba siiga yeni lielo?» 37O den guani ki yedi o: «Yua n gbadi o po mi ninñima yene.» Jesu den yedi o: «Amo n gedi ki ban yaa tiendi yeni.»
Jesu cani Marti leni Mariyama
38Jesu go den taa u sanu, wani leni o ŋoadikaaba. O den kua doyendu nni. Yaa pua n yi Marti den gaa o cangu. #Jan 11.1. 39O pua yeni den pia o waalo ke o tie pua ki yi Mariyama. Wani Mariyama den kali Jesu taana kani ki cengi o maama. 40Ku diegu tuonli den yagi Marti yama ke o cuoni ki lindi. O den cua ki yedi Jesu: «N Daano, laa yia ŋa leni n waalo n ŋaa nni ke n tuuni nbebe? Yedi o wan todi nni.» 41O Diedo den guani ki yedi o: «Marti, Marti, a yagini a yama ki cuoni ki lindi li bonla boncianla po. 42Ama bonyenla n tie tiladi; Mariyama gandi li bonŋanla, ban kan fie o yaala.»
Currently Selected:
Luki 10: BGP
Highlight
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
