Luki 11

Jesu bangi o ŋoadikaaba i jaandi

(Mat 6.9-13; 7.7-11)

1Dayenli, Jesu den gedi kaanuba ki ban jaandi. Wan den jaandi ki gbeni, o ŋoadikaaba siiga yendo den yedi o: «N Daano, bangi ti tin baa jaandi maama, nani Jan n bangi o yaa ŋoadikaaba maama.» 2Jesu den yedi ba: «Yi yaa yen baa jaandi, yin yedi:

‹Ti Baa, a yeli n baa mi gagidiŋanma.

Ŋan teni a diema n cua.

3Pa ti yaa jiema n baa dagidi ti daali kuli.

4Pa ti sugili ti tuonbiadi po,

Kelima timoko puuni sugili yaaba n tudi ti po kuli.

Da tuo tin baa mi tulinma nni.› »#11.4 Mi tulinma nni: yaa ka mi biigima nni.

5Jesu go den yedi ba: «Yi siiga yendo yaa pia o danli ki gedi o kani ku yoagisiigu, ki yedi o: ‹N danli, ledi nni dupen bonbitaa, 6kelima n danli yendo fii li sancenli, ki cua ki cani nni, ke n naa pia liba ki baa candi o.› 7O danli yua n ye o dieli tugu nni yeni yaa guani ki yedi o: ‹Da yagini n yama! N luoni bu buliñoabu no. Mini leni n bila kuli duani, n kan go fidi ki fii ki teni a.› 8N yedi yi, ba o yaa kan fii ki teni o, kelima o tie o danli, o baa fii kelima o tigini po, ki teni o wan luo yaala yeni kuli.

9Lani yaa po, n yedi yi, mia mani, bi#11.9 Nekanba, yaala n yedi: «Bi,» yeni tie U Tienu. baa pa yi, lingi mani, yi baa le. Pua mani bu buliñoabu kani, bi baa luodi yi po. 10Yua n mia kuli baa baa, yua mo n lingi kuli baa le, bi baa luodi yua n pua bu buliñoabu kani kuli po mo. 11Yinba bibaanba siiga, ŋme yaa biga n baa mia o dupen, wan teni o li tanli, bi o yaa mia o o jamo, wan teni o o wa? 12Bi o baa mia li jenli, wan teni o o namo? 13Yinba yaaba n bia yaa bani ki pa yi bila li bonŋanla, lanwani laa pia kuli tama ke ti Baa yua n ye tanpoli baa pa yaaba n mia o o Fuoma Yua.»

Jesu n deli mu cicibiadimu yaa paalu po

(Mat 12.22-30; Mrk 3.22-27; Luk 12.10)

14Jesu den deli ki baa ñani o nilo niinni yaa cicibiadiga n teni ke o tie muulo. Ki cicibiadiga yeni n ñani yaa yogunu, o muulo den maadi ke li pakili cuo ku niligu. 15Ama bi tianba den yedi: «Mu cicibiadimu bado Belisebuli n puni o u paalu ke o fidi ki deli mu cicibiadimu bi niba niinni.» #Mat 9.34; 10.25. 16Bi tianba mo den bua ki dia Jesu ku madiagu, ki mia o ke wan tieni yaa bancianma n baa doagidi ke o paalu ñani U Tienu kani. #Mat 12.38; 16.1; Mrk 8.11. 17Jesu den bani ban maliti yaala, ki yedi ba: «Yaa diema n boagidi ki tuogi leni mi yuli kuli baa bodi,#11.17 Yaa ka, ku diegu yaaba mo yaa paadi ki tuogi leni biyaba, laa diegu baa bodi. mi diena kuli mo baa yaa baali aya po. 18Sutaani yaaba mo yaa deli ki ñani Sutaani yaaba, o diema baa tieni lede ki yaa ye? N yedi yeni kelima yi yedi ke mu cicibiadimu bado Belisebuli puni nni u paalu ke n deli mu cicibiadimu. 19Belisebuli n yaa puni nni u paalu ke n deli mu cicibiadimu, yi yaa ŋoadikaaba mo deli mu ŋme yaa yeli nne? Lani yaa po, bi baa jia yi buudi. 20Ama li yaa tie U Tienu n puni nni u paalu ke n deli mu cicibiadimu, lanwani U Tienu diema pundi yi kani.

21O gbanmandaano yaa kubi o jatiadi ki guu o diegu, wan pia yaala kuli, waa bangi li po. 22Ama yua n pa ki cie o yaa cua ki baa o ki paadi o, o baa fie o jatiadi wan bi dugi yaadi yaa po kuli, ki taa o fagidi ki boagidi boagidi.

23Yua n ki taa n po kuli tie n yieka. Yua n ki todi nni ke n taandi, nan yadi wani. #Mrk 9.40.

Ki cicibiadiga guanma

(Mat 12.43-45)

24Ki cicibiadiga yaa ñani o nilo niinni, ki yen gedi ki ban yaa gaandi yaa fuali n ki pia ñima nni, ki lingi mi fuodima. Ki yàá laa, ki baa yedi: ‹N baa lebidi ki guani n dieli po min den ñani naani.› 25Ki yaa pundi, ki baa sua ke li pidi ki ŋanbi. 26Lanwani, ki baa gedi ki ban taa cicibiadimulele yaamu n bia ki cie kani kiba, mun yegi ki ban kua li niinni ki yaa ye. Laa nilo yeyuankaama baa yaa bia ki cie mi kpiama.»

Mi yemanmoanma maama fuuli

27Jesu n den maadi yeni yaa yogunu, o pua den kpaani ku niligu siiga ki yedi o: «Li pamanli ye leni yaa pua n mali a leni yaa biina n ŋaani a kuli.» 28Jesu den guani ki yedi o: «Li pamanli n ye leni yaaba ki cie tie yaaba n cengi U Tienu maama, ki kubi ma.»

Bi mia Jesu wan tieni mi bancianma

(Mat 12.38-42; 16.1-4; Mrk 8.11-12)

29Bi niba boncianla n den taani ki ŋabi ki mabindi Jesu, o den yedi: «Moala ne niba tie nibiadiba. Bi miadi yaa bancianma n tie sinankeene, ama bi kan tieni bi po sinankeentoa, li yàá tie Jonasi yua yaa ka. #Mat 16.4; Mrk 8.12. 30Nani Jonasi n den tie sinankeene Ninivi dogu yaaba po maama, o Joa Bijua moko baa tua sinankeene moala niba po yene. #Jon 3.4. 31Yaa diema n ye nuganu po puobado baa taani ki sedi leni moala ne niba ti buudi daali, ki bu ki cuo ba, kelima o den ñani hali foagima, ki cua ki cengi Salomon yanfuoma maama. Ama moamoani, yua n cie Salomon ye ne. #1Bad 10.1-10; 2Baj 9.1-12. 32Ninivi dogu yaaba moko baa taani ki fii ki sedi leni moala ne niba ti buudi daali ki bu ki cuo ba, kelima Jonasi n den waani ba U Tienu maama, bi den lebidi bi pala. Ama moamoani, yua n cie Jonasi ye ne. #Jon 3.5.

Ti gbanandi yenma

(Mat 5.15; 6.22-23)

33Niloba kan cuoni fidisanga ki kuani ga yaa kaanu n wuo, yaa ka ki taa li sancianli ki ŋoagini ga. Ama o baa taa ki tuani ga u fidisantuankaanu, ke yaaba n kua li dieli nni kuli n yaa nua mi yenma. #Mat 5.15; Mrk 4.21; Luk 8.16. 34A nunbu n tie a gbanandi fidisanga. A nunbu yaa ŋani, a gbanandi kuli baa yaa yieni bonŋanla. Ama a nunbu yàá ŋani, a gbanandi kuli baa yaa ye li biigili nni. 35Lani yaa po, ŋan fangi a yuli ki da teni ke yaa yenma n ye a niinni n tua biigili. 36A gbanandi kuli yaa yieni bonŋanla, ke li biigili ki ye kaanuba kuli, tikuli baa yaa yieni nani ki fidisanga n yen yendi a po maama.»

Jesu jaligi mi jaanma yudanba

(Mat 23.1-36; Mrk 12.38-40)

37Jesu n den maadi yaa yogunu, Farisieni yendo den yini o ke wan kua ki je o deni. O den kua ki kali u saajekaanu kani. 38Farisieni yeni n den laa ke waa nidi ki baa je, li den paki o. 39O Diedo den yedi o: «Yinba Farisieninba, yi yen ŋuudi ki ŋanbi ki tadiñokaaga leni ku saajetadigu kuli puoli po, ama yi tugu nni nan gbie leni yin fenli yaala leni yin tiendi yaa biadima. 40Yinba, bi yanpiidanba yeni, yua n tagi puoli po, wan ka tagi tugu nni mo? 41Pa mani a luoda yaala n ye yi pala tugu nni, lani, yaala n sieni kuli baa ŋanbi yi po.

42Fala baa yaa ye leni yinba Farisieninba, kelima yi coadi yaa kpinfaadi n yi menti leni ru leni kpinfatoadi kuli, ki ñandi diim. Ama yi ŋaa mi teginma leni U Tienu yaa buama. Li pundi yin yaa bi tiendi lani, ki nan da cedi yin maani ki tiendi yaala yeni mo. #Lev 27.30.

43Fala baa yaa ye leni yi, yinba Farisieninba, kelima yi bua ki yaa kaa i nician-kalikaani li bali maama bangima diena nni, ki go bua bi niba n yaa fuondi ki kpiagidi yi mu daamu nni. 44Fala baa yaa ye leni yi kelima yi tie nani yaa takula n ki ñii, ke bi niba cuoni a po kaa faami.»#11.44 Jufi yaa den cuoni ban piini nilo naani, o miidi li kuali ki joagini U Tienu po. Diidi Mi Coadima 19.11-13.

45Li bali maama bangikacianba siiga yendo den guani ki yedi o: «Canbaa, ŋan maadi maama na, a sugidi timoko.» 46Jesu den guani ki yedi: «Fala baa yaa ye leni yimoko, yinba li bali maama bangikacianba, kelima yi tungi bi niba a tugikpiaga, yinba yi ba n kan tuo ki sii ya leni yi nubili.

47Fala baa yaa ye leni yi, kelima yi guani ki maa ki ŋanbidi yi yaajanba n den kpa yaa saawalipuaba yaa takula. 48Yeni, yi tiendi siedi ke yi yama dagidi leni yi yaajanba tuona, kelima bani, bi den kpa bi saawalipuaba, ke yimo maa bi takula po li bontiadikaala. 49Li tie lani yaa po ke U Tienu yanfuoma mani miba yedi: ‹N baa soani bi kani o saawalipuaba leni a tonda. Bi baa kpa bine ki faligi bine.› 50Lani yaa po, U Tienu baa tuu moala ne niba bi yaajanba n den kpa yaa saawalipuaba ki wuli bi soama panli, ki cili leni Abeli soama hali ŋanduna tagima yogunu, 51ki pundi hali Sakari#11.51 Sakari: yeni tie o Sakarikpialo, 2Baj 24.20-22. yaa soama, ban den kpa yua U Tienu diegu nni, li padibinbinli leni u kaangagidiŋamu siiga. Yeni de! N yedi yi ke U Tienu baa tuu moala ne niba laa kuuma kuli panli. #Cil 4.8; 2Baj 24.20-21.

52Fala baa yaa ye leni yi, yinba li bali maama bangikacianba, kelima yi tuudi ki ñani mi bancianma buliñoabu sendabiga.#11.52 Sendabiga: lani n go tie u bonluodu. Yii kua yiba, yi go yie yaaba n bua ki kua mo yaa po.»

53Jesu n den ñani lankani, li bali maama banda leni Farisieninba den tigini o leni mi mapaama. Bi den buali o yaa bonla n yabi. 54Bi den dia o ku madiagu, ki bua ki baa o ñoabu nni maama, ban baa fidi ki gedini yaama li bali danba kani.

Currently Selected:

Luki 11: BGP

Highlight

Copy