Tẽn‑tʋmdbã tʋʋmã 2
2
Sɩɩg-sõng waoongo
1 #
Mk 23.15-21, Tõ 16.9-11 Pãntekotã#2.1 pãntekotã rat n yeelame tɩ rasem pisnu daare. daar sẽn ta, bãmb fãa rag n tigma taab zĩig a yembre. 2La tao-tao bala, bʋrg sẽn wẽnd sob-kãseng sẽn fugd bʋrg yii arzãn n wa n pid roog ning pʋg bãmb sẽn dag n zĩ wã. 3La bãmb yãnda bũmb sẽn wẽnd wa zɛlma, n yaa wa bug-witim, n welg taab n sig ned kam fãa zugu. 4Bãmb fãa pida ne Sɩɩg-sõngo. La b sɩngame n gom gom-zẽn wa sẽn zems Sɩɩgã sẽn kõ-b tɩ b gomã.
5La Zʋɩf-rãmb sẽn sakd tẽebã sõama, sẽn yi soolem nins fãa sẽn be dũniyã tɛkã, n dag n wa n be Zeruzalɛm. 6Bʋrgã sẽn maanã, neb kʋʋng wʋsg tigma taaba. La bãmb fãa yɛɛsa wʋsgo, ned kam fãa sẽn da wʋmd Kiris tẽedbã sẽn gomd ne yẽnda meng goamã yĩnga. 7La a linga bãmb tɩ b yɛɛs n yetẽ yaa: «Nin-kãensã fãa sẽn gomdã, b ka Galɩle neb wɛ? 8La maana a wãn tɩ tõnd ned kam fãa wʋmd bãmb sẽn gomd tõnd mens goam d sẽn dog ne‑a wã? 9Neb sẽn yit Part la Meed ne Elam dãmba, ne neb nins sẽn yi Mezopotami la Zʋʋde la Kapadoos la Põ ne Aazi soolem, 10la Firzi la Pamfili ne Ezɩpt la Libi soolem toadgã sẽn pẽ Sirɛnã. 11La neb nins sẽn yi Rom n yaa Zʋɩf-rãmbã la bu-zẽms sẽn sakd Zʋɩf-rãmbã kaorengo, la Kɛrɛt nebã ne Araabi neb bee tõnd sʋka. La baoosgo tõnd wʋmda b sẽn gomd Wẽnnaam tʋʋm kãsemsã ne tõnd mens goamã!» 12Bãmb fãa yɛɛsame n dag n ka mi b sẽn na n tags tɩ bũmb ning ye. La b goma ne taab n yeel tɩ bõn-kãngã võor yaa bõe. 13La neb a taab rag n yaanda Kiris tẽedbã n yetẽ tɩ b yũu rãam n tɩge.
A Pɩyɛɛr koe-mooneg Pãntekotã daare
14Dẽ, a Pɩyɛɛr yika yĩngr ne neb piig la a yembrã n zẽk a koɛɛg n gom ne neb kʋʋngã a woto: Yãmb Zʋɩf-rãmba, la yãmb fãa sẽn be-b Zeruzalɛm, bãng-y bõn-kãnga, la y kelg mam goamã neere. 15Nin-kãensã ka yũ rãam wala yãmb sẽn tẽedã ye. Bala, nan ket n yaa yibeoogo, wakat a wɛ bala. 16La yaa bũmb ning Wẽnnaam no-rɛɛs a Zowɛll sẽn da togsã:
17 #
Zow 3.1-5
Wẽnnaam yeelame yaa: «Yaoolem wakate,
mam na n pʋdga m Sɩɩgã ninsaalbã buud fãa zutu.
Yãmb kom-dibli la y kom-pugli na n togsa bãngr goamã.
Yãmb kom-bɩɩs na n yãnda vẽnegre,
la yãmb nin-kẽemb na n paama zãmsdo.
18N ye! Ra-kãens daare,
mam na n pʋdga m Sɩɩgã m tʋmtʋmd-raopã
la m tʋmtʋmd-pogsã zutu,
la b na n togsa bãngr goamã.
19Mam na n maana bõn-yɛɛsds yĩngri, saasẽ,
la bõn-bãn dũniyã zugu, zɩɩm, la bugum,
la bug-zõos na n zĩndame.
20Wĩndgã na n lebga lik bida,
la kiuugã na n lebga wa zɩɩm,
tɩ Zu-soabã daarã sẽn yaa ra-kãseng
la sẽn be ziirã yaool n wa.
21La ned ning fãa sẽn na
n pʋʋs ne Zu-soabã yʋʋr
na n paama fãagre.»
22Yãmb Israyɛll nebã, kelg-y gom-kãensã. Yãmb mens miime tɩ yaa Nazarɛt dao a Zeezi la Wẽnnaam tall n maan bõn-bãnã la bõn-yɛɛsds la bãn yãmb sʋkã, n wilg tɩ yaa bãmb n tʋm-ba. 23#Mat 27.35, Mark 15.24, Luk 23.33, Zã 19.18B zãmba rao-kãngã, n yõk n kõ yãmb wa sẽn zems Wẽnnaam yam-yãkrã, la bãmb sẽn dag n pĩnd n yeelã. Yãmb kɩtame tɩ yel-wẽn maandb ka a Zeezi da-pɩk zug n kʋ-ba. 24#Mat 28.5,6, Mark 16.6, Luk 24.5La Wẽnnaam vʋʋga bãmb n fãag-b kũum pãng nugẽ. Bala, kũumã pãng rag n ka tõe n tall bãmb ye.
25 #
Yɩɩn 16.8-11
Bala, a Davɩɩd dag n goma b yell n yeel yaa:
«Mam dag n yãta Zu-soabã mam taoor wakat fãa.
Bala, bãmb bee ne maam, sẽn na n yɩl
tɩ bũmb da wa n miim maam ye.
26Woto yĩnga, mam sũur pida ne sũ-noogo,
la mam zelemd kɩdemdame.
La baa mam yĩngã na n vʋʋsa tẽeb pidsg gũudum pʋgẽ.
27Bala, yãmb ka na n bas maam
kɩɩm-kulg pʋgẽ ye, la yãmb kõn bas
y sõmblem soabã t'a pa yaoogẽ n põog ye.
28Yãmb wilga maam vɩɩm soayã:
Yãmb na n pida maam ne sũ-noog y nengẽ.»
29M saam-biisi, kõ-y maam noor tɩ m gom ne yãmb tõnd yaab a Davɩɩd yell vẽenega: Bãmb kiime, tɩ b mum-ba, la b yaoog ket n bee tõnd sʋk hal tɩ ta rũndã. 30#Yɩɩn 132.11, 2Sãm 7.12,13La bãmb dag n yaa Wẽnnaam no-rɛɛsa, n mi tɩ Wẽnnaam dag n wẽename n kãab bãmb n yeel tɩ b na n kɩtame tɩ b yagensã sʋka, a yembr sẽn yit bãmb buud pʋgẽ zaoond b naamã geer zugu. 31A Davɩɩd da reng n goma Kirisã vʋʋgrã yell n yeel tɩ b ka bas Kiris kɩɩm-kulg ye, la b yĩngã ka pa yaoogẽ n põog ye. 32Yaa Zeezi‑kãng la Wẽnnaam sẽn vʋʋgã, la tõnd fãa yaa bõn-kãng kaset dãmba. 33A Zeezi zẽkame n be Wẽnnaam dɩtgo, la bãmb deega Sɩɩg-sõngã b sẽn da kãabã, b ba wã nengẽ, n pʋdg-a tõnd zutu. La yaa bõn-kãng la yãmb sẽn yãt la y wʋmd moasã wã. 34#Yɩɩn 110.1Bala, a Davɩɩd mengã ka rʋ arzãn ye, la a yeelame tɩ Zu-soab a Wẽnd yeela yẽnda Zu-soabã yaa: «Wa n zĩnd mam dɩtgo, 35hal tɩ m kɩt tɩ f tab f bɛɛbã.» 36Dẽ yĩngã, Israyɛll buudã fãa, bãng-y sɩd-sɩd tɩ Zeezi‑kãng yãmb sẽn ka da-pɩkã zugã, Wẽnnaam kɩtame tɩ bãmb lebg Zu-soabã la Kirisi.
37La nebã sẽn wʋm gom-kãnga, a sɩɩsa bãmb sũyã. La b soka a Pɩyɛɛr ne tẽn-tʋmdbã a taabã yaa: «D saam-biisi, tõnd tog n maana bõe?» 38A Pɩyɛɛr yeel-b lame yaa: «Tek-y yam n kos sugri, la bɩ ned kam fãa sak n deeg koom lisg ne a Zeezi Kiris yʋʋr a yel-wẽnã sugr kũun yĩnga. Dẽ, y na yaool n deeg Wẽnnaam kũunã sẽn yaa Sɩɩg-sõngã. 39Bala, Wẽnnaam kãabgã yaa yãmb ne y kambã yĩnga, la neb nins fãa sẽn be zĩ-zãrgã yĩnga, la neb nins fãa tõnd Wẽnnaam sẽn na n yaool n boolã me yĩnga.» 40A Pɩyɛɛr leb n goma goam a taab n kɩs kaset n sagl-b ne pẽdgr n yeel-b tɩ b fãag b mens n yi zamaan‑kãnga sẽn yaa wẽngã pʋgẽ. 41Neb nins sẽn sak a Pɩyɛɛr goamã paama koom lisgu. La badaare, karen-biis sõor sẽn kolg tus a tãab n paase.
Tẽedbã manesem
42Bãmb dag n sakda tẽn-tʋmdbã zãmsg neere, n vɩ ba-biis lagem-n-taar pʋgẽ, la b kaood burã n dɩt ne taaba, la b pʋʋsd ne taaba. 43La yɛɛsg rag n tara nebã fãa, bala, tẽn-tʋmdbã rag n maanda bõn-yɛɛsds ne bõn-bãn wʋsgo. 44#Tʋʋm 4.32-35Tẽedbã fãa rag n naaga taab zĩ-yende, n dɩk b paoongã fãa n naagd taaba. 45B rag n koosda b paoongã ne b sẽn tarã n pʋɩt ligdã tɩ tat nebã fãa, tɩ ned kam fãa paamd sẽn zemsd sẽn tõe n sõng-a. 46Daar fãa, bãmb da naagda taab noor a yembr n be wẽnd doogẽ wã. Bãmb da naagda taab n dɩt rɩɩbã b yiyã pʋse, la b dag n dɩta b rɩɩbã ne sũ-noogo, la ne sũy sẽn yaa sõama. 47Bãmb da pẽgda Wẽnnaam. La nebã fãa rag n nong-b lame. La daar fãa, Zu-soabã dag n fãagda neb n paasd wẽnd doogẽ wã.
Currently Selected:
Tẽn‑tʋmdbã tʋʋmã 2: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
