A Zã koe‑noogo 17
17
A Zeezi pʋʋsda b karen-biisã yĩnga
1A Zeezi sẽn gom woto n sɛ, bãmb nak n gesa yĩngr n yeele: M ba, wakat taame. Waoog-y y bi-riblã, tɩ yẽnda me waoog yãmba! 2La wa yãmb sẽn kõ yẽnda noor ning Ninsaal buud fãa zutã, bãmb kõta neb nins fãa yãmb sẽn kõ yẽnda wã vɩɩm sẽn kõn sa. 3La vɩɩm sẽn kõn sa wã yaa tɩ nebã na bãng yãmb sẽn yaa y yembre, n yaa sɩd Wẽnnaamã, la b bãng a Zeezi Kirisi, yãmb sẽn tʋm a soabã. 4Mam kɩtame tɩ yãmb paam waoogr tẽng zugu. Mam sɛɛsa tʋʋmd ning yãmb sẽn kõ maam tɩ m maanã. 5Dẽ, moasã, m ba, waoog-y maam y meng nengẽ ne ziir ning mam sẽn dag n tar yãmb nengẽ sẽn deng dũni belmã.
6Mam puka yãmb yʋʋrã neb nins yãmb sẽn yiis dũniyã pʋgẽ n kõ maamã. Yãmb n dag n so-ba, la yãmb kõ-b-la maam, la b reega yãmb goamã. 7Moasã, b bãngame tɩ bũmb nins fãa yãmb sẽn kõ maamã yita yãmb nengẽ. 8Bala, mam togs-b-la goam nins yãmb sẽn kõ maamã. B reega goamã, la b bãnga sɩd-sɩd tɩ mam yii yãmb nengẽ, la b tẽeme tɩ yãmb n tʋm maam. 9Yaa bãmb yĩng la mam sẽn pʋʋsdã. Mam ka pʋʋsd dũniyã neb yĩng ye, yaa neb nins yãmb sẽn kõ maamã yĩnga, bala, bãmb yaa yãmb nebã 10la tɩ bũmb nins fãa mam sẽn so yaa yãmb n so, la yãmb sẽn so yaa maam n so. La mam paamda waoogr bãmb pʋgẽ. 11Mam ka leb n be dũni‑kãngã pʋgẽ ye, la bãmb ket n bee a pʋgẽ, tɩ mam wat yãmb nengẽ. M ba sẽn ya sõmblem soaba, tall-y-b yãmb yʋʋrã yĩnga, yʋʋr ning yãmb sẽn kõ maamã, tɩ bãmb na lebg yembr wa tõnd sẽn yaa yembrã. 12#Yɩɩn 41.10, Zã 13.18Mam sẽn dag n be ne bãmbã wakate, mam dag n gũuda neb nins yãmb sẽn kõ maamã ne yãmb yʋʋre. Mam kogl-b lame tɩ ned baa a yembr ka menem ye, sã n ka sẽn dag n tog n sãam-a wã,#17.12 Yaa a Zʋdaas Iskaryo yell la b sẽn goma. tɩ yãmb gʋls-sõamyã paam pidsgã. 13Moasã, mam wata yãmb nengẽ, la mam gomda a woto dũniyã pʋgẽ, tɩ nebã na paam mam sũ-noog sẽn pid zãngã. 14Mam kõo bãmb yãmb goamã, la dũniyã neb kisga bãmba, bala, bãmb ka dũniyã neb wa mam me sẽn ka dũni nedã. 15Mam ka kot yãmb tɩ y yiis-b dũni ye, la yaa tɩ yãmb na gũ-b ne wẽng soabã. 16Bãmb ka dũni neb ye, wa mam me sẽn ka dũni nedã. 17Soog‑y bãmb zãng ne‑y sɩdã. Yaa yãmb goamã la sɩdã. 18Mam tʋma bãmb dũniyã pʋgẽ wa yãmb sẽn tʋm maam dũni pʋgẽ wã me. 19Mam welga m meng toor bãmb yĩnga, tɩ bãmb me na welg toor sɩdã pʋgẽ.
20Ka bãmb yĩng bal la mam pʋʋsd ye. Yaa neb nins sẽn na tẽ maam bãmb goam yĩngã yĩng me, 21tɩ bãmb fãa na lebg yembre, wa yãmba, m ba sẽn be mam pʋgẽ, tɩ mam be yãmb pʋgẽ wã. Bɩ bãmb me lebg yembr tõnd pʋgẽ, tɩ dũniyã nebã na tẽ tɩ yaa yãmb n tʋm maam. 22La mam kõo bãmb ziir ning yãmb sẽn kõ maamã, tɩ bãmb na lebg yembr wa tõnd sẽn yaa yembrã, 23tɩ mam be bãmb pʋgẽ, tɩ yãmb be mam pʋgẽ, tɩ b na lebg yembr fasɩ, la tɩ dũniyã neb na bãng tɩ yaa yãmb n tʋm maam, la tɩ yãmb nonga bãmb wa yãmb sẽn nong maamã. 24M ba, mam datame tɩ neb nins yãmb sẽn kõ maamã me na zĩnd ne maam zĩig ning mam sẽn be wã, tɩ b na get mam ziirã, ziir ning yãmb sẽn kõ maam, yãmb sẽn nong maam hal sẽn deng dũni yẽbgrã yĩnga. 25M ba sẽn yaa tɩrga, dũni neb ka bãng yãmb ye, la maam yẽ, mam bãnga yãmba, la nin-bãmbã bãngame tɩ yaa yãmb n tʋm maam. 26Mam kɩtame tɩ b bãng yãmb yʋʋrã, la mam na n kɩtame tɩ b bãng-a, tɩ nonglem ning yãmb sẽn nong maamã na zĩnd bãmb pʋse, la tɩ mam na zĩnd bãmb pʋse.
Currently Selected:
A Zã koe‑noogo 17: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
