A Zã koe‑noogo 18

B yõka a Zeezi

(Mat 26.47-56, Mark 14.43-50, Luk 22.47-53)

1A Zeezi sẽn gom woto n sa, b yii ne b karen-biisã n kẽng Sedrõ kʋɩl-bilã rʋʋnd a to wã. Zẽed zĩig n be be, la a Zeezi kẽe be ne b karen-biisã.

2A Zʋdaase, soab ning sẽn da zãmbd-a bãmb n na n yõk n kõ wã rag n mii zĩ-kãng sõama, bala, a Zeezi ne b karen-biisã dag n tigma taab be naoor wʋsgo. 3Dẽ, a Zʋdaas peega sodaas sulli, ne gũudbã maan-kʋʋdbã kãsem-dãmbã ne Fariizẽ-dãmbã sẽn tʋmã, tɩ b zãad bug-vɩlemse, la fɩtl-dãmba, la zab-teedo, n kẽng zĩigẽ wã.

4A Zeezi sẽn mi bũmb nins fãa sẽn na n paam bãmbã, b kolga nebã n yeel-b yaa: Yãmb baooda ãnda? 5La b leoka bãmb tɩ yaa Nazarɛt Zeezi wã. La a Zeezi yeel-b lame yaa: Yaa maam! A Zʋdaase, soab ning sẽn yõkd bãmb n na n kõ wã dag n bee ne nebã. 6Wakat ning a Zeezi sẽn yeel tɩ: «yaa maamã,» nebã tarame n lʋɩ tẽnga.

7A Zeezi leb n sok-b lame yaa: Ãnda la yãmb baooda? La b yeelame tɩ yaa Nazarɛt Zeezi wã. 8A Zeezi leokame n yeele: Mam yeela yãmb tɩ yaa maam. Dẽ, sã n yaa maam la yãmb baooda, bɩ y bas nin-kãensã tɩ b looge. 9Yaa sẽn na yɩl tɩ bãmb sẽn dag n yeelã pidsi:

Neb nins yãmb sẽn kõ maamã,

ned baa a yembr ka menem ye.

10A Sɩmo Pɩyɛɛr dag n tara zabr sʋʋga, la a wõog-a lame n kɛ maan-kʋʋd kãsmã tʋmtʋmd n fiuug a rɩtg tʋbre. Tʋmtʋmdã yʋʋr la a Malkuusi. 11#Mat 26.39, Mark 14.36, Luk 22.42A Zeezi yeela a Pɩyɛɛr yaa: Lebs f zabr sʋʋgã a wʋʋgẽ. Mam ka na n yũ bõn-yũudl ning m ba sẽn kõ maamã la?

B waa ne a Zeezi a Ãnd ne a Kayif taoore

(Mat 26.57-58, Mark 14.53-54, Luk 22.54)

12Dẽ, sodaasã sull ne b sodaas naabã, la Zʋɩf-rãmbã gũudbã yõka a Zeezi n sẽbe. 13B reng n talla bãmb n kẽng a Ãnd yiri, bala, yẽnda dag n yaa a Kayif sẽn yaa maan-kʋʋd kãsem yʋʋm‑kãngã rɛɛmba. 14#Zã 11.49,50Yaa a Kayif n dag n sagl Zʋɩf-rãmbã tɩ ned a yembr tãa sã n ki soolmã nebã yĩng n são wã.

Maan-kʋʋd kãsmã taoore

(Mat 26.57-70, Mark 14.55-68, Luk 22.55-71)

15Mik t'a Sɩmo Pɩyɛɛr ne a Zeezi karen-biig a to dag n pʋgda a Zeezi. Maan-kʋʋd kãsmã dag n mii karen-bi-kãnga, la karen-biiga tũu a Zeezi n kẽ maan-kʋʋd kãsmã zakẽ, 16la a Pɩyɛɛr paa yɩnga, zag-noorã sɛɛga. Karen-biig a to wã maan-kʋʋd kãsmã sẽn mi wã yiime n gom ne pag ning sẽn gũud zakã noorã, n kɩt t'a Pɩyɛɛr kẽ. 17Dẽ, tʋmtʋmd poakã, zag-no-gũudã yeela a Pɩyɛɛr yaa: Fo ka rao-kãngã karen-biig a yembr sɩda? La a Pɩyɛɛr yeelame tɩ yẽnda ka bãmb karen-biig ye. 18Tʋmtʋmdbã ne gũudbã dag n yasa be. La waood yĩnga, b dag n yõgna saal bugum n wootẽ. A Pɩyɛɛr me dag n bee ne bãmb n woot bugmã.

19Maan-kʋʋd kãsmã soka a Zeezi b karen-biisã yelle, la bũmb nins b sẽn zãmsd nebã yelle. 20A Zeezi leoka yẽnda n yeele: Mam goma nebã fãa taoor wakat fãa, mam zãmsa nebã karen-doogẽ la wẽnd doogẽ wã, zĩig ning Zʋɩf-rãmbã sẽn tigimd taabã, la mam ka soos n gom baa fɩ. 21Bõe tɩ y sokd maam bumb nins m sẽn goma? Sok‑y neb nins sẽn kelg-b maamã bãmb mii bũmb nins mam sẽn gomã! 22A Zeezi sẽn gom woto wã, gũud a yembr sẽn dag n be be wẽe a Zeezi pɛk n yeele: «Yaa woto la fo leokd maan-kʋʋd kãsmã?» 23A Zeezi leoka yẽnda n yeele: «Mam gomdã sã n yaa wẽnga, bɩ f wilg a sẽn yaa wẽng zĩig ninga. La mam sã n goma sõama, bõe yĩng tɩ f wẽed-ma?»

24Dẽ, a Ãnd kɩtame tɩ b tall a Zeezi b sẽn sẽbã n kẽng maan-kʋʋd a Kayif yiri.

A Pɩyɛɛr kɩɩsame t'a ka mi a Zeezi ye

(Mat 26.71-75, Mark 14.69-72, Luk 22.58-62)

25A Sɩmo Pɩyɛɛr dag n bee be n woot bugum. Ned n yeel-a yaa: «Fo me ka bãmb karen-biig a yembr sɩda?» Yẽnda kɩɩsame n yeel yaa: «Mam ka bãmb karen-biig ye.» 26Maan-kʋʋd kãsmã tʋmtʋmd a yembre, sẽn yaa rogem ne ned ning a Pɩyɛɛr sẽn dag n kɛ a tʋbr n fiuugã yeelame yaa: «Mam ka yã foom zẽedã zĩigẽ ne bãmb sɩda?» 27A Pɩyɛɛr leb n kɩɩsame. La wakat-kãng bala, no-raoog kelmame.

A Zeezi bee a Pilat taoore

(Mat 27.1-2,11-14, Mark 15.1-5, Luk 23.1-5)

28B yii ne a Zeezi a Kayif zakẽ wã n tall-b n kẽng gʋvɛrneerã zakẽ. Dag n yaa yibeoogo. Bãmb mensã ka kẽ zakã pʋg ye, sẽn na yɩl n da rẽgem b mense, n paam n dɩ Pak tigrã. 29Dẽ, a Pilat yiime n wa nebã nengẽ n yeel-ba: Bõe rõadg la yãmb tar ne rao-kãngã? 30B leokame n yeele: «A sã n dag n ka maanẽ wẽnga, tõnd dag n kõn tall-a n wa n kõ yãmb ye.» 31Dẽ, a Pilat yeel-b lame yaa: «Bɩ yãmb mensã reeg-a n bʋ a bʋʋdã wa sẽn zems yãmb tõogã.» Zʋɩf-rãmbã yeela a Pilat yaa: «Tõnd ka tar noor tɩ kʋ ned ye.» 32#Zã 3.14, 12.32Yaa sẽn na yɩl la gomd ning a Zeezi sẽn gom n na n wilg kũum ning buud bãmb sẽn na n ki wã pidsi.

33A Pilat kẽe a zakẽ wã n bool a Zeezi n yeel-ba: «Yaa yãmb la Zʋɩf-rãmbã dĩma bɩ?» 34A Zeezi leokame n yeele: Yãmb meng n tags a woto n sokdẽ bɩ, bɩ yaa neb a taab n gom mam yell a woto? 35A Pilat leokame n yeele: «Dẽ yĩnga, mam yaa Zʋɩf la? Fo soolmã neb ne maan-kʋʋdbã kãsem-dãmbã n tall foom n wa n kõ maam. Bõe la f maan yã?» 36A Zeezi leokame n yeele: «Mam soolmã ka dũni ka rẽnd ye. Mam soolmã sã n dag n yaẽ dũni ka rẽnda, mam tʋmtʋmdbã dag n na zab n sõng maam, tɩ b ra yõk maam n kõ Zʋɩf-rãmbã ye. La moasã, mam soolmã ka tẽng zug ka rẽnd ye.» 37A Pilat yeelame: Dẽnd fo yaa rĩm wɛ? A Zeezi leokame n yeele: «Yaa wa yãmb sẽn yeelã, mam yaa rĩma. Ad bũmb ning yĩng mam sẽn dogã, la bũmb ning yĩng mam sẽn wa dũni wã: Yaa tɩ kɩs sɩdã kaseto. Ned ning fãa sẽn yaa sɩdã rẽnd kelgda mam koɛɛga.» 38A Pilat sokame yaa: «Sɩd yaa bõe?»

B kaoo a Zeezi bʋʋd n yeel tɩ b tog n kiime

(Mat 27.15-31, Mark 15.6-20, Luk 23.13-25)

A Pilat sẽn gom woto n sa, a leb n yiime n kẽng Zʋɩf-rãmbã nengẽ n yeel-b yaa: «Mam ka yã baa fɩ raoã nengẽ sẽn sekd tɩ b kao a bʋʋd n yeel t'a zemsa kũum ye. 39La yãmb tara mining sẽn yaa tɩ mam yiis bi-bɛɛg a yembr y Pakã tigr wakat n base. Yãmb datame tɩ mam bas Zʋɩf-rãmbã rĩmã y yĩnga?» 40Nebã leb n kaasame n yeele: Ayo! Da bas-y yẽnda ye, bas-y-yã a Barabaase. A Barabaas yaool n dag n yɩɩ fãada.

Currently Selected:

A Zã koe‑noogo 18: MPBU

Highlight

Copy