A Luk koe‑noogo 13
13
Tek yam n kos sugri
1Wakat-kãnga, neb kẽer waa n togsa a Zeezi bũmb ning sẽn maan Galɩle nebã, a Pilat sẽn daag b zɩɩm n kalem ne b maandã zɩɩmã. 2A Zeezi leoka bãmb n yeele: «Yãmb tẽedame tɩ Galɩle nin-kãens sẽn nams a woto wã, b yaa yel-wẽn maandb n yɩɩd Galɩle neb a taabã la? 3Ayo! Mam yeta yãmb tɩ ayo. Yãmb sã n ka tek yam n kos sugri, yãmb fãa na n sãama a woto me. 4Wall neb piig la a nii Siloe gãosgã sẽn lʋɩ n bʋʋg-b n kʋ-bã, yãmb tagsdame tɩ bãmb yaa bɛɛgdb n yɩɩd Zeruzalɛm neb a taabã la? 5Ayo! Mam yeta yãmb tɩ ayo. Yãmb sã n ka tek yam n kos sugri, yãmb fãa me na n sãama a woto.»
6A Zeezi wẽe yel-bũn‑kãngã me: Ned n dag n tar kankang sẽn sel a reezẽ tɩɩs pʋʋgẽ. A waame n na n yãgs biisi, la a ka yã ye. 7Dẽ, a yeela pʋʋgã koaad yaa: «Yʋʋm a tãab moasã la mam wat n dat kankangã biisi, la m ka yãt ye. Keeg-a! Bõe yĩng t'a yãmb zĩigã zaalem?» 8Reezẽ tɩɩs pʋʋgã koaad leokame n yeele: «M soaala, leb n bas-y-yã-a roandã yɛsa. Ka ne rẽ, mam na n tuume n gilg-a la m ning-a birga. 9Daar ninga, a na wom biisi. La a sã n ka wome, bɩ y keeg-a.»
Pag paama maagr vʋʋsg daare
10Zʋɩf-rãmbã vʋʋsg daar a yembre, a Zeezi dag n zãmsda neb karen-doog a yembr pʋgẽ. 11La pag a yembr n dag n be be, tɩ zĩn kɩt t'a lebg koams hal yʋʋm piig la a nii. A dag n zõrame n ka tõe n doog baa bilf ye. 12A Zeezi yãnd-a lame n gom ne-a n yeele: Paga, fo paama yolsg ne f komsmã. 13Bãmb tika yẽnda ne b nusi. Wakat-kãng bala, a roogame n kõ Wẽnnaam waoogre. 14#Yik 20.9,10, Tõ 5.13,14La karen-doogã naab sũur sãama ne a Zeezi sẽn maan bõn-bãnd vʋʋsg daarã, la a yeela nebã yaa: Dasem a yoob n be tʋʋm yĩnga. Wa-y da-kãens tɩ b maag-yã, tɩ da yɩt tõnd vʋʋsg daarã ye. Zu-soabã leok-a lame n yeele: 15Zãmb rãmba, yãmb ned kam fãa ka lokd a naaf a rɩɩb koglgẽ n tall n tɩ yũnug vʋʋsg daarã sɩda? 16La pʋg‑kãngã sẽn yaa a Abrahaam bi-pugla, t'a Sʋtãan loe-a hal yʋʋm piig la a nii wã, d ka tog n lok-a vʋʋsg daare? 17A Zeezi sẽn gom a woto, yãnd yõka b bɛɛbã fãa, la neb kʋʋngã maanda sũ-noog bũmb nins fãa a Zeezi sẽn maan tɩ be ziirã yĩnga.
Siin-bil ne rã-bɩll yel-bũna
18A Zeezi leb n yeelame yaa: Wẽnnaam soolmã wẽnda bõe, la m na n mams-a-la ne bõe? 19A wẽnda wa siin-bil ned sẽn dɩk n lob a zẽed zĩigẽ. A yitame n lebg tɩɩga, la yĩngr liuuli vɩɩ a wilẽ wã. 20B leb n yeelame: Mam na n mamsa Wẽnnaam soolmã ne bõe? 21A wẽnda rã-bɩll pag sẽn dɩk n ning zom wam a tãabo, hal tɩ zom-nagdgã fãa wuki.
Zak noor sẽn yaa sẽka
22A Zeezi da pɩʋʋgda tẽn-bɛd la tẽn-bãoonego, n zãmsd nebã la b dabd Zeruzalɛm. 23Ned n sok bãmb yaa: Zu-soaba, yaa neb bilf bal n na n paam fãagre? A Zeezi leoka bãmb n yeele: 24Nang-y pãng n tũ digno-sẽkã n kẽ. Bala, mam yeta yãmb tɩ neb wʋsg na n baoome tɩ kẽ la b ka na n tõog ye. 25Yirã soab sã n yik n pag rignoorã, tɩ yãmb pa yɩng n sɩng n kabsdẽ, la y yet Zu-soabã tɩ b pak tɩ y kẽ, b na n leoka yãmb tɩ b ka mi yãmb sẽn yitẽ ye. 26Dẽ, yãmb na n sɩngame n yeele: «Tõnd dɩɩ ne yãmba, la d yũ ne yãmba, la yãmb zãmsa neb tõnd soayã zutu.» 27#Yɩɩn 6.9La b na n leoka yãmb n yeele: «Mam ka mi yãmb sẽn yitẽ ye. Zãag-y ne maam, yãmb fãa sẽn tʋmd ka-tɩrlem tʋʋmã.» 28#Mat 22.13, 25.30#Mat 8.11,12Yãmb sã n yãnd a Abrahaam, la a Izake, la a Zakoob ne Wẽnnaam no-rɛɛsdbã fãa Wẽnnaam soolmã pʋgẽ, tɩ b yaool n lob yãmb yɩnga, nintãm ne yẽn wãbr na zĩnd be. 29Neb na n yii yaang la taoore, dɩtg la goabga, n zĩnd n dɩ Wẽnnaam soolmã pʋgẽ. 30#Mat 19.30, 20.16, Mark 10.31La gese, poorẽ dãmb n be n na n yɩ dẽenem dãmba, tɩ dẽenem dãmb me na n yɩ poorẽ dãmba.
A Zeezi sũ-sãang Zeruzalɛm yĩnga
(Mat 23.37-39)
31Wakat-kãnga, Fariizẽ-dãmbã kẽer waa n yeela a Zeezi yaa: Kẽng n looge! Yi ka, bala, a Erood dat n kʋʋ foom. 32A Zeezi yeela bãmb yaa: Kẽng n tɩ yeel-y sɩlem‑soabã tɩ mam digda zĩn-dãmba, la m maagd bãad-dãmb rũndã la beoogo. La ra-yɩt na n yɩɩ baoosg daar ne maam. 33La yaa tɩlɛ tɩ mam kẽn dũndã, la beoogo, la ra‑yɩta. Bala, a ka zems tɩ Wẽnnaam no-rɛɛs ki zĩig a to tɩ ka Zeruzalɛm ye.
34Zeruzalɛm! Zeruzalɛm! Fo sẽn kʋʋd Wẽnnaam no-rɛɛsdba, la f lobd neb nins Wẽnnaam sẽn tʋm fo nengẽ wã kugã, naoor a wãn la mam dag n tʋlg n tigs fo kambã wa no-yãang sẽn põgended a kamb a pɩgsẽ? La yãmb ka tʋlg ye. 35#Yɩɩn 118.26Gese, b na n basa yãmb ne y roogã. La mam yeta yãmb tɩ yãmb ka na n leb n yãnd maam yɛsa, hal tɩ ta daar ning yãmb sẽn na n yeel tɩ: «Bark bee ned ning sẽn wat ne Zu-soabã yʋʋrã zugu.»
Currently Selected:
A Luk koe‑noogo 13: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
