A Luk koe‑noogo 14
14
1Daar a yembre, a Zeezi kẽe Fariizẽ-dãmbã naab a yembr zakẽ n na n dɩ, la Fariizẽ-dãmbã dag n gũusda bãmba. 2La ade, rao a ye bã-moatg sẽn tar n dag n be bãmb taoore. 3A Zeezi goma ne tõog karen-saam-dãmbã la Fariizẽ-dãmbã n yeele: Dẽ yĩnga, noor beeme tɩ maag ned vʋʋsg daare? 4Bãmb kell n sĩndame. Dẽ, a Zeezi peega bãadã, n maag-a, la b kuils-a. 5#Mat 12.11La a Zeezi yeel-b lame yaa: Ãnda yãmb sʋkã bi-ribl bɩ a naaf n na n lʋɩ bulgẽ vʋʋsg daar t'a ka yiis-a tao-tao? 6La b ka tõog n leok gom‑kãng ye.
Naam zĩndg zĩisi
7Rẽ poore, a Zeezi goma ne neb nins b sẽn bool rɩɩbã yĩngã n wẽ-b yel-bũndi. Bala, bãmb yãame tɩ nin-kãens baooda naam zĩndg zĩisi. B yeel-b lame yaa: 8#Yel 25.6,7Ned sã n bool foom yi-kãadem tigrẽ, bɩ f ra tɩ zĩnd naam zĩndg zĩigẽ ye. Bala, tõeeme t'a boola ned sẽn yɩɩd foom. 9Sã n yɩ a woto, sẽn bool-a foom ne yẽnda wã na n waa n yeela foom tɩ f yik n bas zĩig n kõ-a, fo na n yaool n tɩ zĩnda poorẽ zaoogã zugu, la f na n yãnda yãnde. 10B sã n bool foom, kẽng n tɩ zĩnd poorẽ zaoogã zugu, tɩ ned ning sẽn bool-a foomã sã n wa bɩ a yeel foom yaa: «M zoa, wa taoor ka!» Woto na n yɩɩ fo waoogr neb nins fãa sẽn zĩ ne foom n dɩtẽ wã taoore. 11#Mat 23.12, Luk 18.14Sɩd me, b na n sika ned ning fãa sẽn zẽkd a menga, la b na n zẽka ned ning fãa sẽn sikd a menga.
12La a Zeezi yeela ned ning sẽn bool-a bãmb tɩ b wa n dɩ wã yaa: Fo sã n na n bool neb tɩ b wa n dɩ ne foom, tɩ yaa wĩntoog bɩ yʋngo, da bool f zo-rãmba, wall f ba-biisi, wall f buudu, wall f yags nins sẽn yaa arzegs rãmbã, tɩ bãmb me da wa n bool foom ye. Rẽ na n yɩɩ lebsgo. 13Fo sã n na n bool neb tɩ b wa n dɩ ne foom, bool naong rãmba, la koms-rãmba, la wobse, la zoense, 14la fo na n paama sũ-noogo, b sẽn ka tar n na n kõ foom n lebsã yĩnga. Bala, nin-tɩrsã vʋʋgr wakate, fo na n paama keoore.
Tigr kãseng yel-bũndi
15Neb nins sẽn dag n zĩ n dɩtẽ wã sẽn wʋm a Zeezi gom kãensã, b ned a yembr yeelame yaa: Bark bee ned ning sẽn na n naag-a n dɩ Wẽnnaam soolmẽ wã zugu! 16La a Zeezi leoka yẽnda n yeele: Dao a yembr n dag n segl rɩɩb n bool neb wʋsg tɩ b wa rɩ. 17Dɩɩbã wakate, a tʋma a tʋmtʋmd t'a tɩ yeel neb nins a sẽn boolã tɩ b wa tɩ bũmbã fãa zoe n segl n sɛɛme. 18La bãmb ned kam fãa sɩng n padmame. Pipi soabã yeelame tɩ yẽnda raa pʋʋgo, la yaa tɩlɛ tɩ yẽnda kẽng n tɩ gese, la a kotame tɩ b bas-a taale. 19A to yeelame tɩ yẽnda raa nag-koods piiga, la yẽnda na n mak-b lame n gese, la a kotame tɩ b bas-a taale. 20Ned a to yeelame tɩ yẽnda nan peega a pʋg-paala, la rẽ n kɩt tɩ yẽnda ka na n tõog n wa ye. 21Tʋmtʋmdã lebgame n tɩ togs a soaalã bõn-kãense. A soaalã sũur yĩigame t'a yeel a tʋmtʋmdã t'a kẽng raasẽ wã, la tẽngã soayã zut tao-tao, n wa ne naong rãmba, la koms-rãmba, la zoense, la wobsã be. 22Tʋmtʋmdã yeelame tɩ yẽnda maana a soaalã sẽn yeelã, la vɩʋʋg ket n beeme. 23La soaalã yeela tʋmtʋmdã yaa: Rɩk soayã, la f yeg yãgã n modg nebã tɩ b wa kẽ hal tɩ mam yirã pid ne nebã. 24Bala, mam yeta yãmb tɩ neb nins mam sẽn dag n boolã, bãmb ned baa a yembr kõn lemb mam dɩɩbã ye.
Deng n geelge
25Neb kʋʋng wʋsg dag n tũuda a Zeezi sorã zugu. A Zeezi wẽnemdame n yeel-b yaa: 26#Mat 10.37Ned sã n wat mam nengẽ, n ka kis a ba la a ma, la a paga, la a kamba, la a ba-bi-raopa, la a ba-bi-pogse, la baa ne a mengã vɩɩm, a ka tõe n yɩ mam karen-biig ye. 27#Mat 10.38, 16.24, Mark 8.34, Luk 9.23La ned ning fãa sẽn kõn dɩk a da-pɩk n tũ maam, ka tõe n yɩ mam karen-biig ye. 28Bala, ãndã n be yãmb sʋkã n dat n me gãosgo, n ka reng n zĩnd n geel ligd ning fãa a sẽn tog n yiis tʋʋmdã yĩnga, n bãng a sã n tara sẽn sek tɩ me-a n sa? 29Sã n ka rẽ, a sã n yẽbg roogã n sa, n yaool n ka tõe n baas-a, neb nins fãa sẽn na n yãnd‑a wã na n yaala yẽnda n yeele: 30Rao‑kãngã sɩnga gãosg meeb la a ka tõog n baas ye. 31Wall rĩm bʋg n be n dat n tɩ zab ne rĩm a to, n ka reng n zĩnd n mag n gese, yẽnda ne a nebã tus piigã sã n tara pãn-tõog tɩ kẽng n seg rĩm a to wã sẽn wat ne neb tus pisi wã? 32Rĩm a to wã sẽn ket n be yɩɩga, a na n tʋma neb a nengẽ tɩ b tɩ yẽs laafɩ yẽsg ne-a. 33Woto me, yãmb ned ning fãa sẽn ka basd bũmb nins fãa a sẽn tarã ka tõe n yɩ mam karen-biig ye. 34Yamsem yaa bõn-sõngo. La yamsem sã n lebg poada, bõe la b na n ning-a t'a leb n paam noosem? 35A ka yõod tãnd yĩnga, wall birg yĩng ye. B lobd-a la yɩnga. Bɩ sẽn tar-a tʋb n wʋmdẽ wʋme!
Currently Selected:
A Luk koe‑noogo 14: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
