A Luk koe‑noogo 3

A Zãmbatiis koe-moonego

(Mat 3.1-12, Mark 1.1-8, Zã 1.19-28)

1Rĩm a Sezaar Tɩbɛɛr sẽn deeg naam tɩ yʋʋm piig la nuunẽ, t'a Pilat dag n yaa Zʋʋde soolem Gʋvɛrneere, t'a Erood yaa Galɩle rĩmã, t'a biig a Filip ya Yitʋʋre ne Tarkonit soolem dĩmã, t'a Lizanyaas yaa Abilɛn soolem dĩma, 2t'a Ãnd ne a Kayiif yaa maan-kʋʋdbã kãsem-dãmba, Wẽnnaam goma ne a Zakari biig a Zã weoogẽ wã. 3La a Zã saaga tẽms nins fãa sẽn pẽ Zʋrdẽ wã, n moondẽ n yet nebã tɩ b tek yam n deeg lisgu, n paam b yel-wẽnã sugri. 4#Eza 40.3-5Yɩɩ wa sẽn gʋls Wẽnnaam no-rɛɛs a Ezayi sebrã pʋgẽ wã:

Yaa ned ning koɛɛg sẽn kelemd we-rasempʋɩɩgẽ wã,

n yetẽ tɩ: «Maneg-y Zu-soabã sore!

Rems-y bãmb so-bugsã tɩ yɩ tɩrse!

5Londã fãa na n pidsame!

Tãmsã ne kunkubã fãa na n sarmame!

So-golemsã na n lebga tɩrse,

la b na n kõo so-rʋdã!

6La ninsaal buud fãa na n yãa

fãagr ning Wẽnnaam sẽn kõtã.»

7 # Mat 12.34, 23.33 Dẽ, a Zã rag n yeta neb kʋʋngã sẽn wat yẽnda nengẽ t'a lis-bã yaa: Wag-toos buudu, ãndã n wilg yãmb tɩ y zoe sũ-puugr sẽn watã? 8#Zã 8.33Woto yĩnga, bɩ y wom biis sẽn zemsd ne neb sẽn tek yam n kos sugri, la y da tags y sũyã pʋs t'a Abrahaam sẽn yaa yãmb yaabã sekame ye. Bala, mam yeta yãmb tɩ Wẽnnaam tõe n dɩka kug-kãensã n kɩt tɩ b lebg a Abrahaam yagense. 9#Mat 7.19Larã zoe n bee tɩɩsã yẽgẽ moasã. Dẽ, b na n keega tɩɩg ning fãa sẽn ka womd bi-sõama, n lob bugmẽ.

10Neb kʋʋngã soka a Zã yaa: Woto wã, bõe la tõnd tog n maane? 11A Zã leok-b lame n yeele: Bɩ ned ning sẽn tar fu-yerdɩ a yiib yãk a ye n kõ sẽn ka tar-a, la ned ning sẽn tar n dɩtẽ me maan a woto. 12#Luk 7.29Yaood dɛɛgdbã me waame n dat t'a lis-ba. B soka a Zã yaa: Karen-saamba, tõnd tog n maana bõe? 13Yẽnda leok-b lame n yeele: Da reeg-y yaood n yɩɩd b sẽn kõ yãmb noor tɩ y reegã baa bilfu. 14Sodaas me soka a Zã tɩ la bãmb yẽ tog n maana bõe? Yẽnda leoka bãmb n yeele: Da maan-y ned pãng ye, la y da rõd neb zaalem ye, la y maan sũ-noog ne y yaoodã.

15Nebã da yas n gũudame, la b fãa da sokda b mens n dat n bãng sãnde ka a Zã la Kirisã. 16A Zã leoka bãmb fãa n yeele: Mam lisda yãmb koomẽ. La ned a ye n wata, n tar pãng n yɩɩd maam. Mam pʋs n pa zems tɩ lood bãmb neooda sẽbds ye. Bãmb na n lisa yãmb ne Sɩɩg-sõngo, la ne bugum. 17Bãmb zãada b kaorgo. Bãmb na n pɩɩsa b zɛɛga, n wʋk ki wã n sui b baoorẽ. La b na n yõoga wudgã ne bugum sẽn ka kiida. 18A Zã sagla nebã ne sagls a taab wʋsgo, n moon bãmb koe-noogã. 19#Mat 14.3,4, Mark 6.17,18La a Zã sẽn wilg Erood sẽn yaa Gʋvɛrneerã t'a sẽn maan ne a ba-biig a Filip pag a Eroodyaadã, ne tʋʋm wẽnsã fãa a sẽn maanã ka zemse, 20A Erood leb n maana tʋʋm wẽng a to n paase, n yõk a Zã n sui bi-bees roogo.

A Zeezi koom lisgu

(Mat 3.13-17, Mark 1.9-11)

21Nebã fãa sẽn paam koom lisgu, a Zeezi me paama lisgu. La bãmb sẽn pʋʋsd wakate, yĩngr pakame, 22#Sɩng 22.2, Yɩɩn 2.7, Eza 42.1, Mat 3.17, Mark 1.11, Luk 9.35la Sɩɩg-sõng rɩka manwall wẽneg n sig bãmb zugu. Koɛɛg zĩnda saasẽ n yeele: Fo yaa mam bi-ribl-nongr sẽn ta mam yam zãnga.

A Zeezi roogo

(Mat 1.1-17)

23A Zeezi sẽn wa n na n sɩng b tʋʋmdã, rẽ tɩ b rag n tara yʋʋm pis-tã sẽnẽ. Bãmb da yaa a Zozɛf biig wa nebã sẽn dag n tagsdã. A Zozɛf rag n yaa a Heli biiga, 24sẽn yaa a Matat biiga, sẽn yaa a Leevi biiga, sẽn yaa a Melki biiga, sẽn yaa a Yanayi biiga, sẽn yaa a Zozɛf biiga, 25sẽn yaa a Matatyaas biiga, sẽn yaa a Amoos biiga, sẽn yaa a Nahum biiga, sẽn yaa a Esli biiga, sẽn yaa a Nagayi biiga, 26sẽn yaa a Maat biiga, sẽn yaa a Matatyaas biiga, sẽn yaa a Semeyin biiga, sẽn yaa a Yosɛk biiga, sẽn yaa a Zoda biiga, 27sẽn yaa a Zoaana biiga, sẽn yaa a Reeza biiga, sẽn yaa a Zorobabɛll biiga, sẽn yaa a Salatiyɛll biiga, sẽn yaa a Neeri biiga, 28sẽn yaa a Melki biiga, sẽn yaa a Adi biiga, sẽn yaa a Kozam biiga, sẽn yaa a Elmadam biiga, sẽn yaa a Ɛɛr biiga, 29sẽn yaa a Zeezi biiga, sẽn yaa a Eliyezɛɛr biiga, sẽn yaa a Zorim biiga, sẽn yaa a Matat biiga, sẽn yaa a Leevi biiga, 30sẽn yaa a Sɩmyõ biiga, sẽn yaa a Zʋʋda biiga, sẽn yaa a Zozɛf biiga, sẽn yaa a Zonam biiga, sẽn yaa a Eliyakim biiga, 31sẽn yaa a Meleya biiga, sẽn yaa a Mena biiga, sẽn yaa a Matata biiga, sẽn yaa a Natam biiga, sẽn yaa a Davɩɩd biiga, 32sẽn yaa a Ezayi biiga, sẽn yaa a Zobɛɛd biiga, sẽn yaa a Booz biiga, sẽn yaa a Sala biiga, sẽn yaa a Nasõ biiga, 33sẽn yaa a Aminadaab biiga, sẽn yaa a Admin biiga, sẽn yaa a Arni biiga, sẽn yaa a Ɛsrom biiga, sẽn yaa a Farɛɛs biiga, sẽn yaa a Zʋʋda biiga, 34sẽn yaa a Zakoob biiga, sẽn yaa a Izak biiga, sẽn yaa a Abrahaam biiga, sẽn yaa a Taara biiga, sẽn yaa a Nakoor biiga, 35sẽn yaa a Seruk biiga, sẽn yaa a Reyu biiga, sẽn yaa a Falɛk biiga, sẽn yaa a Ebɛɛr biiga, sẽn yaa a Sala biiga, 36sẽn yaa a Kayinam biiga, sẽn yaa a Arfaksaad biiga, sẽn yaa a Sɛm biiga, sẽn yaa a Nowe biiga, sẽn yaa a Lemek biiga, 37sẽn yaa a Matusala biiga, sẽn yaa a Henok biiga, sẽn yaa a Zarɛɛd biiga, sẽn yaa a Maleleyɛll biiga, sẽn yaa a Kayinam biiga, 38sẽn yaa a Enoos biiga, sẽn yaa a Sɛt biiga, sẽn yaa a Ãdem biiga, sẽn yaa Wẽnnaam biigã.

Currently Selected:

A Luk koe‑noogo 3: MPBU

Highlight

Copy