A Matye koe‑noogo 28

A Zeezi Kiris vʋʋgre

(Mark 16.1-8, Luk 24.1-12, Zã 20.1-10)

1Vʋʋsg daarã loogr zugẽ, rasem a yopoe wã pipi daarã tõd-beoogo, a Maari sẽn yit Magdala, ne Maari a to wã kẽngame n na n tɩ ges yaoogã. 2La gese, tẽn-digimdg kãseng zĩndame. Bala, Zu-soabã malɛɛk yii arzãn n sigi, n wa bilg kugrã n zĩnd a zugu. 3Malɛɛkã dag n wẽnda wa sa-yãgbo, la a fuugã yaa pɛɛlg fasɩ wa lampalga. 4Gũudba rigda ne rabeem n lebg wa kũum. 5La malɛɛkã goma ne pagbã n yeel-ba: «Sã n yaa ne yãmba, bɩ y ra yɛɛs ye. Mam miime tɩ yãmb baooda a Zeezi b sẽn ka da-pɩk zugã. 6Bãmb ka be ka ye. Bala, b vʋʋga wa b sẽn dag n yeelã. Wa n ges-y zĩig ning b sẽn dag n gãe wã, 7la y kẽng tao-tao n tɩ togs b karen-biisã tɩ b vʋʋgame n bas kũum. La ade, b renga yãmb taoor Galɩle. Yaa be la yãmb na n yãnd bãmba. Ade, mam togsa yãmba.» 8Dẽ, bãmb yii yaoogã zĩigẽ tao-tao ne rabeem, la ne sũ-no-kãsenga, la b zoeeme n tɩ togs karen-biisã koɛɛgã. 9La gese, a Zeezi wa n sega pagbã n yeel-b yaa: «Mam pʋʋsda yãmba.» Bãmb kolgame n gãd a Zeezi nao wã n waoog-ba. 10A Zeezi yeel-b lame yaa: «Da zoe-y rabeem ye. Kẽng n tɩ yeel-y m ba-biisã tɩ b kẽng Galɩle. Yaa be la b na n yãnd maam.» 11Pagbã sẽn nan ket n be sorẽ, gũudbã neb kẽer kẽnga tẽngã pʋgẽ n tɩ togs maan-kʋʋdbã kãsem-dãmbã bũmb nins fãa sẽn maanã. 12Bãmb ne nin-kẽembã tigma taab n yãnd taaba, la b kõo sodaasã ligd wʋsg 13n yeel-b tɩ b yeel tɩ bãmb gũsame t'a Zeezi karen-biisã wa zuk kũumã, 14la Gʋvɛrneerã sã n wʋme, bãmb mensã na n goma ne-a n tõog t'a ka maan bãmb bũmb ye. 15Sodaasã deega ligdã, la b maana wa b sẽn yeel bãmbã. La gom-kãng kell n saaga Zʋɩf-rãmbã sʋk hal tɩ ta rũndã. 16#Mat 26.32, Mark 14.28Karen-biis piig la a yembrã kẽnga Galɩle, tãng ning a Zeezi sẽn dag n bilg bãmbã zugu. 17La b sẽn yãnd a Zeezi, b waooga bãmba. La neb kẽer maana sãmbse. 18A Zeezi kolgame n gom ne bãmb a woto: «Wẽnnaam kõo maam pãng fãa sẽn be yĩngri, la sẽn be tẽng zugu. 19#Tʋʋm 1.8Bɩ y kẽng n maan nebã buud fãa tɩ yɩ mam karen-biisi, n lis bãmb ne Ba, la Bi-ribla, la Sɩɩg-sõng yʋʋre, 20la y zãms bãmb tɩ b sak bũmb nins fãa mam sẽn yeel yãmb tɩ y maanã. La gese, mam bee ne yãmb wakat fãa, hal tɩ ta wakat sɛɛbo.»

Currently Selected:

A Matye koe‑noogo 28: MPBU

Highlight

Copy