A Mark koe‑noogo 1

A Zãmbatiis koe-moonego

(Mat 3.1-6, Luk 3.1-6, Zã 1.19-23)

1Koe-noog ning sẽn togsd a Zeezi Kiris sẽn yaa Wẽnnaam Bi-riblã yɛlã sɩngr la a woto. 2#Mal 3.1Bõn‑kãng zemsa wa sẽn gʋls Wẽnnaam no-rɛɛs a Ezayi sebrã pʋgã:

«Ade, mam tʋmda m koe-toagsd

t'a reng fo taoor n maneg f sorã.

3 # Eza 40.3 Yaa yẽnda koɛɛg n kelemd we-rasempʋɩɩgẽ

n yetẽ: Maneg-y Zu-soabã sore,

rems-y bãmb so-bugsã tɩ yɩ tɩrse.»

4A Zã rag n bee weoogẽ n lisd nebã la a moondẽ n yetẽ tɩ b tek yam n deeg lisg b yel-wẽnã sugr yĩnga. 5Zʋʋde tẽmsã neb fãa ne Zeruzalɛm dãmbã rag n yitame n kẽngd yẽnda nengẽ, n vẽnegd n togsd b yel-wẽnã t'a lisd bãmb Zʋrdẽ kʋɩlgã pʋgẽ. 6#2Rĩm 1.8A Zã fuugã rag n wʋga ne yʋgemd kõbdo. A sẽbdgã rag n yaa gãongo, la a rɩɩb rag n yaa sʋy la weoog sɩɩdo. 7Yẽnda rag n moondame n yetẽ: «Ned sẽn yɩɩd maam n na n pʋgl maam n wa. Mam pʋs n ka zems tɩ zõond n lok bãmb neooda loets ye. 8Mam lisa yãmb koomẽ, la bãmb na n lisa yãmb Sɩɩg-sõng pʋgẽ.»

A Zeezi reega koom lisgu

(Mat 3.13-17, Luk 3.21-22)

9Wakat-kãnga, a Zeezi yii Galɩle Nazarɛt n wa, la a Zã lisa bãmb Zʋrdẽ koomã pʋgẽ. 10La b sẽn yit koomẽ wã, b yãnda yĩngr sẽn pake, la Sɩɩg-sõng sẽn wẽnd wall sẽn sigd bãmb zugu. 11#Sɩng 22.2, Yɩɩn 2.7, Eza 42.1, Mat 3.17, 12.18, Mark 9.7, Luk 3.22Koɛɛg zĩnda saasẽ n yeele: «Fo yaa mam Bi-ribl-nongr sẽn ta mam yam zãnga.»

Sʋtãana maka a Zeezi

(Mat 4.1-11, Luk 4.1-13)

12Tao-tao bala, Sɩɩgã kɩtame t'a Zeezi kẽng we-rasempʋɩɩgẽ. 13Bãmb paa be rasem pis-naas tɩ Sʋtãanã mak bãmba. B rag n bee be ne we-rũmsi, la malɛɛk-rãmb n dag n sõngd bãmba.

A Zeezi tʋʋm sɩngre

(Mat 4.12-17, Luk 4.14-15)

14B sẽn kẽes a Zã bi-bees roogã zugẽ, a Zeezi kẽnga Galɩle n tɩ moond koe-noogã n yetẽ: 15#Mat 3.2«Wakatã taame, la Wẽnnaam soolem kolgame. Tek-y yam n bas y yel-wẽnã la y tẽ koe-noogã.»

A Zeezi boola zĩm-yõagdb a naase

(Mat 4.18-22, Luk 5.1-11)

16Bãmb sẽn tũud Galɩle ko‑kãsengã noore, bãmb yãnda a Sɩmo ne a ba-biig a Ãndere, tɩ b lobd zĩm-gãmbr ko‑kãsengã pʋgẽ. Bala, b rag n yaa zĩm-yõagdba. 17A Zeezi yeel-b lame yaa: «Wa‑y n tũ-y maam, tɩ m na n kɩtame tɩ y lebg nin-baoodba.» 18Bãmb basa b zĩm-gãmba wã tao-tao n tũ a Zeezi. 19Bãmb sẽn kẽng taoor bilfu, b yãnda a Zebde kom-dibli a Zak ne a ba-biig a Zã. Bãmb me rag n bee koom koglgẽ n tõgd b zĩm-gãmba. 20Tao-tao bala, a Zeezi boola bãmba, la b basa b ba a Zebde koglgã pʋgẽ ne tʋmtʋmdbã n tũ bãmba.

A Zeezi maaga rao zĩn-dẽgd sẽn tara

(Luk 4.31-37)

21A Zeezi ne b karen-biisã kẽe Kapɛrnaom tẽnga pʋga. La vʋʋsg daarã sẽn ta, a Zeezi kẽe karen-doogẽ wã n sɩng n zãms nebã. 22#Mat 7.28,29Bãmb zãmsgã yɛɛsa nebã, bala, b zãmsa ne noore, la ka wa tõog karen-saam-dãmbã ye. 23La rao a yembr n dag n be bãmb karen-doogẽ wã tɩ zĩn-dẽgd tar-a. A kelmame n yeele: 24«Zeezi sẽn yit Nazarɛte, yaa bõe la y rat ne tõndo? Yãmb waame n na n menes tõnd laa? Mam mii yãmb sẽn yaa ned ninga. Yãmb yaa Wẽnnaam pʋ‑peelem soaba.» 25A Zeezi leng-a lame n yeele: «Sĩnd la f yi n bas raoã.» 26Zĩn-dẽgdã kelma ne pãnga, n yi n bas raoã t'a rigd wʋsgo. 27Nebã fãa yɛɛsame n sok taaba: «Bõn-kãngã yaa bõe? Koe-paalga! B tãsda zĩn-dãmb mens hal tɩ b sakd-ba.» 28Tao-tao bala, bãmb yʋʋrã saaga zĩigã fãa Galɩle soolmã pʋga.

A Zeezi maaga a Pɩyɛɛr reem-poaka

(Mat 8.14-15, Luk 4.38-41)

29A Zeezi ne b karen-biisã sẽn yi karen-doogẽ wã, a Zeezi ne a Zak la a Zã kẽnga a Sɩmo ne a Ãndere rãmb zakẽ. 30A Sɩmo pagã ma yĩns rag n wɩngame t'a gãeyã. La a Zeezi sẽn ta bala, b togs-b lame. 31Bãmb kolgame n gãd a nug n sõng-a t'a yiki, la wakat‑kãng bala, a yĩn-wɩngrã sigame t'a yik n maan-b sãando.

A Zeezi maaga neb wʋsgo

(Mat 8.16-17, Luk 4.40-41)

32La zĩ-sobdo, wĩndgã lʋɩɩs poore, nebã talla bãad-dãmbã fãa ne neb nins zĩn-dãmb sẽn tarã n wa a Zeezi nengẽ. 33La tẽngã nebã tigma taab roogã noore. 34A Zeezi maaga neb wʋsgo, bãas buud toay-toay sẽn dag n tar-ba. Bãmb diga zĩn-dãmb wʋsg me n ka sak tɩ b gom ye. Bala, zĩn-dãmbã rag n mii bãmba.

A Zeezi moona koɛɛg Galile

(Luk 4.42-44)

35A Zeezi sãda beoogo, tɩ zĩigã ket n yaa lika, n kẽng zĩig neb sẽn ka be n tɩ pʋʋse. 36A Sɩmo ne neb nins sẽn be ne yẽnda wã baoo bãmba. 37La b sẽn yãnd a Zeezi, b yeel-b lame yaa: «Nebã fãa baooda yãmba.» 38La a Zeezi leoka bãmba: «Wa-y tɩ d kẽng tẽn-kɩremsã, tɩ m tɩ moon koe-noogã beenẽ me, tɩ yaa rẽnda yĩng la m wa-yã.» 39#Mat 4.23, 9.35Bãmb saaga Galɩle n moon koe-noogã karen-dotã pʋse, la b rig zĩn-dãmba.

A Zeezi maaga yĩng soaba

(Mat 8.1-4, Luk 5.12-16)

40Ned a yembr yĩn-gãong bãag sẽn tar n wa a Zeezi nengẽ n yĩgimd n bõos bãmb ne nimbãaneg n yeele: «Yãmb sã n data, y tõe n maaga maam tɩ m yɩ yɩlemde.» 41Raoã nimbãaneg yõka a Zeezi tɩ b tẽeg b nug n sɩɩs-a n yeele: «Mam datame, lebg yɩlemde.» 42Wakat-kãng bala, yĩn-gãongã bãag loog n bas-a lame t'a lebg yɩlemde. 43Wakat kãng bala, a Zeezi yeel-a-lame t'a looge, 44#Mk 14.1-32n keoog-a neer n yeele: «Gũus n da wa yeel ned tɩ bũmb ye. La f kẽng n tɩ wilg f meng maan-kʋʋdã, la f maan maoong ning a Moyiis sẽn wilgã, f yɩlgr yĩnga, t'a yɩ kaset nebã yĩnga.» 45La raoã sẽn looge, a puka yellã n moone, hal t'a Zeezi ka leb n tõe n kẽ tẽngẽ tɩ ka yɩ ne soosg ye. Bãmb zĩnda zĩis neb sẽn ka be, la neb rag n yita zĩig zãng fãa n wat bãmb nengẽ.

Currently Selected:

A Mark koe‑noogo 1: MPBU

Highlight

Copy