A Mark koe‑noogo 4
4
Bõn-buud b sẽn fẽrg yel-bũndi
(Mat 13.1-9, Luk 8.4-8)
1 #
Luk 5.1-3
A Zeezi leb n sɩngame n na n zãms nebã ko‑kãsengã noore. Neb kʋʋng wʋsg sẽn dag n tigim taab bãmb nengẽ wã yĩnga, bãmb kẽe koom-koglg sẽn be ko‑kãsengã pʋgẽ n zĩndi. La kʋʋngã fãa zĩnda koomã noore. 2Dẽ, bãmb wẽe yel-bũn n zãms nebã bũmb wʋsgo. Zãmsgã pʋgẽ b yeela nebã yaa:
3«Kelg-y-yã! Ned a yembr n dag n kẽng n na n tɩ fẽrg bõn-buudu. 4Fẽrgrã wakate, bõn-biis kẽer lʋɩɩ sor kɩrenga, la liuuli waa n dɩɩ bãmba. 5La kẽer lʋɩɩ kug zĩiga, tom sẽn ka waoogẽ, la tao-tao bala, b yiime, tomã sẽn ka waoogã yĩnga. 6La sõor sẽn zẽke, wĩntoogã yõog-b lame tɩ b ki, b sẽn ka paam yẽgã yĩnga. 7La kẽer lʋɩɩ gõos sʋka, la gõosã yikame n dɩ-b tɩ b ka wom biis ye. 8La kẽer lʋɩɩ zĩ-sõngẽ n yik n wom biisi. Kẽer womame tɩ ta bɛɛl pis-tã‑tã, tɩ kẽer ta pis-yoob‑yoobe, tɩ kẽer ta koabg-koabga. 9Dẽ, a Zeezi yeelame: Sẽn tar-a tʋb sẽn wʋmd bɩ a wʋme.»
10Bãmb sẽn wa n be kɛɛnga, neb nins sẽn tũ-b bãmbã ne karen-biis piig la a yiibã soka bãmb yel-bũnã võore. 11A Zeezi yeela bãmba: «Yaa yãmb la Wẽnnaam kɩt tɩ y bãng bãmb soolmã bõn-solgdse, la ne neb nins sẽn ka be soolmã pʋgẽ wã, yel-kãens yaa soalem bala, 12#Eza 6.9,10 hal tɩ baa b sã n get sõama, b kõn yã ye, la b sã n wʋmd sõama, b kõn wʋm a võore, tɩ b ra wa n tek yam n kos sugr n paam ye.»
Yel-bũndã bilgri
(Mat 13.18-23, Luk 8.11-15)
13A Zeezi leb n sok-b lame yaa: «Yãmb ka wʋmd yel-bũn-kãngã võor la? Dẽ, yãmb na n maana a wãn n wʋm yel-bũnã fãa võore?
14Bõn-bu-fẽrgdã fẽrga Wẽnnaam goamã. 15Neb kẽer wẽnda wa sor kɩrengã, zĩig ning Wẽnnaam goamã sẽn fẽrgã. Bãmb sẽn wʋm koɛɛgã yee, la Sʋtãanã sẽn wat n yiis koɛɛg ning sẽn bʋd b sũurẽ wã. 16Bõn-buudã sẽn lʋɩ kugã zĩigẽ wã yaa ned ning sẽn wʋmd Wẽnnaam koɛɛgã n deeg-a tao-tao ne sũ-noogo, 17la bãmb ka tar yẽg ye, bãmb kaoosda wakat bilf bala. La toog bɩ namsg sã n paam bãmba Wẽnnaam koɛɛgã yĩnga, tao-tao bala, b lʋɩtame. 18Bõn-buud kẽer sẽn lʋɩ‑b gõos sʋkã, yaa neb nins sẽn wʋmd Wẽnnaam koɛɛgã, tɩ yɩɩrã ne dũniyã yɛlã, 19la arzegs belgre, la bũmb a taab ratem kẽedẽ n dɩt Wẽnnaam koɛɛgã t'a ka womd biis ye. 20Bõn-buud nins sẽn lʋɩ‑b zĩ-sõngẽ wã, yaa neb nins sẽn wʋmd Wẽnnaam koɛɛgã n deegdẽ n womd biisi. Kẽer womame tɩ ta bɛɛl pis-tã‑tã, tɩ kẽer ta pis-yoob‑yoobe, tɩ kẽer ta koabg-koabga.»
Fɩtl la makdga
(Luk 8.16-18)
21 #
Mat 5.15, Luk 11.33 A Zeezi leb n soka bãmb yaa: «Rẽ yĩnga, b fõgenda fɩtl ne peoogo, wall b ning-a gãag tẽngre? B kõn dogl-a fɩtl doagendgã zug sɩda? 22#Mat 10.26, Luk 12.2Bala, bũmb ka be sẽn ludi, sẽn kõn puk ye, la bũmb ka be sẽn solge, sẽn kõn vẽneg ye. 23Bɩ sẽn tar-a tʋb sẽn wʋmd wʋme.»
24 #
Mat 7.2, Luk 6.38 Bãmb leb n yeela nebã yaa: «Gũus-y neer ne bũmb ning yãmb sẽn wʋmdã. Wẽnnaam na n maka ne makdg ningã yãmb sẽn tar n makd n kõt nebã n lebs yãmba, la b na n ningame tɩ sudgi. 25#Mat 13.12, 25.29, Luk 19.26Bala, b na n kõo ned ning sẽn tar-a, la ned ning sẽn ka tar-a wã, b na n deega baa bũmb bilf ning a sẽn tarã.»
Bõn-buud sẽn yit n bɩtẽ
26Bãmb leb n yeelame: «Wẽnnaam soolem yaa wa rao sẽn bʋd bõn-biis a pʋʋgẽ. 27A gõe t'a ne me, wĩndg ne yʋngo, bõn-biisã bundame n yikdẽ, la yẽnda ka mi sẽn yɩt to-to ye. 28Bõn-bulã yita b toore, n deng n yaa vãado, n wa rɩk pʋse, n yaool n wom biis sẽn yaa sõama. 29#Zow 4.13La biisã sã n bɩ zãnga, b tigsdame, bala, a tigsg wakat taame.»
Siin-bila
(Mat 13.31-32, Luk 13.18-19)
30A Zeezi leb n yeelame: «Tõnd na n mamsa Wẽnnaam soolmã ne bõe, wall d bilg-a ne bõe yel-bũndi? 31A wẽnda wa siin-bila. Yẽnda yaa bilf n yɩɩd bõn-biisã fãa sẽn bʋt tẽngã. 32La b sã n bʋd-a, a yikdame n lebg wok n yɩɩd zẽed buud a taabã fãa, n tãoodẽ tɩ liuuli tõe n tɩʋ b tʋgd a maasmẽ.»
A Zeezi zãmsa neb ne yel-bũna
(Mat 13.34-35)
33Yaa ne yel-bũn a woto buud wʋsg la a Zeezi wilg nebã Wẽnnaam goamã, a wa sẽn zems b wʋmbo. 34A Zeezi ka gom ne-ba, a sã n ka ne yel-bũn ye. La b sã n wa n be ne b karen-biisã bala, b bilgda bãmb bũmb fãa võore.
A Zeezi kɩtame tɩ sobg yõke
(Mat 8.23-27, Luk 8.22-25)
35La baraar bala, zĩ-sobd sẽn ta, a Zeezi yeela b karen-biisã yaa: «Wa-y tɩ d kẽng ko‑kãsengã rʋʋnde.» 36La karen-biisã sẽn kuils nebã n sɛ, bãmb looga ne a Zeezi ne koom-koglg ning b sẽn dag n be a pʋgẽ wã. La kogond a taab me tũu bãmba. 37Sob-kãseng yikame tɩ ko-pɛmã kẽed koglgã pʋg hal t'a zoe n kolg pidbu. 38La a Zeezi rag n bee koglgã poorẽ n kʋgl zu-kʋk n gõe. La b neka bãmb n yeele: «Karen-saamba, tõnd be ka n na ki tɩ ka yet yãmb tɩ bũmbu?» 39A Zeezi sẽn neke, b lenga sobgã, n yeel ko-kãsengã t'a bas bʋʋr la a sĩndi! La sobgã yõkame tɩ zĩigã lebg sɩddd... 40Dẽ, a Zeezi sok-b lame: «Yaa bõe tɩ yãmb zoet rabeem a woto? Yaa a wãn tɩ yãmb ket n ka tar tẽebo?» 41Dabeem kãseng yõk-b lame, la b soka taaba: «Nin-kãngã yaa bõe neda, tɩ hal baa sobgã ne ko-kãsengã sakd bãmba?»
Currently Selected:
A Mark koe‑noogo 4: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
