A Mark koe‑noogo 5
5
A Zeezi maaga ned zĩn sẽn tar‑a
(Mat 8.28-34, Luk 8.26-39)
1A Zeezi ne b karen-biisã taa ko-kãsengã rʋʋnde, tẽng sẽn boond tɩ Gadara. 2A Zeezi sẽn yi koom-koglgã pʋgẽ bal yee, la rao a yembr zĩn-dẽgd sẽn tar yii yaad zĩigẽ n wa bãmb nengẽ. 3Rao-kãng dag n gãee yaadẽ wã, la neb dag n ka leb n tõe n sẽb-a ye, baa ne kutu. 4Bala, naoor wʋsgo, b rag n balga a naoã ne kutu la b sẽb-a ne bãense, la a kaoo bãensã n sãam kutã, la ned baa a yembr ka tar pãng sẽn sek tɩ tõog-a ye. 5Daar fãa, yʋng ne wĩndga, a bee yaadẽ wã la tãmsã zut n kelemdẽ, la a pogend a meng ne kuga. 6A sẽn yã a Zeezi sẽn ket n be yɩɩga, a wudgame n ta n wõgemd bãmb taoore, n zẽk a koɛɛg n gom ne pãng n yeele: 7«Zeezi! Saasẽ-saasẽ Wẽnnaam bi-ribla, yãmb data maam ne bõe? Mam kota yãmb ne Wẽnnaam yʋʋr tɩ y ra nams maam ye.» 8Bala, a Zeezi rag n yet‑a lame: «Zĩn-dẽgdã! Yi n bas raoã.» 9La bãmb sok-a lame yaa: «Fo yʋʋr la a bõe?» T'a leok-ba: «Mam yʋʋr la a Tusa wã, bala, tõnd yaa wʋsgo.» 10La yẽnda kosa a Zeezi ne a sũur fãa n yeel tɩ b ra rig bãmb tɩ b yi tẽn-kãng ye. 11Kurkuy kʋʋng wʋsg n dag n be tãngã sẽnẽ n wãbdẽ. 12La zĩn-dãmbã bõosa a Zeezi n yeele: «Tʋm-y tõnd kurkuyẽ wã tɩ d tɩ kẽ-ba.» 13La b kõ-b-la noore. La zĩn-dãmbã yiime n kẽ kurkuyã tɩ b yi tãngã sigdg n wudg n lʋɩ ko-kãsengã pʋgẽ. La b sõorã kolga tus a yi, la koomã rɩ-b lame. 14La neb nins sẽn dag n gũud bãmbã zoeeme n tɩ togs koɛɛgã tẽngã pʋgẽ la a kɩremsã, la nebã yiime n tɩ ges bũmb ning sẽn maanã. 15Bãmb waa a Zeezi nengẽ, la b yãnda ned ning zĩn sẽn boond tɩ Tusa wã sẽn dag n tarã, t'a yer fut n zĩẽ, n mi a nenga. 16Neb nins sẽn yãnd bũmb ning sẽn maanã togsa neb a taabã sẽn yɩ to-to ne rao ning zĩnã sẽn dag n tarã, la ne kurkuyã. 17Dẽ, bãmb sɩngame n kos a Zeezi ne b sũur fãa tɩ b yi n bas b tẽngã.
18Bãmb sẽn wa n kẽed koom koglgẽ wã, rao ning zĩnã sẽn dag n tarã kosa bãmb noor n na n pa ne bãmba. 19La a Zeezi ka sak ye, b yeel-a lame yaa: «Lebg n kuil f nebẽ wã n tɩ wilg bũmb nins fãa Zu-soabã sẽn maan n kõ foomã, la b sẽn zoe fo nimbãaneg to-to.» 20Yẽnda kẽnga Dekapoll soolem n tɩ moon bũmb nins fãa a Zeezi sẽn maan n kõ yẽnda wã. La nebã fãa yɛɛsame.
Bi-pugl vʋʋgre, la pag sẽn sɩɩs a Zeezi fuugu
(Mat 9.18-26, Luk 8.40-56)
21A Zeezi kẽe koom-koglgã n leb ko-kãsengã rʋʋnde. La neb kʋʋng wʋsg leb n tigma taab bãmb nengẽ, la a Zeezi dag n bee koomã noore. 22Karen-doog kãsem a yembr n wa be t'a yʋʋr boondẽ t'a Zayiruusi. Yẽnda sẽn yã a Zeezi, a wõgemda bãmb taoore, 23n kos bãmb ne a sũur fãa n yeele: «Mam bi-pugl n dat n ki. Wa-y n sɩɩs-y-yã-a ne y nus t'a sãoog n da ki ye.» 24A Zeezi yãaga yẽnda, la neb kʋʋng wʋsg tũu bãmba, n dɩdgd bãmba.
25Mik tɩ pag a yembr n dag n be be t'a zɩɩm yit hal yʋʋm piig la a yiibu. 26Yẽnda namsa wʋsg tɩpdb wʋsg nusẽ, n kɩs bũmb nins fãa a sẽn dag n tarã, la a ka sãoog baa bilf ye, bãagã pʋs n yãngame. 27A wʋma a Zeezi kibare, la a wẽdga nebã n wa a Zeezi poorẽ n sɩɩs bãmb fuugu. 28Bala, a rag n yeela a sũurẽ woto: «Mam sã n tõog n sɩɩs b futã bala, mam na n paama maagre.» 29La wakat-kãng bala, zɩɩmã sẽn dag n yitã yõkame, la a bãnga a yĩngã pʋgẽ tɩ bãagã bas-a lame. 30Wakat-kãng bal me, a Zeezi bãnga b mengã pʋgẽ tɩ pãng n yi bãmb nengẽ. La b wẽnemda kʋʋngã sʋk n soke: «Ãndã n sɩɩs mam futã?» 31Bãmb karen-biisã yeela bãmb yaa: «Yãmb yãame tɩ neb wʋsg rɩdga yãmba, tɩ yãmb leb n sokdẽ tɩ ãndã n sɩɩs yãmba.» 32La bãmb dag n wẽnemdame n na n ges n bãng sẽn maan-a bõn-kãngã. 33La rabeem yõka pagã t'a rigda, la a sẽn mi bũmb ning sẽn maan yẽnda yĩngẽ wã yĩnga, a waa n yĩgimda a Zeezi taoore, n pelg a pʋgã fãa n togs bãmba. 34La a Zeezi yeela yẽnda: «M biiga, fo tẽeb n maag-fo. Kẽng ne laafɩ n paam f meng ne bãag ning sẽn tar foomã.»
35Bãmb sẽn ket n gomdã, neb yii karen-doog kãsmã zakẽ n wa n yeele: «Yãmb bi-puglã kiime, bõe tɩ y na n kell n nams karen-saamba?» 36La a Zeezi ka kelg gom-kãens ye, la b yeela karen-doog kãsmã yaa: «Da maan dabeem ye, tẽ bala.» 37Bãmb ka sak tɩ ned yãag bãmb ye, sã n ka a Pɩyɛɛr la a Zak ne a ba-biig a Zã. 38B sẽn ta karen-doog kãsmã zakẽ, a Zeezi yãnda neb wʋsg sẽn be be n yãbda, n wiisdẽ, n maand bʋʋr wʋsgo. 39Bãmb kẽeme n sok nebã yaa: «Yaa bõe tɩ yãmb maand bʋʋr a woto la y yãbda? Biigã ka ki ye, a gõeeme.» 40La nebã yaala bãmba. Dẽ, a Zeezi kɩtame tɩ nebã fãa yi, la b tall biigã ba ne a ma, ne b karen-biis a tãabã sẽn yãag bãmbã n kẽ biigã sẽn be zĩig ningã. 41Bãmb gãda biigã nug n yeel-a: «Talita kumi» sẽn dat n yeel tɩ: «Mam bi-pugla, mam yeta foom tɩ f yiki.» 42Tao-tao bala, bi-puglã yikame n sɩng n kẽnda, bala, a ra tara yʋʋm piig la a yiibu. La nebã yɛɛsa wʋsgo. 43A Zeezi sagla bãmb neere n yeel-b tɩ b gũus tɩ ned da bãng ye, n yaool n yeel-b tɩ b bao rɩɩb n kõ biigã t'a rɩ.
Currently Selected:
A Mark koe‑noogo 5: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
