A Mark koe‑noogo 6
6
Nazarɛt nebã kɩɩsa a Zeezi
(Mat 13.53-58, Luk 4.16-30)
1A Zeezi basa zĩ-kãngã n leb b meng tẽngẽ, la b karen-biisã tũu bãmba.
2La vʋʋsg daar sẽn ta, bãmb zãmsa nebã karen-doogẽ wã. Nebã wʋsg sẽn wʋm bãmb zãmsgã, b yɛɛsame n soke: «Bãmb bãng-kãng yita yɛ? Ad yaa yam meng-meng la b kõ-ba, hal tɩ b tõe n maan bõn-bãn ne b nusi! 3Ka bãmb la ra-wãadã, a Maari biigã, a Zak la a Zooze la a Zuud la a Sɩmo ma-biigã? Bãmb ma-bi-pogs ka be tõnd sʋk ka sɩda?» La yõwã kɩtame tɩ Nazarɛt nebã ka tẽ a Zeezi ye.
4 #
Zã 4.44
La a Zeezi yeela bãmb yaa: «Wẽnnaam no-rɛɛs ka kongd waoogre, sã n ka a meng tẽngẽ la a roagdb sʋka, la a meng zakẽ ye.» 5Bãmb ka tõog n maan bõn-bãnd baa a yembr beenẽ, sã n ka b sẽn tik bãad-dãmb kẽer ne b nus n maag-bã bal ye. 6La nebã ka-tẽebã linga a Zeezi. A Zeezi saaga tẽn-kɩremsã n zãms nebã.
A Zeezi tʋma karen-biis piig la a yiibu
(Mat 10.5-15, Luk 9.1-6)
7Dẽ, bãmb boola b karen-biisã piig la a yiibã, n sɩng n tʋm bãmb b yiib-yiibu, n kõ-b pãn-tõog tɩ b rig zĩn-dãmb nins sẽn yaa rẽgdã. 8A Zeezi yeel-b lame tɩ b ra zã baa fʋɩ b kẽndã yĩnga, sã n ka rasaar bal ye. Tɩ b ra zã buri, wall korg bɩ ligd b sẽbds pʋs me ye. 9B yeel-b lame tɩ b wid neooda la b ra yeelg fu-yord a yiib ye.
10La a Zeezi rag n yeta bãmb yaa: «Yãmb sã n tɩ sig ned zakẽ, pa-y be hal tɩ ta y loogre. 11#Tʋʋm 13.51#Luk 10.4-11La yãmb sã n kẽng tẽngẽ tɩ b ka reeg yãmba, la b ka kelg yãmba, bɩ y yi be la y pĩms y naoã tom tɩ bõn-kãng yɩ kaset b yĩnga.»
12Bãmb loogame n moon n yeel nebã tɩ b tek yam n kos sugri. 13#Zak 5.14Bãmb diga zĩn-dãmb wʋsgo, la b tigsa bãad-dãmb wʋsg ne kaam n maag-ba.
A Zãmbatiis kũum
(Mat 14.1-12, Luk 9.7-9)
14 #
Mat 16.14, Mark 8.28, Luk 9.19 Naab a Erood wʋma a Zeezi kibare, bala, b yʋʋrã saaga zĩigã fãa. Nebã yeelame: «A Zãmbatiis vʋʋgame n yi kũum sʋka. Yaa woto n kɩt t'a tar pãng n maand bõn-bãna.» 15Neb a taab yeelame: «Yaa a Eli!» La neb kẽer yeelame: «Bãmb yaa Wẽnnaam no-rɛɛs wa Wẽnnaam no-rɛɛsdb a taabã.» 16La a Erood sẽn wʋm woto, yẽnda yeelame: «Yaa Zã ning mam sẽn da fiuug a zugã. Yaa yẽnda n vʋʋge.»
17 #
Luk 3.19,20 Bala, a Erood meng dag n kɩtame tɩ b yõk a Zã n sẽb n kẽes bi-bees roogẽ, yẽnda ba-biig a Filip pag a Eroodyaad a sẽn peegã poorẽ. 18Bala, a Zã rag n yeel-a lame tɩ ka zems ne tõog tɩ yẽnda dɩk a ba-biigã pag ye. 19A Eroodyaad sũur yika ne a Zã t'a rat n kɩt tɩ b kʋ-a. 20La yẽnda ka tõe ye. Bala, a Erood zoeta a Zã, a sẽn mi t'a yaa nin-tɩrg la nin-sõngã yĩnga. Erood gũ-a lame, la a sẽn wʋm a Zã goamã, lebga tagsg wʋsg ne-a. Baoosgo, a kelg-a-la ne sũ-noogo.
21A Erood sẽn tẽeg a dogem daar n maan tigr a nin-kãsemsã ne a sodaas nanambsã ne Galɩle soolem nanambsã yĩnga, a Eroodyaad paama weer n na n maan a sẽn dag n datã. 22A Eroodyaad bi-pugl kẽe roogẽ wã n sao, la biigã saoog yɩɩ a Erood ne neb nins sẽn dag n zĩ ne yẽnda n dɩtẽ wã noogo. 23A Erood wẽena ne yẽnda n yeele: «Fo sẽn kos maam bũmb ning fãa, mam na kõ foom, baa sã n yaa mam soolmã pʋɩ-sʋka.» 24La bi-puglã yiime n tɩ sok a ma yaa: «M kos bõe?» La a ma wã leokame: «Kos a Zãmbatiis zugã.» 25La yẽnda leba rĩmã nengẽ tao-tao n tɩ kos yẽnda a woto: «Mam datame tɩ y kõ maam a Zãmbatiis zug ne lengr moasã bala.» 26Rĩma sũur sãamame. La a wẽenegã ne nebã sẽn zĩ ne yẽnda wã yĩnga, a rag n ka rat n zãgs ye. 27Tao-tao bala, rĩmã yeela dapoe-bil t'a kẽng n tɩ wa ne a Zãmbatiis zugã. 28Dapoe-bilã kẽngame n tɩ fiuug a Zã zugã bi-beesã roogẽ n sagl lengrẽ n tall n wa n kõ bi-puglã, la bi-puglã tallame n tɩ kõ a ma. 29La a Zã karen-biisã sẽn wʋme, b waa n dɩka a kũumã n tɩ solg yaoogẽ.
A Zeezi rɩlga neb tus a nu
(Mat 14.13-21, Luk 9.10-17, Zã 6.1-13)
30A Zeezi tẽn-tʋmdbã tigma taab bãmb nengẽ n wilg bãmb bũmb nins fãa bãmb sẽn maane, la b zãms nebã. 31Neb wʋsg rag n watame la b loogdẽ hal tɩ bãmb ka tol n tar weer n na n dɩ ye. Dẽ, a Zeezi yeel-b lame yaa: «Wa-y tɩ d yi we-kɛɛnga, neb sẽn ka beẽ tɩ y tɩ vʋʋs bilfu.» 32Bãmb kẽe koom-koglgã n na n yi kɛɛnga, zĩig neb sẽn ka beẽ. 33La neb wʋsg yãnda bãmb loogrã n bãng bãmba. La neb yii tẽms fãa n zoe ne nao n deng bãmb n ta zĩig ning bãmb sẽn dabdã. 34#Sõd 27.17, 1Rĩm 22.17, 2Kib 18.16, Eze 34.5, Mat 9.36A Zeezi sẽn yi koom koglgẽ wã, b yãnda neb kʋʋng wʋsgã, la b nimbãaneg yõka bãmba, bala,
bãmb wẽnda wa piis sẽn ka tar pe-kɩɩm ye.
La bãmb sɩngame n zãms-b bũmb wʋsgo. 35Wakatã sẽn loogdã yĩnga, a Zeezi karen-biisã kolga bãmb n yeele: «Zĩ-kãngã yaa weoogo, la wakatã loogdame. 36Kɩt-y tɩ nebã loog n kẽng tẽn-bãoonegã la tẽn-kɩremsã sẽn pẽ wã n tɩ ra rɩɩb n dɩ.»
37A Zeezi leok-b lame yaa: «Bɩ yãmb mensã bao rɩɩb n kõ nebã tɩ b rɩ.» La b yeela a Zeezi yaa: «Tõnd na n kẽngame n tɩ ra bur deniye kobsi n wa n kõ-b tɩ b rɩ?» 38La a Zeezi leok-b lame n yeele: «Yãmb tara bur a wãna? Kẽng‑y n ges-y yã.» Karen-biisã kẽngame n tɩ gese, la b wa n togs a Zeezi tɩ yaa bur a nu ne zĩm a yiibu. 39Dẽ, bãmb yeelame tɩ b zĩnig nebã fãa sull-sull mo-maasã zugu. 40La bãmb zĩnda rulg-rulga, koabg-koabga la pis‑nunu. 41A Zeezi dɩka bur a nu wã ne zĩm a yiibã n nak n ges yĩngri, n ning barka, n yaool n kao burã n kõ b karen-biisã tɩ b pʋɩ kʋʋngã. Bãmb pʋɩɩ zĩm a yiibã me tɩ ta nebã fãa. 42Bãmb fãa rɩɩme n tɩge. 43La b wʋka bur-gɩrsã ne zĩm-kɛlã peoog piig la a yiibu. 44Neb nins sẽn dɩ burã yaa raop tus a nu.
A Zeezi kẽnda koom zugu
(Mat 14.22-23, Zã 6.16-21)
45Tao-tao bal yõwã zugẽ, a Zeezi kɩtame tɩ b karen-biisã kẽ koom-koglgã n deng bãmb taoor ko-kãsengã rʋʋnde, Betsayɩda sẽnẽ, tɩ bãmb mengã yõdg n kuils nebã. 46Bãmb sẽn kuils nebã n sa, b kẽnga tãngã zug n tɩ pʋʋse.
47Zĩ-sobd sẽn ta, koom-koglgã bee ko-kãsengã sʋka, t'a Zeezi be tẽng b yembre. 48Bãmb yãame tɩ b karen-biisã namsda wʋsgo, n dugsd koom-koglgã, bala, sobg n segd-ba. Sẽn kolg tõd-beoogo, a Zeezi kẽna ko-kãsengã zug n dabd b karen-biisã sẽnẽ, n dat n loog-ba. 49Bãmb sẽn yã a Zeezi tɩ b kẽnd koomã zugã, b tẽeme tɩ yaa kɩɩma, 50la b kelmame, bala, bãmb fãa yãnd-b lame, la rabeem yõka bãmba. Tao-tao bala, a Zeezi goma ne bãmb n yeele: «Keng-y y sũyã, yaa maam. Da zoe-y rabeem ye.» 51Dẽ, bãmb kẽe koom-koglgã pʋgẽ n paas b karen-biisã, la sobgã yõkame. Karen-biisã yɛɛsame n sẽege, 52bala, bãmb dag n ka wʋm burã bõn-bãndã võore, b sũyã sẽn diglmã yĩnga.
A Zeezi maaga bãad-dãmb Zenezarɛt
(Mat 14.34-36)
53La bãmb sẽn pɩʋʋg ko-kãsengã, bãmb taa Zenezarɛt soolmẽ, la b yalsa koomã noore. 54La bãmb sẽn yi koom koglgẽ wã, nebã bãnga a Zeezi tao-tao. 55La b zoeeme n kẽ soolmã fãa n tɩ rɩgs bãad-dãmbã ne pãnday n wa zĩig ning fãa b sẽn wʋm t'a Zeezi be. 56A Zeezi sẽn taẽ fãa, tɩ yaa tẽn-bãoonegẽ, tɩ yaa tẽn-bɛdẽ, tɩ yaa pʋt rotẽ, nebã gãnegda bãad-dãmb raas pʋse, la b kosa a Zeezi tɩ b sak tɩ b sɩɩs b fuugã noor bala. La neb nins fãa sẽn sɩɩsã paama laafɩ.
Currently Selected:
A Mark koe‑noogo 6: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
