TDP 32
32
1Lon mànan lɛn, ka n too kɔ,
man die boo diɛ,
tán mànan dɔn,
ka n too kɔ ma lɛ gɔ́ɔ̃ ǹ boon li.
2Maa doree kɛ n kiɛ ka la bɛ́ lɔn,
maa boo kɛ n gisĩ ka pele bɛ́ lɔn,
ka la gole bɛ́ lɔn kiɛ wuru-n,
ka kaasuun bɛ́ lɔn buu ganaa.
3Ma á re Dɛnaa Lawa tɔ boe,
ka wɔa Lawa lɛ a golebaa dɔ̃.
4A din nə wɔ tamaɛ,
a sii tumaa lɛ n piɛ̃ nɛ.
A n sii tumaa siɛ a zii li,
Lawa bɔlɔgoondɛnaa nɛ,
kɔkɔrɔbaa ba a li wa,
a n pepere, telee ne.
5Maǹ nə́ n dinin ziziɛ̃,
Lawa sii bie wa,
bɛa sìi nə ǹ dinin ganaa,
ǹ ba a nɛnyaanan lɛa wa
min gɛsɛ manɛ,
min kɔkɔrɔn manɛ.
6Baãnaan man ka nɛ,
sii-doɛ̃ nya ka-a.
Ka dinin man kɛ miã
zɛnɛɛ Dɛnaa Lawa-n sonbore?
Táa ka a Díi n ka a din lɛ nɛ,
táa ka zɛnaali ni?
A din na á ka zɛnaa,
á ka koa a din a minin lɛa.
7Ka n yiri kɔ ka lɛlɛ siin lɛn nɛ,
ka n taasɛ ka lɛ̀n kɛn nɛ ǹ nə́ kiɛ̃.
Ka nɔ̀n da kaa díin la,
ǹ tá re a yɔrɔ pii ka nɛ,
ka nɔ̀n da kaa min golen la,
ǹ tá re pii ka nɛ.
8 #
NDS 17.26
Lon a Lawa bɛ́ minbuiinin
niniɛ kɔn,
a bɛ́ bǎã tatalɛ koe tɔrɔn la,
a n gèlè koɛ tɔrɔn bii,
á n yiri koa Izirayeli minin
dɔn li.
9A giala, Dɛnaa Lawa wɔ gii
bɛ́ ka màn mɛn nɛ,
a din a minin kɛn manɛ.
Zakɔba tɔrɔn lɛn,
bɛn lɛn man doe a ganaa.
10Lawa na á woo a minin
yaa don,
ǹ dininsɔɔ̃nɔn,
don mànan lɛ-baa bii,
á ǹ tamaa, á ǹ doroo,
á ga ǹ walan,
ka a din yii nàn bɛ́ lɔn.
11Ka giogiatã-a bɛ́ a
nɛnyaanan foo taɛ̃ lɔn,
bɛ̀ a n bibiə̃ ǹ mìi la,
á n nyàan lɛ bɔ sababa,
á ǹ goa á ǹ kaa a nyàan la,
12Dɛnaa Lawa dinsɔɔ̃
ná a zaman nyɛɛnaan bɔ miɛ̃,
tɔrɔ kɔsɔn kɛn dì kɔn goã kun
ni walan wa.
13Á giã ǹ bǎã kɔ ǹ la kele yii ni,
ǹ nə́ wuru bɔ,
ǹ nə́ màn yɛ ǹ nə́ bii.
Á zoo bɔ kele yala-n á kɔ ǹ la
ǹ nə́ bii,
á *olivie dan kaa bɔ ganaa
pára kaka la.
14A din na á diin laanka
sèren nyɔ kɔ ǹ la ǹ nə́ mi.
A din na á siĩ nyɔɔnaa kɔ ǹ la
ǹ nə́ sɔ̃,
sère nyɔɔnaan manɛ,
Basan a sère gɔ̀lɔ̀n kɛn
tɔrɔn manɛ,
ka butumun nyɔɔnaan nɛ.
Á *belee sonbore kɔ ǹ la ǹ nə́ bii,
á duvɛ̃ kɔ ǹ la ǹ nə́ mi,
*rezɛ̃ da a nɛ kɛ lɛ.
15Sɛnɛ, Izirayeli minin kɛn,
ǹ bɛ́ ǹ nə́ kã kəni,
maǹ nə n gòã toe.
Ǹ bɛ́ ǹ nə́ gole kɔ,
ǹ nə́ kasã, ǹ nɔ̀ bɔ,
ǹ nə́ Lawa toa walan,
a da yaa, a din dɔ na á ǹ zɛnaa.
Ǹ ná a puusə kɔ,
a da yaa a din dɔ nə ǹ tamaɛ,
á tá ǹ kirisibiɛ.
16Izirayeli minin lɛn man nə́
kɔ lawa kɔsɔn lɛ,
ǹ nə́ Lawa da miãgoã bɔ ganaa,
ǹ dinin man nə́ sii
bɔbɔnɛɛ zɛnaa,
ǹ ná a foo da yoo ganaa.
17 #
Kor1 10.20
Maǹ wúlu mànan koe
nɔ̀ɔnɔn la,
a da yqa bɛn dɔn bie Lawa
lɛa wa.
Maǹ wúlu mànan koe dìn la,
a da yǎa ǹ ba ǹ doɛ̃ lɛlɛ wa.
Maǹ koe dì soreen la,
a da yaa,
ǹ din dinin nə bɛn guguru kɔ wa.
18Lawa mɛn lɛ nə ǹ zɛnaa,
á nə́ ǹ tamaɛ,
maǹ nə́ n la bɔ bɛ lɛ-a.
Lawa mɛn lɛ nə ǹ zɛnaa
á ǹ kaa kanaa,
ǹ yiri bɔ ka bɛ lɛ nɛ.
19A nɛnyaanan lɛn nə́ wɔ a lon.
Dɛnaa Lawa bɛ́ á yɛ miɛ̃,
a foo yoo,
20á tɔ́n pɛ kɛnɛn:
«Ma á re n yɔrɔ bɔyɛɛ ma bɔ ǹ la,
bɛ̀ maǹ die n biɛ lɔn,
ma á re giɛ a ganaa.
A giala, tɔrɔ babaraan manɛ,
maǹ minin lɛa,
min ba boe la á n foo doɛ
ǹ ganaa wa.
21 #
Kor1 10.22; Rɔm 10.19 Mànan mɛnɛn bɛ́ lawa
kooron lɛa,
ǹ nə́ ma da kɔn ka bɛn nɛ,
ǹ nə́ ma foo yoo ka
ǹ màn kokooron kɛn nɛ.
Á bǐɛ̃ kɔ!
Tɔrɔ mɛn bɛ́ a tɔrɔ lɛa wa,
ma dɔ n die ǹ dɔn kiɛ kɔn ka bɛ nɛ.
Tɔrɔ mɛn nə́ ke baãnaa lɛa,
man die ǹ foo yui ka bɛ nɛ.
22Maa foo a yoo lɛ gɔ́ɔ̃ nɛ,
tɛ na á soo.
Bɛa tɛ lɛ kũ yǎa geren piɛ,
á màn tumaa kũ tán la,
á kelen giala wɔ ǹ bǎãn kukũ.
23Man die bɔ̀n gigiã diɛ ǹ ganaa,
yǎa maa kiɛ nyɛɛ ǹ ganaa.
24Bɛ̀ ǹ nə́ nɔmaa bòo gɔn,
bɛ̀ gɔ̀nɔn wɛɛ̃ laanka busu
babaraa kɔsɔn nə́ ǹ pàã nya,
ma á re don màn babaraan kiɛ
ǹ ganaa,
ma á re miɛ̃ babaraan kiɛ
ǹ ganaa.
25Kanaa, minin tá re
ǹ nɛnyaanan dii zia la,
kion, nyɛ́ɛ a re ǹ toɛ wa.
Ǹ nɛgiĩn laanka ǹ nɛlɔn tá re giɛ̃,
ǹ nɛnyaanan laanka ǹ min
zizin tá re giɛ̃.»
26A na á goã ma gɔ́ɔ̃ nɛ:
ma ǹ dɛ, ma ǹ pɔpɔsɛ,
ma ǹ sii bɔ ma bɔ
minbuiinin taasiɛ nɛ.
27Sɛnɛ, man má goã nyɛ́ɛ biɛ,
máa ǹ zɔ́ɔn kɛn baran n gɔn
kũ bɛ ganaa,
ǹ sɔ kɔ ma-a wa,
máa ǹ ziadɛnan lɛn baran
n dinin bebele ǹ pɛ
mà ǹsɛn man nə́ gɔ̀lɔ̀ baa ka
n dinin pàã nɛ,
mà Dɛnaa Lawa bie á kɛ
tumaa zɛnaa wa.
28Tɔrɔ kɛa minin man
baãnaan lɛa,
ǹ yiri banban.
29Bɛ̀ maǹ sii doɛ̃,
sii mɛn bɛ́ n yii diɛ ǹ la,
bɛ̀ ǹ tá n taasɛ ka bɛ nɛ,
bɛ̀ ǹ tá re a giala miɛ.
30Min goon dinsɔɔ̃ n siɛ lɔn,
a min duu goon loo?
Min paa dinsɔɔ̃ n siɛ lɔn,
a min duu fù kaa baa ganaa,
bɛ̀ ǹ tamaali lɛ bie á ǹ sã wa,
bɛ̀ Dɛnaa Lawa lɛ bie á ǹ wɔ
ǹ zɔ́ɔn gɔn wa?
31A giala, màn mɛn bɛ́ wɔa
zɔ́ɔn lɛn tamaɛ,
bɛ pàã dɔ wɔsɛn tamaali Lawa
kɛ wɔ li wa.
Ǹ dininmaan tá bɛ doɛ̃.
32Wɔa zɔ́ɔn lɛn man ka
Sodɔmu minin kɛn bɛ́ lɔn,
maǹ ka Gomɔɔrɔ minin kɛn
bɛ́ lɔn.
Ǹ zɛnaa ǹ sii lɛ n ka sèwò
bɛ́ lɔn,
ǹ nya ǹ dí lɛ n kɔɔsɛ.
33A n ka miɛ̃ babaraa a sèwò
bɛ́ lɔn,
a n baraa ka bìri a sèwò bɛ́ lɔn.
34Bɛ bie ma yiri-n ke wa ya?
Bɛ bie koa-n ma gɔn li wa ya?
35 #
Rɔm 12.19; Ebr 10.30 Ma din nə gɛ̀ dòo boe,
ma din nə dòo sarɛɛ.
Bɛ̀ ǹ nə́ sã ǹ nə́ wɔ ma lon
ǹ mɛn pinaa,
ǹ bɔ̀n baa pinaa na á dɔ.
Sii mɛn nə n yɔrɔ bɔ ǹ wɔ lɛa,
bɛa re n lɔloɛ wa.
36 #
Loe 135.14
Dɛnaa Lawa din nə die
a minin lɛn sii yɔrɔ boe.
Bɛ̀ á yɛ mà ǹ pàã nya
ǹ mɛn waáraa,
dɔmalɛ wole ná a ba ǹ lon wa,
foo doa ǹ bǎã ná a ba ǹ lon wa,
á re wusii a makara bɔ
a dí-nyalin lɛn ganaa.
37Bɛa biikoo li, á re pii:
«Kaa lawan lɛn nə́ maa,
ka bɛ́ ká goã n foo doɛ
ǹ mɛnɛn lɛn ganaa,
mà ǹ tá re ka tamaɛ,
ǹ nə́ maa?
38Ǹ dinin lɛn man nə́ goã
kaa wúlu mànan lɛn nyɔɔ soɛ̃,
ka goã die wúlu boe ka
duvɛ̃ mɛn nɛ,
bɛ̀ ǹ bɛ mi.
Ǹ yoo kanna kəni,
ǹ nə n dɔ ka lɛ,
ǹ bǎã yɛ kəni, ǹ ka duru a nɛ!
39Ka dɔ̃ ka bɛ lɛ-n kəni,
mà ma din lɛ nɛ,
ma din goon lɛ nɛ,
lawa kɔsɔ ba n tii ma-a wa.
Ma din nə gɛ̀ dii,
ma din nə yiikoonaabaa koe,
ma din nə busu diɛ min ganaa,
ma din nə busu nyɛɛ.
Min kɔn ba boe la a min kũ
a si ma la wa.
40Ma nə n gɔn siɛ ma dia lon
ma kɛ pɛ:
Ma din lɛ yii n koo yǎa duduu!
41Bɛ̀ má maa gɔya sa tɛ-pɛle
kɛ lɛ lɔ,
bɛ̀ má dɔlɔ-bɔ giala kɔ,
ma á re maa gɛ̀ dòo boe
maa zɔ́ɔn kɛn ganaa,
min mɛnɛn bɛ́ ma biɛ zɔ́ɔ,
ma á re bɛn sarɛɛ.
42Bɛ̀ maa gɔya sa kɛ tá
ǹ siĩ gialaa ǹ mɛn waáraa,
ma á re maa kiɛn kɛn goe ka
mà nɛ ǹ mi, ǹ yii tii.
Ma á re maa zɔ́ɔn lɛn
goledɛnan mìi wɔsɛ kɔn.
Gɔn nə min mɛnɛn kũ,
ka kòso nɛn nɛ,
ma á re bɛn mà kiɛ.»
43 #
Rɔm 15.10; SNS 19.2 Tɔrɔn lɛn,
ka n nyɛnyɛɛ kun ka
Dɛnaa a zaman nɛ.
A giala,
a n die a dí-nyalin lɛn gɛ̀ dòo boe,
a n die dɔlɔ diɛ a zɔ́ɔn lɛn mìi ni.
Sɛnɛ, á re a gána lɛ laanka
a minin lɛn sii baraan sawɛɛ.
44Muizu na á daa kun ka Nunu a nɛgiĩ Zozoe ne, á bɛa loe kɛ lɛ a boon tumaa pɛ zaman lɛ nɛ.
45Muizu bɛ́ á bɛa loe lɛ a boon tumaa pɛ Izirayeli minin tumaa nɛ á nya, 46á pɛ ǹ nɛ: «Ma boon mɛnɛn tumaa pɛ ka-n pelo, ka ǹ kũ ka parsiini. Ka dɔn die ka pɛ ka laa kaa nɛnyaanan ganaa, màn mɛn bɛ́ toɛ, ǹ nə n yiri koa dí-pɛ kɛ lɛ a boon tumaa li ǹ kɔ ǹ lɛ. 47A giala, boo kɛ lɛ bie boo kooro lɛa wa. Boo kɛ lɛ, ka nyin biɛ nɛ. Bɛ̀ ká si, ka bɛ́ re Zurdɛ̃ tà kuri, ka wɔ gána mɛn lɛ nɛ ka si ka baa kaa wɔ lɛa, ka á re nyin sasa yii a nɛ.»
Muizu a gɛ̀ mìi
48 #
MNS 27.12-14; TDP 3.23-27 A din pinaa kɛ lɛ nɛ, Dɛnaa Lawa boo da ka Muizu ni á pɛ nɛ: 49«Dii Neboo kele la Abarimu a kele yii kɛ nɛ, Moabu gána nɛ, Zerikoo kiwi yɔrɔ-a. N toa walan n ga Kanaan gána lɛ ganaa, ma bɛ́ ǹ mɛn lɛ koe Izirayeli minin lɛn la ǹ wɔ lɛa. 50N bɛ́ re dii kele mɛn lɛ la, n tá re giɛ̃ walan n wo n digolon li, ka ǹ dɔɔ̃ngiĩ Aarɔn nə́ ke á gã Hɔɔrɔ kele la lɔn, á woo ǹ digolon li. 51A giala, n din laanka Aarɔn nɛ ka masɛ bɔlɔ tii Meribaa mu kɛ lɛ-a Kadɛsi kiwi, Sini don. Ka masɛ a Lawabaa nyaa Izirayeli minin lɛn manɛ a pinaa wa. 52Bɛ lɛ nɛ, gána kɛ lɛ ma á re koe Izirayeli minin la, n tá re yii ka n yii ni, sɛnɛ, n gòã na a re miɛ̃ a-n wa.»
Currently Selected:
TDP 32: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.