TDP 33
33
Barka mɛn nə n da tɔrɔ fulupaa kɛ ganaa
1Lawa a boo gii-dali Muizu barka mɛn da Izirayeli minin lɛn ganaa á tɔ́n gã, bɛ n ka kɛ nɛ. 2A na á pɛ kɛnɛn:
«Dɛnaa Lawa bɔ Sinayii kele la á daa,
a na á n toa Seyiiri gána nɛ á daa ǹ lɛa,
ka wasa bɛ́ lɔn,
á n toa Paran kele la,
á wasa kaa a minin lɛn ganaa.
Á daa a minin li,
kun ka lon a dia dí-a wole duu damata nɛ,
ka a dí-pɛ tɛdɛnaa kɛ nɛ a gɔn.
3Sonbore,
Dɛnaa Lawa á minin narɛ,
min mɛnɛn bɛ́ a wɔn lɛa,
ǹ mɛnɛn bɛ́ woe giɛ̃ tán a li,
bɛ̀ ǹ nə n too kɔ a boo li,
bɛn lɛn sii na a gɔn.
4Muizu na á dí-pɛ kɔ wɔ la,
Zakɔba tɔrɔn lɛn kíɛ̃ nɛ.
5Zaman lɛ a nyɛɛnaandɛnan bɛ́ ǹ nə́ n lɛ sɔkɔn,
kun ka Izirayeli tɔrɔn lɛn nɛ,
Izirayeli minin lɛn nə́ kii yɛ.
6Lawa die a Urubɛn tɔrɔn lɛn toa.
A laanɛ ǹ ba tɛ wa,
Lawa die a ǹ nyin toa.»
7A màn mɛn pɛ Zudaa wɔ paǹ li, bɛ á ke:
«E, Dɛnaa Lawa,
n too kɔ Zudaa tɔrɔn kɛn lɛn li,
n nə ǹ kaa kun ka ǹ tɔrɔ minin ni.
N din nə pàã kɔ ǹ la,
n dɔ ǹ lɛ, ǹ boo ǹ zɔ́ɔn la.»
8 #
BBN 17.7; 28.30; MNS 20.13 *Levii tɔrɔn wɔ paǹ li, a na á kɛ pɛ:
«Dɛnaa, ń nə́ n din dùũ dɔ̃ ǹ mànan kɔ ǹ dí-nyali sonboren kɛn la.
Ń nə́ n da ǹ gɔ́ɔ̃ li Masaa,
ń dɔlɔ bɔ ǹ ganaa Meribaa mu lɛ a boo-a.
9Ǹ nə́ n din narɛ á la ǹ díin laanka ǹ náan manɛ,
ǹ nə́ n piã ka ǹ dɔɔ̃nɔn nɛ n din a lɛa,
ǹ nə́ ǹ nɛnyaanan tii n din a lɛa.
Ǹ nə́ n boo kɛ tamaa,
ǹ nə́ n yiri koa n lɛ kɔ kɔn la lɛ li.
10Ǹ dinin lɛn man Zakɔba tɔrɔn darɛɛ n sii yɔrɔ bɔ ǹ boon ganaa,
ǹ dinin man Izirayeli minin darɛɛ n dí-pɛn ganaa.
Ǹ dinin man nyɔɔ gìĩ kɔɔ̃n tiɛ̃ n yɔrɔ-a,
ǹ dinin man *wúlu màn tiɛ̃ *wúlu bɔ ǹ bǎã kɛ nɛ.
11Dɛnaa Lawa, n din nə màn da ǹ pàã li,
ǹ bɛ́ dí mɛn nyɛɛ n bɛ lɛ si.
Min mɛnɛn bɛ́ yui ǹ gialaa, bɛn kii yiɛ,
min mɛnɛn bɛ́ ǹ biɛ zɔ́ɔ,
n nyan toa bɛn nə yoo doo wa.»
12Bɛnzamɛn tɔrɔn wɔ paǹ li, a na á kɛ pɛ:
«Dɛnaa Lawa Bɛnzamɛn tɔrɔn narɛ parsiini.
Maǹ là nyantoro la kun ka n din ni,
n din nə ǹ tamaɛ baraabaraa
n din nə giã nɛ ǹ bii.»
13Zozɛfu tɔrɔn wɔ paǹ li, a na á kɛ pɛ:
«Dɛnaa Lawa die a kaa gána bǐɛ̃ kɔ.
Lawa die a bǐɛ̃ sonbore baa ka la,
a die a pele gisĩ kaa tán la,
a tán giulun mu kɛ dɔ kɔ ka la.
14Wasa bɛ́ boe bɛ̀ a màn mɛn bǐɛ̃ kɔ,
màn mɛn bɛ́ miɛ̃ mui woo mui,
a die a bɛ tumaa a sonbore kɔ ka la.
15Kelen man kaa bǎã lɛ nɛ haalɛ lɛlɛ lɛlɛ,
tentenen man a nɛ haalɛ bibi,
kaa bǎã lɛ á màn bǐɛ̃ koe á la yii ni.
16Gána sonbore kɛ lɛ a naforo ne,
Lawa mɛn bɛ́ á n din nyaa daãn nɛ,
bɛa bǐɛ̃ nɛ,
bɛ die a dɔ Zozɛfu tɔrɔn kɛn ganaa,
Zozɛfu mɛn bɛ́ á ǹ dɔɔ̃nɔn mìilandɛnaa baa.
17Zozɛfu nyàa á lon!
A n kaka ka dii gɔ̀lɔ̀ bɛ́ lɔn,
ka lɛlɛ a don a zù kɛ bɛ́ lɔn.
Á bɛn gegere màn paa bɔ,
goon nə ka Efrayimu tɔrɔ gigiã kɛ nɛ,
goon nə ka Manaasee tɔrɔ duu damata kɛ nɛ.
A n tɔrɔn dii ka a bɛnɛn lɛn nɛ,
a ǹ loo a wo ǹ koa kanaa lɛ dan ganaa.»
18Zabulɔn tɔrɔn wɔ paǹ li,
a na á kɛ pɛ:
«Zabulɔn tɔrɔn,
ka n nyɛnyɛɛ kaa soo a wo ga màn li lɛ gɔ́ɔ̃ nɛ.
Kasɛn, Isakaara tɔrɔn,
ka dɔn nə n nyɛnyɛɛ kaa mɔnaa kionən ne.
19Ǹ tá re tɔrɔn bii ǹ wo ne kele la,
ǹ tá re wúlu mànan koe a yɔrɔ li walan.
A giala, ǹ tá re màn gigiã wɛɛ yìsi mu li,
ǹ tá re màn sonboren wɛɛ nyɔɔsɔ li.»
20Gaadi tɔrɔn wɔ paǹ li,
a na á kɛ pɛ:
«Ma á barka diɛ Lawa nɛ,
a giala, á bǎã gole kɔ Gaadi tɔrɔn la,
ǹ nə́ giã a nɛ ka yàra nɛ ǹ dan bɛ́ lɔn,
a na a siĩ duĩ, a kũ,
a saa a gòãn ganaa a sɔ̃ a wo a mìi yaa.
21Gaadi tɔrɔn man nə́ gána lɛ a bǎã sonbore bɔ.
Gána lɛ a mìilandɛnaa wɔ gii na á goã walan.
Bɛ kio, ǹ nə́ woo dɔ tɔrɔn lɛn goledɛnan li,
Dɛnaa Lawa bɛ́ giɛ màn mɛn li,
ǹ nə́ bɛ zɛnaa,
a màn mɛn pɛ Izirayeli wɔ paǹ li,
ǹ nə́ bɛ zɛnaa.»
22Dan tɔrɔn wɔ paǹ li, a na á kɛ pɛ:
«Dan tɔrɔn man ka yàra ten bɛ́ lɔn,
maǹ soe Basan gána nɛ ka baa nɛ.»
23Nɛfutalii tɔrɔn wɔ paǹ li,
Muizu na á kɛ pɛ:
«Nɛfutalii tɔrɔn nə́ kã ka màn kɔɔ̃n nɛ,
Dɛnaa Lawa a bǐɛ̃ nə́ ǹ gɔ̀nɔn bɔ.
Ǹ die ǹ gána lɛ a lɛ̀nyɛɛn gɔn la laanka a gusin a lɛ̀gɔn la si.»
24Asɛɛrɛ tɔrɔn wɔ paǹ li,
a na á kɛ pɛ:
«Zakɔba a nɛgiĩn lɛn tumaa bii,
Lawa die a barka da Asɛɛrɛ tɔrɔn ganaa,
Lawa die a na gìĩ da ǹ dɔɔ̃nɔn lɛn tumaa nyin ni,
Lawa die a na a nyɔɔ lɛ kɔ ǹ la.
25Kaa kiɛnlɛ-a ǹ goon lɛn die ǹ goã fɔlɔ laanka zan lɛa,
ka goã kaka miɛ̃ yǎa a woe kiɛ kaa gɛ̀ lɛ.»
26Bɛ kio Muizu wusoo á kɛ pɛ:
«Izirayeli minin lɛn,
màn kɔn ba n zoɛ̃ kaa Lawa kɛ-a wa.
A din nə dii labaran la,
a n toa lon a gisĩ tán ka gugurubaa nɛ,
a din nə die n doe ka lɛ.
27Lawa mɛn bɛ́ a tan yǎa duduu,
a din lɛ n duru n bǎã lɛa,
A din lɛ gɔn nə ka li yǎa duduu.
Á kaa zɔ́ɔn loo á ǹ bɔ ka nyɛɛnɛ,
á pɛ ka nɛ, mà ka ǹ dɛ lenlen.
28Izirayeli minin lɛn man là nyantoro la, n susui,
Zakɔba tɔrɔn lɛn manə ǹ gɔrɔ.
Ǹ bɛ́ re woe gána mɛn nɛ,
*belee laanka rezɛ̃ gána nɛ,
a giala,
pele a gisĩ ǹ bǎã lɛ-n parsiini.
29Izirayeli minin,
kasɛn wɔ bǐɛ̃ kɔ!
Dɛnaa Lawa na á tɔrɔ kɔsɔ mɛn kirisibaa ka kasɛn kɛn bɛ́ lɔn?
A din nə goóro lɛa ka tamaɛ,
a din dɔ n gɔya sa lɛa,
pàã koe ka la.
Kaa zɔ́ɔn tá re ka bebele ka yɔrɔ yii ni,
sɛnɛ, kasɛn tá re tɔ we ǹ dɔ̀ɔ̃ la.»
Currently Selected:
TDP 33: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.