TDP 5
5
Di fù boo
1Muizu Izirayeli minin lɛn tumaa biì á pɛ ǹ nɛ: – Izirayeli minin lɛn, ma bɛ́ landa boon laanka sii yɔrɔ bɔ ǹ boon mɛnɛn kiɛ ka too-n pelo ke, ka n too kɔ bɛn li. Ka n daraa ǹ ganaa, ka ǹ tamaa, ka kɔ ǹ lɛ.
2Wɔa Lawa, Dɛnaa Lawa lɛ lɛ kɔ kɔn la wɔ wɔ nɛ, Orɛbu kele la. 3Dɛnaa Lawa bie á bɛa lɛ kɔ kɔn la lɛ wɔ ka wɔ digolon dininsɔɔ̃nɔn nɛ wa. Sɛnɛ, a na á doa kɔn ka wɔ dɔn nɛ, wɔ mɛnɛn tumaa yii á ke koo kànaa pelo. 4Dɛnaa Lawa na á boo da ka dinin yii ni, kele lɛ la tɛ bii. 5Bɛa waáraa lɛ nɛ, ma din nə má tɔ́n golee ka laanka Dɛnaa Lawa bii, má n Dɛnaa Lawa a boo sii pii ka nɛ. A giala, ka n ká goã nyɛ́ɛ biɛ tɛ lɛ nyɛɛnɛ, ka goã ká dii kele lɛ la wa. Dɛnaa Lawa na á pɛ ka-n kɛnɛn:
6«Masɛ din Dɛnaa Lawa lɛ n kaa Lawa lɛa. Ma din ni má ka waa má ka bɔ bɛ̀rɛbaa nɛ Ezipti gána nɛ.
7Máa ka baran lawa kɔsɔ guguru kɔ masɛ kio wa,
8 #
LWS 26.1; TDP 4.15-18; 27.15 Ka baran màn nyìn zɛnaa ka bɛ baa kaa lawa lɛa wa. Mànan mɛnɛn bɛ́ lon, ǹ mɛnɛn bɛ́ tán la, ka ǹ mɛnɛn dɔn bɛ́ mu li tán, a nyan bɛ kɔn nyìn baa wa.
9 #
BBN 34.6-7; MNS 14.18; TDP 7.9-10 Ka baran n kuməə bɛa lawan kɛn lɛn yɔrɔ-a, ka ǹ guguru kɔ wa. A giala, masɛ din Dɛnaa Lawa n kaa Lawa lɛa. Maa lɛ koe ka lawa kɔsɔ guguru kɔ wa. Bɛ̀ min sii la masɛ la, ma á dɔlɔ boe a nɛnyaanan ganaa, a nɔ̀ɔnɔn nɛ, yǎa a woe doe a nɔ̀ɔ fulupaa ganaa. 10Sɛnɛ, min mɛnɛn bɛ́ masɛ narɛ, ǹ nə masɛ a gɔn waa ǹ boon kɛn tamaɛ, man maa bǐɛ̃ kɛ zɛnɛɛ bɛn tɔrɔ duu gigiã nɛ.
11 #
LWS 19.12
Ka baran kaa Lawa, Dɛnaa Lawa tɔ bii sii kooron ganaa wa. A giala, bɛ̀ min mɛn masɛ tɔ bii sii kooron ganaa, masɛ a bɛa dɛnaa kɛ toɛ dɔlɔ baã wa.
12 #
BBN 16.23-30; 31.12-14 Ka *susu ǹ pii tamaa, ka bɛ koa a gɔrɔn Lawa a lɛa, ka kaa Lawa, Dɛnaa Lawa goã á pɛ á laa ka ganaa lɔn. 13#BBN 23.12; 31.15; 34.21; 35.2; LWS 23.3 Ka dí nya lɛawaa sɔrɔ gɔ́ɔ̃ nɛ, ka kaa sii tumaa zɛnaa bɛ lɛ gɔ́ɔ̃ nɛ. 14Sɛnɛ, a lɛawaa sɔbaabaa ǹ wɔ ke, bɛ n masɛ Dɛnaa Lawa, kaa Lawa lɛ a susu ǹ pii lɛa. Ka baran dí kɔn nya bɛa pinaa kɛ lɛ-n wa: ka dinin ni, kaa nɛgiĩn ni, kaa nɛlɔn nɛ, kaa bɛ̀rɛgiĩn ni, kaa bɛ̀rɛlɔn nɛ. Kaa diin ni, kaa dundunun ni, kaa tɔɔn tumaa, ǹ kɔn baran dí nya wa, haalɛ gùlin mɛnɛn dɔn bɛ́ giã-n kaa kiwin ni. Ka zɛnaa miɛ̃ màn mɛn bɛ́ toɛ, kaa bɛ̀rɛlɔn laanka kaa bɛ̀rɛgiĩn nə n susu ka ka dɔn wɔ bɛ́ lɔn. 15Ka n yiri koa a nɛ, mà ka n ká goã bɛ̀rɛn lɛa Ezipti gána nɛ. Kaa Lawa, Dɛnaa Lawa lɛ na á sii kakan zɛnaa, á ka waa ka pàã nɛ á soo ka nɛ. Bɛ lɛ na á toa masɛ Dɛnaa, kaa Lawa lɛ laa ka ganaa, máa yǎa ka susu ǹ pii koɛ.
16 #
TDP 27.16; Mat 15.4; 19.19; Mar 7.10; 10.19; Luk 18.20; Efɛ 6.2-3 N díi laanka n náa guguru kɔ, ka masɛ Dɛnaa Lawa, kaa Lawa lɛ pɛ má laa ka ganaa lɔn, màn mɛn bɛ́ toɛ n nyin sasa yɛ, n yii-nyɛɛ dɔ yɛ gána kɛ nɛ, kaa Lawa, Dɛnaa Lawa n koe ka la.
17 #
SGK 9.6; LWS 24.17; Mat 5.21; 19.18; Mar 10.19; Luk 18.20; Rɔm 13.9; Zaaki 2.11 N baran gɛ̀ dɛ wa.
18 #
LWS 20.10; Mat 5.27; 19.18; Mar 10.19; Luk 18.20; Rɔm 13.9; Zaaki 2.11 N baran naarɛbaa zɛnaa wa.
19 #
LWS 19.11; Mat 19.18; Mar 10.19; Luk 18.20; Rɔm 13.9 N baran wurumu baa wa.
20 #
BBN 23.1; Mat 19.18; Mar 10.19; Luk 18.20 N baran soɛ da min la wa.
21 #
Rɔm 7.7; 13.9 N yii baran bɔ min kɔsɔ gɔn màn kɔn li wa. A nyan bɔ a lɔ li wa, a kion ne, a wuru ni, a bɛ̀rɛgiĩ ni, a bɛ̀rɛlɔ nɛ, a dii ni, a dundun ni, n yii nyan bɔ bɛ kɔn li wa.»
22 #
Ebr 12.18-19
Dɛnaa Lawa na á bɛa boon lɛn pɛ ka nɛ ka lɛn gole ne, tɛ bii, tɛmaa bii, ka wɔlɔ tì gole ne. Ka mɛnɛn tumaa goã kele lɛ gòã lasa la, a na á boon kɛn lɛn da ka dinin manɛ, a màn kɔsɔ ti a ganaa wa. Bɛ kio, á boon lɛn kiɛ̃ kɔlɔ-sɛlɛɛ màn paa la, á ǹ kɔ ma la.
Zaman Muizu lɛ si ka boo mɛn nɛ
23Ka bɛ́ ka boo-diɛ lɛn lɛ ma, wɔlɔ tì bii, tɛ n ka a n kele lɛ dɔ kuĩ, kaa tɔrɔn lɛn nyɛɛnaandɛnan laanka ǹ min golen nə́ n zɔ̃ ǹ nə́ dɔ ma li. 24Ǹ nə́ pɛ: «Wɔa Lawa, Dɛnaa Lawa lɛ á ke á ná a gugurubaa laanka a golebaa nyaa wɔ nɛ. Wɔ́ a lɛ ma tɛ lɛ bii. Wɔ́ yɛ pelo kəni, wɔa Lawa á boe la a boo da ka min ni, ǹ dɛnaa yii wusoo a goã koo. 25Sisia, wɔ a re toɛ tɛ gole kɛ wɔ dɛ wa. Bɛ̀ wɔ́ woo nyɛɛn kɛnɛn, wɔ n wɔa Lawa, Dɛnaa Lawa kɛ lɛ miɛ, wɔ n die giɛ̃. 26Min bin Lawa Yiikoonaa kɛ lɛ ma boo diɛ tɛ bii ka wɔsɛn bɛ́ lɔn, a yii wusoo á goã koo?
27Nsɛ nə n zɔ̃ n woo. Wɔa Lawa, Dɛnaa Lawa lɛ bɛ́ re màn mɛn pii, n too kɔ bɛ tumaa li. A bɛ́ re màn mɛn tumaa pii n nɛ, nsɛ wusoo n bɛ pɛ wɔsɛn nɛ, wɔ á re n too koe li, wɔ kɔ lɛ.»
28Ka boon mɛnɛn da ma nɛ, Dɛnaa Lawa nə́ ǹ ma. Á tɔ́n pɛ ma nɛ: «Zaman lɛ boon mɛnɛn da, má ǹ ma. Taãn tá ǹ lon, ǹ bɛ tumaa pɛ. 29Sɛnɛ, toa bɛ̀ bɛa foo lɛ miã nə ǹ lon biikoo tumaa li, ǹ nə́ nyɛ́ɛ biɛ masɛ nɛ, ǹ nə́ masɛ a landa boon kɛn tumaa tamaɛ, ǹ dinin laanka ǹ nɛnyaanan yii-nyɛɛ a lɛa yǎa duduu. 30Wo pɛ ǹ nɛ mà ǹ wusoo, ǹ wo ǹ mɔnaa kionən ne. 31Sɛnɛ, nsɛ golee kànaa, ma li. Ma á re gɔn waa ǹ boon kɛn tumaa pii n ni, landa boon kɛn nɛ, ka sii yɔrɔ bɔ ǹ boon kɛn nɛ. Ń die n nə ǹ daraa bɛn lɛn ganaa, ǹ kɔ ǹ lɛ gána kɛ lɛ nɛ, má n koe ǹ la, ǹ wɔ lɛa.»
32Haya! Kaa Lawa, Dɛnaa Lawa lɛ nə n gɔn waa ka-n lɔn, ka zɛnaa a kɔnpɛ ka bɛ nɛ. Ka nyan kanaa ka wo gusin wa, ka nyan wo gɔsɛ wa. 33Kaa Lawa, Dɛnaa Lawa màn mɛn tumaa pɛ ka nɛ á laa, ka kɔ bɛ lɛ pepere, màn mɛn bɛ́ toɛ, ka yii goã koo, kaa wɔ boo la a bǐɛ̃ kɔ, ka nyin sasa yɛ gána kɛ nɛ, ká n die sii ka baa kaa wɔ lɛa.
Currently Selected:
TDP 5: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.