TDP 6
6
Lawa narɛɛ
1Gɔn waa ǹ boon lɛn man ka kɛn nɛ kànaa, ka landa boon laanka sii yɔrɔ bɔ ǹ boon ne. Kaa Lawa, Dɛnaa Lawa na á pɛ, mà ma ka daraa ǹ ganaa, màn mɛn bɛ́ toɛ, ka kɔ ǹ lɛ gána lɛ nɛ, ka bɛ́ re kiɛ̃ ka kaa gána mɛn lɛ nɛ, ka si ka baa kaa wɔ lɛa. 2Màn mɛn bɛ́ toɛ dɔn, ka nyɛ́ɛ baa, kaa Lawa, Dɛnaa Lawa yii ni, ka dinin ni, kaa nɛnyaanan nɛ, ka kaa nɔ̀ɔnɔn nɛ. Ma bɛ́ maa landa boon laanka maa gɔn waa ǹ boon mɛnɛn tumaa koe ka la, kaa yiikoonaabaa tumaa gɔ́ɔ̃ nɛ, ka bɛn tamaa, màn mɛn bɛ́ toɛ, ka nyin sasa yɛ. 3Izirayeli minin lɛn, ka goã bɛ̀ ka n too kɔ bɛn lɛn li, ka n yiri koa ǹ li, ka kɔ ǹ lɛ. Bɛ̀ ká zɛnaa miɛ̃, kaa wɔ á re bǐɛ̃ koe. Ka á re mɔnɛɛ gána lɛ nɛ taãn-taãnɛ, bɔ̀nyaa laanka zoo nyɔɔ bɛ́ baa-sìi gána mɛn nɛ, ka ka digolon Lawa, Dɛnaa Lawa bɛ́ á n lɛ kɔ ka la lɔn.
4 #
Mar 12.29
Izirayeli minin lɛn, ka n too kɔ: Dɛnaa, wɔa Lawa lɛ n Dɛnaa Lawa lɛa, goon toto. 5#Mat 22.37; Mar 12.30; Luk 10.27 N Lawa, Dɛnaa Lawa narɛ ka n foo tumaa nɛ, ka n gɔ́ɔ̃ tumaa nɛ, ka n pàã tumaa nɛ. 6#TDP 11.18-20 Ma bɛ́ n gɔn wɛɛ ka nɛ ka boon mɛnɛn nɛ pelo, ka toa bɛn nə goã ka yiri ni.
7Ka die ka a boo da kaa nɛnyaanan manɛ ka ǹ daraa a ganaa. Ta n nə giã-n tán, ta n nə n zii tɔ we, n waa tán waáraa nɛ, n yoo waáraa nɛ, n die n bɛ lɛ pɛ. 8Màn mɛn bɛ́ toɛ n yiri baran bɔ ǹ nɛ wa, n die ǹ nə ǹ yii n nyàa ganaa, ka n nyanlɛ nɛ. 9N die ǹ nə ǹ kiɛ̃ n kiɛnlɛ wàãn ganaa, ka kiwin wɔ ǹ kiɛnlɛn kɛn nɛ.
Yiri koa ka Lawa nɛ
10 #
SGK 12.7; SGK 26.3; 28.13 Kaa Lawa, Dɛnaa Lawa lɛ nə n lɛ kɔ ka digolo Abrahamu laanka Izaaki ka Zakɔba la, mà asɛ á re gána mɛn lɛ koe ka la, á re woe ka-n walan. Bɛ̀ ká dɔ, ka á re kiwi dadara sonboren yii walan, ka bɛ́ ka kiwin mɛnɛn dɔ wa, 11kionən ne, piɛ̃ nɛ ka màn sonbore tɔrɔ tumaa nɛ, kasɛn dɔn bie ká ǹ kaa ǹ nɛ wa, tùn ni foɛ̃-n gɔrɔ, kasɛn dɔn bie ká ǹ fɔ̃ wa, ka *rezɛ̃ dan laanka *olivie dan nɛ, kasɛn dɔn bie ká ǹ zumu wa. Bɛ̀ ká màn bii ká kã kəni, 12ka ka dinin kũ, ń giɛ ka yiri ná a boe ka Dɛnaa Lawa-n wa. A din na á ka waa á ka bɔ Ezipti gána a bɛ̀rɛbaa nɛ. 13#Mat 4.10; Luk 4.8 Ka doamaa-n ka nyɛ́ɛ baa a dinsɔɔ̃ nɛ, ka a guguru kɔ, ka n liɛ ka a dinsɔɔ̃ tɔ nɛ. 14Tɔrɔ kɔsɔn mɛnɛn bɛ́ ka lɛnpɛnɛ, ka nyan toa ka bɛn dìn guguru kɔ wa. 15A giala, kaa Lawa, Dɛnaa Lawa mɛn lɛ á ke ka bii ke, a lɛ koe lawa kɔsɔ-a wa. A bɛ́ miɛ̃, ka ka dinin kũ, ka baran a foo yoo ǹ sii zɛnaa wa. A giala, á boe la a ka dɛ, a ka bɔ kanaa. 16#BBN 17.1-7; Mat 4.7; Luk 4.12 Ka baran n da kaa Lawa, Dɛnaa Lawa gɔ́ɔ̃ li, ka ka á ke ká zɛnaa Maasaa lɔn wa.
17Kaa Lawa, Dɛnaa Lawa gɔn waa ǹ boon mɛnɛn pɛ ka nɛ, ka doroo ǹ boon laanka landa boon ne, ka die ka bɛn tamaa sɔnbɔraanɛ. 18Sii mɛn bɛ́ pepere, á n siĩni Dɛnaa Lawa yii li, ka bɛ zɛnaa. Bɛ á re toɛ, kaa wɔ bǐɛ̃ kɔ. Dɛnaa Lawa nə n liɛ mà asɛ á re gána sonbore mɛn koe ka la, ka boo la ka wɔ bɛ nɛ, ka si ka baa kaa wɔ lɛa. 19Ka die ka kaa zɔ́ɔn kɛn tumaa loo ka ǹ bɔ a nɛ, ka Dɛnaa Lawa á ke á pɛ lɔn.
20Bɛ̀ kaa nɛnyaanan nə́ nɔ̀n da ka la ǹ mɛn pinaa: «Mà wàa na á baa, wɔa Lawa, Dɛnaa Lawa doroo ǹ boon kɛn kɔ ka la, ka landa boon laanka sii yɔrɔ bɔ ǹ boon kɛn nɛ,» 21ka pɛ kaa nɛnyaanan lɛn manɛ kɛnɛn: «Wɔ n wɔ́ goã Eziptin kii a bɛ̀rɛn lɛa, Ezipti gána nɛ. Sɛnɛ, Dɛnaa Lawa na á wɔ waa ka pàã nɛ, á wɔ bɔ Ezipti gána nɛ. 22Á kaãbaa ǹ sii dadaran zɛnaa wɔ dinin yii ni, á bɔ̀n da Ezipti gána ganaa, ǹ kii ni, ka a kion minin tumaa nɛ. 23A na á wɔ waa, á wɔ bɔ walan. Dɛnaa Lawa nə n lɛ kɔ wɔ digolon la ka gána mɛn nɛ, á woo wɔ kaa walan, á kɔ wɔ la. 24Dɛnaa Lawa na á pɛ wɔ nɛ mà wɔ kɔ a landa boon kɛn tumaa lɛ. Bɛ̀ wɔ tá li wɔa wɔ bǐɛ̃ kɔ baraabaraa, wɔ goã wɔ yii n koo, ka wɔ á ke lɔn pelo, yǎa wɔ nyɛ́ɛ biɛ wɔa Lawa, Dɛnaa Lawa lɛ yii ni. 25A gɔn waa ǹ boon mɛnɛn kɔ wɔsɛn la, bɛ̀ wɔ tá n yiri koɛ li, wɔ á bɛn tumaa tamaɛ, wɔa Lawa, Dɛnaa Lawa yɔrɔ-a, bɛ lɛ n nyɛɛ, mà wɔ tá a bɔlɔ sii.»
Currently Selected:
TDP 6: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.