TDP 8
8
Izirayeli minin daraa
1Ma bɛ́ gɔn waa ǹ boon mɛnɛn tumaa pii ka-n pelo ke, ka n yiri koa li, ka kɔ ǹ lɛ. Bɛ á re toɛ ka yii goã koo, ka mɔnaa, ka boo la ka wɔ gána kɛ nɛ, Dɛnaa Lawa nə́ n liɛ mà asɛ á re koe ka digolon la. 2Kaa Lawa, Dɛnaa Lawa zii sɔsɔɔ mɛn tɔ wɔ ka nɛ, lɛ̀ pusi don bii, ka n yiri koa bɛ li. A na á fuu nyaa ka nɛ, á n da ka gɔ́ɔ̃ li, màn mɛn bɛ́ toɛ, a ka gɔ́ɔ̃gɔ́ɔ̃ ǹ taasiɛ dɔ̃, bɛ̀ ka á re asɛ a gɔn waa ǹ boon kɛn tamaɛ, hinlaa bɛ̀ ka a re ǹ tamaɛ wa. 3#Mat 4.4; Luk 4.4 A bɛ́ á fuu nyaa ka nɛ, á toa bòo ka kũ, a din wusoo á *maánə kɔ ka la. Bɛ n màn-bii lɛa, ka goã doɛ̃ wa, ka digolon dɔn dinin nə goã doɛ̃ wa. A na á zɛnaa miɛ̃ á nyaa ka nɛ, mà màn-bii dinsɔɔ̃ bie minbuiin nɛ toe wa, sɛnɛ, boo woo boo boe Lawa lɛ-n, bɛ lɛ n min toe. 4Bɛa lɛ̀ pusi kɛ lɛ gɔ́ɔ̃ nɛ, kaa dɔnkɛn nə pɔpɔsɛ ka ganaa wa, ka gòãn nə yuyu wa. 5Ka dɔ̃ ka bɛ lɛ-n kəni, mà kaa Lawa, Dɛnaa Lawa lɛ n giɛ li a ka doroo, ka díi bɛ́ a nɛ doree lɔn. 6Ka kaa Lawa, Dɛnaa Lawa lɛ a gɔn waa ǹ boon tamaa, ka kɔ a dùũ siin lɛ, ka nyɛ́ɛ baa nɛ.
Damagɔ́ɔ̃li sii
7Kaa Lawa, Dɛnaa Lawa lɛ n die woe ka kiɛ gána sonbore ne. Bɛa gána lɛ a mu bǎãn nə́ mɔnaa. Mu pìãn tá a nɛ, ǹ mu n soe diə bǎãn laanka kele bǎãn nɛ. 8A n gána lɛa, *belee n bǐɛ̃ koe a nɛ, *ɔrzi ni, rezɛ̃ nɛ, gɔ́rɔ nɛ, grenadie da nɛ. Gána nɛ, *olivie nyɔɔ n yii a nɛ, ka zoo ne. 9Ǹ ba re kaa màn-bii zoɛ̃ walan, bɛ̀ ǹ tɔn kɔ ka la wa, màn kɔn dɔ a re nyaabiɛ ka ganaa wa. Fɔlɔ n yii bɛa gána lɛ a kɔlɔn li, ǹ zan bɔ a kelen la. 10Ka á re màn bii walan ka kã. Ka goã bɛ̀ ka barka da kaa Lawa, Dɛnaa Lawa lɛ nɛ, gána sonbore kɛa lɛa, á kɔ ka la.
11 #
Oz 13.5-6
Ma bɛ́ kaa Lawa, Dɛnaa Lawa a gɔn waa ǹ boon mɛnɛn pii ka-n pelo, a sii yɔrɔ bɔ ǹ boon laanka a landa boon ne, ka yiri bɔ, ka nyan bɛn da ka gɔn para-a, n ka yiri yǎa kiɛ̃ boe ka kaa Lawa, Dɛnaa Lawa lɛ-n wa. 12Ka á re màn bii ka kã, ka á re kion sonboren doe ka giã ǹ nɛ, 13kaa tɔɔ dadaran laanka kaa tɔɔ bisinin tá re mɔnɛɛ, ka á re wɔrɔ gigiã laanka sana gigiã yii ka màn sonbore tɔrɔ tumaa nɛ. 14Sɛnɛ, ka nyan nə n saa bɛ li ka ka dinin gole kɔ, ka yiri bɔ ka kaa Lawa, Dɛnaa Lawa-n wa. A din na á ka waa á ka bɔ Ezipti gána a bɛ̀rɛbaa nɛ. 15A din na á ka kaa tɔ-wɔ ganaa don kaara kɛ nɛ, nyɛ́ɛ da ǹ bǎã lɛa. A piɛ̃maa-n ka miɛ̃ babaraan laanka tonən ne. Bǎã gere ne, mu ba a-n wa. Sɛnɛ, a din lɛ na á mu bɔ gɛ̀fu kaka nɛ, á kɔ ka la. 16Á din don kɛ lɛ nɛ, á maánə kɔ ka la ká bii, ka digolon dinin nə goã bɛa màn-bii lɛ doɛ̃ wa. A ka yii puusə kɔ miɛ̃, á n da ka gɔ́ɔ̃ li, màn mɛn bɛ́ toɛ kaa biɛ̃ ǹ bǐɛ̃ kɔ. 17Ka nyan taasɛ ka dinin gɔ́ɔ̃ nɛ: mà ka dinin doa laanka ka dinin pàã na á toa, ká bɛa gɔn mànan kɛn lɛn yɛ wa. 18Sɛnɛ, ka n yiri koa li ka dɔ̃, mà kaa Lawa, Dɛnaa Lawa na á pàã kɔ ka la, ká tɔ́n bɛa gɔn mànan lɛn yɛ. A na á bɛ zɛnaa á nyaa, mà asɛ lɛ kɔ kɔn la mɛn wɔ ka ka digolon ne, mà bɛ á tɔn a giala la, haalɛ pelo. 19Sɛnɛ, bɛ̀ ka yiri bɔ ka kaa Lawa, Dɛnaa Lawa kɛ nɛ, bɛ̀ ká kɔ lawa kɔsɔn kio lɛ, bɛ̀ ká kaa tán bɛn giulun ká ǹ guguru kɔ, man diɛ ka yiri-a pelo: ka á re papaɛ̃ lenlen.
20Bɛ̀ ka kaa Lawa, Dɛnaa Lawa lɛ si wa, ka á re papaɛ̃ ka tɔrɔ kɔsɔn kɛn bɛ́ lɔn, Dɛnaa Lawa nə́ ǹ papaɛ̃ ǹ boe ka nyɛɛnɛ.
Currently Selected:
TDP 8: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.