TDP 9
9
Izirayeli minin soɛ kɔ tɔrɔ kɔsɔn nɛ baã
1Izirayeli minin lɛn, ka n too kɔ! Ka n die Zurdɛ̃ tà kuri pelo. Tɔrɔn mɛnɛn bɛ́ didi ǹ nə́ la ka nɛ, ǹ pàã dɔ din la kaa wɔ nɛ, ǹ kiwi nə́ dadara kungɔnun nə́ ǹ lɛnpɛnɛ, sasa lon ka piwɔɔn, ka n die bɛa tɔrɔn lɛn lui. 2Sanparɛ Anaaki tɔrɔn kɛn mɔnaa nɛ, sɔsɔrɔ dɔn. Ka tá doɛ̃, ǹ bin pɛ, ká ma dɔn dinin mà die n boe la a golee Anaaki tɔrɔn kɛn nyɛɛnɛ? 3Ka dɔ̃ pelo, mà kaa Lawa, Dɛnaa Lawa lɛ din nə die miɛ̃ ka nyɛɛnɛ, ka tɛ á ke màn kuĩ lɔn. A din nə die ǹ dii, a ǹ kaa tán ka nyɛɛnɛ. Ka á re ǹ lui, ǹ papaã ǹ nə n bɔ walan bǎã goon, ka Dɛnaa Lawa bɛ́ á n lɛ kɔ ka la lɔn.
4Bɛ̀ kaa Lawa, Dɛnaa Lawa lɛ nə́ ǹ loo á ǹ bɔ ka nyɛɛnɛ ǹ mɛn waáraa, ka baran din gole kɔ ǹ boo da ka pɛ mà ka dinin peperebaa a lɛa nɛ, Dɛnaa Lawa toa ka wɔ gána lɛ nɛ, ka si ka baa kaa wɔ lɛa wa. Sɛnɛ, ka dɔ̃ mà tɔrɔn kɛn lɛn baraabaa a lɛa nɛ, Dɛnaa Lawa á re ǹ lui, a ǹ bɔ ka nyɛɛnɛ. 5Kaa peperebaa laanka kaa gɔ́ɔ̃ fubaa bie re toɛ, ka wɔ ǹ gána lɛ nɛ, ka si ka baa kaa wɔ lɛa wa. Sɛnɛ, bɛa tɔrɔn kɛn lɛn dinin baraabaa n die toɛ, kaa Lawa, Dɛnaa Lawa nə ǹ loo a ǹ bɔ ka nyɛɛnɛ. A n die bɛ zɛnɛɛ dɔn, màn mɛn bɛ́ toɛ, a na a lɛ kɔ ǹ boo lɛ pã ka digolon wɔ paǹ li: Abrahamu laanka Izaaki ni, ka Zakɔba nɛ. 6Ka dɔ̃ mà kaa peperebaa a lɛa bie re toɛ, kaa Lawa, Dɛnaa Lawa gána sonbore kɛ lɛ kɔ ka la, ka si ka baa kaa wɔ lɛa wa. A giala, ka n tɔrɔ too kaka-a lɛa.
Diin nɛ nyín
7Ka sii mɛn zɛnaa, ká kaa Lawa, Dɛnaa Lawa lɛ foo yoo ne don, ka n yiri kɔ bɛ li, ka nyan toa ka yiri bɔ ka bɛ-n wa. A saa kaa soo Ezipti gána-n ganaa, a da kaa kaa dɔ kànaa kɛ lɛ, ka gòãn man dii-n kɔn ka Dɛnaa Lawa-n miɛ̃. 8Orɛbu kele la, ká Dɛnaa Lawa foo yoo. A foo busu ka li, á baa re ka dii a ka nya. 9#BBN 24.18 Dɛnaa Lawa lɛ kɔ kɔn la mɛn wɔ kɔn ka nɛ, a bɛ lɛ a boo kiɛ̃ kɔlɔ-sɛlɛɛn mɛnɛn ganaa, man má goã má dii kele lɛ la, má woo bɛn lɛn si. Ma lɛawaa pusi ka tèlò pusi n kele lɛ la, ma a màn bii wa, ma a mu mii wa. 10Dɛnaa Lawa na á kɔlɔ-sɛlɛɛ màn paa lɛ kɔ ma la walan. A din nə n toa kele lɛ la tɛ bii á boon mɛnɛn da ka nɛ, a din na á bɛa boon lɛn tumaa kiɛ̃ kɔlɔn lɛn ganaa. A pinaa, bɛ̀ ka á soen kɔn kele gòã kɛ la.
11Lɛawaa pusi ka tèlò pusi lɛ lɛ bɛ́ á pã, Dɛnaa Lawa kɔlɔ-sɛlɛɛ màn paa lɛ kɔ ma la, lɛ kɔ kɔn la ǹ boon lɛn nə́ kiɛ̃ nɛ ǹ ganaa. 12Dɛnaa Lawa tɔ́n pɛ ma nɛ: «N nanaa n gisĩ, n nə n bɔ kànaa. A giala, n tɔrɔn lɛn, má ǹ waa má ǹ bɔ Ezipti gána nɛ, ǹ nə́ n dinin ziziɛ̃. Masɛ zii mɛn nyaa ǹ nɛ mà ǹ kɔ lɛ, ǹ nə́ kanaa, ǹ nə́ n bɔ bɛ la gɔrɔ, ǹ nə́ sana yo, ǹ nə́ màn nyín zɛnaa nɛ.» 13Dɛnaa Lawa tɔ́n boo da ma nɛ á pɛ ma-n kɛnɛn: «Ma yii tɔrɔn kɛn lɛn gɔ̀nɔn bɔ. Á ke, tɔrɔ too kaka-an manɛ. 14Toa ma ǹ dɛ ma ǹ nya, ma ǹ tɔ tuturu ma bɔ kanaa. Ma á re toɛ n din tɔrɔn nə mɔnaa, pàã nə́ ǹ lon á la kɛn manɛ.» 15Má tɔ́n nə n bɔyaa, máa man gisĩ n boe kele lɛ la, tɔn tɛ lɛa girigiri. Kɔlɔ-sɛlɛɛ màn paa mɛn bɛ́ lɛ kɔ kɔn la ǹ boon lɛn nə́ goã kiɛ̃ nɛ ǹ la, bɛn man nə́ goã ma gɔnɔn paanan nɛ. 16Má daa yaa, bɛ̀ ka á ke ká sii babaraa la kaa Lawa, Dɛnaa Lawa la: ka n ká sana yo, ka diin nɛ nyín zɛnaa nɛ. Dɛnaa Lawa zii mɛn nyaa ka nɛ mà ka kɔ lɛ, ká kanaa ká n bɔ bɛ la gɔrɔ. 17Bɛ lɛ nɛ má tɔ́n kɔlɔ-sɛlɛɛ màn paa lɛ zũ má ǹ bɔ ma gɔn, má ǹ yɔyɔrɛ tán ka dinin yii ni.
Muizu n Dɛnaa Lawa gòã kuĩ
18Má tɔ́n na má kaa tán Dɛnaa Lawa yɔrɔ-a, ma lɛawaa pusi ka tèlò pusi, ka bibinaa wɔ lɛ bɛ́ lɔn. Ma màn-bii wɔ ma lɛ-n wa, ma mu wɔ ma lɛ-n wa, kaa sii baraa kɛ lɛ tumaa a lɛa ká zɛnaa. Sii mɛn bɛ́ baraa Dɛnaa Lawa yii li, ka n ká bɛ lɛ zɛnaa, ká a foo yoo ne. 19#Ebr 12.21 Nyɛ́ɛ masɛ din kũ a foo-yoo lɛ gɔ́ɔ̃ nɛ. A giala, a foo yoo ka li á dɔ bǎã mɛn nɛ, a na á baa re ka dii a ka nya. Sɛnɛ, á wusoo á maa nyankɔ si ka bɛ lɛ dɔ-n doo. 20A foo yoo Aarɔn din li á là da. A na á baa re dii. Sɛnɛ, má gòã-kũ da a ganaa Aarɔn dɔ a lɛa, bɛa pinaa kɛ lɛ nɛ. 21Bɛ kio, ka dí mɛn nya kaa sii baraa zɛnaa lɛ gɔ́ɔ̃ nɛ, diin nɛ nyín lɛ, má bɛ saa, má da tɛ-n. Má zũ má baa wùsu lɛa nɔnɔɔ, ka tii ni. Tà mɛn a mu á ke n toɛ kele lɛ la bɛ̀ a gisĩ, má a wùsu lɛ kaa bɛa mu li. 22#BBN 17.7; MNS 11.3,34 Taberaa kiwi, Maasaa kiwi, Kibrɔti-Hataabaa kiwi, ká Dɛnaa Lawa foo yoo bɛa bǎãn kɛn lɛn dɔn nɛ. 23#MNS 13.17,31; TDP 1.21,26; Ebr 3.16 Ka bɛ́ Kadɛsi-Barneya, Dɛnaa Lawa bɛ́ á ka dia á pɛ ka nɛ mà asɛ bɛ́ gána mɛn lɛ koe ka la, mà ka woo, ka si ka baa kaa wɔ lɛa, ká n piã ka kaa Lawa, Dɛnaa Lawa lɛ a boo ne, ka waa la wa, ka n too kɔ a lon wa. 24Masɛ din ka dɔ̃ ǹ mɛn pinaa, ka n Dɛnaa Lawa bɔlɔ-tiilin lɛa miɛ̃.
25Dɛnaa Lawa bɛ́ mà a n die ka dii a ka nya, má tɔ́n kaa tán a yɔrɔ-a. Ma lɛawaa pusi ka tèlò pusi n tán a yɔrɔ-a. 26Má gòã-kũ da Dɛnaa Lawa ganaa, má pɛ kɛnɛn: «Dɛnaa Lawa, n baran n minin lɛn dɛ wa! Tɔrɔn kɛn lɛn manə n din wɔn lɛa, ń nə́ ǹ si ka n din a boo sii la nɛ, ń nə́ ǹ waa ka pàã nɛ Ezipti ń soo ǹ ne. 27N yiri kɔ n dí-nyalin kɛn li: Abrahamu ni, Izaaki ni ka Zakɔba nɛ. N baran n saa tɔrɔn kɛn too kakabaa li, ǹ baraabaa nɛ, ka ǹ sii baraakɛn nɛ wa. 28N wɔ waa ń wɔ bɔ gána mɛn lɛ nɛ, n nyan toa minin nə wusoo ǹ kɛ pɛ walan wa: Dɛnaa Lawa na á ǹ waa á soo ǹ ne, á toa ǹ nə́ gã don. A giala, a n lɛ kɔ ǹ la ka gána mɛn lɛ a sii ni, a goã boe la á woe ǹ ne walan wa. Ka bɛ dɔ nɛ, ǹ sii goã kɔɔ̃nɛ a ganaa wa. 29A da yaa, tɔrɔn kɛn lɛn, n din a minin manɛ, ń sii kakan zɛnaa, ń nə́ ǹ waa ka pàã gole ne, ń soo ǹ ne.»
Currently Selected:
TDP 9: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.