Efɛ 5
5
Goã wɔlɔ fúlu-n boo
1Ka bɛ́ n Lawa a nɛnyaanan lɛa a n ka narɛ, ka n doa ka a din lɛn zɔɔ̃. 2#BBN 29.18; Loe 40.7 Ka goã kɔn-narɛɛ gɔ́ɔ̃ nɛ, ka *Krita din bɛ́ á wɔ narɛ lɔn, yǎa á n din kɔ wɔ a lɛa, *wúlu màn gìĩ kɔɔ̃n-a lɛa, á n kɔɔ̃n Lawa ganaa. 3Ka bɛ́ Lawa a zaman minin lɛa, a kɔnboe ka yɔrɔ kɔ́n nɛ, kɔrɔbaa nɛ, gɔgɔrɛbaa nɛ, ka yii mu mi ni, bɛ kɔ́n boo ma ka bii dinin wa. 4A kɔnboe dɔn, sìi-doɛ̃baã boo ne, ka kɔrɔbaa boo ne, hinlaa boo gɔgɔrɛn nɛ, ka bɛ kɔ́n da wa. Sɛnɛ, ka barka da Lawa nɛ. 5Ka dɔ̃ taãnɛ, mà kɔrɔbaali ni, min gɔgɔrɛ nɛ, hinlaa yii mu-mili ni, mà bɛa minin kɛn kɔ́n gii ba Krita laanka *Lawa a kiibaa kɛ-n wa. Yii a mu mi màn li n goon ka dì guguru-kɔ nɛ.
6Ka nyan toa, min kɔ́n ka bebere ka yiri baãnaabaa ǹ boon ne wa. A giala, bɛa sã ǹ siin kɛn lɛn man die toɛ, Lawa foo yoo a lɛ-tiilin li. 7Ka nyan toa, ka kaa sii kɔ́n kaa kun ka bɛa minin kɛn lɛn nɛ wa. 8Ka ǹ ka goã wɔlɔ tì li lɛlɛ, sɛnɛ, ka ǹ wɔlɔ fúlu li kanna kaa kaa kun ka Dɛnaa-n pàã ganaa. Bɛ lɛ taman yii, ka toa ka goã wɔlɔ fúlu minin lɛa. 9Wɔlɔ fúlu bɛ́ sii mɛn koe, bɛ n ka min bǐɛ̃baa nɛ, peperebaa nɛ, ka sonbore ne. 10Sii mɛn bɛ́ kiɛ Dɛnaa foo la, ka n doa ka bɛ dɔ̃. 11Ka baran kaa sii kaa kun ka wɔlɔ tì a sii kooron kɛn nɛ wa, ka bɛa sii kooron kɛn lɛn kaa wɔlɔ fúlu li dinin. 12Bɛa minin kɛn lɛn bɛ́ sii mɛn zɛnɛɛ ka durii ni, a pɛ á sìi diɛ dinin. 13Sɛnɛ, bɛ̀ bɛa siin kɛn lɛn nə́ n kaa wɔlɔ fúlu li, ǹ bɛ́ màn mɛn lɛa taãnɛ, bɛ nə n nyɛɛ foaãnɛ. 14A giala, sii mɛn dɔ bɛ́ á n nyaa foaãnɛ, bɛ n wɔlɔ fúlu biɛ. Bɛ lɛ nɛ, á n pɛ:
«Nsɛ mɛn bɛ́ nyuù we,
n yii kaa,
nsɛ mɛn bɛ́ geren li,
yoo lon,
Krita á re fúlu kiɛ n ganaa.»
15Ka n yiri kɔ kaa giã ǹ gɔn li parsiini. Ka baran n dinin nyaa ka yiri baãnaan bɛ́ lɔn wa, sɛnɛ, ka n dinin nyaa ka sii-dɔ̃lin bɛ́ lɔn. 16#Kol 4.5 Bɛ̀ sii sonbore zɛnaa ǹ pàã tá ka lon biikoo mɛn li, ka zɛnaa. A giala, lɛawaan mɛnɛn bɛ́ wɔ tá ǹ nɛ, ǹ tá baraa. 17Bɛ lɛ a lɛa, ka baran goã yiri baãnaan lɛa wa. Sɛnɛ, ka n doa, Dɛnaa bɛ́ giɛ li mà ka sii zɛnaa lɔn, ka bɛ giala ma. 18Ka baran duvɛ̃ mi a yoo ka yii-a wa, bɛ á re toɛ ka sii lɔlɔkɔn. Sɛnɛ, ka toa ka pã ka Yiri Fu ni. 19#Kol 3.16-17 Ka kɔn foo taã ka Lawa tɔ bɔ ǹ loen ne, ka loe kɔsɔn nɛ, ka Yiri Fu bɛ́ loen mɛnɛn dɔn gisĩ ka mìi pán nɛ. Ka bɛa loen kɛn lɔ Dɛnaa nɛ, ka a tɔ bɔ ka ka foo tumaa nɛ. 20Ka barka da Díi Lawa nɛ, biikoo tumaa li, sii din tumaa a lɛa, ka wɔa Dɛnaa Yezu Krita tɔ nɛ.
Giĩn laanka lɔn doroo ǹ boo
21Kasɛn mɛnɛn bɛ́ nyɛ́ɛ biɛ Krita nɛ, ka kɔn lɛ si.
22 #
Kol 3.18; Piɛ1 3.1 Lɔn lɛn, ka ka zuũn lɛ si, ka ka bɛ́ Dɛnaa lɛ sii lɔn. 23A giala, giĩ na a lɔ mìilandɛnaa lɛa, ka Krita bɛ́ Lawa a sɔmɔ mìilandɛnaa lɛa lɔn. Krita lɛ din nə Lawa a sɔmɔ lɛ kirisibaali lɛa, sɔmɔ mɛn bɛ́ a din gɔ̀nɔn lɛa. 24Bɛ lɛ nɛ, lɔn man kɔnboe ǹ nə ǹ zuũn lɛ si sii tumaa gɔ́ɔ̃ nɛ, ka Lawa a sɔmɔ bɛ́ Krita lɛ sii lɔn.
25 #
Kol 3.19; Piɛ1 3.7 Giĩn lɛn, ka dɔn nə kaa lɔn narɛ, ka Krita bɛ́ á Lawa a sɔmɔ narɛ lɔn. A na á n din nyin kɔ a lɛa, 26a ná a *yoreen kɔ ka *batɛmu da ǹ mu ni, ka boo-n kun ni, ń giɛ á boe la a tá Lawa wɔ biɛ. 27A na á zɔɔ̃ li, mà Lawa a sɔmɔ lɛ goã asɛ din yɔrɔ-a, ka a nɛniɛ tii bɛ́ lɔn, a siĩnbaa tumaa gɔ́ɔ̃ nɛ, a gɔ̀nɔn nə́ zɔzɔnɔ, *gɔ̀ ná a ba a ganaa wa, wɔ̀lɔ̀ kɔ́n dɔ ná a ba a ganaa wa. 28Giĩ n kɔnboe a na a lɔ narɛ ka bɛa yɔrɔ kɛ nɛ, ka a din gɔ̀nɔn bɛ́ lɔn. Bɛ̀ min mɛn tá a lɔ narɛ, bɛ na a dinmaa narɛ. 29Taãn nɛ, min kɔ́n ba sii baraa zɛnɛɛ a din gɔ̀nɔn nɛ wa, sɛnɛ, a n giɛ a walan, á n toe. Krita dɔ n zɛnɛɛ Lawa a sɔmɔ lɛ-n miɛ̃. 30A giala, wɔ na a gɔ̀nɔn lɛ a gùn lɛa. 31#SGK 2.24 Ka Lawa a sɛ́wɔ bɛ́ pii lɔn: «Bɛ lɛ a lɛa nɛ, giĩ á re n niɛ̃ a n bɔ ǹ di laanka ǹ dan ganaa, a n doa kɔn ka a lɔ nɛ, ǹ dinin paanan tá re n biɛ goon.» 32Sii-durii gole n ka kɛ nɛ. Man pii Krita laanka Lawa a sɔmɔ kɛ wɔ paǹ li. 33Ta á n baa lɔn, ka gogoonmaa doamaa nɛ, a na a lɔ narɛ ka a bɛ́ a din narɛ lɔn, lɔ gogoonmaa dɔ doamaa nɛ a ǹ zuũ guguru kɔ.
Currently Selected:
Efɛ 5: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.