Efɛ 6
6
Nɛnyaanan laanka ǹ yɛ wolen doroo ǹ boo
1 #
Kol 3.20
Nɛnyaanan lɛn, ka kaa yɛ wolen lɛ si Dɛnaa yɔrɔ-a, a giala, mà bɛ n pepere. 2#BBN 20.12; TDP 5.16 Lawa lɛ kɔ ka màn nɛ a dí-pɛ bibinaa mɛn li, bɛ n ka kɛ nɛ: «N díi laanka n náa guguru kɔ, 3ń giɛ n tá nyin sasa yii, n yii-nyɛɛ dɔ yɛ tán la.»
4 #
Kol 3.21
Kasɛn díin lɛn, ka baran kaa nɛnyaanan kũ baraa wa, ǹ yaa kiɛ̃ n gòãn dii wa. Sɛnɛ, ka n doroo a kɔnpɛ ka daraa kɛ nɛ boe Dɛnaa li.
Bɛ̀rɛn laanka ǹ mìinaan doroo ǹ boo
5 #
Kol 3.22-25
Bɛ̀rɛn lɛn, ka kaa tán a mìinaan kɛn lɛ si, ka nyɛ́ɛ baa ǹ nɛ, ka ǹ guguru kɔ ka foo sonbore ne, ka n pɛ mà ka n dí nyɛɛ *Krita nɛ. 6Ka baran zɛnaa miɛ̃, bɛ̀ ǹ tá ka genli biikoo mɛn dinsɔɔ̃ li, ń giɛ ka á kiɛ ǹ foo la wa. Sɛnɛ, ka Lawa foo sii zɛnaa ka ka foo tumaa nɛ, ka Krita a bɛ̀rɛn bɛ́ lɔn. 7Ka kaa bɛ̀rɛbaa ǹ dí nya ka foo kɔɔ̃n nɛ, ka ka bɛ́ nyɛɛ Dɛnaa-n lɔn, ka baran nya minbuiinin dininsɔɔ̃nɔn lɛa wa. 8Ka n yiri koa a nɛ, ta man bɛ̀rɛ lɛa hinlaa n din gɔn wìi a lɛa, didie sii bǐɛ̃ mɛn zɛnaa, á re bɛ yii Dɛnaa li.
9 #
TDP 10.17; Kol 3.25; 4.1 Kasɛn dɔn mìinaan lɛn, ka zɛnaa miɛ̃ kaa bɛ̀rɛn lɛn wɔ paǹ li. Ka kakaarɛbaa toa walan, ka dɔ̃ mà ka dinin ni, ka kaa bɛ̀rɛn nɛ, mà ka n lon a Goledɛnaa goon toto kɛ wɔn lɛa, asɛ mɛn bɛ́ a bɔkɔnlɛ we wa.
Ziabaa ǹ mànan boo
10Bɛ tumaa kio, ka ga pàã li kaa tá kun ka Dɛnaa-n kɛ gɔ́ɔ̃ nɛ, ka ga a din a pàã gole kɛ li. 11Lawa bɛ́ ziabaa ǹ mànan mɛnɛn koe ka la, ka tumaa bɛn kaa ka ganaa, màn mɛn bɛ́ toɛ, ka boo la ka yɔ bɔ *Sɛtaan a minin bebere ǹ yirin kɛn ganaa. 12A giala, wɔ bie yɔ boe kɔn ka minbuiinin ni wa. Sɛnɛ, màn pàãdɛnan laanka ǹ goledɛnan mɛnɛn bɛ́ yii ná a ba ǹ ganaa wa, wɔ n yɔ boe kɔn ka bɛn laanka nɔ̀ɔn babaraan nɛ. Ǹsɛn lɛn man lon laanka tán biin ni, ǹ nə́ pàã la wɔlɔ tì kanaa kɛ-n kanna. 13Bɛ lɛ a lɛa, ka Lawa a ziabaa ǹ mànan tumaa gũ ka gɔn kanna. Màn mɛn bɛ́ toɛ, bɛ̀ lɛawaa baraa kɛ́ dɔ, yǎa kaa zɔ́ɔ kɛ da yoo ka gialaa, ka boo la ka n gòãn doa a ganaa. Ka á re zia biɛ a ganaa miɛ̃ yǎa a woe nyɛɛ, ka á re goɛ̃ ka dinin giã ǹ gɔn taãn la ka bɛ nɛ.
14 #
Iza 11.5; 59.17 Ka n yɔrɔ bɔ ka n koa kəni: ka sonbore yii ka bɔsɔ̃ maabɛlɛ lɛa, ka peperebaa wɔ ka ganaa ziabaa ǹ dɔnkɛ lɛa. 15#Iza 52.7 Ka din kɔ sii ganaa baa kɔsɔn lɛa, ka ǹ wɔ ka gòãn ganaa, ka là nyantoro yɛ ǹ Boo Tii Kɔɔ̃n kɛ pɛ nɛ. 16Sanparɛ goleemali ke kəni, ka bɛ baa ziabaa ǹ goóro lɛa, ka Sɛtaan baraa a kiɛ tɛdɛnan kɛn kurəə ne. 17#Iza 59.17 Bɛ din tumaa kio, ka lɛ kɔ Lawa a minin kirisibaa kɛ ganaa, ka bɛ baa ziabaa ǹ bafolo lɛa. Yiri Fu bɛ́ Lawa a boo mɛn diɛ ka nɛ, ka bɛ baa gɔya sa lɛa.
18Ka bɛa sii lɛ tumaa zɛnaa Lawa nyankɔ gɔ́ɔ̃ nɛ, ka dɔmalɛ nyankɔ Lawa lon. Ka Lawa nyankɔ sii tumaa gɔ́ɔ̃ nɛ, Yiri Fu n ka nyɛɛnaan boe. A bɛ́ miɛ̃, ka goã ka gòãn la, ka n yii kaka kɔ, ka goã bɔlɔgoondɛnan lɛa ka wo ne. Ka Lawa nyankɔ Lawa a zaman min din tumaa a lɛa. 19Ka Lawa nyankɔ masɛ dɔ a lɛa, bɛ̀ ma á boo diɛ, Lawa boo peperen wɔ ma lɛ-n, man bɔlɔ pɛ ka foo tãbaa nɛ, minin nə boo la, ǹ Boo Tii Kɔɔ̃n a sii-durii kɛ dɔ̃. 20Man Boo Tii Kɔɔ̃n kɛ lɛ a sii yɔrɔ-bɔle lɛa, a laanɛ ma á kòso-n sisia. Ka Lawa nyankɔ mà ma boo la, ma a boo da ka foo tãbaa nɛ, ka ma bɛ́ kɔnboe ma zɛnaa lɔn.
Fòo-diɛ giala-nyɔmɔɔ boo
21 #
NDS 20.4; Tim2 4.12 #
Kol 4.7-8
Wɔ dɔɔ̃n taãn Tisiki mɛn bɛ́ bɔlɔgoondɛnaa lɛa, Dɛnaa a dí kɛ gɔ́ɔ̃ nɛ, ma bɛ́ ka yɔrɔ mɛn nɛ, bɛ á re die a bɛ tumaa pɛ ka nɛ, ma bɛ́ màn mɛn lɛa ka bɛ dɔ̃. 22Man diɛ ka li bɛ lɛ tɔ ganaa, máa a da wɔa giã ǹ gɔn pɛ ka nɛ, a ka foo taã nɛ.
23Wɔ Di Lawa laanka wɔa Dɛnaa Yezu Krita die ǹ là nyantoro kɔ wɔ dɔɔ̃nɔn lɛn tumaa la, ka kɔn-narɛɛ nɛ, ka goleemali ni. 24Min mɛn tumaa bɛ́ Dɛnaa Yezu Krita narɛ taãn-taãnɛ, Lawa a bǐɛ̃ die a dɔ bɛn tumaa ganaa.
Currently Selected:
Efɛ 6: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.