BBN 1

Izirayeli nɛnyaanan bɛ̀rɛ baa Ezipti gána-n boo

1 # SGK 46.8-27 Zakɔba lɛ a tɔ n Izirayeli, á woo Ezipti gána nɛ. A nɛnyaanan mɛnɛn nə wo kun ni, ka ǹ kion minin ni, bɛn tɔ á ke: 2Urubɛn nɛ, Simiɔn nɛ, Levii ni ka Zudaa nɛ, 3Isakaara nɛ, Zabulɔn nɛ ka Bɛnzamɛn nɛ, 4Dan nɛ, Nɛfutalii ni, Gaadi ne ka Asɛɛrɛ nɛ. 5Ǹ bɛ́ woe, bɛ̀ Zozɛfu sɛ n Ezipti gɔrɔ. Zakɔba a kion minin lɛn tumaa na á goã min pɔsɔbaa.

6Bɛ kio Zozɛfu daa á gã. Ǹ dɔɔ̃nɔn laanka bɛa biikoo minin kɛn lɛn tumaa daa ǹ nə́ gã. 7#NDS 7.17 Izirayeli minin lɛn nə́ nɛnyaanan yɛ, ǹ nə́ mɔnaa Ezipti gána lɛ nɛ, ǹ pàã gole kɔ parsiini.

8 # NDS 7.18 Bɛ kio ǹ nə́ kii dii koa Ezipti gána lɛ mìi la, kii mɛn bɛ́ a Zozɛfu dɔ̃ wa. 9Bɛa kii lɛ pɛ a gána minin manɛ: «Á ke, Izirayeli nɛnyaanan lɛn nə́ mɔnaa á la yii ni, ǹ pàã n giɛ mà a la wɔa wɔ nɛ. 10#NDS 7.19 Ka daa wɔ ga yiri sonbore li, wɔ yoo ǹ gialaa wɔ ǹ kurəə mɔnaa ganaa. Bɛ bie wa, bɛ̀ zia yoo, maǹ die kiɛ kun ka wɔa zɔ́ɔn nɛ, ǹ zia da wɔ ganaa, ǹ tɔn soo ǹ nə n bɔ gána lɛ nɛ.»

11Bɛ lɛ taman yii, Ezipti minin lɛn nə́ kənən koa ǹ mìi la, maǹ nə ǹ kaa pàã dí nyɛɛ ganaa. Ǹ nə́ màn-bii koa ǹ kiwin dɔ Ezipti gána a kii *Faarahɔn nɛ, Pitomu laanka Ramusɛsi kiwin kɛn manɛ. 12Sɛnɛ, ǹ bɛ́ giɛ li mà ǹ màn da Izirayeli nɛnyaanan lɛn nɔmaa li ǹ mɛn waáraa, bɛa biikoo lɛ din ni, màn nə́ miɛ̃ ǹ mɔnaa li, ǹ nə́ bǎã siɛ. Ǹ sii goã nyɛ́ɛ diɛ Ezipti minin ganaa. 13Bɛ lɛ a lɛa, ǹ nə́ bɔ Izirayeli nɛnyaanan lɛn yii ni, ka n pɛ mà bɛ̀rɛn manɛ. 14Ǹ nə́ kanaa tìĩ bɔ ǹ nyin ni ka dí babaraa nɛ: tii miɛ̃ nɛ, toopaa boe ne ka wuru dí tumaa nyɛɛ nɛ. Maǹ nə́ nɔmaa ǹ dí tumaa da ǹ mìi-n ka baraabaa nɛ.

Kii Faarahɔn a Izirayeli nɛnyaanan dɛ boo

15Nɛ-yole min paa na á goã *Ebrəə minin lɛn li, goon tɔ na á goã Sifra, goon kɛ dɔ tɔ n Puha. Ezipti gána a kii lɛ pɛ bɛn manɛ: 16«Bɛ̀ ka tá n doe Ebrəən lɛn lɔn lɛ, ǹ nɛ yɛ gɔ́ɔ̃ nɛ, ka ga nɛnyaan lɛ ganaa doɛ̃. Bɛ̀ nɛginin ni, ka dɛ a gã. Bɛ̀ nɛlɔ nɛ, ka toa a yii n koo.»

17Sɛnɛ, lɔ nɛ-yolen lɛn nə́ nyɛ́ɛ baa Lawa nɛ. Kii lɛ boo mɛn pɛ ǹ nɛ, ǹ sii lɛ zɛnaa á kɔnpɛ ka bɛ-n wa. Ǹ nə́ nɛgininin lɛn dɔn yii toa koo. 18Ezipti gána a kii lɛ tɔ́n lɛ dia ǹ la, á pɛ ǹ nɛ: «Wàa na á baa ka zɛnaa miɛ̃, ka ǹ nɛgininin yii toa koo?»

19Lɔ nɛ-yolen lɛn nə́ pɛ Faarahɔn nɛ: «Ebrəən lɛn lɔn ba goon ka Ezipti minin wɔn nɛ wa. Pàã tá Ebrəə lɔn lɛn lon, nɛ-yole laan bɛ̀ a n doe, bɛ̀ ǹ nə́ ǹ nɛ yɛ.»

20Bɛa yɔrɔ kɛ lɛ la, màn nə́ mɛ Izirayeli nɛnyaanan lɛn li, ǹ nə́ mɔnaa, ǹ pàã gole kɔ. 21Lɔ nɛ-yolen lɛn sɛn bɛ́ ǹ nə́ nyɛ́ɛ baa Lawa nɛ, Lawa bǐɛ̃ zɛnaa ǹ nɛ, á nɛnyaanan kɔ ǹ la.

22 # NDS 7.19 Bɛ lɛ nɛ, Faarahɔn pɛ a gána a zaman tumaa nɛ: «Ka Ebrəən lɛn nɛnyaan tiɛɛ̃n giĩdɛnaa tumaa zũ tà mu li, ka toa ǹ nɛlɔdɛnan yii goã koo.»

Currently Selected:

BBN 1: SBPE2011

Highlight

Copy