SGK 50

Zakɔba a gɛ̀ zɛnaa

1Zozɛfu na, á waa ǹ di lɛ la tán, á n sɔɔ a nɛ, á wuu pɛ la. 2Bɛ kio, á pɛ a dagòã-bɔlen ne, mà ǹ nyɔɔ lɔ asɛ di lɛ gere ganaa ǹ koa, màn mɛn bɛ́ toɛ, a baran bɔɔ̃ wa. 3A kɔnpɛ ka ǹ landa nɛ, maǹ nə́ bɛ lɛ zɛnaa yǎa lɛawaa pusi. Ezipti minin nə́ wuu pɛ a gere la, yǎa lɛawaa pɔsɔbaa.

4Zakɔba a gɛ̀ wuu pɛ biikoo bɛ́ á nya, Zozɛfu pɛ *Faarahɔn a kion minin ni: – Bɛ̀ masɛ sii á kɔɔ̃n ka ganaa, ma ǹ ka nyankoe, ka ma lɛ gɔ́ɔ̃ ǹ boo gũ, ka wo pɛ Faarahɔn nɛ kɛnɛn: 5#SGK 47.29-31 «Ma di lɛ bɛ́ re giɛ̃ ǹ mɛn waáraa, a na á pɛ ma nɛ, mà ma n liɛ, mà asɛ din yala mɛn zɛnaa Kanaan gána nɛ, mà ma asɛ bĩ bɛ nɛ.» Sisia, man giɛ li, ma wo ma di lɛ gere bĩ, ma tɔn nə n bɔyaa ma daa.

6Faarahɔn lɛ kɔ la, mà a wo ǹ di lɛ gere bĩ, ka a bɛ́ á n liɛ-n lɔn. 7Zozɛfu bɛ́ woe ǹ di lɛ gere bĩ ǹ bǎã nɛ, Faarahɔn a pàãdɛnan tumaa woo kun ni, ka a kion min dadaran nɛ, ka Ezipti gána a min dadaran tumaa nɛ. 8Zozɛfu din dɔ a kion minin nə́ woo kun ni, ǹ dɔɔ̃nɔn nɛ, ka ǹ dikion minin gialakunun ni. Ǹ mànan mɛnɛn toa Gosɛnɛ, ǹ nɛnyaanan dininsɔɔ̃nɔn manɛ, ka ǹ sèren laanka ǹ bòen ne ka ǹ diin ni. 9Wotoron dinin nə́ woo kun ni, ka sùidɛnan nɛ. Zaman mɛn woo, zaman gole ne.

10Ǹ bɛ́ ǹ nə́ dɔ nyan bǎã kɔ́n nɛ, Ataadi kiwi Zurdɛ̃ tà kio, ǹ nə́ gɛ̀ wuu pɛ walan, ǹ nə́ n lɛ dɛ kɔsɛkɔsɛ. Zozɛfu nə́ n di a gɛ̀ koa, yǎa lɛawaa sɔbaa. 11Kanaan minin mɛnɛn bɛ́ bɛa bǎã lɛ nɛ, ǹ nə́ ǹ gɛ̀ zɛnaa ǹ gɔn lɛ yɛ Ataadi, bɛn nə́ tɔ́n pɛ: «Gɛ̀ gole na á gã Ezipti minin kɛn la dɛ!»

Bɛ lɛ na á toa, ǹ nə́ bɛa bǎã lɛ bíi mà Abeli-Misirayimu bɛ giala mà "Ezipti Minin Gɛ̀ Zɛnaa". Bɛa bǎã lɛ n Zurdɛ̃ tà kio.

12Zakɔba màn mɛn pɛ a nɛnyaanan lɛn nɛ, a din wɔ paǹ li, ǹ nə́ zɛnaa miɛ̃. 13#NDS 7.16 Ǹ ná a gere saa, ǹ nə́ woo-n Kanaan gána nɛ. Abrahamu wuru mɛn pii Ɛti tɔrɔ Efrɔn lon, a geren bĩ ǹ bǎã lɛa, ǹ nə́ bĩ kele kolo yala-n walan Makpelaa. Bɛa bǎã lɛ laanka Manbre n dia-n kɔn la.

14Zozɛfu bɛ́ á ǹ di lɛ gere bĩ á nya, a laanka ǹ dɔɔ̃nɔn lɛn nə́ n bɔyaa, ǹ nə́ daa Ezipti gána nɛ, kun ka min mɛnɛn tumaa wo kun ni, ǹ di lɛ gere biĩ lɛ taman yii.

Zakɔba a gɛ̀ kio siin

15Zozɛfu ǹ dɔɔ̃nɔn lɛn bɛ́ ǹ nə́ yɛ, mà ǹsɛn di lɛ gã, ǹ nə́ pɛ kɔn nɛ mà ǹsɛn nə sii baraa mɛn zɛnaa Zozɛfu ni, mà a kiɛ̃ a n bɔyaa ǹsɛn li, a bɛa gɛ̀ dòo bɔ ǹsɛn ganaa ke! 16Ǹ nə́ tɔ́n boo dia Zozɛfu la kɛnɛn: «Wɔ di lɛ na á n gɔn waa wɔ nɛ á tɔn gã, 17mà wɔ pɛ n nɛ, mà n bǐɛ̃ kɔ, n wɔsɛn sii baraa gole kɛ toa wɔ nɛ. Wɔ́ sii la n la sɛn, sɛnɛ, sabara baa, n wɔa sii baraa gole kɛ toa wɔ nɛ. A giala, wɔ di bɛ́ á goã dí nyɛɛ Lawa mɛn nɛ, wɔ dɔn man dí nyɛɛ bɛ lɛ nɛ.»

Ǹ bɛ́ ǹ nə́ boo da Zozɛfu-n miɛ̃, á n lɛ da wuu ni. 18Bɛ kio, ǹ golon lɛn nə́ n gɔn bɔ ǹ dinin ganaa, ǹ nə́ kaa tán a giulun, ǹ nə́ pɛ nɛ: «Wɔ tá n gɔn, n bɛ̀rɛn lɛa!»

19Zozɛfu tɔ́n pɛ ǹ nɛ: «Ka baran nyɛ́ɛ baa wa. Masɛ n Lawa bǎã-n ya? 20A na á goã ka gɔ́ɔ̃ nɛ, mà ka sii baraa zɛnaa ma nɛ, sɛnɛ, Lawa bɔyaa á baa sii bǐɛ̃ lɛa, á min gigiã nyin si, ka ka yii bɛ́ a ganaa lɔn pelo. 21Sisia, ka baran nyɛ́ɛ baa wa: man die kaa màn-bii boe, ma kaa nɛnyaanan dɔn wɔ bɔ.»

Á ǹ foo wɔraa ka boo kɔɔ̃n nɛ.

22Zozɛfu giã Ezipti, a laanka ǹ di a kion minin lɛn nɛ. Zozɛfu na á lɛ̀ paabiɛ ka fù (110) zɛnaa. 23Efrayimu a nɛnyaanan laanka a nɔ̀ɔnɔn nə́ yɛ a yii ni. Á ná a nɔ̀ɔn Makiiri a nɛnyaanan gũ. Makiiri n Manaasee a nɛ lɛa.

24Zozɛfu tɔ́n pɛ ǹ dɔɔ̃nɔn lɛn nɛ ǹ kɔn pinaa kɛnɛn: «Masɛ a gɛ̀ dɔ á nya. Sɛnɛ, Lawa á die n doe ka lɛ. A n lɛ kɔ Abrahamu laanka Izaaki la ka Zakɔba nɛ, mà á die gána mɛn koe ka la, Lawa á die ka boe a ka bɔ Ezipti gána nɛ, a wo ka-n walan. 25#BBN 13.19; Zoz 24.32; Ebr 11.22 Bɛ̀ Lawa nə́ n dɔ ka lɛ, á bɛ zɛnaa ka nɛ ǹ mɛn waáraa, bɛ̀ ka tá woe, ka ma wen waa ka wo ǹ ne. Zozɛfu pɛ ǹ nɛ, mà yǎa ǹ nə n liɛ asɛ nɛ, ka bɛa zɛnaa nɛ.»

26Zozɛfu bɛ́ giɛ̃, bɛ̀ a lɛ̀ paabiɛ ka fù (110) ni. Ǹ nə́ nyɔɔ gìĩ kɔɔ̃n lɔ a gere ganaa a koa doɛ̃ taman yii, bɛ kio, ǹ nə́ da màn nɛ Ezipti gána nɛ.

Currently Selected:

SGK 50: SBPE2011

Highlight

Copy