SGK 49

Zakɔba barka mɛn da a nɛgiĩ fulupaa ganaa

1Zakɔba ná a nɛgiĩn lɛn bíi, á pɛ ǹ nɛ: «Ka n lɛ sɔkɔn, màn mɛn bɛ́ toɛ, sii mɛn bɛ́ re ka yii biɛ̃, ma bɛ pɛ ka nɛ:

2Zakɔba a nɛnyaanan lɛn,

ka n lɛ sɔkɔn ka n too kɔ,

ka n too kɔ ka di Izirayeli lon.

3Urubɛn, nsɛ lɛ n maa nɛ

bibinaa lɛa.

Nsɛ lɛ n maa giĩbaa ǹ nɛ

bibinaa lɛa,

bɛ̀ pàã bɛ́ ma lon ǹ mɛn waáraa.

Barka tá n lon, pàã tá n lon,

á la ǹ dɔɔ̃nɔn kɛn wɔ nɛ.

4Tà mu bɛ́ n lɔlɛkɔn lɔn,

n dɔ n sii lɔlɛkɔn miɛ̃.

Bɛ lɛ n ke,

n ba re nyɛɛnaandɛnaabaa

yii wa.

A giala, ń ma yii puusə kɔ,

ń giã kun ka maa lɔ nɛ,

ma din a waa ǹ pìi la.

5Simiɔn laanka Levii n dan

nɛn lɛa,

manə n lɛ kiɛ kun,

bɛ̀ ǹ kakaarɛbaa ǹ siin zɛnaa.

6Ǹ bɛ́ n duri,

bɛ̀ ǹ kɔn yɛ boo mɛn ganaa,

ma ba li ma wo a bǎã-n wa,

ma ba li ma wo ǹ kɔn yɛ ǹ

bǎã-n wa.

A giala, ǹ foo bɛ́ á yoo,

ǹ nə́ minin dɛ,

ǹ bɛ́ mà maǹ là kiɛ sii ganaa,

ǹ nə́ diin dɛdɛ kooro.

7Ǹ foo golebaa lɛ,

ǹ tá re a koen goɛ.

A giala, ǹ tá kakaarɛ á la yii ni.

Ǹ sii zɛnaa a là diɛ kɛ lɛ,

ǹ tá re a koen goɛ,

a giala, mà makara ba ǹ lon wa.

Ma á re ǹ tɔrɔn niniɛ,

ma ǹ bɔ kɔn Izirayeli gána nɛ.

Ma á re ǹ sasawɛɛ,

ma ǹ bɔ kɔn gána lɛ gɔ́ɔ̃ nɛ.

8Nsɛ Zudaa,

n dɔɔ̃nɔn man die loe loe,

ǹ nə n tɔ bɔ nɛ.

N tá re n zɔ́ɔn nyɛnɛɛ,

n nə ǹ kaa ǹ dungiala la.

N dinɛn tá re n musin koɛ

tán n giulun.

9 # MNS 24.9; SNS 5.5 Zudaa n kaka ka yàra ten

bɛ́ lɔn.

Maa nɛgiĩ n boe a siĩ kũ ǹ

bǎã nɛ,

die a waa ǹ bǎã ganaa.

Á n musi yiɛ,

á waa tán ka yàra sà bɛ́ lɔn.

Kakaarɛ ka yàra nɛ ǹ dan bɛ́ lɔn,

die n boe la a pɛ, mà a yoo?

10Kiibaa n die goɛ̃ Zudaa a

kion biikoo tumaa li.

Kiibaa ǹ bàbàla n die goɛ̃

a tɔrɔn gɔn biikoo tumaa li,

yǎa kiibaa ǹ bàbàla lɛ a

dɛnaa die,

tɔrɔ tumaa doamaa bɛ́

ǹ min mɛn bɔlɔ si.

11Á die a dundun doɛ

*rezɛ̃ da ganaa.

Á die a dundun nɛ doɛ rezɛ̃ da sonbore ganaa.

Á die a mɔnaa pii yɔ li.

Á die a dɔnkɛ gole pii rezɛ̃ mu tã li.

12A yii nànan nə́ tataã,

á la yɔ yii ni.

A sɔn nə́ fufu kɔ,

ǹ nə́ la bɔ̀nyaa nɛ.

13Zabulɔn tá re giɛ̃ kɔ̀ mu lɛ-a.

Mu la ǹ goo dadaran bɛ́ re

golee kɔ̀ mɛn lɛ-a.

A giã ǹ bǎã á die golee koe,

a dɔ Sidɔn kiwi ganaa.

14Isakaara n ka dundun kaka

bɛ́ lɔn,

waa-n tán tɔɔn kion.

15Á yɛ mà asɛ a susu ǹ bǎã

lɛ á siĩni.

Á yɛ mà gána lɛ á kɔɔ̃nɛ.

Á n nyàan gisĩ,

guĩ saa taman yii,

á n din kɔ bɛ̀rɛbaa ǹ dí la.

16Dan tá re kiri kuri a minin la.

Izirayeli gána nɛ,

á re kiri kuri a minin la.

17Dan nə die goɛ̃ ka miɛ̃

bɛ́ lɔn zii la,

ka kɔrɔkan bɛ́ lɔn zii boɛɛn la.

Á die sùi yawɛɛ a toro ganaa,

sùidɛnaa lɛ á die boe a n làfu kɔ tán.

18E Dɛnaa, ma nə n yii diɛ,

máa n din ma kirisibaa!

19Nsɛ Gaadi,

zia nɛn tá re die koe n lɛ.

Sɛnɛ, n tá re n tiɛ̃ n kɔ ǹ lɛ,

n nə ǹ loo.

20Màn-bii gigiã á re yii

Asɛɛrɛ a gána nɛ,

kiin màn-bii á re yii

Asɛɛrɛ a gána nɛ.

21Nɛfutalii n ka tiã bɛ́ lɔn,

baa sii a din gɔn wìi a lɛa,

a n ka tiã bɛ́ lɔn, nɛ sonboren yii.

22Zozɛfu a sii n kɔnboe ka

da gùrù mɛn bɛ́ nɛ koe,

ka da mɛn bɛ́ mu yala lɛ-a,

a gùrù n nɛ koe.

A gùrùn nə́ yoo,

ǹ nə́ kaa kisilɛ lalan lon.

23Ǹ nə́ ga a lɛ li,

ǹ nə́ zia baa a ganaa,

kiɛ-bɔlen nə́ zia baa a ganaa.

24Sɛnɛ, a dɔ ná a sa kũ kaka.

Á n gɔn wìi kaka kɔ a ganaa,

ka Zakɔba a Lawa Kaka kɛ

pàã nɛ.

A din lɛ n Izirayeli tamaɛ

ka tɔɔn-lɛduə̃li bɛ́ a tɔɔn

tamaɛ lɔn.

A foo n doa-n a din lɛ ganaa,

a giala, a n kaka ka kɔlɔ nɛ.

25N di a Lawa á re n doe n lɛ,

Pàãyiidɛnaa Lawa á re barka

diɛ n ganaa.

Á die a la mu gisĩ n la,

a die a tán giulun mu kɔ n la,

a die a nɛnyaanan laanka tɔɔn

kɔ n la.

26Là mɛn bɛ́ boe lɛlɛ a kelen

kɛn nɛ,

màn mɛn bɛ́ yii tenten zizin

kɛn la,

masɛ bɛ́ barka mɛn diɛ n ganaa,

á la bɛ nɛ.

Nsɛ Zozɛfu mɛn bɛ́ maa nɛgiĩ lɛa,

nsɛ mɛn bɛ́ ǹ dɔɔ̃nɔn mìi la,

bɛa barka lɛ n koe n kio lɛ miɛ̃.

27Bɛnzamɛn n die kakaarɛ koe

ka don gin bɛ́ lɔn.

Baayɛlɛ, a n siĩ soɛ̃,

wasamiɛ̃nɛ, a n bɔ zia la ǹ mànan gii.»

28Izirayeli tɔrɔn lɛn man fulupaa. Ǹ di bɛ́ á boo mɛn da, á barka da ǹ ganaa, bɛ lɛ n ka kɛ nɛ, didie laanka a wɔ nɛ.

Zakɔba a gɛ̀

29Bɛ kio, Zakɔba nə́ n gɔn waa a nɛnyaanan lɛn nɛ, á pɛ ǹ nɛ: «Bɛ̀ ma gã, ka ma gere bĩ ma digolon gere bĩ ǹ bǎã nɛ, kele kolo yala-n, Ɛti tɔrɔ Efrɔn a wuru-n. 30#SGK 23.3-20 Kele kolo yala mɛn bɛ́ Makpelaa, dia-n kɔn la ka Manbre ne, Kanaan gána nɛ. Abrahamu na á bɛa wuru lɛ pii Ɛti tɔrɔ Efrɔn lon, á baa a geren bĩ ǹ bǎã lɛa. 31#SGK 25.9-10; 35.29 Maǹ nə́ Abrahamu laanka a lɔ Saaraa gere bĩ walan, ka Izaaki laanka a lɔ Rebeka nɛ. Ma dinmaa dɔ-n má Leyaa gere bĩ walan. 32Wuru lɛ laanka kele kolo yala mɛn bɛ́ bǎã lɛ nɛ, bɛn man nə́ n pii Ɛti tɔrɔn lon.»

33 # NDS 7.15 Zakɔba bɛ́ á n gɔn waa a nɛnyaanan lɛn nɛ, á nya, á n gòãn zɛnaa, á waa tán a piì la, a fɔfoã kuru, á n ti ǹ digolon ganaa.

Currently Selected:

SGK 49: SBPE2011

Highlight

Copy