Gal 3
3
Dí-pɛn, hinlaa golee Krita li boo
1Galaasi yiriwɛɛnaan lɛn! Die na á kɔnkoãbaa zɛnaa ka nɛ? A da yaa, ǹ nə́ Yezu *Krita a dere gɔn ganaa boo kɛ da ka yii-n foaãnɛ. 2Man zoɛ̃, máa ka nɔ̀n-diɛ kɛ a binyəə kɔ ma la: Ka ǹ ká Lawa a Yiri Fu yɛ kaa dí-pɛn lɛa, hinlaa ka Boo Tii Kɔɔ̃n mɛn ma ka golee li, bɛa lɛa nɛ? 3Ka ǹ yiriwɛɛnaan lɛa miɛ̃ ya? Ka ǹ ká a giala kɔ ka Lawa a Yiri Fu ni. Ka n zoɛ̃ mà ka a giala-nyɔmɔɔ kanna ka ka dinin gɔ̀nɔn foo sii ni? 4Kaa sii gigiã yɛ kɛ lɛ tumaa na á goã kooro? A boe la á kooro biɛ doɛ̃ wa! 5Lawa ná a Yiri Fu kɔ ka la, a n kaãbaa ǹ siin zɛnɛɛ ka bii. A na á bɛ zɛnaa kaa dí-pɛn siin zɛnaa a lɛa, hinlaa ka Boo Tii Kɔɔ̃n mɛn ma ka golee li, bɛa lɛa nɛ?
6 #
SGK 15.6; Rɔm 4.3 A n miɛ̃, Lawa a sɛ́wɔ pɛ Abrahamu wɔ paǹ li kɛnɛn: «Abrahamu nə́ n foo doa Dɛnaa Lawa ganaa. Bɛ lɛ na á toa, Lawa kũ min pepere lɛa.» 7#Rɔm 4.16 Ka á kɔnboe ka a giala ma, ka dɔ̃, mà goleemali wolen man Abrahamu a nɛnyaan taãnan lɛa. 8#SGK 12.3 Lawa a sɛ́wɔ wɔ yiri da a-n lɛlɛ, mà Lawa á re lɛ koe tɔrɔ kɔsɔn ganaa min peperen lɛa ǹ goleemali taman yii. Bɛ lɛ nɛ, á saa lɛlɛ á boo kɔɔ̃n kɛ pɛ Abrahamu ni: «Lawa á re barka diɛ kanaa minin tumaa ganaa n lɛa.» 9Abrahamu golee li, Lawa tɔ́n barka da a ganaa. Bɛa yɔrɔ lɛ la, min mɛnɛn tumaa bɛ́ goleemali we, Lawa á re barka diɛ bɛn ganaa ka Abrahamu wɔ bɛ́ lɔn.
10 #
TDP 27.26
Sɛnɛ, min mɛnɛn bɛ́ n foo doɛ dí-pɛn ganaa, mà ǹsɛn nə pepere kɔ Lawa yɔrɔ-a, koe á re boe bɛn ganaa. A giala, á kiɛ̃-n Lawa a sɛ́wɔ nɛ: «Min mɛn bɛ́ a re koe bɛa dí-pɛ kɛ lɛ a boon lɛ a ǹ lɛ pã wa, bɔ̀n na á bɛa dɛnaa yɛ!» 11#Abak 2.4 A n foaã dinin, Lawa a lɛ koe min kɔ́n ganaa min pepere lɛa, dí-pɛn lɛ-sii taman yii wa. A giala a tá kiɛ̃ nɛ: «Min mɛn bɛ́ a pepere wa, bɛa dɛnaa á re mɛnɛɛ. Sɛnɛ, min mɛn bɛ́ pepere, a bɔlɔgoondɛnaabaa n die toɛ a yii goã koo.» 12#LWS 18.5 Dí-pɛn lɛ-sii bie goon ka goleemali-n wa. A giala, Lawa a sɛ́wɔ pɛ: «Min mɛn bɛ́ dí-pɛn bɔlɔ sii, a tá ǹ sii zɛnɛɛ, bɛa dɛnaa á re yiikoonaabaa yii bɛn taman yii.» 13#TDP 21.23 Koe mɛn goã wɔ mìi-n dí-pɛn lɛ-tii a lɛa, Krita na á wɔ kirisibaa bɛ lɛ ganaa. A giala, koe bɔ a dinmaa lɛ ganaa wɔ a lɛa. Ka Lawa a sɛ́wɔ bɛ́ á pɛ lɔn: «Bɛ̀ ǹ nə́ min mɛn gere da da la, koedɛnaa n ka bɛ nɛ.» 14Bɛ na á n zɛnaa, màn mɛn bɛ́ toɛ, Lawa barka mɛn da Abrahamu ganaa, bɛ dɔ tɔrɔ kɔsɔn kɛn tumaa ganaa Yezu Krita pàã ganaa. Bɛa yɔrɔ kɛ lɛ la, goleemali barka nɛ, wɔ n boe la, wɔ Lawa a lɛ-kɔ ǹ Yiri Fu kɛ yɛ.
Dí-pɛn laanka lɛ-kɔ ǹ sii
15Ma dɔɔ̃nɔn lɛn, ka daa wɔ ga minbuiinin sii-zɛnaa goon ganaa. Bɛ̀ minin man nə́ lɛ-kɔ kɔn la wɔ, ǹ nə́ zɛnaa a yɔrɔ li, min kɔ́n ba ziziɛ̃ wa, min dɔ a màn diɛ li wa. 16Lawa na á lɛ-kɔ ǹ boon da Abrahamu ni ka a tɔrɔ nɛ. A bie á pɛ mà "ka a tɔrɔn nɛ", ka n pɛ mà a n min gigiã ganaa wa. Sɛnɛ, mà "ka a tɔrɔ nɛ". A n min goon toto nyɛɛ, bɛ n ka Krita nɛ. 17#BBN 12.40 Masɛ a taasiɛ n ka kɛ nɛ: Lawa din na á lɛ-kɔ wɔ bɔrɔ, á zɛnaa a yɔrɔ li. Dí-pɛn man nə́ daa lɛ̀ biɛsii ka pɔsɔɔ (430) bɛ kio. Bɛn ba boe la ǹ lɛ kɔ kɔn la lɛ sàabaa wa. Bɛ bie wa bɛ̀ Lawa a lɛ-kɔ kɛ n kooro biɛ. 18#Rɔm 4.14 A giala, Lawa bǐɛ̃n mɛnɛn koa a din wɔn manɛ, bɛ̀ bɛn man yii dí-pɛn pàã ganaa, bɛ̀ ǹ ba yii lɛ-kɔ kɛ pàã ganaa doo wa. A da yaa, Lawa na á bǐɛ̃ kɛ zɛnaa Abrahamu ni ka a lɛ-kɔ kɛ barka nɛ.
19Dí-pɛn man nə́ daa wàa mɛn a lɛa kəni? Maǹ nə́ daa, ń giɛ màn mɛn bɛ́ sii baraa lɛ lɛa taãnɛ, wɔ bɛ dɔ̃. Lon a dia dí-a wolen man nə́ bɛa dí-pɛn kɛn lɛn kɔ. Ǹ nə́ min goon baa zɛlɛ lɛa, Muizu ni. Maǹ nə́ dí-pɛn lɛn kɔ, mà ǹ goã yǎa Abrahamu tɔrɔ kɛ lɛ a daa doe, lɛ-kɔ nə n wɔ asɛ mɛn lɛ nɛ. 20Bɛ̀ min goon dinsɔɔ̃ n sii zɛnɛɛ, a laadoo ba zɛlɛ ganaa wa, a da yaa lɛ-kɔ kɛ gɔ́ɔ̃ nɛ, Lawa dinsɔɔ̃ nɛ.
Dí-pɛn bɛ́ màn mɛn giala pii
21Dí-pɛn lɛn man zia biɛ kɔn ka Lawa a lɛ-kɔ kɛ-n kəni? Haayii, ǹ ba zia biɛ kɔn wa! Sonbore, dí-pɛn nə́ n kɔ. Bɛ̀ pàã nə ǹ lon ǹ nə́ nyin nyabaã koe minbuiinin la, bɛ̀ min tá boe la, a pepere kɔ Lawa yɔrɔ-a ǹ pàã ganaa. 22Sɛnɛ, Lawa a sɛ́wɔ pɛ, mà kanaa minbuiin tumaa n sii baraa pàã giulun. Màn mɛn bɛ́ toɛ, Lawa a lɛ-kɔ ǹ sii lɛ nə n zɛnaa goleemali wolen ne, ka golee Yezu Krita li barka nɛ.
23Goleemali biikoo bɛ́ a tɔn dɔ wa, wɔ n wɔ́ goã bɛ̀rɛn lɛa dí-pɛn gɔn. Wɔ ǹ wɔ́ goã n yii diɛ bɛa goleemali kɛ lɛ la. 24Bɛa yɔrɔ kɛ lɛ la kəni, dí-pɛn lɛn man nə́ goã wɔ lɛduə̃li lɛa. Wɔ n wɔ́ goã n yii diɛ Krita a daa la, ń giɛ wɔ á min peperen biɛ Lawa yɔrɔ-a wɔa goleemali a lɛa. 25Sɛnɛ kanna, goleemali a daa kio, wɔ bie wɔ lɛduə̃li kɛ wɔn lɛa doo wa.
26A giala, goleemali barka nɛ, ka tumaa n Lawa a nɛnyaanan lɛa Yezu Krita wɔ gɔ́ɔ̃ nɛ. 27Hiĩ, ka mɛnɛn tumaa bɛ́ ka *batɛmu yɛ Krita wɔ gɔ́ɔ̃ nɛ, ka n ká Krita wɔ ka dinin ganaa. 28Kanna, Zuifu laanka tɔrɔ kɔsɔ bɔkɔnlɛ banban doo wa. Bɛ̀rɛ laanka tá ma din gɔn wìi a lɛa wole bɔkɔnlɛ banban doo wa. Lɔ laanka giĩ bɔkɔnlɛ banban doo wa. A giala, ka tumaa n màn goon lɛa Yezu Krita wɔ gɔ́ɔ̃ nɛ. 29#Rɔm 4.13 Bɛ̀ ka á Krita wɔn lɛa, bɛ n nyɛɛ kəni, mà ka n Abrahamu tɔrɔn dɔn lɛa. Lawa nə n lɛ kɔ la ka bǐɛ̃n mɛnɛn nɛ, ka dɔn tá re bɛn yii, a kɔnpɛ ka Lawa din a lɛ-kɔ kɛ nɛ.
Currently Selected:
Gal 3: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.