Gal 4
4
1Maa taasiɛ n ka kɛ-n kəni: Nɛ mɛn bɛ́ ǹ di a kíɛ̃-saali lɛa, a n goon ka bɛ n bɛ̀rɛ lɛa a nɛtenbaa tumaa gɔ́ɔ̃ nɛ, a laanɛ a din nə màn tumaa a dɛnaa lɛa. 2A saa a tenmaa ganaa, a n goɛ̃ a tooli laanka a sii yɔrɔ-bɔlen wɔ gɔ́ɔ̃ nɛ, ǹ di biikoo mɛn pɛ, yǎa bɛ doe. 3Wɔsɛn dɔn man wɔ́ goã miɛ̃ ka nɛnyaanan bɛ́ lɔn. Wɔ n wɔ́ goã kanaa a màn pàãdɛnan kɛn gɔn, wɔ nə́ ǹ bɛ̀rɛn lɛa. 4Sɛnɛ, biikoo mɛn nə n bɔ á n koa, bɛ bɛ́ á dɔ, Lawa ná a Nɛgiĩ dia. Á yɛ lɔ la, Zuifun dí-pɛn pàã giulun, 5#Rɔm 8.15-17 màn mɛn bɛ́ toɛ, a da tá dí-pɛn pàã giulun wolen kirisibaa. A din lɛ pàã ganaa, Lawa wɔ baa a nɛnyaanan lɛa.
6Wɔ bɛ́ na a nɛ taãnan lɛa, bɛ lɛ nɛ, Lawa ná a Nɛgiĩ Yiri dia wɔ foo ne. Bɛ lɛ n pii wɔ gɔ́ɔ̃ nɛ mà "Wɔa Díi". 7A bɛ́ miɛ̃, ka bie bɛ̀rɛn lɛa doo wa, sɛnɛ, ka ǹ nɛn lɛa. Bɛ̀ ka ǹ nɛn lɛa, Lawa màn mɛn koa a nɛn manɛ, ka á re bɛ yii.
Pooli a gɔ́ɔ̃-bii ka Galaasi minin sii-n boo
8Lɛlɛ, ka bɛ́ ka goã Lawa doɛ̃ wa, ka ǹ ká goã màn kɔsɔn bɛ̀rɛn lɛa, màn mɛnɛn bɛ́ ǹ ba Lawa taãnan lɛa wa. 9Sɛnɛ kanna, ká Lawa dɔ̃. A taãnbaa din li Lawa na á kasɛn dɔ̃. Kanaa màn pàãwɛɛnan kɛn, là goon ná a ba ǹ ganaa wa, ka ǹ li ka goã bɛn bɛ̀rɛn lɛa doo? 10Ka ǹ tɔn zín koe lɛawaan tɛnɛn la, ka muin tɛnɛn nɛ, waáraan tɛnɛn nɛ ka lɛ̀n tɛnɛn nɛ. 11Nyɛ́ɛ tá ma ganaa kaa wɔ paǹ li. Masɛ dí mɛn tumaa nya ka nɛ, bɛ n die goɛ̃ kooro?
12Ma dɔɔ̃nɔn lɛn, man ka nyankoe, ka giã ká masɛ bɛ́ lɔn. A giala, mà ma dɔ nə́ n din baa ka ka bɛ́ lɔn. Ka sii baraa kɔ́n zɛnaa ma-n lɛlɛ sɛn wa. 13Ka á doɛ̃ taãnɛ, mà ma bɛ́ Boo Tii Kɔɔ̃n kɛ pii ka-n bibinaanɛ, mà busu a lɛa nɛ. 14Ma gɔ̀nɔn-busii kɛ goã sii kaka lɛa ka ganaa. Ka bɛ din tumaa nɛ, ka nyaǹ bɔ ma ganaa, ká ma toa walan wa. Bɛ din na á toa dinin ká ma kũ doɛ̃, ka Lawa a lon a dia dí-a wole goon ne ma nɛ, hinlaa ka Yezu Krita din ni ma nɛ. 15Nyɛnyaa mɛn goã ka-n lɛlɛ, bɛ á maa kəni? Ma á boe la ma siére kɛ sɛ pɛ kaa lɛa. Bɛ̀ ka ǹ ká boo la, bɛ̀ ka n yii nànan waa ka ǹ kɔ ma la. 16Sɛnɛ kanna, ma taãn mɛn lɛ pɛ ka nɛ, bɛ n ma biɛ kaa zɔ́ɔ lɛa?
17Minin tá n là kakaɛ̃ ka li, sɛnɛ, kaa bǐɛ̃ kɔ a lɛa bie wa. Maǹ giɛ li mà ǹ ka na kɔn ka masɛ nɛ, ń giɛ ka á n là kakaɛ̃ ǹsɛn dinin li. 18Sonbore, bɛ̀ min tá n là kakaɛ̃ ka li, bǐɛ̃ a lɛa, bɛ á siĩni biikoo tumaa li. Sɛnɛ, a bie pàã lɛa, masɛ din goã ka li ma bɛ zɛnaa wa. 19Maa giaáran lɛn, ma bɛ́ fuu mɛn yii kaa lɛa kanna, a n goon ka lɔ nɛ-yɛle a fuu ni, yǎa Krita yii ka nɛ. 20Bɛ̀ man ka li biikoo kɛ gɔ́ɔ̃ nɛ, ma boo la ma boo da ka-n ka yɔrɔ kɔsɔ nɛ, a n kɔɔ̃n ma ganaa. A giala, kaa sii á gɔ́ɔ̃-bii diɛ ma ganaa.
Agaara laanka Saaraa a sii a kɔnboebaa
21Man nɔ̀n diɛ ka la, kasɛn mɛnɛn bɛ́ zoɛ̃ mà ka goã Muizu a dí-pɛn giulun. Bɛa dí-pɛn kɛn lɛn bɛ́ boo mɛn diɛ, ka ǹ ka a miɛ wa? 22#SGK 16.15; 21.2 Sonbore, a n kiɛ̃ nɛ Lawa a sɛ́wɔ nɛ, mà Abrahamu a nɛ n paa. Ǹ goon na á yɛ a bɛ̀rɛlɔ Agaara la, ǹ goon dɔ́ yɛ a lɔ wɔsiɛ Saaraa la. 23A bɛ̀rɛlɔ a nɛ lɛ na á yɛ minbuiin nɛ foo sii gɔ́ɔ̃ nɛ. Sɛnɛ, a lɔ wɔsiɛ a nɛ kɛ na á yɛ Lawa a lɛ-kɔ kɛ wɔ gɔn la. 24Boon kɛn man sii a kɔnboen giala pii wɔ nɛ. A giala, lɔ màn paa kɛ n lɛ kɔ kɔn la màn paa giala pii wɔ nɛ. Lɛ-kɔ mɛn nə n wɔ Sinayii kele la, Agaara a sii n bɛa kɔnboe lɛa. A nɛnyaanan mɛnɛn yɛ, bɛn nə́ bɛ̀rɛn baa. 25Bɛ̀ wɔ á pii mà Agaara, Sinayii kele mɛn bɛ́ Larabu gána nɛ, wɔ n bɛ boo diɛ. Sɛnɛ, wɔ á boe la wɔ zɔɔ̃ kɔn ka pelo a Zeruzalɛmu kɛ dɔ nɛ. Zeruzalɛmu n bɛ̀rɛ lɛa, kun ka a nɛnyaanan tumaa nɛ. 26Sɛnɛ, lɔ wɔsiɛ kɛ n goon ka lon a Zeruzalɛmu kɛ nɛ, a din nə wɔa náa lɛa. 27#Iza 54.1 Taãn nɛ, Lawa a sɛ́wɔ pɛ:
«Nsɛ lɔ mɛn bɛ́
n tɔn nɛ yɛ duduu wa,
yoo n nə n nyɛnyaa!
N lɛ dɛ ka foo kɔɔ̃n nɛ,
nsɛ mɛn bɛ́
n tɔn nɛ-yɛ a fuubaa dɔ̃ wa!
A giala, ǹ lɔ mɛn toa walan,
bɛ á re nɛ yii
a la lɔ mɛn bɛ́ kun ka ǹ zuũ-n ni.»
28Ma dɔɔ̃nɔn lɛn, kasɛn tumaa n ká yɛ nɛnyaanan lɛa, á kɔnpɛ ka Lawa a lɛ-kɔ kɛ nɛ, ka Izaaki wɔ bɛ́ lɔn. 29#SGK 21.9-10 Lɛlɛ, nɛ mɛn bɛ́ á yɛ minbuiinin nɛ yɛ ǹ gɔn la, bɛ na á goã boe goon kɛ yii ni. Yiri Fu nə ǹ goon mɛn a yɛ boo da ke lɛn. A din goon nə ke n zɛnɛɛ kanna dɔ nɛ. 30Sɛnɛ, sɛ́wɔ lɛ n wàa boo diɛ? A n kɛ pii: «Bɛ̀rɛlɔ lɛ laanka a nɛgiĩ lɛ loo, a giala, bɛ̀rɛlɔ kɛ a nɛgiĩ doamaa bie, a kíɛ̃ gii kɔn ka lɔ wɔsiɛ kɛ a nɛ n wa.» 31Bɛ lɛ nɛ, ma dɔɔ̃nɔn lɛn, wɔ bie bɛ̀rɛ a nɛnyaanan lɛa wa, wɔ n lɔ wɔsiɛ a nɛnyaanan lɛa.
Currently Selected:
Gal 4: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.