Gal 5
5
Goã ma din gɔn wìi a lɛa boo
1 *Krita na á wɔ si bɛ̀rɛbaa la, mà wɔ goã wɔ gɔn wìi a lɛa taãn-taãnɛ. Ka toa ka goã doa-n sɔnbɔraanɛ bɛa tá ma din gɔn wìi a lɛa kɛ lɛ gɔ́ɔ̃ nɛ. Ka nyan toa, ka wusoo ka ka dinin kɔ bɛ̀rɛbaa la doo wa.
2Masɛ Pooli n pii ka nɛ, máa bɛ̀ ka toa ǹ nə́ ka kuru, Krita là kɔ́n ba yii ka ganaa doo wa. 3Man wusii ma á pii ka-n doo, máa bɛ̀ min woo min toa ǹ nə́ kuru, ǹ dɛnaa doamaa nɛ a dí-pɛn sii din tumaa dɔ zɛnaa. 4Táa ka n giɛ li, mà Lawa lɛ kɔ ka ganaa min peperen lɛa dí-pɛn taman yii! Haya, ka n ká n dinin na ka n bɔ Krita ganaa. Kaa wɔ gii ba Lawa a bǐɛ̃ kɛ-n doo wa.
5Wɔsɛn foo n doa nɛ wáa Lawa á re wɔ biɛ min peperen lɛa. Wɔ nə n yii diɛ bɛ lɛ la Yiri Fu barka nɛ, asɛ mɛn bɛ́ dí nyɛɛ wɔa goleemali gɔ́ɔ nɛ. 6A giala, min mɛn bɛ́ Krita wɔ gɔ́ɔ̃ nɛ, kurii laanka kuriibaã a màn kɔ́n lɛa bɛa dɛnaa wɔ paǹ li wa. Màn mɛn bɛ́ màn lɛa, golee Yezu li ni, bɛ nə n nyaa ka miãn narɛɛ nɛ.
7Ka a giala kɔ doɛ̃ sɔnbɔraanɛ! Sɛnɛ, die na á ka kurəə mà ka nyan sonbore boo lɛ si doo wa? 8Lawa bie á ka kurəə wa, a giala a din na á ka bíi. 9#Kor1 5.6 Ka ǹ bɛ́ pii lɔn sii baraa wɔ paǹ li: «Yɔ bù boɛɛn nə toɛ buuru yia tumaa yoo.» 10A laanka bɛ tumaa nɛ, ma foo á doa-n Dɛnaa ganaa kaa wɔ paǹ li. Ma á doɛ̃, máa ka a re zii kɔsɔ siɛ wa. Sɛnɛ, min mɛn bɛ́ ka yiri lɔlɛkɔn, ta ǹ dɛnaa n màn mɛn lɛa, Lawa á re dɔlɔ boe a ganaa.
11Ma din wɔ paǹ li, dɔɔ̃nɔn lɛn, bɛ̀ ma din lɛ n má pɛ doo, máa kurii á siĩni, wàa na á baa, ǹ tá tɔn boe ma din yii-n dɔn? Bɛ̀ bɛ n taãn lɛa, bɛ̀ ma bɛ́ Krita a dere gɔn ganaa boo mɛn diɛ, bɛ̀ bɛa wusii a min kɔ́n yiri lɔlɔkɔn doo wa. 12Bɛ̀ masɛ wɔ a lɛa nɛ, min mɛnɛn bɛ́ ka yiri lɔlɛkɔn, bɛn nə ǹ dí-pɛ siin lɛn zɛnaa ǹ wo nyɛɛnɛ, ǹ nə ǹ giĩbaa dɔ din bɔ duduu.
13Kasɛn wɔ paǹ li, ma dɔɔ̃nɔn lɛn, Lawa na á kasɛn bíi mà ka goã ka gɔn wìi a lɛa. Sɛnɛ, ka bɛ́ ka dinin gɔn wìi a lɛa ke, ka nyan taasɛ, mà ka á boe la ka sii tumaa zɛnaa kanna, a kɔnpɛ ka ka gɔ̀nɔn foo siin kɛn nɛ wa. Sɛnɛ, ka n dɔ kɔn lɛ ka kɔn-narɛɛ nɛ. 14#LWS 19.18 A giala, dí-pɛ tumumaa lɛ n piɛ̃ ka boo goon toto kɛ nɛ: «Ǹ miã kɔsɔ narɛ ka n bɛ́ n din narɛ lɔn.» 15Sɛnɛ, bɛ̀ ka á sɔndoe kɔn ganaa ka n kɔn soɛ̃, ka yiri bɔ. Bɛ bie wa, ka n die kɔn ziziɛ̃.
Yiri Fu bɛ́ min diɛ zii la lɔn
16Ka n too kɔ ma lon: Ka tɔ wɔ Yiri Fu gòã wuu li, ka a re gɔ̀nɔn foo siin zɛnɛɛ doo wa. 17#Rɔm 7.15-23 A giala, gɔ̀nɔn foo siin man yɔ boe kɔn ka Yiri Fu wɔn nɛ. Yiri Fu dɔ wɔn man yɔ boe kɔn ka gɔ̀nɔn wɔn nɛ. Zɔ́ɔbaa nə ǹ bii ni. Bɛ lɛ na a toa ka á ka dinin foo sii zɛnɛɛ wa. 18Sɛnɛ, ka toa Yiri Fu ka nyɛɛnaan bɔ, ka a re goɛ̃ dí-pɛn giulun doo wa.
19Gɔ̀nɔn foo siin bɛ́ n zɛnɛɛ lɔn ǹ tá n doɛ̃: kɔrɔbaa nɛ, *gɔ̀ sii zɛnaa nɛ, din kũ doɛ̃baã nɛ, 20dì wúlu bɔ nɛ, ka dagòã si ni. Minbuiinin man zɔ́ɔbaa we kɔn ganaa, ǹ nə́ zian diɛ kɔn ganaa, ǹ foo n wuu pii, foo-yoo la ǹ yii ni, ka miã lɔ zuũbaa nɛ. Maǹ nə n niniɛ kɔn tanlɛ tanlɛ, ǹ nə́ kurun lɛa yɔ boe kɔn ganaa. 21Maǹ yii bɔ miãn gɔn màn li wolen lɛa, ǹ nə́ n dinin koe yɔ mi á la yii-n la, ǹ nə́ basaã-kɔlen lɛa, ka bɛ miã sii kɔsɔn dɔn nɛ. Man wusii ka yiri diɛ a-n kanna doo, ka ma bɛ́ má pɛ ka-n lɔn lɛlɛ, máa bɛ miã min kɛ kɔ́n ba *Lawa a kiibaa ǹ bǎã yii kíɛ̃ lɛa wa.
22Sɛnɛ, Yiri Fu bɛ́ sii mɛn zɛnɛɛ wɔ nɛ, bɛ dɔ á ke: kɔn-narɛɛ nɛ ka nyɛnyaa nɛ, là nyantoro ne ka foo-kũ ni, min bǐɛ̃baa nɛ ka yiri kɔ sii li ni, ka bɔlɔgoondɛnaabaa nɛ, 23foo-basiɛ̃ nɛ ka boomadinla nɛ. Dí-pɛn ba yɔ boe bɛa sii kɛ miã kɔ́n ganaa wa. 24Min mɛnɛn bɛ́ Yezu Krita wɔn lɛa, bɛn man nə́ ǹ gɔ̀nɔn foo sii kɛn dere gɔn ganaa, kun ka ǹ lɛ mui ǹ sii baraan nɛ.
25Yiri Fu bɛ́ á nyin dii kɔ wɔ la, yǎa wɔ toɛ a wɔa giã ǹ gɔn dɔ tele. 26Wɔ nyan din-koalin baa wa. Ga kɔn lɛ li nyan goã wɔ bii wa, yii bɔ kɔn gɔn màn li dɔ nyan goã wa.
Currently Selected:
Gal 5: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.