SGK 41

Eziptin kii narɛɛn mɛnɛn wɔ

1Lɛ̀ paa bɛ kio, *Faarahɔn dɔ nə́ n narɛ, ka asɛ n golee-n Niili tà lɛ-a. 2Á dii dan sonbore sɔbaa yɛ soe tà mu lɛ li, kasiɛ̃-n sɔnbɔraanɛ, ǹ nə́ tà lɛ-a ǹ buu gialaa soɛ̃. 3Bɛ kio, á dii dan sɔbaa kɔsɔ dɔ yɛ soe Niili tà mu lɛ li, pɛrɛɛ-n babaraanɛ, ǹ nə́ daa golee bibinaan lɛn li tà lɛ lɛ-a. 4Dii dan pɛrɛɛ wolen lɛn nə́ dii dan kasiɛ̃ wolen lɛn kũ, ǹ nə́ ǹ mui. Bɛ kio, Faarahɔn yii kaa.

5Nyuù wusoo á saa, á narɛɛ paabaa ǹ wɔ wɔ. A yii n *belee san sɔbaa ganaa belee giala goon toto mìi ni, ǹ tumaa n siĩni, ǹ mìi n dadara. 6Bɛ kio, á belee san sɔbaa kɔsɔ dɔ yɛ boe bɛn lɛn kio, piɛ̃ nə́ ǹ mìi tutusi, á ǹ bɛbɛnɛ. 7Belee san tutusiin lɛn nə́ belee san dadara sonboren lɛn mui. Bɛ kio, Faarahɔn yii kaa, á n bɔ nyuù ni, á yɛ narɛɛ lɛa.

8 # Dan 2.2 A lɛawaa baayɛlɛ, a yiri bɛ́ lɔloɛkɔn, á minin dia, mà ǹ wo Eziptin kɔ́lɔnbaalin tumaa bíi, ka ǹ sii-dɔ̃lin tumaa nɛ, mà ǹ daa. Ǹ bɛ́ ǹ nə́ daa, a ná a narɛɛn lɛn pɛ ǹ nɛ, sɛnɛ, min kɔ́n boo la, á ǹ giala pɛ-n wa. 9Bɛa biikoo li, Faarahɔn a yɔ kɔmala wolen goledɛnaa tɔ́n pɛ nɛ: «Ma doamaa nɛ ma ma din zɛ̀rɛ baa pelo. 10Ǹ kɔ́n pinaa, kii foo yoo ma laanka buuru-dalin goledɛnaa li, á wɔ kaa kòso-n kun, a sɔmɔ-lɛduə̃li a kion. 11Wɔ́ n narɛ kun tèlò goon ne, narɛɛ lɛ gogoonmaa laanka a giala nɛ. 12Nɛginin goon goã kòso lɛ-n kun ka wɔ nɛ, *Ebrəə min ni, kii a sɔmɔ-lɛduə̃li lɛ a bɛ̀rɛ lɛa. Wɔ́ wɔa narɛɛn lɛn pɛ nɛ. Á ǹ giala pɛ, á didie wɔ a binyəə pɛ nɛ. 13Siin lɛn dɔn nə́ n zɛnaa, ǹ nə́ kɔnpɛ a da ǹ boo lɛ-n ka te. Ǹ nə́ wusoo ǹ nə ma saa maa dí ni, ǹ nə́ buuru-dalin goledɛnaa lɔɔ da ganaa lon.»

Zozɛfu n Eziptin kii a narɛɛn giala pii

14Faarahɔn minin dia, mà ǹ wo lɛ dia Zozɛfu la. Ǹ nə́ woo Zozɛfu bɔ kòso-n ka baa nɛ, ǹ ná a mìi kɔɔ̃. Bɛ kio, á n sɔlɔ á mɔnaa kɔsɔn wɔ, á tɔ́n woo kii li. 15Faarahɔn tɔ́n pɛ Zozɛfu ni: «Má narɛɛ kɔ́n wɔ, min kɔ́n boo la, a ná a binyəə pɛ ma-n wa. Sɛnɛ, má ma, mà bɛ̀ ń min a narɛɛ boon ma, mà ń tá boe la, n ná a binyəə pɛ.»

16Zozɛfu Faarahɔn lɛ si kɛnɛn: «Masɛ din bie wa, Lawa n die a binyəə taãn koe n la.»

17Bɛ kio Faarahɔn tɔ́n pɛ nɛ: «Man má n narɛ, ka man golee-n Niili tà lɛkoro-a. 18Ma bɛ́ giɛ, bɛ̀ dii dan sonbore sɔbaa bɛ́ soe tà mu lɛ li, kasiɛ̃-n sɔnbɔraanɛ. Ǹ nə́ tà lɛ-a ǹ buu gialaa soɛ̃. 19Bɛ kio, ma dii dan sɔbaa kɔsɔ dɔ yɛ, ǹ nə́ soo ǹ kio, pɛrɛɛ nɛ, babaraa yɔrɔ-a, pàã wɛɛ̃ kɔ ǹ ganaa. Ezipti gána din tumaa nɛ, ma bin tɔɔ yɛ naarɛ lɛa kɛnɛn wa. 20Bɛn nə́ bibinaadɛnaa sɔbaa kasiɛ̃ wolen lɛn kũ, ǹ nə́ ǹ mui. 21Ǹ bɛ́ ǹ nə́ dɔ ǹ bùndara nɛ, min din ba foɛ̃ a ganaa wa, a giala, ǹ nə́ wusoo ǹ nə́ babaraa kɔ yɔrɔ-a doo, ǹ nə́ la ǹ lɛlɛmaa nɛ. Bɛ kio, ma yii kaa. 22Sɛnɛ, má wusoo má narɛɛ kɔsɔ wɔ bɛ kio. Bɛ gɔ́ɔ̃ nɛ, má belee san sɔbaa yɛ, dadara siĩn sɔnbɔraanɛ, ǹ nə́ bɔ belee giala goon toto mìi ni. 23Bɛ kio, má belee san sɔbaa kɔsɔ yɛ, ǹ nə́ bɔ bɛn kio, ǹ nə́ laa ǹ nə́ bɛbɛnɛ piɛ̃ lɛ gɔn. 24Belee san bɛbɛnɛɛn lɛn ná a sonbore dadaran lɛn mui. Má pɛ kɔlɔn-baalin ni, sɛnɛ, min kɔ́n boo la, a ná a binyəə pɛ ma-n wa.»

25Zozɛfu tɔ́n pɛ Faarahɔn nɛ: «N narɛɛ màn paa lɛ tumaa a binyəə n goon. Lawa bɛ́ re sii mɛn zɛnɛɛ, a na á saa lɛlɛ, á bɛ lɛ da n yiri-a. 26Dii dan sonbore sɔbaa kɛ n lɛ̀ sɔbaa lɛa, belee san sonbore sɔbaa kɛ n lɛ̀ sɔbaa lɛa; bɛa narɛɛ kɛ n boo goon giala pii. 27Dii dan sɔbaa kɔsɔn mɛnɛn bɛ́ ǹ nə́ pɛrɛ ǹ nə́ ziziɛ̃, bɛ n lɛ̀ sɔbaa giala pii. A din goon nə ka belee san sɔbaa lɛ nɛ, ǹ mɛnɛn bɛ́ ǹ nə́ laa, ǹ nə́ bɛbɛnɛ piɛ̃ gɔn. Bɛ n nyɛɛ mà bòo gole n die we lɛ̀ sɔbaa gɔ́ɔ̃ nɛ. 28Faarahɔn, boo mɛn bɛ́ masɛ lɛ-n ma pɛ n nɛ, a din nə ka kɛ nɛ. Lawa bɛ́ re sii mɛn zɛnɛɛ, a na á bɛ lɛ nyaa n nɛ. 29Lɛ̀ sɔbaa ke die kɔn kio, màn tá re yii Ezipti gána din tumaa-n parsiini. 30Bɛ kio, bòo gole á die we lɛ̀ sɔbaa gɔ́ɔ̃ nɛ. Màn gigiã mɛn tumaa yɛ lɛlɛ, minin yiri á re boe, ka bɛ din tumaa-n Ezipti gána nɛ. Bòo lɛ á re gána lɛ nɔmiɛ̃. 31Bòo mɛn bɛ́ re die bɛ kio ke lɛn, á re baraa koe parsiini, minin dinin ba re màn-bii a tan giala doɛ̃ wa. 32Bɛ̀ ń yǎa ń narɛɛ lɛ wɔ gunyin paa, bɛ n nyɛɛ mà Lawa din a sii yɔrɔ boe ne, a n die n nanaɛ a zɛnaa dɔ li. 33Faarahɔn, sisia, ga min yiridɛnaa li, n koa gána lɛ mìi la, min mɛn bɛ́ sii doɛ̃. 34N sii yɔrɔ bɔ wolen dɔn koa, buu-kɔsɔlin bɛ́ re màn gigiã yii lɛ̀ sɔbaa mɛn gɔ́ɔ̃ nɛ, bɛn nə gána lɛ a màn a sosoorobaa ǹ wɔ sisi. 35Lɛ̀ sɔbaa mɛn bɛ́ re bǐɛ̃ koe, ǹ die ǹ màn-bii lɛ sisi bɛn gɔ́ɔ̃ nɛ, ǹ kaa kun, ǹ belee kaa dɔǹɔn nɛ kiwi dadaran nɛ, ǹ koa, Faarahɔn din goã ǹ mìi la. 36Lɛ̀ sɔbaa bòo mɛn bɛ́ re we Ezipti gána lɛ nɛ, ǹ bɛa màn-bii lɛ koa, bɛ lɛ á die n minin màn-bii biɛ lɛ̀ sɔbaa lɛ gɔ́ɔ̃ nɛ. Bɛ̀ á n zɛnaa miɛ̃, bòo lɛ a boe la a basaã kɔ wa.»

Zozɛfu a koa goledɛnaa lɛa

37Zozɛfu a boo lɛ kɔɔ̃n kɔ Faarahɔn laanka a pàãdɛnan tumaa ganaa. 38Faarahɔn tɔ́n pɛ ǹ nɛ: «Wɔ á re min kɔsɔ yii ka giĩ kɛ bɛ́ lɔn Lawa Yiri ná a lon?»

39Mà Zozɛfu ganaa: «Lawa bɛ́ á siin kɛn lɛn tumaa nyaa n nɛ, min kɔ́n banban yiri ná a lon, á n boe la, a sii dɔ̃ ka n bɛ́ lɔn wa. 40#NDS 7.10 N din nə die giɛ̃ maa kion mìi la. Maa minin tumaa á re n bɔlɔ sii, maa kiibaa kɛ dinsɔɔ̃ n die masɛ diɛ n nyɛɛnɛ.»

41Á tɔ́n pɛ Zozɛfu ni: «Má n koa Ezipti gána tumaa mìi la.»

42Bɛ kio, a ná a gòon ganaa ǹ kaaran bɔ, á wɔ Zozɛfu goon ganaa, á mɔnaa guguru sonboren wɔ a ganaa, á sana gii da a bɔlɔ-a. 43Bɛ kio, á da a wotoro paabaa ǹ wɔ gɔ́ɔ̃ nɛ, minin nə́ goã n lɛ dii a nyɛɛnɛ ǹ nə́ pii: «Ka zii da!» Faarahɔn Zozɛfu koa a gána tumaa mìi la ka bɛa yɔrɔ lɛ nɛ.

44Á pɛ Zozɛfu ni: «Masɛ din nə Eziptin kii lɛa. Sɛnɛ, Ezipti gána din tumaa nɛ, min kɔ́n ba re n gòon nyɔɔn siɛ lon a sii kɔ́n zɛnaa, bɛ̀ n din nə́ n lɛ kɔ wa.»

45Bɛ kio, Faarahɔn Eziptin minin tɔ kɔ Zozɛfu ganaa, á bíi mà: Safnati-Paneya. Bɛ kio, á Potifeeraa a nɛlɔ Azenati wɔ lɔ lɛa, á kɔ la. Potifeeraa na á goã Onə kiwi a wúlu-bɔle lɛa. Bɛ kio, Zozɛfu yoo, á n bibiə̃ á ga Ezipti gána din tumaa ganaa. 46Zozɛfu bɛ́ dí nyɛɛ Faarahɔn nɛ, bɛ̀ a lɛ̀ pɔsɔɔ nɛ.

Bɛ lɛ kio ne, á zii nyankɔ Faarahɔn la, á woo n bibiə̃ Ezipti gána tumaa nɛ. 47Màn bǐɛ̃ kɔ lɛ̀ sɔbaa mɛn gɔ́ɔ̃ nɛ, gána minin lɛn nə́ màn yɛ parsiini. 48Bɛa lɛ̀ sɔbaa kɛ lɛ, á koa kɔn la Ezipti gána nɛ, Zozɛfu màn-bii lɛ tumaa a kɔn sisi, á kaa kun. Don kiondɛnan nə màn mɛn a dí nya, á bɛ lɛ kɔ́n sisi, á kaa kun á koa kiwi dadaran nɛ, 49á belee gigiã gigiã lɛ sɔkɔn. Bɛa belee lɛ mɔnaa ka kɔ̀ mu li ǹ nyɔɔsɔ̃ bɛ́ lɔn, yǎa a ná a boroo nimii lɛ da, a giala, min ba boe la, á nimi doo wa.

50Zozɛfu nɛgiĩ min paa yɛ a lɔ Azenati lɛ la, bòo lɛ̀ lɛ tɔ́n dɔ. 51A ná a goledɛnaa bíi Manaasee (bɛ giala mà "Yiri a bɔ ka sii ni"). A giala, mà Lawa toa asɛ yiri bɔ ka a lɛlɛ a nɔmaan kɛn tumaa nɛ, ka ǹ dikion tumaa nɛ. 52Á kiɛɛrɛdɛnaa lɛ bíi Efrayimu (bɛ giala mà "Nɛnyaanan Yɛ"). A giala, mà Lawa nə́ n dɔ asɛ lɛ, á nɛnyaanan yɛ, bɛ̀ asɛ bɛ́ a nɔmaa ǹ gána nɛ.

53Lɛ̀ sɔbaa mɛn bǐɛ̃ kɔ Ezipti gána nɛ, bɛn nə́ daa ǹ nə́ nya. 54#NDS 7.11 Bòo bɛ́ re we lɛ̀ sɔbaa mɛn gɔ́ɔ̃ nɛ, bɛn nə́ n giala kɔ, ka Zozɛfu bɛ́ á pɛ lɔn. Bòo lɛ baraa kɔ gána kɔsɔn dinin tumaa nɛ, sɛnɛ, màn-bii goã Ezipti gána nɛ. 55#Zaã 2.5 Ezipti gána a minin lɛn bɛ́ nɔmaa-n bòo lɛ gɔn ǹ mɛn waáraa, ǹ nə́ woo n lɛ dɛdɛ Faarahɔn ganaa, mà a màn-bii kɔ ǹsɛn la. Faarahɔn tɔ́n pɛ Ezipti gána min tumaa nɛ mà ǹ wo dɔ Zozɛfu li. A bɛ́ re màn mɛn pii ǹ ni, mà ǹ bɛ zɛnaa. 56Bòo lɛ na á goã wɛ̃-n gána lɛ paǹ tumaa ganaa. Zozɛfu màn-bii tamaa kiwi mɛnɛn nɛ, á bɛa bǎãn lɛ tumaa lɛ bũ, á màn-bii lɛ sã Ezipti minin la. Bòo lɛ baraa kɔ Ezipti gána nɛ. 57Gána tumaa na á goã die belee pii Zozɛfu li Ezipti, a giala, bòo lɛ baraa kɔ bǎã tumaa nɛ.

Currently Selected:

SGK 41: SBPE2011

Highlight

Copy