SGK 42

Zakɔba na a nɛnyaanan diɛ Ezipti gána nɛ

1Zakɔba bɛ́ á ma, mà *belee tá Ezipti gána nɛ, á pɛ a nɛgiĩn manɛ: «Ka ǹ tán giɛ kɔn ganaa? 2#NDS 7.12 Haya! Má ma mà belee tá Ezipti gána nɛ. Ka yoo ka wo walan, ka belee pii ka da kɔ wɔ la, wɔ bii, màn mɛn bɛ́ toɛ, wɔ la.» 3Zozɛfu ǹ golon lɛn min fù yoo, ǹ nə́ woo Ezipti gána nɛ, mà maǹ woe belee pii. 4Sɛnɛ, Zakɔba Bɛnzamɛn dia kun ka ǹ golon lɛn nɛ wa, a giala, a na á goã pii, mà sii tɔ́n bɛ dɔ yɛ walan. 5Zakɔba a nɛnyaanan lɛn nə́ dɔ Ezipti gána nɛ, kun ka belee-piili kɔsɔn dɔn nɛ, a giala bòo lɛ goã wɛ̃-n Kanaan gána nɛ.

Zozɛfu nə n golon lɛn kũ lɔn

6Zozɛfu giã gána lɛ mìi la, a din na á goã belee siɛ̃ a minin tumaa la. Ǹ golon lɛn nə́ dɔ, ǹ nə́ kaa tán a giulun, ǹ nə́ n mìi kuməə tán. 7Zozɛfu nə́ ǹ golon lɛn yɛ, á ǹ dɔ̃. Sɛnɛ, á n din duru ǹ ganaa, á kakaarɛ kɔ ǹ ganaa. Á pɛ ǹ nɛ: «Ka ǹ boe maa?»

Ǹ ná a lɛ si: «Wɔ ǹ boe Kanaan gána nɛ. Wɔ n wɔ́ daa belee pii.»

8Zozɛfu nə́ ǹ golon lɛn dɔ̃, sɛnɛ, ǹsɛn na asɛ dɔ̃ wa. 9#SGK 37.5-10 Zozɛfu bɛ́ á goã á narɛɛn mɛnɛn wɔ ǹ wɔ paǹ li, a yiri gisĩ ka bɛn nɛ. Á tɔ́n pɛ ǹ nɛ: «Táa ka n ka n duru, ka daa ga gána lɛ a pàã wɛɛnaabaa ǹ bǎãn ganaa.»

10Ǹ nə́ Zozɛfu lɛ si kɛnɛn: «Haayii dɛ! Wɔa dɛnaagiĩ, wɔ ǹ wɔ́ daa belee pii. 11Wɔsɛn man giĩ goon a nɛnyaanan lɛa, min taãnan man ka wɔ nɛ, wɔ bie duru a da ga gána ganaa wolen lɛa wa.»

12Zozɛfu wusoo á pɛ ǹ nɛ: «Haayii dɛ! Ka ǹ ka daa ga gána lɛ a pàã wɛɛnaabaa ǹ bǎãn ganaa.»

13Ǹ nə́ tɔ́n pɛ: «Wɔ n wɔ́ goã min fulupaa wɔ di la. Wɔ ǹ Kanaan minin lɛa. Min mɛn bɛ́ wɔ diɛ̃ boɛɛn lɛa, bɛ tá wɔ di li piɛ pelo pelo. Goon ke, bɛ banban.»

14Zozɛfu nə́ n lɛn saa lon á pɛ: «Ma màn mɛn lɛ pɛ, a din ni. Ka ka n duru, ka daa ga gána lɛ ganaa. 15Ma bɛ́ re sii mɛn diɛ ka mìi ni, bɛ ǹ ka kɛ nɛ: A kii kɛ yii toa koo, ka a re soe ka n bɔ kànaa, bɛ̀ ka diɛ̃ boɛɛn kɛ ná a daa wa. 16Ka kaa min goon dia, bɛ wo ka diɛ̃ lɛ kũ, a da nɛ. Gialakunun kɛn nə giã kòso-n kànaa. Bɛ̀ kaa boo lɛ n taãn lɛa, ma á re giɛ a ganaa. Bɛ̀ taãn dɔ bie wa, a kii yii toa koo, ka n ka n duru, ka daa ga gána lɛ ganaa sonbore!»

17Zozɛfu nə́ ǹ tumaa kaa kòso-n yǎa lɛawaa sɔɔ. 18A lɛawaa sɔɔbaa ǹ wɔ pinaa, Zozɛfu tɔ́n pɛ ǹ nɛ: «Ka bɛ́ re sii mɛn zɛnɛɛ ka tɔn la, bɛ ǹ ka kɛ nɛ. Ma á nyɛ́ɛ biɛ Lawa nɛ. 19Bɛ̀ ka tá li, min waa kaa min taãnbaa la, ka bɛ́ kòso kion mɛn nɛ, ka goon giã walan. Ka gialakunun kɛn nə wo belee lɛ kɔ bòonaan lɛn la piɛ. 20Bɛ̀ ka á die, ka ka diɛ̃ boɛɛn lɛ kũ ka da nɛ. Ma á die kaa boo lɛ a taãnbaa doɛ̃ ka bɛ nɛ, ka a re gɛ̀ we wa.»

Ǹ nə́ lɛ kɔ, ǹ nə́ zɛnaa miɛ̃. 21Sɛnɛ, maǹ nə́ goã pii kɔn nɛ: «Ebe! Wɔ́ sii la wɔ diɛ̃ kɛ la lɛlɛ dɛ. A bɛ́ a foo-ziziɛ̃ lɛ gɔ́ɔ̃ nɛ ǹ mɛn waáraa, wɔ́ yɛ. Sɛnɛ, á wɔ nyankɔ á fɔ̃ li, wɔ n too kɔ a lon wa. Bɛ lɛ na á toa, bɛ miã foo-ziziɛ̃ kɛ tá wɔ dɔn yii pelo.»

22 # SGK 37.21-22 Urubɛn tɔ́n pɛ ǹ nɛ: «Táa má pɛ ka-n lɛlɛ lɛn máa ka baran sii la nɛ lɛ la wa! Ka bɛ́ ka n too kɔ ma lon wa, Lawa n bɛ lɛ a gɛ̀ dòo boe wɔ ganaa pelo.»

23Ǹ goã doɛ̃ mà Zozɛfu tá ǹsɛn boo lɛ miɛ wa, a giala, min kɔsɔ na á goã Zozɛfu a boo lɛ bɔyɛɛ, á pii ǹ ni. 24Zozɛfu nə́ n zɔ̃ á n bɔ ǹ ganaa, á wuu pɛ. Bɛ kio, á n bɔyaa á daa ǹ li, á boo da ǹ nɛ. Á Simiɔn kũ ǹ bii, á yii ǹ dinin yii ni. 25Bɛ kio, á tɔ́n pɛ, mà ǹ belee kaa ǹ mànan nɛ ǹ pã, ǹ wusoo ǹ didie a wɔrɔ da a boroo gɔ́ɔ̃ nɛ, ǹ màn-bii kɔ ǹ la, ǹ die ǹ bii zii gialaa. A na á zɛnaa ǹ nɛ miɛ̃. 26Ǹ dɔɔ̃nɔn lɛn nə́ ǹ belee boroon lɛn kaa ǹ dundunun la, ǹ nə́ woo.

27Wɔlɔ bɛ́ á tii ǹ ganaa bǎã mɛn nɛ, ǹ nə́ golee. Ǹ min goon ná a boroo lɛ bũ, mà a n die màn-bii koe a dundun la, a ná a wɔrɔ yɛ a nɛ. A ná a lɛ bũ kɛnɛn, bɛ̀ wɔrɔ lɛ bɛ́ tán a nɛ! 28Á tɔ́n pɛ ǹ dɔɔ̃nɔn nɛ: «Ǹ nə́ wusoo ǹ nə́ maa wɔrɔ we kɔ ma la le! Á ke maa belee boroo ne!»

Ǹ foo biɛ na, nyɛ́ɛ nə́ ǹ kũ parsiini, ǹ nə́ tɔ́n pɛ kɔn nɛ: «Kɛ n wàa sii lɛa Lawa zɛnaa wɔ nɛ!»

29Ǹ bɛ́ ǹ nə́ dɔ ǹ di Zakɔba li Kanaan gána nɛ, sii mɛn tumaa nə n zɛnaa ǹ nɛ, ǹ ná a tumaa pɛ nɛ. 30Ǹ nə́ pɛ nɛ:

– Giĩ mɛn bɛ́ gána lɛ mìi la, á kakaarɛ kɔ wɔsɛn ganaa. A na a yiri ni, ka wɔsɛn man wɔ daa ga gána lɛ ganaa ka gɔ́ɔ̃ nɛ. 31Wɔ́ á lɛ si kɛnɛn: «Min taãnan man ka wɔsɛn nɛ, wɔ bie wɔ daa ga gána ganaa ka gɔ́ɔ̃-n wa.» 32Wɔ́ pɛ nɛ: «Giĩ goon a nɛnyaanan man ka wɔsɛn nɛ, wɔ n wɔ́ goã nɛgiĩ fulupaa. Wɔa min goon na a banban, wɔ diɛ̃ boɛɛn kɛ tá wɔa díi li Kanaan gána-n pelo pelo.» 33Giĩ lɛ pɛ wɔ nɛ: «Bɛ̀ ka tá li ma waa kaa min taãnbaa la, ka ka dɔɔ̃n lɛ goon toa ma li. Màn mɛn bɛ́ re kaa kion minin boe, ka gialakunun lɛn nə bɛ goa, ka wo kɔ bòonaan lɛn la piɛ. 34Ka da ka ka diɛ̃ boɛɛn lɛ dɔ nɛ. Ma á re doɛ̃ ka bɛ nɛ, máa ka bie ka daa ga gána lɛ ganaa ka gɔ́ɔ̃-n wa, máa min taãnan man ka nɛ. Ma á re wusii, ma ka dɔɔ̃n kɛ lɛ kɔ ka la, ka á re boe la, ka n foo sii zɛnaa gána lɛ nɛ.»

35Bɛ kio, ǹ nə́ ǹ boroon binyəə. Ǹ nə́ wɔrɔ boroonən yɛ boroo lɛ tumaa gɔ́ɔ̃ nɛ, didie a wɔrɔ ná a wɔ nɛ. Ǹ bɛ́ ǹ nə́ wɔrɔ boroonən lɛn yɛ ǹ mɛn waáraa, ka ǹ wɔrɔ ná a nɛ, nyɛ́ɛ nə́ ǹ laanka ǹ díi lɛ kũ. 36Zakɔba tɔ́n pɛ ǹ nɛ: «Táa ka n giɛ li, ka masɛ gɔn kooro toa! Zozɛfu bie a tan doo wa, Simiɔn banban, ka ǹ giɛ li, ka Bɛnzamɛn dɔ si ma la! Sii tumaa n masɛ mìi-n dɛ!»

37Urubɛn tɔ́n pɛ ǹ díi lɛ nɛ: «Bɛ̀ man bɔyaa ka Bɛnzamɛn nɛ, má daa kɔ n la wa, n maa nɛgiĩ min paa kɛ dɛ a dòo. N sii bɔ a nɛ, ma á die n bɔyɛɛ nɛ, ma da kɔ n la.»

38Zakɔba nə́ ǹ lɛ si: «Maa nɛ a woe kun ka n walan wa. Ǹ dannɛ gã, a dinsɔɔ̃ na a tan. Bɛ̀ sii mɛn wɔ lɛ zii la, maa zizimaa n die giɛ̃ ka foo-busii ni, ka dinin zɛnaa ǹ sii taman yii.»

Currently Selected:

SGK 42: SBPE2011

Highlight

Copy