Ebr 1
1
Lawa boo da ka a Nɛ barka-n lɔn
1Lɛlɛ, Lawa na á boo da wɔ digolon ne, gunyin damata ka yɔrɔ gigiã nɛ, ka a din a boo gii-dalin barka nɛ. 2Sɛnɛ sisia, giala-nyɔmiɛ biikoo kɛ li, Lawa na á boo da wɔ nɛ, ka a din a Nɛgiĩ kɛ barka nɛ. Lawa na á kanaa da ka bɛa Nɛgiĩ kɛ lɛ pàã nɛ, a na á ná a din dɔ bɔ á koa, mà a màn din tumaa a dɛnaa baa. 3Bɛa Nɛgiĩ kɛ lɛ n Lawa a gugurubaa tɛ-pɛle kɛ nyɛɛ, a din nə Lawa a Lawabaa nyɛɛ taãn-taãnɛ. A din nə kanaa kɛ kuĩ á golee ne, ka a boo pàãdɛnaa kɛ barka nɛ. A bɛ́ á kanaa minin sii baraa pii á nya ǹ mɛn waáraa, á woo giã Lawa pàãdɛnaa gusin lon.
Nɛgiĩ lɛ bɛ́ gole á la lon a dia dí-a wolen man lɔn
4Lawa tɔ mɛn kɔ a ganaa, bɛ bɛ́ gole lɔn á la lon a dia dí-a wolen wɔ nɛ, Nɛgiĩ lɛ dinmaa dɔ n gole miɛ̃ á la lon a dia dí-a wolen manɛ. 5#Sam2 7.14; KZS1 17.13; Loe 2.7Sonbore, Lawa bini boo kɛ miã pɛ lon a dia dí-a wole kɛ kɔ́n nɛ wa:
«Ma n masɛ a Nɛgiĩ lɛa,
a kũ pelo ganaa, masɛ nə n Díi lɛa.»
Lawa bini kɛ miã pɛ ǹ kɔ́n dɔ-n wa:
«Masɛ n die n biɛ a Díi lɛa,
a dɔ n die n biɛ masɛ a Nɛgiĩ lɛa.»
6 #
TDP 32.43
Sɛnɛ, Lawa a Nɛgiĩ bibinaa dia kanaa biikoo li, Lawa pɛ: «Lon a dia dí-a wolen tumaa die ǹ na a guguru kɔ.»
7 #
Loe 104.4
Màn mɛn nə n pɛ lon a dia dí-a wolen wɔ gɔn la, bɛ n ka kɛ nɛ:
«Lawa na a lon a dia dí-a wolen biɛ
ka piɛ̃ bɛ́ lɔn,
a na a dí-nyalin biɛ
ka tɛ lɛwɔn bɛ́ lɔn.»
8 #
Loe 45.7-8
Sɛnɛ, Lawa màn mɛn pɛ a Nɛgiĩ ni, bɛ á ke:
«N kiibaa lɛ n Lawa wɔ kɛ miã lɛa
yǎa duduu.
N din nə n minin lɛn nyɛɛnaan boe
ka peperebaa nɛ.
9 Peperebaa n kɔɔ̃nɛ n ganaa,
n ba sii baraa li wa.
Bɛ lɛ na á toa,
Lawa lɛ, n Lawa lɛa,
bɛ nə́ n soɛ kɔ n miãn tumaa nɛ.
Á zɔ́n nyɔɔ kaa n mìi ni,
á n bɔ á n koa kii lɛa.»
Bǎã kɔsɔ dɔ n pii:
10 #
Loe 102.26-28
«Dɛnaa,
n din lɛ nə́ n kanaa da lɛlɛ-lɛlɛ.
Lon dɔ nə́ n din gɔn a màn zɛnaa lɛa.
11 Bɛn lɛn yii á re nyɛɛ,
sɛnɛ, nsɛ n goɛ̃ yǎa duduu.
Ǹ tumaa á re zizi koe ka mɔnaa bɛ́ lɔn.
12 N tá re ǹ muni ka dɔnkɛ bɛ́ lɔn,
n tá re ǹ lonkoe ka mɔnaa bɛ́ lɔn.
Sɛnɛ, nsɛ n die goɛ̃ miɛ̃ n din lɛa,
n nyin ba re nyɛɛ wa.»
13 #
Loe 110.1
Lawa bini boo kɛ miã pɛ lon a dia dí-a wole kɔ́n nɛ wa:
«Giã ma gusin,
yǎa ma gɔ̀lɔ̀baa lɛ piɛ̃ koe n la,
n zɔ́ɔn nə die kiɛ tán n
gòãn giulun.»
14Lon a dia dí-a wolen kɛn tumaa n yirin dininsɔɔ̃nɔn lɛa, dí nyɛɛ Lawa nɛ, ǹ nə́ n doe kirisibaa-yɛlen kɛn lɛ.
Currently Selected:
Ebr 1: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
