Ebr 2
2
Kirisibaa gole kɛ a kũ ka parsii-n boo
1Bɛ lɛ na á toa, wɔ sonboren mɛnɛn ma, ka daa wɔ n gɔn paraa bɛn ganaa ka kaka, màn mɛn bɛ́ toɛ, wɔ baran wusoo wɔ papaã wa. 2Lawa a lon a dia dí-a wolen nə dí-pɛ mɛn kɔ wɔ digolon la, bɛ ná a dí nya. Sii baraa doamaa bɛ́-n ka dɔlɔ mɛn nɛ, bɛ̀ á daa yaa bɛ nə́ n bɔ bɔlɔ-tii tɔrɔ tumaa a lɛa, 3wɔsɛn dɔn kəni, wɔ ǹ die liɛ lɔn, bɛ̀ wɔ́ sàn kɔ ka kirisibaa gole kɛ nɛ? Kirisibaa mɛn bɛ́ Dɛnaa din ná a boo da bɔrɔ, bɛ kio, min mɛnɛn na a boo ma ka ǹ too ne, bɛn dɔn nə́ wusoo ǹ ná a sonborebaa pɛ. 4Lawa din na á goã dí nyɛɛ, á n pàã we ǹ siére lɛ nɛ, ka sii-nyaa ǹ siin dadaran laanka kaãbaa ǹ sii tɔrɔ tumaa nɛ. A na á goã Yiri Fu a bǐɛ̃ mànan dɔn koe minin la, á n kɔnpii a din dùũ ni.
Yezu a gisiĩ laanka a guguru-kɔ boo
5Sonbore, kanaa mɛn bɛ́ die wɔ ná a boo diɛ, Lawa bie re bɛ diɛ lon a dia dí-a wolen pàã giulun wa. 6#Loe 8.5-7 Sɛnɛ, min pɛ Lawa a boo sɛ́wɔ paǹ kɔ́n nɛ kɛnɛn:
«Minbuiin nɛ kɛ n wàa lɛa kəni,
n tá n yiri koɛ nɛ?
A n wàa lɛa, n tá giɛ a walan?
7 Ń ná a kiɛɛrɛ kɔ á la
lon a dia dí-a wolen manɛ,
ń gugurubaa laanka siĩnbaa kɔ la,
8 n màn din tumaa da a pàã giulun.»
Sonbore, Lawa bɛ́ á «màn din tumaa da a pàã giulun» ke, a màn kɔ́n lɛ bɔ á da wa. Haalɛ ka bɛ yii ni, wɔ a doɛ̃ bɔrɔ wáa màn din tumaa tá a pàã giulun wa. 9Sɛnɛ, wɔ yii n kɛ ganaa Yezu lɛ wɔ paǹ li: «Biikoo boɛɛn gɔ́ɔ̃ nɛ, Lawa ná a kiɛɛrɛ kɔ, á la lon a dia dí-a wolen manɛ,» màn mɛn bɛ́ toɛ, Lawa a bǐɛ̃baa barka nɛ, a gã minbuiin nɛ tumaa a lɛa. Sɛnɛ kanna, wɔ yii na a ganaa doo, wáa Lawa «gugurubaa laanka zín kɔ la» a gɛ̀-wɔ lɛ a lɛa.
Minbuiin nɛn dɔɔ̃n boo
10Sonbore, Lawa din na á màn tumaa zɛnaa, a din dɔ n màn tumaa tamaɛ. A na á goã giɛ li, mà a nɛnyaan gigiã dɔ a din a kiibaa guguru bǎã kɛ nɛ. Bɛ lɛ nɛ á zɛnaa, Yezu mɛn nə ǹ nyɛɛnaan bɔ kirisibaa ǹ zii lɛ la, bɛa sii tumaa lɛ pã fuu gɔ́ɔ̃ nɛ. Bɛ na á kɔnpɛ ka Lawa din sɔ̀n nɛ. 11A giala, Yezu mɛn bɛ́ *gɔ̀ boe minin-a, ka minin mɛnɛn bɛ́ gɔ̀ nə́ n bɔ ǹ ganaa, bɛn tumaa n boe Díi goon ne. Bɛ lɛ na á toa, a ba sìi lɛa Yezu lɛ ganaa, a kɛn lɛn bíi mà asɛ dɔɔ̃nɔn wa. 12#Loe 22.23 A din na á pɛ Lawa nɛ:
«Man die n boo diɛ ma dɔɔ̃nɔn manɛ,
man die n tɔ boe zaman bii.»
13 #
Iza 8.17-18
Á pɛ doo:
«Man die n foo doɛ Lawa din ganaa.»
Ka bɛ dɔ-n doo:
«Ma á ke,
n din Lawa minin mɛnɛn kɔ ma la,
ma laanka bɛn manɛ.»
14Bɛa yɔrɔ kɛ la, mà laanka gɔ̀nɔn siĩ bɛ́ minin kɛn lɛn lon lɔn, a na á n zɛnaa Yezu dɔ-n miɛ̃, á daa yɛ a din minbuiin nɛbaa kɛ lɛ nɛ. Yezu na á bɛ lɛ zɛnaa, màn mɛn bɛ́ toɛ, a gɛ̀ barka nɛ, *Sɛtaan mɛn bɛ́ gɛ̀ a pàã ná a gɔn, a bɛ pàã ziziɛ̃, 15min mɛnɛn bɛ́ ǹ tá kanaa din tumaa zɛnɛɛ, nyɛ́ɛ baa gɛ̀ nɛ a bɛ̀rɛbaa nɛ, a bɛn si a ǹ kaa. 16Sonbore, Yezu lɛ bie á daa lon a di-a wolen lɛa wa, a na á daa n dɔ "Abrahamu a nɛnyaanan" kɛn lɛ, ka Lawa a boo bɛ́ á pɛ lɔn. 17Bɛ lɛ na á toa, á n din baa ka n dɔɔ̃n minbuiin nɛn bɛ́ lɔn yɔrɔ tumaa la, màn mɛn bɛ́ toɛ, a n baa wúlu-bɔlen kiã lɛa, á n makara doɛ̃ a dí kɛ nɛ Lawa yɔrɔ-a, a minin sii baraa tuturu. 18Bɛ lɛ tɔ ganaa, a din bɛ́ á fuu yɛ lɔn damagɔ́ɔ̃li siin gɔn, min mɛnɛn dɔn bɛ́ damagɔ́ɔ̃li siin gɔn, á boe la a n dɔ bɛn lɛ.
Currently Selected:
Ebr 2: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.