Ebr 13
13
Lawa dùũ siin zɛnaa ǹ gɔn
1Ka toa dɔɔ̃nbaa ǹ kɔn-narɛɛ goã ka bii. 2#SGK 18.1-8; 19.1-3 Ka yiri baran bɔ tiin kũ doɛ̃-n wa. Bɛ a zɛnaa barka nɛ, min tɛnɛn nə́ lon a dia dí-a wolen tiibaa kũ, ǹ nə́ ǹ dɔ̃ wa. 3Ka n yiri kɔ ka kòso nɛn nɛ, ka n pɛ mà ka dɔn man kòso-n kunun ǹ ni. Ka n yiri kɔ nɔmaa-wɔlen kɛn dɔn nɛ, a giala, ka tá ǹ sii giala miɛ.
4Min tumaa zín wɔ kɔn-wɔ nɛ. Giĩ laanka lɔ goã bɔlɔgoondɛnan lɛa. A giala, mà Lawa á re kiri kuri naarɛbaalin laanka min kɔrɔn la.
5 #
TDP 31.6,8; Zoz 1.5 Wɔrɔ-narɛɛ baran goã kaa sii tumaa zɛnaa mìi lɛa wa. Màn mɛn bɛ́ ka lon, ka toa bɛ ka yii kã. A giala, Dɛnaa din na á pɛ: «Haayii! Ma a re n gɔn boe n ganaa duduu wa, ma a re n toɛ walan wa.» 6#Loe 118.6 Bɛ lɛ taman yii, wɔ á boe la wɔ pɛ ka foo tãbaa nɛ:
«Dɛnaa n maa dɔmalɛ wole lɛa,
ma a re nyɛ́ɛ biɛ màn kɔ́n nɛ wa.
Minbuiin nɛ n boe la
a wàa zɛnaa ma nɛ?»
7Ka n yiri kɔ kaa lɛlɛ a nyɛɛnaandɛnan kɛn nɛ, ǹ mɛnɛn nə Lawa a boo lɛ pɛ ka nɛ. Ka ga ǹ tá kanaa a tɔ-wɔ ǹ gɔn kɛ laanka ǹ gɛ̀-wɔ ǹ gɔn kɛ ganaa, ka toa ka ǹ golee Lawa li lɛn zɔɔ̃. 8Yezu *Krita bɛ́ lɔn gunun, a n miɛ̃ pelo, a n die goɛ̃ miɛ̃ yǎa duduu. 9Ka baran toa ǹ ka yiri sã ka daraa tɔrɔ diin ni wa. A giala, a n siĩni min foo tã kɔ Lawa a bǐɛ̃baa barka nɛ. A baran tã kɔ màn-biin bɔkɔnlɛ gɔn wa. A giala, min mɛnɛn nə n saa bɛn li, ǹ là kɔ́n yɛ a-n wa.
10Wɔsɛn *wúlu màn tan, Lawa guguru kɔ ǹ wɔ nɛ. Min mɛnɛn bɛ́ tɔn dí nyɛɛ Lawa a kion zizi kɛ nɛ, bɛn ba boe la ǹ saa ǹ sɔ̃ wa. 11#LWS 16.27 Wúlu-bɔlen kiã n we nyɛɛnaan bǎã sonbore kɛ nɛ ka tɔɔn mà nɛ, sii baraan nya a lɛa, sɛnɛ, ǹ siĩn manə n tiɛ̃ kiwi lɛ kio. 12Bɛ lɛ a lɛa nɛ, Yezu dɔ́ gɛ̀ wɔ kiwi lɛ kio, á zaman lɛ *yoreen kɔ ka a din mà nɛ. 13Ka daa wɔ dɔn nə soo, wɔ wo a li kiwi lɛ kio, wɔ dɔn na a din sìi kɛ lɛ si wɔ ganaa. 14A giala, kiwi ba wɔ lon kanaa kɛ nɛ, wɔ n die giɛ̃ a nɛ duduu wa, wɔ n giɛ biɛ̃ ǹ wɔ kɛ li. 15Ka daa, Yezu din barka nɛ, wɔ Lawa guguru kɔ, bɛ goã wɔa wúlu mànan lɛa, bɛ giala, mà wɔ a tɔ bɔ ka wɔ lɛ nɛ. 16Ka yiri baran bɔ bǐɛ̃ zɛnaa kɔn nɛ laanka dɔkɔnlɛ-n wa. A giala, bɛ miã siin lɛn zɛnaa á kɔɔ̃n Lawa ganaa, maǹ ka wúlu mànan bɛ́ lɔn.
17Ka kaa nyɛɛnaandɛnan bɔlɔ si, ka goã doroo ne ǹ ne. Sonbore, maǹ giɛ ka telenboenən walan, a giala, ǹ tá re n bɔlɔ pii Lawa yɔrɔ-a bɛa lɛa. Bɛ̀ ka á ǹ bɔlɔ sii, ǹ tá re dí nyɛɛ ka nyɛnyɛɛ nɛ. Bɛ̀ ka a ǹ bɔlɔ sii wa, ǹ tá re nyɛɛ ka yɔrɔ-kɔsiɛ nɛ. Bɛ̀ á yɔrɔ-kɔsiɛ baa, ka dɔn dinin là ba a-n wa.
18Ka Lawa nyankɔ wɔ a lɛa, a giala, wɔ á waa-n la, wáa wɔ foo ba wɔ zɛ̀rɛ biɛ wa, wɔ ǹ giɛ li, wɔ tɔ sonbore wɔ biikoo tumaa li. 19Man ka nyankoe ka ma foo din tumaa nɛ, máa ka bɛ zɛnaa, màn mɛn bɛ́ toɛ, Lawa ma dia ka li fufuu.
Lawa bǐɛ̃ bíi laanka fòo-diɛ boon
20Lawa din na á wɔa Dɛnaa Yezu, Sèren-Lɛduə̃li gole kɛ yii kaa, á bɔ geren bii. A din na á lɛ-kɔ duduu wɔ ka minbuiin nɛ nɛ, á bɛ́ á sonborebaa nyaa ka Yezu a gɛ̀ barka nɛ. Man bɛa Là Nyantoro Kɔle Lawa kɛ lɛ nyankoe, 21máa a die a pàã kɔ ka la, ka boo la ka a din dùũ sii sonbore kɛ yii zɛnaa. A din die a na a din dùũ siin zɛnaa wɔsɛn ganaa, ka Yezu Krita barka nɛ. Gugurubaa goã a din wɔ lɛa yǎa duduu! A n miɛ̃.
22Dɔɔ̃nɔn lɛn, man ka nyankoe, ka doroo ǹ boon kɛn si ka ganaa. Kɛ din nə boo nɛ paa kooro lɛa ma á diɛ ka la.
23Ka dɔ̃ mà ǹ nə́ wɔ dɔɔ̃n Timote da. Bɛ̀ á daa fufuu, ma á re die n yii koe ka li kun ni.
24Ma á fòo diɛ kaa nyɛɛnaandɛnan tumaa nɛ, ka Lawa-nyankɔlen tumaa nɛ. Italii minin tá fòo diɛ ka nɛ.
25Lawa a bǐɛ̃ die a goã kun ka tumaa nɛ!
Currently Selected:
Ebr 13: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.