Ebr 12
12
Wɔ bɛ́ sii sii wɔ ganaa fuu gɔ́ɔ̃-n lɔn
1Bɛa siére zaman gole kɛ lɛ tá wɔ lɛnpɛnɛ, ǹ nə́ ǹ golee Lawa li sii nyɛɛ wɔ nɛ. Bɛ lɛ-n kəni, màn mɛn tumaa bɛ́ wɔa tɔ-wɔ sàabiɛ, ka daa wɔ n piã bɛ nɛ, ka sii baraa kɛ dɔ nɛ n pɛnɛ wɔ ganaa fufuu. Ka daa, baa si a kɔn daa mɛn nə n nyaa wɔ nɛ, wɔ bɛ si ka sii simaa nɛ. 2Ka daa wɔ ga Yezu ganaa, a din nə golee Lawa li lɛ a giala-kɔle laanka a lɛ pã wole lɛa wɔ foo ne. Nyɛnyɛɛ mɛn bɛ́ koa-n nɛ, á n yii doa bɛ la, á gɛ̀ wɔ gɔn ganaa kɛ si a ganaa, a ga-a sìi lɛa wa. Bɛ kio, á giã gugurubaa ǹ bǎã nɛ Lawa a kii dankan gusin. 3Sonbore, ka n taasɛ a din lɛ nɛ, màn mɛn bɛ́ toɛ, ka foo baran ziziɛ̃ ka gù gã wa. Á min baraan piãman si a ganaa. 4Ka dɔn ziabaa lɛ gɔ́ɔ̃ nɛ, sii baraa-zɛnaalin ganaa, ka tɔn yɔ bɔ á woo dɔ gɛ̀ ganaa wa. 5#SYB 5.17; Suu 3.11-12 Táa ka á n yiri koɛ ka doroo kɛ nɛ, Lawa n koe ka la ka a nɛnyaanan bɛ́ lɔn:
«Maa nɛ,
Dɛnaa bɛ́ n dii a nə́ n doree ke,
n baran ga bɛ ganaa
sii kiɛɛrɛ lɛa wa.
Bɛ̀ a tá n zɛ̀rɛ biɛ,
n foo baran ziziɛ̃ wa.
6 A giala,
Dɛnaa bɛ́ min mɛn narɛ,
a n bɛ lɛ dii a doroo,
a bɛ́ lɛ koe nɛ mɛn ganaa,
a n dɔlɔ boe bɛ lɛ ganaa.»
7Ka ka doroo ǹ dɛ kɛ lɛ si ka ganaa, a giala, Lawa n ka kuĩ ka a nɛnyaanan bɛ́ lɔn. Sonbore, nɛ mɛn nɛ mà ǹ di na a ba dii a doroo wa? 8Min tumaa wɔ gii bɛ́ dɛ a doroo mɛn nɛ, bɛ̀ kasɛn ba bɛ yii wa, haya, ka n min kɔsɔ a nɛnyaanan lɛa le, ka a Lawa wɔn lɛa wa. 9Gɔ̀nɔn siĩ a díin nə́ yɛ wɔ lon, ǹ nə́ wɔ dɛ ǹ nə́ wɔ doroo, wɔ ǹ lɛ dɔ si. Sanparɛ ka Lawa mɛn bɛ́ lon a Díi lɛa, wɔ a re n doree bɛ nɛ, wɔ yiikoonaabaa taãn-taãn yɛ wa? 10Sonbore, wɔa gɔ̀nɔn siĩ a díin lɛn man nə́ wɔ dɛ, ǹ nə́ wɔ doroo, á kɔnpɛ ǹ dinin dùũ ni biikoo boɛɛn gɔ́ɔ̃ nɛ. Lawa lɛ sɛ n zɛnɛɛ wɔ dinin là a lɛa, á n die wɔ biɛ siĩni ka a din bɛ́ lɔn. 11Dɛ a doroo din tumaa, a bǎã nɛ, a nyɛnyɛɛ diɛ wa, a n yɔrɔ-kɔsiɛ diɛ. Sɛnɛ bɛ kio, min mɛnɛn nə doroo lɛ yɛ, a là n goɛ̃ ka là nyantoro laanka peperebaa nɛ bɛn ganaa.
Doroo laanka gɔn waaman boo kɔsɔn
12 #
Iza 35.3
Ka wusoo ka n gù wen yii, ka ǹ yii taãn-taãnɛ. 13#Suu 4.26 Ka ga zii sonboren li ka kɔ ǹ lɛ, màn mɛn bɛ́ toɛ, kaa talaa wolen baran mɛnaa wa, sɛnɛ, ǹ wusoo ǹ zii saa.
14Ka n doa ka ga là nyantoro li ka bii ni, ka min din tumaa nɛ, ka *yoreenbaa nɛ. Bɛ̀ bɛ gòɛ̃ ba a-n wa, min kɔ́n ba Dɛnaa yii wa. 15#TDP 29.18 Ka n yiri kɔ ka dinin li, min kɔ́n baran da ka bɔ Lawa a bǐɛ̃baa kɛ li wa, min kɔ́n baran n baa da kɔɔsɛ lɛa, a bɔ tán a yoo, a minin tumaa lɔlɔkɔn, a ǹ ziziɛ̃ wa. 16#SGK 25.29-34 Ka n yiri kɔ, min kɔ́n baran naarɛbaali baa wa, hinlaa sàn kɔ Lawa-n wole, ka Ezawu bɛ́ lɔn wa. Asɛ mɛn bɛ́ a ná a kiãbaa sã bǎã goon màn-bii ganaa. 17#SGK 27.30-40 Ka á doɛ̃, bɛ kio, a bɛ́ mà a n giɛ li ǹ mɛn waáraa, mà ǹ di Izaaki Lawa bǐɛ̃ bíi asɛ li, ǹ di nə́ n piã nɛ. A boo la doo duduu, á bɛa sii kɛ lɛ bɔyaa wa, a laanɛ a ná a nyankɔ ka yii mu ni.
18 #
BBN 19.16-22; 20.18-21; TDP 4.11-12; 5.22-27 Min bɛ́ boe la, a n gɔn da Sinayii kele mɛn ganaa, kasɛn bie ka n mɔrɔ bɛ ganaa, ka Izirayeli minin wɔ bɛ́ lɔn wa. Ǹsɛn man nə́ n mɔrɔ bɛa kele lɛ ganaa, bɛ̀ tɛ gole n la, ka wɔlɔ tì gole ne, ka piɛ̃ gole ne, 19ka lɛn gole dɔ nɛ, kaka ka bɛn wuu bɛ́ lɔn. Min mɛnɛn nə bɛ ma, bɛn ná a nyankɔ, mà ǹ ba n too koe boo lɛ ganaa, ǹ wo-n nyɛɛn wa. 20#BBN 19.12-13 A giala, dí mɛn nə n pɛ ǹ nɛ, ǹ boo bɛa pàã la wa: «Min woo min, haalɛ ta tɔɔ dɔ din ni, a n die n gɔn diɛ kele kɛ lɛ ganaa, ǹ kɔlɔ kaã bɔ a ganaa.» 21#TDP 9.19 Ǹ màn mɛn yɛ, bɛ na á goã nyɛ́ɛ da ǹ màn gole lɛa taãn-taãnɛ, yǎa Muizu din pɛ kɛnɛn: «Nyɛ́ɛ n ma ganaa, man bìn diɛ.»
22Sɛnɛ, kasɛn man ká n mɔrɔ *Siɔn kele kɛ ganaa, ka Lawa yiikoonaa a kiwi kɛ nɛ, Lon a Zeruzalɛmu ke, ka a lon a dia dí-a wole duu damata kɛ nɛ. 23Ka n ká n mɔrɔ zaman kɛ ganaa zɔ́n zɛnɛɛ, bɛn man ka Lawa a nɛgiĩ bibinaan bɛ́ lɔn, ǹ tɔn nə́ kiɛ̃ nɛ lon gɔ́ɔ̃ nɛ. Ká n mɔrɔ Lawa ganaa, a din mɛn bɛ́ min tumaa a kiri-kuruli lɛa. Ká n mɔrɔ min sonboren telenboenən ganaa, min mɛnɛn lɛn lɛ bɛ́ piɛ̃ nɛ. 24#SGK 4.10 Ká n mɔrɔ Yezu ganaa, asɛ mɛn bɛ́ á lɛ kɔ kɔn la dii lɛ a zɛlɛ baa. Ka ǹ ká n mɔrɔ a mà kɛ ganaa min pii, mà mɛn bɛ́ dí gole nyɛɛ á la Abeli wɔ nɛ.
25 #
BBN 20.22
Ka n yiri kɔ ka dinin li, ka baran n piã mà ka a n too koe Lawa kɛ lon, boo diɛ ka-n wa. A giala, Izirayeli minin lɛn bɛ́ Sinayii kele li, ǹ nə n too kɔ ǹ gɔn waaman wole lɛ lon wa. Ǹ kirisibaa dɔlɔ lɛ ganaa wa. Sanparɛ ka wɔsɛn nɛ, bɛ̀ wɔ́ n piã wɔ n too kɔ lon a Lawa kɛ lon boo diɛ wɔ-n wa, wɔ dɔn ba kirisibiɛ dɔlɔ lɛ ganaa wa, 26#Aze 2.6 Asɛ mɛn bɛ́ a lɛn bìn da tán ganaa, a din lɛ n boo kɛ pii wɔ-n kanna: «Masɛ n die wusii ma bìn da tán lɛ ganaa gunyin goon doo. Bɛ dinsɔɔ̃ bie wa, ma á re bìn diɛ lon dɔ ganaa.» 27Bɛa «gunyin goon doo» kɛ lɛ n nyɛɛ, mà kanaa diɛ kɛ lɛ a màn bìn-dali tumaa á re papaɛ̃, mà a bìn-dali baãnaa n die goɛ̃. 28Wɔ dinin man wɔ gána yɛ, a kiɛ̃ duduu wa. Ka daa wɔ barka da Lawa nɛ. Ka daa wɔ dí nya nɛ ka yɔrɔ kɛ nɛ, kɔɔ̃n a ganaa, bɛ n ka a guguru kɔ nɛ, ka a nyɛ́ɛ baaman nɛ. 29#TDP 4.24 Sonbore, wɔa Lawa lɛ n ka tɛ bɛ́ lɔn, á n màn kuĩ lenlen.
Currently Selected:
Ebr 12: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.