Ebr 4
4
1Lawa a lɛ-kɔ lɛ n wɔ dɔn wɔ lɛa, wɔ á re boe la, wɔ wɔ bɛa bǎã lɛ nɛ wɔ n susu. Ka daa wɔ n dinin kũ, màn mɛn bɛ́ toɛ, kaa min kɔ́n baran fɔ̃ bɛa susui kɛ lɛ li wa. 2A giala, wɔ dɔn man wɔ́ Boo Tii Kɔɔ̃n lɛ ma, ka bɛa minin kɛn lɛn wɔ bɛ́ lɔn. Sɛnɛ, bɛa boo kɛ lɛ ǹ nə́ ma, a là goon yɛ ǹ ganaa wa, a giala, ǹ bɛ́ ǹ nə́ ma, ǹ lɛ kɔ a ganaa ka goleemali-n wa. 3#Loe 95.11 Wɔsɛn mɛnɛn bɛ́ wɔ́ golee Lawa li, wɔsɛn man we susui lɛ nɛ. Lawa din na á boo kɛ pɛ taãn-taãnɛ susui lɛ wɔ gɔn la:
«Bɛ lɛ na á toa,
maa foo-yoo gɔ́ɔ̃ nɛ,
má n liɛ
máa ǹ ba re we maa susu ǹ gána kɛ-n wa.»
Lawa a dí na a nya kanaa diɛ waáraa wa? Á nya. 4#SGK 2.2 A tá kiɛ̃ nɛ taãn-taãnɛ, kanaa a diɛ lɛawaa sɔbaabaa ǹ wɔ lɛ a paǹ li: «Lɛawaa sɔbaabaa ǹ wɔ pinaa, Lawa nə́ n susu a dí lɛ tumaa a nya kio.» 5#Loe 95.11 Sɛnɛ, Lawa pɛ a boo-n gɔrɔ: «Ǹ ba re we maa susu ǹ gána kɛ-n wa.» 6Bɛ n nyɛɛ mà ǹ tɛnɛn gii ba bɛa susui kɛ lɛ-n wa, ǹ dinin Lawa bɔlɔ tii a lɛa, haalɛ ta ǹ nə́ Lawa a lɛ-kɔ ǹ boo lɛ ma dinin. Sɛnɛ, a n nyɛɛ dɔn mà gialakunun tá re we a nɛ. 7#Loe 95.7-8 Bɛ lɛ taman yii ni, Lawa lɛawaa goon bɔ á koa, á n bíi «pelo», sɛ́wɔ paǹ kɛ lɛ nɛ wɔ́ yɛ gɔrɔ, Davida nə ǹ mɛn kiɛ̃ nyɔɔbaa ke lɛn.
«Pelo, bɛ̀ ka Lawa a lɛ-dia ma,
ka baran n foo laa wa.»
8 #
TDP 31.7; Zoz 22.4 Sonbore, bɛ̀ Zozoe na á zaman lɛ kaa susui li, bɛ̀ Lawa a re lɛawaa kɔsɔ boo diɛ doo wɔ susui ni ǹ lɛawaa lɛa wa. 9Bɛ̀ á miɛ̃, Lawa a minin lɛn susui biikoo n tɔn nyɛɛn die. 10#SGK 2.2 Min mɛn wɔ a susui lɛ nɛ, bɛ dɔ a dɛnaa nə n susui a dí a nya kio, ka Lawa din bɛ́ á n susu lɔn lɛawaa sɔbaabaa ǹ wɔ pinaa kɛ nɛ, a dí a nya kio. 11Ka daa wɔ n doa wɔ wɔ bɛa susui kɛ nɛ, màn mɛn bɛ́ toɛ, lɛlɛdɛnan Lawa bɔlɔ tii kɛ miã baran wɔa min kɔ́n daa, a na a bɔ̀n baa wa.
12Sonbore, Lawa a boo lɛ n boo yiikoonaa lɛa, pàã dɔ tá a nɛ, á lɛ boe á la gɔya paǹan paanan lɛbɔle tumaa nɛ. A n we min ni taãn-taãnɛ, yǎa a telenboen laanka yiri toɛ̃ kɔn, yǎa a gù kòròn laanka sɛwɔ toɛ̃ kɔn. A n min dùũ laanka a taasiɛ bǐɛ̃ boe kɔn lɛ ka a baraa nɛ. 13Màn kɔ́n din ba durii-n Lawa la wa. Màn din tumaa na a yɔrɔ-a panparaanɛ, a yii nə́ ǹ ganaa. Wɔ tumaa n die n bɔlɔ pii a din yɔrɔ-a.
Wɔa wúlu-bɔlen kiã Yezu boo
14Wúlu-bɔlen kiã gole gole tá wɔ lon, á lon bii kuru á kiɛ̃ yǎa Lawa yɔrɔ-a: Lawa a Nɛgiĩ Yezu lɛ nɛ. Bɛ lɛ nɛ, wɔ bɛ́ pii wáa wɔ lɛ kɔ goleemali mɛn ganaa, ka daa wɔ n gɔn paraa bɛ ganaa parsiini. 15Wúlu-bɔlen kiã mɛn bɛ́ a ba wɔa pàã wɛɛnaabaa doɛ̃ wa, bɛ bie wɔ lon wa. Wɔa wúlu-bɔlen kiã lɛ damagɔ́ɔ̃li ǹ siin fuu yɛ, yɔrɔ din tumaa la ka wɔ dɔn bɛ́ lɔn, sɛnɛ, asɛ sii baraa zɛnaa wa. 16Bɛ lɛ taman yii, ka daa wɔ n tá nyɛɛnɛ ka foo-doa nɛ, wɔ n mɔrɔ Lawa a kii dankan lɛ ganaa, màn mɛn bɛ́ toɛ, Bǐɛ̃dɛnaa lɛ makara bɔ wɔ ganaa, a bǐɛ̃ zɛnaa wɔ nɛ, bǐɛ̃ mɛn bɛ́ re n doe wɔ lɛ wɔ laadoo biikoo li.
Currently Selected:
Ebr 4: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.