MNS 23
23
1Balaamu pɛ Balaaki ni: «*Wúlu bɔ ǹ bǎã sɔbaa dɔ kànaa n nə ǹ kɔ masɛ la, n dii gɔ̀lɔ̀ sɔbaa laanka sère gɔ̀lɔ̀ sɔbaa dɔ yɔrɔ bɔ a din bǎã kɛ lɛ nɛ, n nə ǹ kɔ ma la.»
2Balaaki dɔ́ zɛnaa, ka Balaamu pɛ-n lɔn. Ǹ dinin min paa tɔ́n wúlu bɔ ka dii gɔ̀lɔ̀ goon laanka sère gɔ̀lɔ̀ goon ne, wúlu bɔ ǹ bǎã lɛ a gogoonmaa la. 3Balaamu pɛ Balaaki ni: «Giã n *wúlu màn tiɛ̃ genli, masɛ nə n wɔlɔ lui. Kɔntan, Dɛnaa Lawa á re die masɛ li. Bɛ̀ á boo mɛn da ma nɛ, ta bɛa boo kɛ lɛ n lɔn, ma á re pii n ni.»
Bɛ kio, Balaamu kiɛ̃ á woo tenten kɔn la. 4Lawa daa Balaamu yɔrɔ-a, Balaamu tɔ́n pɛ nɛ: «Má wúlu bɔ ǹ bǎã sɔbaa dɔ, má wúlu bɔ ka dii gɔ̀lɔ̀ goon laanka sère gɔ̀lɔ̀ goon ne, ǹ gogoonmaa la.» 5Dɛnaa Lawa tɔ́n boo da, á wɔ Balaamu lɛ-n. Bɛ kio, á pɛ Balaamu ni: «Wusoo n wo Balaaki li, n bɛa boo lɛ pɛ nɛ.»
6Balaamu nə́ n bɔyaa á woo Balaaki li, á woo yaa golee ne a wúlu màn tiɛ̃ lɛ genli, kun ka Moabu gána a min dadaran nɛ. 7Balaamu tɔ́n bɔ boon kɛn nɛ kɛnɛn á ǹ pɛ:
Balaaki na á minin dia die ma kuĩ Siirii gána nɛ,
Moabun kii na á min dia die lɛ diɛ ma la,
lɛ̀giala a kelen kɛn bǎã nɛ,
á pɛ ma nɛ:
Da lɛn baraa bii Zakɔba tɔrɔn kɛn li,
maa lɛa.
Da dɔlɔ da Izirayeli minin kɛn mìi ni.
8Lawa bɛ́ a n lɛn baraa da min mɛn kio wa,
masɛ n siɛ lɔn ma tɔn nə n lɛn baraa da bɛ kio?
Dɛnaa Lawa bɛ́ a dɔlɔ da min mɛn mìi-n wa,
masɛ n siɛ lɔn ma tɔn dɔlɔ da bɛ mìi ni?
9Bɛ̀ má n toa gɛ̀fun mìi ni,
má ga zaman kɛ ganaa,
bɛ̀ má n toa kelen mìi ni,
má n yii doa la,
a n zaman lɛa,
zaman mɛn nə́ ke giã nɛ a mìi ni,
á n doɛ̃ mà asɛ a goon ka tɔrɔ kɔsɔn kɛn nɛ wa.
10Die n boe la,
a Izirayeli min damata kɛ nimi,
a Zakɔba tɔrɔ gigiã kɛ lɛ yɛ?
Masɛ n zoɛ̃ li,
máa ma dinmaa min peperen gɛ̀ tɔrɔ wɔ,
maa lɛ-nyɔmiɛ̃ goã goon ka ǹ wɔ nɛ.
11Balaaki pɛ Balaamu ni: «Wàa sii n ke ń zɛnaa ma nɛ? Masɛ n má daa n nɛ máa n lɛn baraa bíi maa zɔ́ɔn li, á ke ń yoo ń barka da ǹ ganaa taãn-taãnɛ.»
12Balaamu tɔ́n na a lɛ si: «Dɛnaa Lawa bɛ́ boo mɛn we ma lɛ-n, maa wɔ bie ka bɛ dinsɔɔ̃ a pɛ-n wa?»
Balaamu a boo paabaa ǹ wɔ
13Balaaki wusoo á pɛ Balaamu ni: «Bǐɛ̃ kɔ n kiɛ̃ n nə n ta kun ka masɛ-n bǎã kɔsɔ nɛ, n bɛ́ re boe la n nə n toa bǎã mɛn nɛ, n zaman lɛ gialakun yɛ, n nə́ n ba ǹ tumaa yii wa. N die n nə n toa walan kəni, n lɛn baraa bii ǹ li maa lɛa.»
14Bɛ kio, Balaaki Balaamu kũ á woo ne bǎã-lɛduə̃lin doa ǹ bǎã kɛ nɛ, Pisigaa kele mìi ni. Á *wúlu bɔ ǹ bǎã sɔbaa dɔ, á wúlu bɔ ka dii gɔ̀lɔ̀ goon laanka sère gɔ̀lɔ̀ goon ne ǹ gogoonmaa la. 15Balaamu pɛ nɛ: «Giã kànaa n wúlu màn tiɛ̃ genli, masɛ wo n yii da kɛnɛn li.»
16Dɛnaa Lawa daa Balaamu yɔrɔ-a, á boo da á wɔ a lɛ-n, bɛ kio, á pɛ nɛ: «Wusoo n wo Balaaki lɛ li, n bɛa boo lɛ pɛ nɛ.» 17Balaamu dɔ́ wusoo á woo Balaaki li, á woo yǎa golee ne a wúlu màn tiɛ̃ lɛ genli, kun ka Moabu gána a min dadaran nɛ. Balaaki tɔ́n nɔ̀n da la: «Dɛnaa Lawa mà wàa?»
18Balaamu tɔ́n bɔ boon kɛn nɛ kɛnɛn á ǹ pɛ:
Balaaki, yoo n nə n too kɔ!
N too kɔ ma lon,
Sipɔɔrɔ a nɛgiĩ!
19Lawa bie min lɛa,
a tɔn soɛ bɔ wa!
A bie minbuiin nɛ lɛa,
a tɔn wusoo a kio-n wa!
A ba boo diɛ,
bɛ̀ a ná a ba a lɛ piɛ̃ wa!
A boo diɛ a n lɛ bɔ wa!
20Masɛ n má lɛ kɔ,
má barka da zaman kɛ lɛ-a,
a giala,
Lawa din na á barka da ǹ ganaa.
Ma bie re wusii man bɔlɔ baa wa.
21Dɛnaa Lawa sii baraa yɛ Zakɔba tɔrɔn lɛn ganaa wa.
A kɔkɔrɔbaa yɛ Izirayeli minin lɛn ganaa wa.
A nə ǹ Lawa Dɛnaa Lawa lɛa,
giã nɛ ǹ bii.
Ǹ tá n lɛ dii ka a kiibaa nɛ.
22A din na á ǹ waa Ezipti gána nɛ á soo ǹ ne.
Á pàã kɔ ǹ la,
ka don a zù bɛ́ lɔn.
23Wɔ-kũli ba kun ka Zakɔba tɔrɔn lɛn nɛ wa.
Boo baa ǹ dí ba Izirayeli minin lɛn li wa.
Lawa bɛ́ sii mɛn zɛnɛɛ,
bɛ nə n pii Zakɔba tɔrɔn lɛn nɛ,
a nə n pii Izirayeli tɔrɔn lɛn nɛ,
a kɔnpɛ a biikoo ne.
24Á ke, bɛa zaman kɛ lɛ n yui ka don siĩ bɛ́ lɔn.
A nə n goã doa ka yára bɛ́ lɔn
a màn mɛn kũ,
bɛ̀ a bɛ siĩ sɔ̃ wa,
a gɔn dɔ màn mɛn-a,
bɛ̀ a bɛ mà mi wa,
a bie wɛɛ tán wa.
25Bɛ kio, Balaaki pɛ Balaamu ni: «Bɛ̀ n ba re lɛn baraa bii ǹ li wa, n baran barka da ǹ ganaa sɛn wa.»
26Balaamu tɔ́n na a lɛ si kɛnɛn: «Táa ma goã má pɛ n nɛ, máa bɛ̀ Dɛnaa Lawa boo woo boo da ma nɛ, masɛ n koen bɛ yii lɛ.»
Balaamu a boo sɔɔbaa ǹ wɔ
27Balaaki wusoo á pɛ Balaamu ni: «Da kiɛ̃ kəni, ma n kũ ma wo n ne bǎã kɔsɔ nɛ. Kɔntan, Lawa á die lɛ koe la, a n toa bɛa bǎã lɛ nɛ, n lɛn baraa bii zaman kɛ lɛ li maa lɛa.» 28Balaaki tɔ́n Balaamu kũ á woo ne Pewɔrɔ kele kɛ la, zumii-n diə gole kɛ nɛ.
29Balaamu pɛ Balaaki ni: «*Wúlu bɔ ǹ bǎã sɔbaa dɔ kànaa n nə ǹ kɔ ma la, dii gɔ̀lɔ̀ sɔbaa laanka sère gɔ̀lɔ̀ sɔbaa dɔ yɔrɔ bɔ, a din bǎã kɛ lɛ nɛ, n nə ǹ kɔ ma la.»
30Balaaki dɔ́ zɛnaa ka Balaamu pɛ-n lɔn. Bɛ kio, á wúlu bɔ ka dii gɔ̀lɔ̀ goon laanka sère gɔ̀lɔ̀ goon ne, wúlu bɔ ǹ bǎã lɛ a gogoonmaa la.
Currently Selected:
MNS 23: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.