MNS 31
31
Zia mɛn nə n da Madiã minin ganaa
1Dɛnaa Lawa boo da Muizu ni, á pɛ: 2«Madiã minin nə baraa mɛn zɛnaa Izirayeli minin lɛn manɛ, Muizu bɛa dòo bɔ ǹ ganaa. Bɛ kio, a din tɔn kanaa toa.»
3Muizu tɔ́n pɛ zaman lɛ nɛ: «Kaa min gialakunun nə ǹ ziabaa ǹ mànan goa ǹ wo zia la. Maǹ die woe Madiã minin gialaa, ǹ Dɛnaa Lawa a dòo kɛ bɔ ǹ ganaa. 4Ka giĩ duu goon bɔ Izirayeli tɔrɔn lɛn gogoonmaa bii, ka ǹ dia zia lɛ la. 5Ka tɔ́n giĩ duu goon bɔ Izirayeli tɔrɔn lɛn gogoonmaa bii, ka kaa kun min duu fulupaa ǹ yɔrɔ ń boe-n ziabaa taman yii.»
6Muizu nə́ ǹ tumaa dia zia lɛ la, Eleyazaara a nɛgiĩ Pinasi Lawa a wúlu-bɔle kɛ ń kunun ǹ ni. Asɛ na á goã Lawa a dí nya ǹ màn sonboren kɛn guĩ, ka bɛnɛn kɛn nɛ, ǹ nə́ gòon yiɛ minin ganaa ǹ nɛ. 7Ǹ nə́ woo kɔ Madiã minin lɛn lɛ ka zia nɛ, ǹ nə́ ǹ giĩn tumaa dɛ, ka Dɛnaa Lawa goã á n gɔn waa Muizu-n lɔn. 8Ǹ nə́ Madiã minin kii sooro kɛ dɔ dɛ: Ɛvi ni, Rekɛmu ni, Suuru ni, Uuru ni, ka Rebaa nɛ. Ǹ nə́ Bewɔɔrɔ a nɛgiĩ Balaamu kɛ dɔ dɛ. 9Ǹ nə́ Madiã minin lɛn lɔn laanka ǹ nɛnyaanan baa bɛ̀rɛn lɛa, ǹ nə́ ǹ dí nya ǹ tɔɔn tumaa laanka ǹ tɔɔn tumaa goa ǹ nə́ woo ǹ ne, ka ǹ gɔn mànan tumaa nɛ. 10Ǹ nə́ tɛ da Madiã minin lɛn giã ǹ kiwi dadaran tumaa ganaa, ka ǹ giã ǹ zìã tumaa nɛ. 11Bɛ kio, ǹ mànan mɛnɛn tumaa goa zia lɛ la, ǹ nə́ woo ka bɛn nɛ, kɔnlɛ ka minin kɛn laanka tɔɔn kɛn nɛ ǹ nə́ ǹ kũ. 12Maǹ nə́ woo ǹ ne Muizu laanka Lawa a wúlu-bɔle Eleyazaara li, ka Izirayeli zaman lɛ tumaa nɛ, giã ǹ bǎã kɛ nɛ Moabu a nyankɔrɔ lɛ nɛ, Zurdɛ̃ tà lɛ-a, Zerikoo kiwi yɔrɔ-a.
13Muizu ni, Lawa a wúlu-bɔle Eleyazaara nɛ, ka zaman lɛ a nyɛɛnaandɛnan tumaa nɛ, bɛn nə́ soo ǹ nə́ n bɔ giã ǹ bǎã lɛ nɛ, ǹ nə́ woo n da ǹ lɛ. 14Min mɛnɛn nə goã zia-baalin lɛn tumaa a goledɛnan lɛa, min mɛnɛn dɔn nə goã zia-baali duu goon mìi la, ka ǹ mɛnɛn nə goã zia-baali paabiɛ mìi la, ǹ nə́ boe zia lɛ a baa ǹ bǎã nɛ, Muizu foo yoo bɛn tumaa li. 15Muizu nɔ̀n da ǹ la mà maǹ nə́ lɔn tumaa yii toa koo ya. 16#MNS 25.1-9 A da yaa, bɛa Madiã lɔn kɛn lɛn dinin man nə́ n saa Balaamu a boo li, ǹ nə́ toa Izirayeli minin lɛn nə́ n baa bɔlɔgoonbaãdɛnan lɛa Dɛnaa Lawa yɔrɔ-a wa, Pewɔɔrɔ a sii kɛ gɔ́ɔ̃ nɛ. Bɛ́ toa koe bɔ Dɛnaa Lawa a zaman lɛ ganaa. 17Kanna kəni, ka Madiã minin lɛn nɛginin tumaa dɛ ka ǹ lɔn mɛnɛn tumaa giã kun ka giĩ ni. 18Sɛnɛ, nɛlɔn mɛnɛn bɛ́ ǹ tɔn giĩ dɔ̃ wa, ka bɛn yii toa koo ka dinin wɔn lɛa. 19Min mɛnɛn tumaa bɛ́ ǹ bii, ǹ nə́ gɛ̀ dɛ hinlaa ǹ nə́ n gɔn da gere-a, bɛn doamaa nɛ ǹ goã giã ǹ bǎã lɛ kio, lɛawaa sɔbaa. Ǹ doamaa nɛ ǹ *gɔ̀ bɔ ǹ dinin-a a lɛawaa sɔɔbaa ǹ wɔ laanka a lɛawaa sɔbaabaa ǹ wɔ pinaa. Bɛa boo kɛ lɛ yɔrɔ n dia nɛ ǹ bɛ̀rɛnɛn lɛn dɔn la. 20Ǹ die ǹ gɔ̀ bɔ mɔnaan tumaa dɔ ganaa, ka mànan mɛnɛn tumaa nə n zɛnaa ka ki ni, ka bòe ka nɛ, hinlaa ka gɔn nɛ.
21Sɔraasin mɛnɛn lɛn nə goã ǹ nə́ woo zia la, Lawa a wúlu-bɔle Eleyazaara pɛ bɛn manɛ: «Landan mɛnɛn bɛ́ dí-pɛ ǹ sɛ́wɔ kɛ nɛ, Dɛnaa Lawa nə́ ǹ kiɛ̃ á ǹ kɔ Muizu la, bɛn boo n ka kɛ nɛ: 22sana mànan nɛ, wɔrɔ wɔn nɛ, zan wɔn nɛ, fɔlɔ wɔn nɛ, ka fɔlɔ bù wɔn nɛ, 23bɛa mànan kɛn lɛn tumaa, tɛ ná a ba ǹ kuĩ wa, ka die ka gɔ̀ bɔ ǹ ganaa ka tɛ nɛ, bɛ kio, ka ǹ kaa gɔ̀ bɔ ǹ mu kɛ li. Tɛ bɛ́ màn mɛn kuĩ, ka bɛ sã mu li. 24Ka die ka kaa mɔnaan dɔn pii a lɛawaa sɔbaabaa ǹ wɔ pinaa, ka tá re *yoreen koe. Bɛ kio, ka tá boe la ka n bɔyaa ka wo giã ǹ bǎã lɛ nɛ.»
Zia mànan lɛn gii
25Dɛnaa Lawa boo da Muizu ni, á pɛ: 26«N din ni, Lawa a wúlu-bɔle Eleyazaara nɛ, ka zaman lɛ a kɛdɛnan nɛ, ka minin laanka tɔɔn mɛnɛn kũ zia lɛ la ka daa ǹ nɛ, ka bɛn nimi. 27Ka mànan mɛnɛn lɛn goa zia la, n bɛn na kɔn wɔlɔ paa, ǹ kɔnpɛ. Sɔraasin mɛnɛn nə zia lɛ baa, n na a paǹ goon kɔ bɛn la, a paǹ goon kɛ kɔ zaman gialakun kɛ dɔ la. 28Sɔraasin mɛnɛn nə zia lɛ baa, màn mɛn bɛ́ bɛn wɔ gii lɛa, n màn bɔ a nɛ n kɔ Dɛnaa Lawa la. Min biɛsooro (500) bii, n min goon bɔ. Diin wɔ paǹ li, dundunun ni, sèren laanka bòen ne, tɔɔ biɛsooro bii, n tɔɔ goon bɔ. 29Bɛ̀ ń Dɛnaa Lawa wɔ lɛ bɔ miɛ̃, n kɔ Lawa a wúlu-bɔle Eleyazaara la. 30Zaman gialakun lɛ wɔ gii kɛ gɔ́ɔ̃ nɛ, min posooro bii, n min goon bɔ. Diin wɔ paǹ li, dundunun ni, sèren ne, bòen ne, ka tɔɔ gialakunun kɛn nɛ, tɔɔ posooro bii, n tɔɔ goon bɔ. Bɛ̀ á ǹ bɔ miɛ̃, n die n nə ǹ kɔ *Levii tɔrɔn kɛn la Dɛnaa Lawa a kion dí nyɛɛ.»
31Dɛnaa Lawa màn mɛn pɛ Muizu ni, Muizu lɛ laanka Lawa a wúlu-bɔle Eleyazaara bɛa sii zɛnaa. 32Sɔraasin lɛn bɛ́ ǹ nə́ ǹ zɔ́ɔn mànan lɛn kokoo, ǹ mɛn giala goã, bɔ zia la màn lɛa bɛ á ke: tɔɔ bisin duu biɛsɔrɔ ka pɔsɔbaawensooro (675 000), 33tɔɔ dadara duu pɔsɔbaawenpaa (72 000) 34dundun duu pɔsɔrɔwengoon (61 000) 35ka minin dɔn nɛ. Bɛa minin lɛn man lɔn lɛa, ǹ nə́ ǹ ba giĩ doɛ̃ wa. Ǹ tumaa a kaa kun nə lɔ duu pɔsɔɔwenpaa (32 000). 36Màn mɛn nə goã á dɔ sɔraasin lɛn ganaa, bɔ zia la màn lɛ a talɛɛ lɛa bɛ á ke: tɔɔ bisin nə duu biɛsɔɔ ka duu pɔsɔɔwensɔbaa ka biɛsooro (337 500), 37a biɛsɔrɔ ka pɔsɔbaawensooro (675) na á n bɔ Dɛnaa Lawa wɔ lɛa. 38Diin man duu pɔsɔɔwensɔrɔ (36 000), a pɔsɔbaawenpaa na á n bɔ Dɛnaa Lawa wɔ lɛa. 39Dundunun man duu pɔsɔɔ ka biɛsooro (30 500), a pɔsɔrɔwengoon na á n bɔ Dɛnaa Lawa wɔ lɛa. 40Minbuiinin man duu fulusɔrɔ (16 000), a pɔsɔɔwenpaa na á bɔ Dɛnaa Lawa wɔ lɛa. 41Màn mɛn nə n bɔ Dɛnaa Lawa wɔ lɛa, Muizu bɛ kɔ Lawa a wúlu-bɔle Eleyazaara la, ka Dɛnaa Lawa goã á pɛ-n lɔn. 42Màn mɛn nə dɔ Izirayeli min gialakun lɛ ganaa, bɔ zia la màn lɛ a talɛɛ lɛa, kɛ lɛ Muizu na sɔraasin lɛn wɔ nɛ á kɔ ǹ la, 43bɛ á ke: tɔɔ bisin nə duu biɛsɔɔ ka duu pɔsɔɔwensɔbaa ka biɛsooro (337 500). 44Diin man duu pɔsɔɔwensɔrɔ (36 000). 45Dundunun man duu pɔsɔɔ ka biɛsooro (30 500). 46Minbuiinin man duu fulusɔrɔ (16 000). 47Izirayeli min gialakun lɛ wɔ gii lɛ gɔ́ɔ̃ nɛ, Muizu minbuiinin posoorobaa ǹ wɔ bɔ, ka tɔɔn dɔn posoorobaa ǹ wɔ nɛ, á ǹ kɔ Levii tɔrɔn kɛn la giɛ Dɛnaa Lawa a kion lɛ walan. Dɛnaa Lawa pɛ Muizu-n lɔn, Muizu na á zɛnaa miɛ̃.
Lawa gɔ ǹ màn
48Min mɛnɛn bɛ́ sɔraasin goledɛnan lɛa, sɔraasi duu goon mìilandɛnan laanka sɔraasi paabiɛ mìilandɛnan nɛ, bɛn nə́ n zɔ̃ ǹ nə́ dɔ Muizu li, 49ǹ nə́ pɛ nɛ: «Wɔsɛn bɛ́ sɔraasin mɛnɛn lɛn mìi la, wɔ́ ǹ nimi, min goon din nə n bɔ ǹ lɛ wa. 50Bɛ lɛ n ke, wɔ á die ka mànan nɛ Dɛnaa Lawa gɔ ǹ wɔ lɛa, màn mɛn bɛ́ toɛ wɔ nyin nə goã. Wɔ sanan mànan mɛnɛn yɛ, gɔn ganaa ǹ zanan nɛ, nyàan ganaa ǹ mànan nɛ, gòon ganaa ǹ kaaranan nɛ, too mànan nɛ, ka bɔlɔ ganaa ǹ mànan nɛ, wɔsɛn didie n die a wɔ koe.»
51Ǹ da ka wɔrɔ màn zɛnaa mɛn tumaa nɛ, Muizu laanka Lawa a wúlu-bɔle Eleyazaara lɛ kɔ bɛn ganaa. 52Sɔraasin goledɛnan lɛn nə mànan mɛnɛn kɔ Dɛnaa Lawa la, a gugurubaa tumaa a kaa kun dɔ kilo paabiɛ ka pɔsɔbaa (170) kɛ miã. 53Sɛnɛ, sɔraasin lɛn mɛnɛn bɛ́ ǹ ba goledɛnan lɛa wa, bɛn gogoonmaa nɔmɔ a zia màn ganaa. 54Sɔraasin goledɛnan lɛn nə da ka sanan mànan mɛnɛn lɛn nɛ, Muizu laanka Lawa a wúlu bole Eleyazaara bɛn tumaa si, ǹ nə́ woo ǹ ne kɔn yɛ ka Lawa nɛ ǹ kion kɛ nɛ, màn mɛn bɛ́ toɛ a n baa Izirayeli minin lɛn yiri gisĩ sii ni ǹ màn lɛa, Dɛnaa Lawa yɔrɔ-a.
Currently Selected:
MNS 31: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.