MNS 32
32
Tɔrɔ sɔɔ n giɛ̃ Zurdɛ̃ tà a lɛ̀ giala gɔn la
1Urubɛn tɔrɔn laanka Gaadi tɔrɔn tɔɔn man nə́ goã mɔnaa-n taãn-taãnɛ. Ǹ nə́ tɔ́n yɛ, mà Yazɛɛrɛ bǎã laanka Galaati gána tá tɔɔn sii. 2Bɛ lɛ n ke, ǹ nə́ woo Muizu laanka Lawa a wúlu-bɔle Eleyazaara li, ka zaman lɛ a nyɛɛnaandɛnan nɛ, ǹ nə́ pɛ ǹ nɛ: 3«Atarɔti kiwi ni, Dibɔn kiwi ni, Yazɛɛrɛ kiwi ni, Nimura kiwi ni, Ɛsibɔn kiwi ni, Eleyale kiwi ni, Sebamu kiwi ni, Neboo kiwi ni, ka Bewɔn kiwi ni, 4bɛa bǎãn kɛn lɛn Izirayeli minin nə́ boo ǹ la ǹ nə́ ǹ si ka Dɛnaa Lawa a dɔmalɛ nɛ, ǹ tá tɔɔn sii. Á ke, tɔɔn man wɔsɛn lon.» 5Ǹ nə́ wusoo doo ǹ nə́ pɛ Muizu ni: «Bɛ̀ n tá bǐɛ̃ koe wɔsɛn ganaa, bɛa gána kɛ lɛ wɔsɛn wɔ baa, n baran wo ka wɔsɛn nɛ Zurdɛ̃ tà kio wa.»
6Sɛnɛ Muizu pɛ Gaadi tɔrɔn lɛn laanka Urubɛn tɔrɔn lɛn manɛ: – Ka dɔɔ̃nɔn kɛn man die woe zia la, kasɛn nə n zɔ̃ ka giã kànaa koɛ? 7Dɛnaa Lawa bɛ́ gána mɛn koe Izirayeli minin lɛn la, wàa na á baa ka tá Izirayeli minin lɛn gù dii ka bɛa woo ne? 8#MNS 13.17-33 Ka digolon dɔn man nə́ goã ǹ nə́ bɛa sã kɛ lɛ tɔrɔ wɔ, bɛ̀ masɛ bɛ́ má n toa Kadɛsi-Barneya má ǹ dia máa ǹ wo ga Kanaan gána lɛ ganaa. 9Maǹ nə́ goã ǹ nə́ woo yǎa Ɛsikɔli a nyankɔrɔ lɛ kɛ nɛ, ǹ nə́ ga gána lɛ ganaa. Ǹ bɛ́ ǹ nə́ n bɔyaa biikoo mɛn li, Dɛnaa Lawa bɛ́ mà asɛ á gána mɛn lɛ koe ǹ la, ǹ nə́ Izirayeli minin gialakunun gù dɛ ka bɛa gána lɛ a woo ne. 10#MNS 14.26-35 Dɛnaa Lawa foo goã á yoo bɛa pinaa kɛ lɛ-n taãn-taãnɛ, á tɔ́n nə n liɛ kɛnɛn: 11«Min mɛnɛn nə soo Ezipti gána lɛ nɛ, ǹ lɛ̀ ń lɛ̀ fuə, ka lɛ̀ fuə ka kio ne, bɛn kɔn yii ba re gána kɛ yii wa, masɛ nə n lɛ kɔ ka ǹ mɛn lɛ nɛ, máa ma á koe Abrahamu la, ka Izaaki laanka Zakɔba nɛ. A giala, ǹ kɔ ma lɛ ka ǹ yɔrɔ-n wa. 12Zefunee a nɛgiĩ Kalɛbu ke Kenii tɔrɔ lɛa, bɛ laanka Nunu a nɛgiĩ Zozoe dinsɔɔ̃ n die we gána lɛ nɛ, a giala ǹ nə́ kɔ masɛ lɛ ka ǹ yɔrɔ nɛ.» 13Muizu mà bɛ lɛ n ke, Dɛnaa Lawa foo yoo Izirayeli minin lɛn li á ǹ kaa birin bɔ ganaa lɛ̀ pusi, diə gole gɔ́ɔ̃ nɛ, yǎa bɛa biikoo lɛ a minin tumaa gã ǹ nə́ nya. Sii mɛn bɛ́ a ba Dɛnaa Lawa foo sii wa, bɛa biikoo lɛ a minin man nə́ bɛ zɛnaa. 14Á ke, ka dɔn man ka yoo tán ka digolon lɛn bǎã nɛ, sii baraa-zɛnaali tɔrɔn lɛa, ka n màn diɛ Dɛnaa Lawa a foo-yoo li, Izirayeli minin wɔ paǹ li. 15Sonbore, bɛ̀ ka kanaa ka n bɔ Dɛnaa Lawa kio, a n die wusii a toa Izirayeli minin nə belebɔ diə gole lɛ nɛ. Bɛa yɔrɔ lɛ la, ka n die zaman kɛ lɛ tumaa bɔ̀n biɛ.
16Bɛa minin lɛn nə́ wusoo ǹ nə́ n zɔ̃ ǹ nə́ dɔ Muizu li, ǹ nə́ pɛ nɛ: «Wɔsɛn man die zìã doe kànaa wɔa tɔɔn wɔn lɛa, wɔ kiwin dɔ a nɛ wɔa kion minin wɔn lɛa. 17Bɛ kio, wɔ tá re n nanaɛ wɔ wɔa ziabaa ǹ mànan goa, wɔ kiɛ̃ wɔ mɛ̀ Izirayeli min gialakun lɛ nyɛɛnɛ, yǎa wɔ woe doe ǹ ne ǹ bǎã nɛ. Bɛa biikoo li, wɔa kion minin tá re goɛ̃ kiwi kungɔndɛnan kɛn nɛ, ǹ nə́ tamaa nɛ gána lɛa minin ganaa. 18Wɔ ba n bɔyɛɛ wɔ da piɛ wa, yǎa Izirayeli min gogoonmaa na a bǎã yii. 19Sɛnɛ, bǎã ba re doe wɔ ganaa ǹ li, Zurdɛ̃ tà kio lɛ-n wa, a giala wɔsɛn bǎã tá paǹ kɛ ganaa, Zurdɛ̃ tà a lɛ̀ giala gɔn la.»
20Bɛ kio, Muizu pɛ ǹ nɛ: «Bɛ̀ ka bɛ zɛnaa, bɛ̀ ka ziabaa ǹ mànan goa Dɛnaa Lawa yɔrɔ-a ka woo zia la, 21bɛ̀ kaa sɔraasin tumaa Zurdɛ̃ tà lɛ kuru Dɛnaa Lawa yɔrɔ-a, yǎa Dɛnaa Lawa na a zɔ́ɔn tumaa loo a ǹ bɔ a nyɛɛnɛ, 22bɛ̀ ka n bɔyaa wa, ka gole miɛ̃ yǎa Dɛnaa Lawa gána lɛ da a pàã giulun, zɛ̀rɛ ba re ka kuĩ Dɛnaa Lawa laanka Izirayeli minin wɔ paǹ li wa. Bǎã kɛ lɛ tán, a n die goɛ̃ kaa wɔ lɛa Dɛnaa Lawa yɔrɔ-a. 23Sɛnɛ, bɛ̀ ka zɛnaa miɛ̃ wa, ka n sii liɛ Dɛnaa Lawa la. Ka dɔ̃ sɛn, mà kaa sii baraa lɛ tá ka kio. 24Ka kiwin dɔ ka ǹ kɔ ka kion minin la, ka zìã dɔ kaa tɔɔn wɔn lɛa. Sɛnɛ, lɛ-kɔ ǹ boo mɛn nə soo ka lɛ-n, ka bɛ lɛ pã.»
25Gaadi tɔrɔn lɛn laanka Urubɛn tɔrɔn lɛn nə́ tɔ́n pɛ Muizu ni: «N boo mɛn pɛ wɔ nɛ, wɔ á re a sii zɛnɛɛ. 26Wɔa lɔn nɛ, wɔa nɛnyaanan nɛ, wɔa tɔɔn nɛ, ka wɔa dí nya ǹ tɔɔn nɛ, wɔ n die bɛn toɛ kànaa, Galaati kiwin ni. 27Bɛ kio kəni, ziabaa ǹ mànan bɛ́ wɔ mɛnɛn tumaa ganaa wo ziabaa taman yii, wɔ á re kiɛ̃ Dɛnaa Lawa yɔrɔ-a wɔ wo zia lɛ la, ka wɔa dɛnaagiĩ pɛ lɔn.»
28 #
Zoz 1.12-15
Muizu tɔ́n dí pɛ Lawa a wúlu-bɔle Eleyazaara nɛ, ka Nunu a nɛgiĩ Zozoe laanka Izirayeli tɔrɔn lɛn kɛdɛnan nɛ. Bɛa dí lɛ yɔrɔ na á goã dia-n Gaadi tɔrɔn kɛn laanka Urubɛn tɔrɔn kɛn la. 29Muizu lɛ na á pɛ ǹ nɛ: «Bɛ̀ Gaadi tɔrɔn lɛn laanka Urubɛn tɔrɔn lɛn nə́ ǹ ziabaa ǹ mànan goa ǹ nə́ Zurdɛ̃ tà kɛ kuru kun ka nɛ, ǹ nə́ woo zia baa Dɛnaa Lawa yɔrɔ-a, ǹ nə́ n dɔ ka lɛ ǹ nə́ gána lɛ da ka pàã giulun, ka die ka Galaati gána kɛ kɔ ǹ la ǹ bǎã lɛa. 30Sɛnɛ, bɛ̀ Gaadi tɔrɔn lɛn laanka Urubɛn tɔrɔn lɛn nə bɛ zɛnaa wa, bǎã doamaa nɛ a dɔ ǹ ganaa ka dinin kɛn lɛn li Kanaan gána lɛ nɛ.»
31Gaadi tɔrɔn lɛn laanka Urubɛn tɔrɔn lɛn nə́ wusoo ǹ nə́ pɛ doo: «Dɛnaa Lawa boo mɛn pɛ wɔsɛn nɛ, wɔ tá re bɛ zɛnɛɛ. 32Wɔ n die wɔ ziabaa ǹ mànan goɛ wɔ wo kaa Kanaan gána lɛ nɛ Dɛnaa Lawa yɔrɔ-a, màn mɛn bɛ́ toɛ wɔ wɔa bǎã gii yɛ Zurdɛ̃ tà lɛ a para kɛ nɛ.»
33Muizu Amɔɔrɔ tɔrɔn kii Sihɔn a gána laanka Basan kiwi a kii Ɔgu a gána kɔ Gaadi tɔrɔn lɛn laanka Urubɛn tɔrɔn la, ka Zozɛfu a nɛgiĩ Manaasee tɔrɔn kɛn talɛɛ#32.33 Manaasee tɔrɔn talɛɛ lɛ boo bibinaa na á n da kanaa. nɛ. A na á bɛa gánan lɛn kɔ ǹ la kɔnlɛ ka ǹ lɛkoro lɛ-a bǎãn nɛ. 34Gaadi tɔrɔn lɛn nə́ wusoo ǹ nə́ Dibɔn kiwi dɔ, Atarɔti kiwi ni, Aroɛɛrɛ kiwi ni, 35Atrɔti-Sofan kiwi ni, Yazɛɛrɛ kiwi ni, Zogbaa kiwi ni, 36Bɛti-Nimura kiwi ni, ka Bɛti-Haran kiwi ni. Ǹ nə́ bɛa kiwi kungɔndɛnan lɛn dɔ, ka sèren kaa ǹ bǎãn dɔn nɛ. 37Urubɛn tɔrɔn nə́ wusoo ǹ nə́ Ɛsibɔn kiwi dɔ, Eleyale kiwi ni, Kiriyatayimu kiwi ni, 38Neboo kiwi ni, Baali-Mehɔn kiwi ni, ka Sibma kiwi ni. Ǹ wusoo ǹ nə́ kiwin mɛnɛn lɛn dɔ, ǹ nə́ tɔ dii wɔ ǹ tɛnɛn ganaa. 39Manaasee a nɛgiĩ Makiiri tɔrɔn man nə́ woo Galaati gána nɛ, ǹ nə́ gána lɛ si ka pàã nɛ ǹ nə́ baa ǹ wɔ lɛa, Amɔɔrɔ tɔrɔn mɛnɛn nə goã giã nɛ a nɛ, ǹ nə́ bɛn loo. 40Muizu tɔ́n Galaati gána lɛ kɔ Manaasee a nɛgiĩ Makiiri la, á giã a nɛ. 41Yayiiri ke Manaasee a nɛgiĩ kɔsɔ lɛa, bɛ tɔrɔn nə́ woo Amɔɔrɔ tɔrɔn kiwin si ka pàã nɛ ǹ nə́ ǹ baa ǹ wɔn lɛa. Ǹ nə́ bɛa kiwin lɛn bíi "Yayiiri a kiwin". 42Nobaa dɔ́ woo Kenati kiwi si á baa a wɔ lɛa, kɔnlɛ ka a lɛkoro lɛ-a bǎãn nɛ. Á n din tɔ taãn kɔ kiwi lɛ-a, mà Nobaa.
Currently Selected:
MNS 32: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.