मत्ती 19
19
छोडपत्र सम्बन्धी
मर्कूस १०:१-१२
1अत्रा बात बट्वाक सेक्ल त येशू गालीलसे यर्दन लद्यक पूरुब यहूदिया क्षेत्रओर गैल। 2मनैन्हक भारीभारी भीड उहाँक पाछ-पाछ लग्लन, ओ उहाँ बेरम्हेन चोखैल।
3कुछ फरिसीहुँक्र उहाँकठे अइल ओ उहाँह बातबातम फँसैना उद्देश्यले एकठो बात पुछ्ल, “का कौनो मनैया जौनटौन कारण देखाक आपन गोसिन्यसे छोडपत्र कर्ना ठीक हो?”
4येशू जवाफ देल, “का सृष्टिकर्ता परमेश्वर सुरुम पुरुष ओ महिला बनैलक बात टुह्र पहर्क फे नैबुझ्टो?#उत १:२७; ५:२ 5उहओर्से त मनैया आपन डाई-बाबह छोर्क आपन गोसिन्यसे मिल्लरठा, हुँक्र दुनु जन मिल्क एक शरीर हुइठ।#उत २:२४ 6आब हुँक्र दुइ जन नैहुइट, तर एक हुइट। उहओर्से परमेश्वरक मिलाइल जोह्रेह कुई फे अल्गाइ नैपरट्।”
7हुँक्र उहाँह पुछ्ल, “काजे मोशा छोडपत्र कागत लिख्क कौनो मनैया आपन गोसिन्यह छ्वार सेक्ना अनुमति देरख्ल?”#व्य २४:१-४; मत्ती ५:३१
8येशू जवाफ देल, “मोशा त टुन्हक मन कठोर रलक कारण टुँहन आपन गोसिन्यह छ्वार सेक्ना अनुमति देलह। तर सुरुम परमेश्वरक इच्छा ओसिन नैरलहन। 9मै टुँहन कहटुँ, कि व्यभिचार बाहेक और कारणले आपन गोसिन्यह छोर्क द्वासर भ्वाज कर्ना मनैया व्यभिचार कर्ठा, [ओ जे छ्वारल गोसिन्यह भ्वाज कर्ठा, ऊ फे व्यभिचार कर्ठा।]”#मत्ती ५:३२; १ कोर ७:१०-११
10चेलावँ उहाँह कल, “यदि आपन गोसिन्यसे छोडपत्र कर सेक्जैना आधार ओत्र केल हो कलसे, काजे भ्वाज कर्ना?”
11येशू हुँकन कल, “यी वचन सबजन स्वीकार कर नैसेक्ट, तर परमेश्वर कुछ मनैन यी वचन स्वीकार कर सेक्ना बनारख्ल। 12भ्वाज नैकर्ना विभिन्न कारण हुइसेक्ठा। काकरकि कत्रा जन त जन्मटीहिक नपुंसक रठ, कत्राजहन और मनै नपुंसक बनादेरख्ठन, ओ कत्रा जनजुन स्वर्ग राज्यक लाग अपन्हे भ्वाज नैकर्ट। आब यी बात जे मानसेक्ठा, उह मान।”
येशू ओ लर्काओँ
मर्कूस १०:१३-१६; लूका १८:१५-१७
13येशू लर्कन्हकम आपन हाँठ ढैदेहीँ ओ हुँकन्हक लाग प्रार्थना कैदेहीँ कना विचारले, कुछ मनै आपन लर्कन उहाँकठे अन्ल। यी देख्क चेलावँ उ मनैन हप्कैल।
14तर येशू कल, “लर्कन म्वारठे आइदेओ, हुँकन जिन रोको, काकरकि स्वर्गक राज्य अस्त मनैन्हक लाग हो।” 15येशू उ लर्कन्हक कपारिम हाँठ ढै-ढै आशिष देल, ओ ओठेसे गैल।
धनी मनैया
मर्कूस १०:१७-३१; लूका १८:१८-३०
16एकठो मनैया उहाँकठे आक कहल, “गुरु, अनन्त जीवन पाइक लाग महीह का असल काम करपरी?”
17उहाँ ओहीह कल, “असल कामक बारेम टुँ महीह काजे पुछटो? असल त परमेश्वर केल बाट। तर यदि टुँ अनन्त जीवन पाइ चाहटो कलसे, उहाँक आज्ञापालन करो।”
18उ मनैया पुछल, “कौन-कौन आज्ञा कहटी?” येशू कल, “यिह त हो: हत्या नैकर्ना, व्यभिचार नैकर्ना, चोरी नैकर्ना, झूट साक्षी नैबक्ना,#प्रस २०:१३-१६; व्य ५:१७-२० 19आपन डाई-बाबक आदर कर्ना, ओ आपन छिमेकीह अपन्हेहअस प्रेम कर्ना।”#प्रस २०:१२; व्य ५:१६; लेवी १९:१८
20उ जवान मनैया कल, “यी सब त मै पालन कर्टीआइलबाटुँ। और का करपरी?”
21येशू ओहीह कल, “यदि टुँ सिद्ध हुइ चाहटो कलसे, जाओ ओ आपन सब चिज बेँच्क गरीबन बाँट्देओ, ओ टुँ स्वर्गम धन पैबो। तब आक म्वार पाछ लागो।”
22यी बात सुनल त, उ जवान मनैया अन्धार मुह् लगाक चलगैल्। काकरकि ऊ आपनठे रहल धेर सम्पत्ति गुमाई नैचाहल।
23तब येशू आपन चेलन कल, “जाट्टीसे मै टुँहन कहटुँ, धनी मनैन स्वर्गक राज्यम जैना धेर कर्रा परहीन। 24वास्तवम कना हो कलसे, धनी मनैन परमेश्वरक राज्यम जैनासे त, बेनसे ऊँट्टोह सुइक नाखिमसे छिर्ना सजिलो हुहिँस।”
25यी सुन्क चेलावँ अचम्म मन्टी कल, “ओसिन हो कलसे, के स्वर्ग जाइसेकी तो?”
26येशू हुँकन हेर्क कल, “मनैन्हक लाग यी बात सम्भव नैहो, तर परमेश्वरक लाग सब चिज सम्भव बा।”
27तब पत्रुस उहाँह कल, “हेरी, हम्र त सब चिज छोर्क अप्नक पाछ लागरली। हम्र का पैबी तो?”
28येशू हुँकन कल, “जाट्टीसे मै टुँहन कहटुँ, मै मनैयक छावा, लौव राज्यम आपन महिमामय सिंहासनम बैठम। उ समयम टुह्र म्वार पाछ लगुइयन फे बाह्रठो सिंहासनम बैठ्बो, ओ इस्राएलक बाह्र कुलक न्याय कर्बो।#मत्ती २५:३१; लूक २२:३० 29म्वारम विश्वास कर्लक कारण, आपन दादुभैया, दिदीबहिन्या, डाई-बाबा, छाई-छावा, या जग्गाजमिन छोरुइया मनै सय गुणा धेर पैहीँ, ओ अनन्त जीवन फे पैहीँ। 30तर आजकाल सबसे उच्च रहल धेर मनै पाछ सबसे टर्का दर्जम रहहीँ, ओ आजकाल सबसे टर्का दर्जम रहुइयन धेर मनै पाछ सबसे उच्च हुइहीँ।”#मत्ती २०:१६; लूक १३:३०
Currently Selected:
मत्ती 19: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
