Jẹnẹsisi 23
23
Isi Ẹtọ Kwasị Ọgụn
Ọnwụn Sẹra Lẹ Olili Ẹ
1Ahụa ẹsa kwasị-ọgụn-isin kẹ Sẹra tọ. 2Ya Sẹra nọ nwụntọ alị Kiriatị-Aba (hụn wụ alị Hibrọnụ) hụn rị imẹ alị Kenaanị. Ya Ebraham nọ banye ebe ozun Sẹra rị d'a kwan a, kwan ezigbo ẹkwan.
3O mẹgụ Ebraham nọ gha ebẹhụ ozun nwunyẹ ẹ rị lihi ọtọ; ọ nọ buru ndị Hẹti o bi alị wẹ, sị wẹ, 4“M wụ otumunyẹ imẹ igunrun ụnụ; m bihụ ebeni e bi; dodo ni, ye ni m ebe m'e liye ozun, nị m li onyẹ nwụnnahịnnị m.”
5Ya ndị Hẹti nọ sị Ebraham, 6“Diọkpa, dodo gọn ntịn: okẹn-ịhịan Osolobuẹ kẹ ị wụ imẹ ẹnyi; họrị nwan ili kachanrịn mma imẹ ili-okporo ndịnị ile ẹnyi gutọ, n'i liye onyẹ nwụnnahịnnị ị; imẹ ẹnyi ile, onwọnni onyẹ k'a jụ n'o yekọ ị ili ọwụlẹ ị k'a họrị n'i liye onyẹ nwụnnahịnnị ị.” 7Ya Ebraham nọ lihi ọtọ, hulụa isi, kele ndị Hẹti, ndị alị ahụn; 8ọ nọ sị wẹ, “O mẹ nwan n'ọ hụ ụnụ mma nị m li onyẹ nwụnnahịnnị m, dodo ni, du ni m nwan rịọ Ẹfrọnụ nwa Zoha 9n'o reye m okporo ẹ hụn rị ẹgbẹrẹ Mak'pẹla; ụsụọ ugbo ẹ k'ọ rị. Ya reye m'ẹ ọnụ-egho ẹ, idẹnya ụnụ, nị m'e liye ozun ebẹhụ.”
10Ẹfrọnụ nọdị alị imẹ igunrun ndị Hẹti ibe ẹ ebahụn. Ọ nọ nọ ebẹhụ shịarị Ebraham, idẹnya ndị Hẹti lẹ ndị ile rị ebẹhụ ịhịan ile n'e zu ọnụ-mgbọn obodo Ẹfrọnụ, sị a, 11“Diọkpa, nsọngbu arị; lee ẹ, m rị e ye i alị ahụn; m rị e yezikwọ ị okporo rịn'a; m rị e ye y'ẹ idẹnya ndị nke m; d'e liye onyẹ nwụnnahịnnị ị.”
12Ya Ebraham nọ hulụa isi, kelezi ndị alị ahụn. 13Ya ọ nọ nọ idẹnya ndị alị ahụn sị Ẹfrọnụ, “Nsọngbu arịa; gọn m ntịn: omẹni ọ sụọghọ ị, nị m kụ nwan ụgwọ alị ahụn. Ẹghẹẹ, narịn m'a, nị m hụn ụzọ li onyẹ nwụnnahịnnị m.” 14Ya Ẹfrọnụ nọ sị Ebraham, 15“Diọkpa, nsọngbu arịa, kaka; mmẹ lẹ yụ wụzị onyẹ ọzọ? Alị karịlẹni akpụrụ egho siliva nnụ! D'e li onyẹ nwụnnahịnnị ị.”
16Ya Ebraham nị kweyeni Ẹfrọnụ, kụ Ẹfrọnụ ọnụ-egho ahụn Ẹfrọnụ nọ idẹnya ndị Hẹti kpọ ẹfan, hụn wụ akpụrụ egho siliva nnụ; ihiẹn ndị-afịa gi a ma egho ogẹn ahụn k'o gi maye ẹ ya. 17Ẹrịra kẹ alị Ẹfrọnụ, hụn rị ẹgbẹrẹ Mak'pẹla ibẹka ọwụwa-ẹnyanwụn Mamre lẹ ihiẹn ile rịn'a, kẹ alị lẹ enwẹn ẹ kẹ okporo rịn'a kẹ osisi ile rịn'a, dọn ban 18ẹka Ebraham idẹnya ndị Hẹti, idẹnya ndị ile rị ebẹhụ wẹ n'e zu ọnụ-mgbọn obodo Ẹfrọnụ wẹ. 19O mẹgụ, Ebraham nọ li Sẹra nwunyẹ ẹ ye imẹ okporo ahụn rị ẹgbẹrẹ Mak'pẹla, hụn bu ihun zinmẹ Mamre wụ Hibrọnụ, imẹ alị Kenaanị.
20Kẹ alị ahụn kẹ okporo ahụn rịn'a nọ ban ẹka Ebraham; Ebraham nọ gi ẹ họnrin ebe w'e liye ndị ebọn ẹ.
Currently Selected:
Jẹnẹsisi 23: ikkBI
Highlight
Share
Copy
Want to have your highlights saved across all your devices? Sign up or sign in
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.
