Jẹnẹsisi 25
25
Isi Nke Isẹn Kwasị Ọgụn
Ndị-ọzọ Ebraham Mụ Lẹ Ọnwụn Ebraham
1Ebraham lụ nwunyẹ ọzọ; ẹfan a wụ Kẹtura. 2Kẹtura mụnị Ebraham Zimranị lẹ Jokshanị lẹ Mẹdanị lẹ Midianị lẹ Ish'bakị lẹzi Shụa. 3Jokshanị wụ nẹdi Shẹba lẹ Dedanị. Dedanị wụ nẹdi ndị Ashuru lẹ ndị Letushu lẹzi ndị Lewum. 4Ụmụ Midianị wụ Efa lẹ Ẹfẹ lẹ Hanọkụ lẹ Abida lẹzi Ẹl'daa. Uwẹ ile wụ ụmụ Kẹtura lẹ ụmụ-ụmụ a.
5Aziki kẹ Ebraham latọchanrịnnị ukuu ẹ. 6Kanị, nke ụmụ ndị mgba a, Ebraham yesọnmẹ wẹ ihiẹn ebe ọ rị ndụn, zipụsọnmẹ wẹ d'e biri alị ndị rị ibẹka ọwụwa-ẹnyanwụn, wẹ nọ yeni Aziki efe.
7Ahụa mmisẹn kwasị ọgụn-ẹsatọ kẹ Ebraham tọ. 8O mẹgụ, Ebraham nọ nwụnhụn ebe ọ kakpụkpọgụ ọhụnma-ọhụnma; wẹ nọ li ẹ, o buru ibe ẹ alị-mmọn. 9Ya kẹ ụmụ a wụ Aziki lẹ Ishmẹlụ nọ li ẹ ye imẹ okporo ahụn rị ẹgbẹrẹ Mak'pẹla hụn rị ibẹka ọwụwa-ẹnyanwụn Mamre, imẹ alị ahụn te wụ nke Ẹfrọnụ nwa Zoha — 10alị ahụn Ebraham ṅọnnarịn ndị Hẹti; ebahụn ke wẹ liye Ebraham — ebẹhụ o liye Sẹra nwunyẹ ẹ. 11Kẹ Ebraham nwụnhụngụ, Osolobuẹ gọzi Aziki nwa a. Biẹ-Lahaị-rọị kẹ Aziki bi.
Ebọn Ishmẹlụ
12Ndịnị wụ ebọn Ishmẹlụ nwa Ebraham, hụn Haga onyẹ Ijiptu nwata-iwe Sẹra mụyeni Ebraham.
13Lee ẹfan ụmụ Ishmẹlụ lẹ usọnrọn wẹ gi mụ wẹ: nwa ibuzọ Ishmẹlụ wụ Nẹbayọtụ; ndị e sọnn'ẹ wụ Kẹda, Ad'bilu, Mibsam, 14Mishma, Duma, Masa, 15Hadadị, Tẹma, Jẹtọ, Nafishi lẹ Kẹdẹma. 16Wẹ ile wụ ụmụ Ishmẹlụ, onyẹ-onyẹ lẹ ẹfan a, hụn wụzị ẹfan obodo lẹ ụmụ-alị ndị nke ẹ bi. Wẹ rị okẹn-ịhịan mmẹbụọ, onyẹ-onyẹ lẹ ebọn ẹ. 17Ahụa mmẹsa kwasị ọgụn-isin kẹ Ishmẹlụ tọ O mẹgụ, Ishmẹlụ nọ nwụnhụn; wẹ nọ li ẹ, o buru ibe ẹ alị-mmọn. 18Ụmụ Ishmẹlụ bichanrịn gha alị Havila d'e rukwọrị alị Shuru hụn bu ihun zinmẹ alị Ijiptu, ị ghashi ụzọ wẹ gha e jẹn Ashuru (Asiria). Ya lẹ umunẹ ẹ asụọnị.
Ebọn Aziki
19Ndịnị wụ ụmụ Aziki, nwa Ebraham: Ebraham mụ Aziki; 20Aziki rị nwa ahụa ọgụnnaị k'ọ lụrụ Rebika nwa Bẹtuẹlụ onyẹ Aram, onyẹ Padan-Aram; nwẹnẹ Rebika okẹnnyẹ wụ Labanị, onyẹ Aram. 21Aziki e mẹ ekpere, rịọ Osolobuẹ n'o yeni nwunyẹ ẹ ẹka, makẹni Rebika wụ agan; Osolobuẹ nọ ye ẹ ihiẹn ọ rịọ, Rebika nọ tụrụ imẹ. 22Ụmụ rị Rebika ẹfọ hụ a zụọ ụzọ, e mẹhunmẹ ọda-ọda imẹ ẹfọ. Ya ọ nọ sị, “Omẹni ẹrịra k'ọ rị, kị haịn m gi tụrụ imẹ?!” Ọ nọ jẹnmẹ d'a jụ Osolobuẹ. 23Osolobuẹ nọ sị a,
“Alị ẹbụọ rị ị ẹfọ;
madụ ẹbụọ i jẹnkọ d'a mụ k'e kebe;
ohu k'a ka ibe ẹ,
onyẹ isi rịn'a k'a rị okpuru ejimẹ.”
24Ọmụmụ e ru ẹ, e lee ụmụ ejimẹ ẹfọ a ezioku-ezioku! 25Hụn bu ụzọ pụha hụ e nwun ufie-ufie; o mẹ ẹṅẹnrẹn-ẹṅẹnrẹn nọkẹ sị wẹ yimẹ ẹ ẹṅẹnrẹn, ya wẹ nọ gụn a “Isọ”. 26Omẹgụ, nwẹnẹ ẹ a pụha; o gi Isọ atụ-ụkụ azụụn k'ọ pụla! Ya wẹ nọ gụn a “Jekọpụ”.
Aziki rị ahụa ọgụn ẹtọ kẹ Rebika mụn'a ụmụ ẹbụbụọnị.
Isọ Lẹ Jekọpụ
27Ogẹn ụmụ ikẹnnyẹ ẹbụbụọnị gi hipụha, Isọ nọ wụrụ ọchụ-nta#25.27 Ogbeni., ọfịa k'ọ ka a nọ; kanị Jekọpụ wụ ọmẹhẹn, ụlọ-ụlọ k'ọ nọdị. 28Ihiẹn Isọ a sụọ Aziki nẹdi wẹ — makẹni anụ-ọfịa Isọ e gbuhẹ a sụọ Aziki ọda-ọda; kanị ihiẹn Jekọpụ sụọ Rebika nnẹ wẹ.
29Ụhụọhịn ohu, ebe Jekọpụ nọ e shi ẹgwa, Isọ nọ gha ọfịa lụapụha, ẹgụn e d'e gbu ẹ; 30Isọ nọ sị Jekọpụ, “Dodo, yebeye m ẹgwa ahụn rị e nwun ufie-ufie ri, nị ẹgụn e d'e gbu m!” (Ya kẹ wẹ gi kpọ Isọ “Ẹdọm” hụn wụ “Ufie.”) 31Ya Jekọpụ nọ sị a, “Reyegụ m ọkwa nwa-ibuzọ.” 32Ya Isọ nọ sị a, “Ẹgụn e d'e gbu m ma! Elee erere kẹ ọkwa nwa-ibuzọ bannị m?” 33Kanị Jekọpụ sị a, “Kungụnị m Osolobuẹ.” Ya kẹ Isọ wụ nwa-ibuzọ nọ kunni Jekọpụ Osolobuẹ gi re ọkwa nwa-ibuzọ ye ẹ. 34Ya Jekọpụ nọ nwan ye Isọ brẹdi lẹ ẹgwa ri. Isọ nọ ri, ra, lihi ọtọ, jẹnmẹ mkpa a. Ẹrịra kẹ Isọ hụn wụ nwa ibuzọ dọn lelịa ọkwa nwa-ibuzọ ọ wụ.
Currently Selected:
Jẹnẹsisi 25: ikkBI
Highlight
Share
Copy
Want to have your highlights saved across all your devices? Sign up or sign in
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.
