१ कोरिन्थी 1
1
पावलकु सेव
1ओराम सेलाखाजेम माम्चु़नीकु न होम्साका येशू ख्रीष्टका उनीमा थु़र्मा मु़चु़ दु़म्मु छेट्ङिडिमिम गो पावल मा गोनुङ लाम्दिपा आकीमा ल्वाक सोस्थेनेसलामका सो़।
2ओराम सेलाखाजेम कोरिन्थ शहरडा बाट्पा माम्चु़नीकु मण्डलीडा बाट्पामिमलाई र्याक्तोङा बेउ। गानीलाई माम्चु़नीका उनी त्वाकु सेपा मु़चु़ दु़म्मु लागि येट्निमी। ङाचो़ येशू ख्रीष्टकु सो़रलोले बेपा खोत्लेथो़म मु़चु़मिमलाई गुमीका सेपा दु़म्बेट्मिडिम होम्साका गानीलाई वो ख्रीष्ट येशूलामका सेपा दु़म्बेट्नामिम बु। येशू ङा इनीमा नुङ आकीमा ङाचो़ सो़।#थु़र्मा १८:१
3इकी माम्चु़नी पाप नुङ ङाचो़ येशू ख्रीष्टलामका गानी दिदाम नुङ न-भ्रसी ल्वानी।
पावलका माम्चु़नीलाई आलासो़ ग्वाक्तु़म
4गानीलाई माम्चु़नीका ख्रीष्ट येशूडा उनी दिदाम ग्वाक्निमका गो हेल्लो लोवो गुमीलाई इनीमा लागि आलासो़ ग्वाक्पुमी। 5हेङालोने ख्रीष्टडा गानी खोत्ले ल्वाडा जेमु मा खोत्ले ल्वा सो़मु चापा नेप्चीकु जि-वा ल्वान्निम बु। 6ख्रीष्टकु दुथाम सो़त्तोकोम ल्वा गानी जो़होमका थो़र बेन्नी। 7मेम्मिमका इकी ङाचो़ येशू ख्रीष्ट आथावो योमी र्वाक्साका गानी छो़म लन्थानिलो माम्चु़नीका ग्वाक्निमिम राप्लावाका मेलिट्पा मेबुनी। 8हुक्पा थारी मेदु़म्थु़मसम्म गुमीका गानीलाई छो़म सोनुङमा दु़म्बेनी। मेम्मा इकीमा ङाचो़ येशू ख्रीष्ट आथावो योमिलो गानी हाम वो मेजो़पा मेबेपा डार्निमी। 9माम्चु़नी थो़र लु़इमिम बुमी। गुमीका उनीमा तारापाचो़ येशू ख्रीष्ट इकी ङाचो़नुङ हेमकेम दु़म्मु लागि गानीलाई येट्निमी।
मण्डलीडा गो-फ दु़स्ताम
10वा-ल्वाकनी, इकी ङाचो़ येशू ख्रीष्टकु नङडा गो गानीलाई छो़म र्वाङु, गानी खोत्ले इनी त्वाप-त्वापडा दु़साका बानी, मा गो-फ मेदु़म्नी। मेम्मा इनी नडा नुङ इनी मिम्सीडा कोलेङा नकाम दु़म्नी। 11हेङालोने आमा वा-ल्वाकनी, गानीगोडा रिबुसी गस्ताम बु ए र्वाक्साका क्लोएकु नेमडाममिमगोडाम कोङनिमका गोनुङ सो़म्डिम बु। 12गो र्वामु मालुमिम ल्वा ओरामङा: गानीगोडाम कोङनिमका, “गो पावलकाम”, याङका “गो ओपोल्लोसकाम”, याङका “गो केफासकाम”#१:१२ अरामिक ल्वाडा केफास र्वाक्मा पत्रुस, मा याङका “गो ख्रीष्टकाम” र्वानी ए।#थु़र्मा १८:२४ 13हाम ख्रीष्ट दो़म्सिम्डिम बु मा? हाम पावल इनीमा लागि क्रूसडा चेसिड्डा? हाम पावलकु नङडा गानी कु-रु़दु़म रन्नी मा? 14गो माम्चु़नीलाई आलासो़ र्वाङु, गानीगोडाम क्रिस्पस नुङ गायसडाम वाङमिम सु़लाई वो कु-रु़दु़म ग्वाक्तोमिम मिबु।#थु़र्मा १८:८; १९:२९; रोम १६:२३ 15मेम्मिमका आमा नङडा कु-रु़दु़म रउतो र्वाक्साका गानी सु़का वो र्वामु मेचाम्नी। 16ए आच्छाङा, स्तिफनासकु नेमडाममिमलाई वो गो कु-रु़दु़म ग्वाक्तोमी। मेड्डाममा कोङनिमलाई कु-रु़दु़म ग्वाक्तोमी डे मेएँ मेचक्पु।#१ कोर १६:१५ 17हेङालोने ख्रीष्टका गोलाई कु-रु़दु़म ग्वाप्डा मेएँ, जो़पा-सेला थो़बेड्डा थु़र्ङिडिमिम। मिनी नेप्चीडाम ल्वा मेसो़साका जो़पा-सेला थो़बेड्डा गुमीका गोलाई थु़र्ङिडिमी, मेएँ माला ने क्रूसडला ख्रीष्ट सिम्डिम हाम ना हामकाम दु़प्सावा।
ख्रीष्टङा माम्चु़नीकु यु़म नुङ नेप्ची
18पुयु़लुमु खापामिमकाम लागि क्रूसकु दुथाममिम ल्वा नेप्ची मान्थिम मु़चु़का जेस्ताम होप्माम दु़म, लावो गुइ सेल्सिक्पामिमकाम लागि ओराम माम्चु़नीकु यु़म सो़। 19माम्चु़नीकु सिजेमका आरेसाका र्वा,
“ननुङमा मु़चु़मिमकु न गो डाम्साक्पुमी,
मा नेप्चीनुङमामिमकु उनी नेप्ची हाम ना हामकाम दु़म्बेट्पु।”#यशै २९:१४
20नेप्चीनुङमा बान्ते बु? पातु़म्री बान्ते बु? ल्वालाम खाल्पा आथामबिलिम मु़चु़ बान्ते बु? हाम माम्चु़नीका ओ सु़म्दिसेरकु नेप्ची हाम ना हामकाम मेदु़म्बेट्मिवा मा?#अयू १२:१७; यशै १९:१२; ३३:१८; ४४:२५ 21सु़म्दिसेरडाम मु़चु़मिमका उनी त्वाकु नेप्चीका माम्चु़नीलाई छेमु मेचाप्मिवा। मेम्मिमका माम्चु़नीकु नेप्ची होम्साका गुकु थो़बेत्तोकोम जो़पा-सेला नेप्ची मान्थिम होप्मामलामका थो़र लु़पामिमलाई सेल्मु माम्चु़नीका जो़पा लु़म्डी। 22यहूदीमिमका यु़मखारीमिम रेम्मु माल्मी, मा ग्रीकमिमका नेप्ची माल्नी। 23लावो गुकु ने क्रूसडा चेम्सिम्डिम ख्रीष्टकु दुथाम जो़पा-सेला थो़बेन्कुमी, उहेम ने यहूदीमिमलाई तुक्पा मा वाङसामामिमकाम लागि ने हाम ना हामकु ल्वा बाइडा। 24लावो यहूदीमिम दु़म्नु़का वाङसामामिम, माम्चु़नीका येट्मिडिमिमकाम लागि ने ख्रीष्टङा माम्चु़नीकु यु़म नुङ नेप्ची सो़। 25हेङालोने माम्चु़नीकु नेप्ची मान्थिम मुलु़ बेम्डिम ल्वा मु़चु़मिमकु खोत्ले नेप्चीडाम वो सोनुङमा बु। माम्चु़नीकु मेचाप्सी ने मु़चु़मिमकु खोत्ले सोडाम सोनुङमा बु। 26वा-ल्वाकनी, माम्चु़नीका गानीलाई येट्निमिम थारीका गानी हेप्माम बान्नी, मेराम मिम्नी। सु़म्दिसेरडाम मु़चु़मिमकु मिम्सी होङङा गानीगोडाम हापा मु़चु़ नेप्चीनुङमा, हापा मु़चु़मिम यु़मचो़ नुङ हापा मु़चु़मिम नङ दोपा नेमगोडाम मेबानिवा। 27लावो नेप्चीनुङमा मु़चु़मिमकु क्रो़म लु़बेन्मु माम्चु़नीका सु़म्दिसेरडाम नेप्ची मान्थिम ल्वामिम छेट्मिडी। सोनुङमा मु़चु़मिमकु क्रो़म लु़बेन्मु माम्चु़नीका सु़म्दिसेरडाम मेचापा ल्वामिम छेट्मिडी। 28सु़म्दिसेरडाम मु़चु़मिमका डोक्पु मिम्मिडिम ल्वामिमलाई हाम ना हामकाम दु़म्बेन्मु लागि सु़म्दिसेरका याक्के मिम्डु़म मा हाम ना हामकाम ल्वामिमलाई माम्चु़नीका छेट्मिडी। 29उनीमा ङादोडा सु़ वो डोक्पु मेलिसिनु़ र्वाक्साका माम्चु़नीका आरे बेम्डिम सो़। 30माम्चु़नीका गानीलाई येशू ख्रीष्टनुङ दु़म्बेट्निम बु। ख्रीष्ट ङा इकीमा लागि माम्चु़नीलाममिम नेप्ची, लोवो गुइलाई माम्चु़नीकु ङादोडा जो़पा मिम्पा, गुइलाई उनीमा सेपा मु़चु़ दु़म्बेट्पा, मा गुइलाई छु़ललामका वाङ बेपा दु़म्मिडिम बु। 31मेम्मिमका माम्चु़नीकु सिजेमडा आरेसाका र्याक्मा बु, “उहेम मु़चु़ डोक्पु लिसी, ङाचो़डा कोङङा डोक्पु लिसिनु़।”#यर ९:१४
Currently Selected:
१ कोरिन्थी 1: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.