१ कोरिन्थी 2
2
1वा-ल्वाकनी, माम्चु़नीकु दुथाम थक्साका जु़ल्मा आच्छाङाकाम ल्वा सो़प्डा गो इनीमाडा रोङडोलो छो़म जेसी थेट्पा नुङ नेप्चीनुङमा दु़म्साका मेरोक्ङुवा। 2गो गानीनुङ बाङडोलो येशू ख्रीष्ट नुङ गुमीलाई क्रूसडा चेट्मिडिम ल्वाडाम वाङमिम खोत्ले प्ल्वापा मुलु़ बेउतोम बाइडा। 3गो इनीमाडा मेचापा मा छो़म ङिमुका रुट्त्तो रोङडोम बाइडा।#थु़र्मा १८:९ 4आमा सिजेम नुङ गो दो़उतोम ल्वा मु़चु़लाई नडा लक्पा नुङ नेप्चीनुङमा मेबायावा, लावो मेर्मिम ल्वाडा ने माम्चु़नी-पेलकु यु़म आच्छाङा रेम्बेसिड्डाम बाइडा। 5मेम्साका इनीमा थो़र मु़चु़मिमकु नेप्चीडा मेएँ, लावो माम्चु़नीकु यु़मडा दु़म्नु़।
माम्चु़नी-पेललाममिम नेप्ची
6मेमङा लोवो गुकु डोक्पु थो़रनुङमा मु़चु़मिम गोडा नेप्चीकु दुथाम जेकु, लावो ओराम सु़म्दिसेरडाम नेप्ची मेएँ मा ओराम सु़म्दिसेरडाम साखामचो़मिमकु नेप्ची वो मेएँ, मेर्मिमकु नेप्ची ने दाम्मा लल्या। 7माम्चु़नीकु मेल्वाखोपडाम नेप्ची, थक्मा नेप्ची ङा गुकु सो़कु, उहेम ने ङादो गुमीका इकीमा यु़म-झ्वाक्सीकाम लागि सु़म्दिसेर प्रङमु ङादोङा मुलु़ बेम्डिम बाइडा। 8ओराम सु़म्दिसेरडाम साखामचो़मिम सु़का वो ओराम ल्वा थेसिमेथेट्मिवा। मेर्मिमका थेसिथेट्मिवाम माला यु़म-झ्वासिक्पा ङाचो़लाई क्रूसडा मेचेट्मिवा। 9लावो माम्चु़नीकु सिजेमडा आरेसाका र्याक्मा बु,
“मिक्सीका मेल्वाम्मा, नोफ्लाका मेथो़म्मा, नडा मेमिम्मा ल्वा,
माम्चु़नीका गुमीलाई रिखाम बेपामिमकाम ङादोङा चोचु़म्सिडिम बाइडा।”#यशै ६४:४
10लावो माम्चु़नीका ओर्मिम ल्वा उनी पेललामका इकीमाडा रेम्बेम्डिम बु। माम्चु़नी-पेलका खोत्ले ल्वा माल्मी, मा माम्चु़नीकु गोनोम थेसिथेन्मु मेझापा ल्वा वो रेम्बोमी। 11मु़चु़ गोनोम मु़चु़कु न उ न-गोका कोङङा च। मेम्साकाङा माम्चु़नीकु न माम्चु़नीकु पेलडाम वाङमिम सु़का वो मेच। 12गुइ सु़म्दिसेरडाम पेल ल्वास्तिम मेएँ, लावो माम्चु़नीका गुइलाई ग्वाक्साड्डामिम खोत्ले ल्वा थेसिथेडिनु़ र्वाक्साका माम्चु़नीलाममिम पेल ल्वास्तिम बु। 13उहेम ल्वा गुकु जेकु मेर्मिम ल्वा मु़चु़कु नेप्चीलाम सीसिक्तोकोम मेएँ, लावो माम्चु़नी-पेलका सीत्तिकिम होम्साका माम्चु़नी-पेल ल्वापामिमलाई आच्छाङाकाम माम्चु़नी-पेलकु ल्वा सो़कु। 14माम्चु़नी-पेल मान्थिम मु़चु़का माम्चु़नीकु पेललाम रोक्पा ल्वामिम मेरङु़। मेर्मिम ल्वा मेरामकाम लागि हाम ना हामकाम दु़म, मा मेर्मिम ल्वा मेरामका थेसिथेन्मु मेचाप्सु़, हेङालोने मेर्मिम ल्वा माम्चु़नी-पेललाम कोङङा थेसिथेन्मु झाम। 15माम्चु़नी-पेलनुङमा मु़चु़का जो़पा नुङ मेजो़पा र्वाक्साका खोत्ले ल्वा छाम्डु़, लावो वाङमिम सु़का वो गुलाई ने छाम्मु मेचाप्सु़। 16माम्चु़नीकु सिजेमका आरे र्वा,
“सु़का ङाचो़कु न च?
सु़का गुमीलाई सीमु चाप्सु़?”#यशै ४०:१३
लावो गुइनुङ ने ख्रीष्टकु न बु।
Currently Selected:
१ कोरिन्थी 2: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.